Уаанӡа амонастыр аҿы амаҵ зуаз ииашаҵәҟьоу доуҳатә еиҳәшьцәаны иҟалеит

Фелиса: Сара даараӡа Анцәа дахьхарҵоз аҭаацәараҿы сиит. Сҭаацәа католикцәан. Жәахаҩык сыуацәа ԥшьаҩцәан, мамзаргьы ауахәамаҿы амаҵ руан. Сан лан лаҳәшьа ԥа дыԥшьаҩын, насгьы акатоликцәа рышкол аҿы рҵаҩыс дыҟан. Иара данԥсы ашьҭахь Римтәи папа Иоанн Павел II Анцәа изааигәоу иԥшьоу ауаа дырхиԥхьаӡалеит. Саб джьиин, сан амхурсҭаҿы аус луан. Ааҩык ахәыҷқәа рҟынтә сара сеиҳабын.

12 шықәса анысхыҵуаз Испаниа атәылауаҩратә еибашьра иалагеит. Аибашьра ашьҭахь саб абахҭа дҭаркит, избанзар аиҳабыра иполитикатә гәаанагарақәа ргәаԥхомызт. Аҭаацәара рныҟәгара ихьанҭоу еидарак еиԥш сан лҟәаҟәа иқәҳаит. Убри аҟынтә лҩызак илабжьалгеит хҩык лыԥҳацәа аиҵбацәа — Арасели, Лаури, Рамони — Бильбао (Испаниа) иҟаз амонастыр иалҭарц, избанзар уа ма амла иаганы иԥсуамызт.

Арасели: Усҟан сара 14 шықәса ракәын исхыҵуаз, Лаури — 12, Рамони — 10. Ҳҭаацәеи ҳареи ҳаиԥырҵра даара иаҳцәыцәгьан. Бильбао ҳара аилыргарақәа ҳарҿын. Ҩышықәса рышьҭахь амонастыр аҿы амаҵ зуаз аҳәса Сарагоса иҟаз амонастыр ду ахь ҳрышьҭит. Уа зықәрахь инеихьоу ирхылаԥшуан. Уи амонастыр аҿы ҳара афатәҟаҵарҭа еилҳаргалар акәын. Ҳара, ахбыџқәа, ҳзы ари аус даара ихьанҭан!

Фелиса: Саҳәшьцәа Сарагоса иҟаз амонастыр ахь ианырышьҭ, сани аҭыԥантәи ԥшьаҩыс иҟаз лашьеиҵби саргьы уа аус зулар ауп ҳәа рыӡбеит. Убасала дара сызгәаԥхоз рԥыск сиԥырыргарц рҭахын. Сара даараӡа Анцәа ихаҵара змаз аӡә сакәын аҟынтә, амонастыр аҿы маҷк аҟазаара цәгьа исымбеит. Сара есыҽны амессахь ацара сашьцылеит, миссионерс аҟаларагьы сазхәыцуан, Африка монахс иҟаз сан лаҳәшьа ԥа иеиԥш.

Амонастыр аҿы даҽа тәылак аҟны Анцәа имаҵ аура ахьысҭахыз аӡәгьы хьаас имамызт. Сара сҭакызшәа збон. Убри аҟынтә шықәсык ашьҭахь иԥшьаҩыз саншьа сихылаԥшларц азы, аҩныҟа ахынҳәра сыӡбеит. Уа аҩнтәи аусқәа сырҿын, хәылбыҽхала саншьеи сареи ҭесԥыҳәла Анцәа ҳиҳәон. Иара убас сара ауахәамаҿы иҟаз ашәҭқәа рхылаԥшра, насгьы Мариеи «аԥшьацәеи» рыстатуиақәа рырԥшӡара сгәаԥхон.

Арасели: Иаарласны амонастыр аҿы ҳаԥсҭазаара аҽаԥсахит. Раԥхьатәи аҿаҭахьақәа ансықәысҵа ашьҭахь, амонастыр аҿы амаҵ зуаз аҳәса ҳаиԥырырхырц рыӡбеит. Рамони Сарагоса даанхеит, Лаури Валенсиаҟа дцеит, сара Мадрид срышьҭит, уа аҵыхәтәантәи аҿаҭахьақәа сықәысҵеит. Мадрид иҟаз амонастыр аҿы зны-зынла астудентцәа, зықәрахь инеихьоу, убас егьырҭгьы нхон, убри аҟынтә уа аҟаҵатә даара ирацәан. Сара амонастыр иаҵанакуаз ахәышәтәырҭаҿы аус зуан.

Аиаша сҳәозар, амонастыр аҿы амаҵ аура иснаҭо рацәахоит ҳәа сыԥшын. Сгәы иаанагон Абиблиа саԥхьалоит, насгьы еилыскаалоит ҳәа. Аха ара Анцәеи Иисуси рыӡбахә аӡәгьы далацәажәомызт, Абиблиагьы зынӡа иааҳартуамызт. Хәыҷы-хәыҷла алаҭын бызшәа сҵон, «аԥшьацәа» рыԥсҭазаара атәы саԥхьон, Мариа слымҵаныҳәон, егьи аамҭа зегьы аџьабаа ӷәӷәа збон.

Даараӡа сгәы каҳаны сыҟан, убри аҟынтә амонастыр аҿы амаҵ зуаз аҳәса иреиҳабыз слацәажәарц сыӡбеит. Сара иласҳәеит сҭаацәа ацхыраара анырҭаху егьырҭ рџьыба дырҭәларц азы ара аус зысулар акәу шысзеилымкаауа. Лара ауада сыҩналкит, сгәанаагара ԥсахны уеизгьы амонастыр аҿы саанҿасуеит ҳәа дгәыӷуа.

Хынтә соурыжьхьан, аха уи амонастыр ааныжьра сҭаху-исҭахыму аилкааразы акәын. Аха сара исҳәаз ҳәан, усҟан дара арзаҳал сҩырц сыдырҵеит, абас зҳәоз: «Сара амонастыр аансыжьуеит, избанзар Анцәа иакәымкәа Аҩсҭаа имҵахырхәара сҭахуп». Ари адҵа саршанхеит. Амонастыр аансыжьырц даараӡа ишысҭахызгьы, исарҳәаз аҩра сақәшаҳаҭмызт. Аҵыхәтәаны аԥшьаҩы иацәажәара алшара сырҭарц саҳәеит, уи сгәалақәа зегьы изеиҭасҳәеит. Иара аепископ азин имихын, дырҩегь Сарагосатәи амонастыр ахь срышьҭит. Мызқәак рышьҭахь амонастыр ааныжьра азин сырҭеит. Иаарласны Лауригьы Рамонигьы амонастыр аанрыжьит.

«ЗЫԤХЬАРА ҞАМЛОЗ» АШӘҞӘЫ ҲАИЛНАХИТ

Фелиса: Аамҭақәак рышьҭахь сара аҭаацәара салалеит, насгьы Кантабриаҟа нхара сиасит. Сара иааиԥмырҟьаӡакәа амессахь аныҟәара сшаҿыц саҿын. Сабшак азы акафедра аҟынтәи иааџьоушьаша лаҳәарак ҳаҳаит. «Ижәбома абри ашәҟәы? — иҳәеит аԥшьаҩы иԥсахы еибакны, „Истина, ведущая к вечной жизни“ захьӡу ашәҟәы ҳарбо.— Абри ашәҟәы аӡәы ишәиҭар, сара исышәҭ, ма наҟ ишәыршә!»

Ари ашәҟәы сара исымамызт, аха иаразнак исыԥшаар сҭаххеит. Ҩымшҟа рышьҭахь ҩыџьа аҳәса сышә иасит. Урҭ «зыԥхьара ҟамлоз» ашәҟәы сыдыргалеит. Дара Иегова ишаҳаҭцәа ракәын. Аухаҵәҟьа сара уи ашәҟәы саԥхьеит, урҭ даҽазны ианааи, Абиблиа аҵара сақәшаҳаҭхеит.

Иаарласны аҵабырг сгәаҵанӡа инеит. Сара еснагь исҭахын Анцәа игәаԥхара анагӡара. Убри аҟынтә Иегова изку аҵабырг анеилыскаа, сыбзиабара иара иахь даара иӷәӷәахеит. Гәацԥыҳәарала имаҵ аура салагеит, 1973 шықәсазы аӡы сыҽӡаасхит. Сҭынхацәа аҵабырг рзеиҭаҳәаразы исымаз алшарақәа маҷын, аха исылшоз ҟасҵон. Хыхь ишысҳәахьоу еиԥш, раԥхьа дара ӷәӷәала сыгәрахаҵара иаҿагылон, еиҳараӡак Арасели.

Арасели: Амонастыр аҿы аԥсҭазаара сгәымбылџьбараны сҟанаҵеит. Аха уеизгьы сара есыҽны аҭесԥыҳә ала Анцәа сиҳәон, мҽышала амессахь сныҟәон. Сара анаҩсгьы Абиблиа еилыскаар сҭахын, убри аҟынтә Анцәа дсыцхраарц сиҳәон. Аха Фелиса лыгәрахаҵара ҿыц атәы анысзеиҭалҳәоз убасҟак дгәырӷьон, лхы еилаԥсаз џьысшьон, илҳәозгьы сақәшаҳаҭхомызт.

Шықәсқәак рышьҭахь сусура иахҟьаны Мадридҟа схынҳәит, иаарласны аҭаацәарагьы салалеит. Ԥыҭрак ашьҭахь адинхаҵара сгәы ахшәеит. Сара игәасҭеит иааиԥмырҟьаӡакәа амессахь иныҟәоз Аевангелие иднарҵоз ишықәымныҟәоз. Аҵыхәтәаны ауахәамахь аныҟәара саҟәыҵит. Уаҳа рыгәра згомызт «аԥшьацәагьы», џьаҳанымгьы, исымаз астатуеткақәагьы наҟ иқәызгеит. Аха иҟасҵо иашоу-ииашаму сыздыруамызт. Даара сгәы каҳаны сыҟан, аха Анцәа сиҳәон: «Сара уеилыскаар сҭахуп. Усыцхраа!» Исгәалашәоит Иегова ишаҳаҭцәа зныкымкәа сышә ишасуаз, аха ирзаасыртуамызт. Иарбанзаалак адинхаҵара агәра згомызт.

1980-тәи ашықәсқәа рылагамҭазы саҳәшьцәа уи аамҭазы Франциа инхоз Лаурии Испаниа инхоз Рамонии Иегова ишаҳаҭцәа рҿы Абиблиа аҵара иалагеит. Сара исыӡбеит урҭгьы Фелиса леиԥш иҩашьоит ҳәа. Ԥыҭрак ашьҭахь сара сааигәара инхоз Анхелинес слабадырит, насгьы ҳаиҩызцәахеит. Ларгьы Иегова ишаҳаҭ лакәын. Зныкымкәа Анхелинес лхаҵеи лареи Абиблиа аҵара сыдыргалон. Дара ирбон адинхаҵарақәа сшырзыҟоу зеиԥшразаалакгьы, Абиблиа иану аилкаара даараӡа ишысҭаху. Аҵыхәтәаны исҳәеит: «Ибзиоуп. Аха Абиблиа аҵара салагоит, схатә Библиа мацара ҳхы иаҳархәалозар». Зыӡбахә сҳәоз Накари Колунгеи реиҭага акәын.

АБИБЛИА ҲАИДНАКЫЛОИТ

Фелиса: 1973 шықәсазы аӡы сҽанӡаасхыз, Кантабриа аҳҭнықалақь Сантандер Иегова ишаҳаҭцәа 70-ҩык раҟара ыҟан. Ажәабжьҳәаразы атерриториа дуӡӡа ҳаман, убри аҟынтә Кантабриа зегьы ҳахысырц азы, қыҭак аҟынтәи даҽа қыҭак ахь раԥхьа автобусла ҳцон, нас машьынала. Убас шәкыла ақыҭақәа ҳархысит.

Ашықәсқәа рыҩныҵҟа ирацәаны абиблиатә ҵарақәа мҩаԥызгон, изсырҵоз рҟынтә 11-ҩык аӡы рыҽӡаархит. Дара зегьы реиҳарҩык католикцәан. Исгәалашәоит схаҭа акатоликтә ҵарақәа даара рыгәра шызгоз, убри аҟынтә издыруан ачҳареи аилкаареи аасырԥшлар шакәыз. Даараӡа иулаҵәаны иҟоу удинхаҵара иаразнак иузааныжьӡом. Ауаа аҵабырг ахьыҟоу еилыркаарц азы, Анцәа Иажәа ргәаҵанӡа инеироуп, насгьы иԥшьоу адоуҳа рнырыр ауп (Аур. 4:12). Уаанӡа аполициаҿы аус зуаз схаҵа Бьенвенидо 1979 шықәсазы аӡы иҽӡааихит. Сангьы лыԥсра маҷк шагыз Абиблиа аҵара далагеит.

Арасели: Иегова ишаҳаҭцәа Абиблиа анрыцысҵоз, раԥхьа рыгәра згаӡомызт. Аха мчыбжьқәак рышьҭахь игәасҭеит сгәымбылџьбарара ашьҭрагьы шнымхаз. Сара даара иџьасшьеит: Иегова ишаҳаҭцәа рхаҭа ирҳәоз иқәныҟәон. Уаанӡа исымаз агәрамгара аҭыԥан агәрахаҵара ӷәӷәа соуит, уи еиҳа снасыԥны сҟанаҵеит. Сгәылацәаҵәҟьагьы исарҳәон: «Арасели, иалыбхыз амҩа иаша банымҵын!»

Исгәалашәоит Анцәа сышиҳәоз: «Иегова, иҭабуп идуӡӡаны сахьаанумыжьыз. Уара сзышьҭаз Абиблиа иану аҵабырг аԥшааразы зныкымкәа алшара суҭахьан». Сара Фелиса лҿаԥхьа аҭамзаара шьҭасҵеит иласҳәаз лгәы лзырхьыз ажәақәа зегь рзы. Аимакра аҭыԥан, ҳара уажәы гәахәарыла Абиблиа ҳалацәажәоит. Сара 1989 шықәсазы аӡы сыҽӡаасхит, усҟан 61 шықәса схыҵуан.

Фелиса: Уажәы сара 91 шықәса схыҵуеит. Сара сыԥҳәысеибоуп, сымчгьы кәадоуп. Аха уаанӡа еиԥш есыҽны Абиблиа саԥхьоит, сгәабзиара иансылнаршо аизарақәа рахь сныҟәоит, ажәабжьҳәараҿгьы исылшо ҟасҵоит.

Арасели: Иҟалап амонастыр аҿы амаҵ ахьызуаз азы акәзар аԥшьаҩцәеи амонастыр аҿы амаҵ зуа аҳәсеи ажәабжь бзиа рзеиҭаҳәара зысгәаԥхо. Урҭ Абиблиа шьаҭас измоу апубликациақәа рацәаны ирзынсыжьит, насгьы аинтерес зҵоу аицәажәарақәа сыман. Исгәалашәоит ԥшьаҩык зныкымкәа сышиацәажәахьаз. Иара ус сеиҳәеит: «Арасели, зегь рыла сбықәшаҳаҭуп. Аха сара сеиԥш зықәра цахьоу шьҭа дабацои? Ирҳәозеи ауахәамахь инеиуа, насгьы сҭаацәа?» Сара иасҳәеит: «Ииҳәозеи Анцәа?» Иара илахь еиқәҵаны ихы ааирҵысит, аха уи аамҭазы аҵабырг анаҩсгьы аԥшааразы агәымшәара изхомызт.

Иара убас сара ахаан исхашҭуам раԥхьаӡа акәны схаҵа аизарахь дсыццарц шиҭаху аниҳәа. Усҟан иара 80 шықәса дшырҭысхьазгьы, уи нахыс зныкгьы аизара бжьаимыжьит. Абиблиа аҵара далагеит, иӡаахым жәабжьҳәаҩнгьы дҟалеит. Ажәабжь шеицаҳҳәоз анысгәалашәо, даара сгәы иахәоит. Иара иҽӡааихаанӡа ҩымз шигыз дыԥсит.

Фелиса: Сара агәырӷьара ду сзаанагеит раԥхьа аҵабырг иаҿагылаз саҳәшьцәа аиҵбацәа хҩык аҵыхәтәаны доуҳатә еиҳәшьцәаны иахьысзыҟалаз. Ҳара даараӡа ҳгәы иахәоит ҳаизаны ҳ-Нцәа Иегова Иажәеи иареи ҳанрылацәажәо. Анцәа иџьшьаны саҳәшьцәеи сареи адоуҳатә акзаара ҳауит!a