Ҳара наӡаӡа ҳанхалар ҳалшоит

1. Иарбан цәаныррақәоу иҳазцәырнаго Иегова наӡаӡатәи аԥсҭазаара ҳамҭас ишҳаиҭо ахьҳаиҳәаз?

ИЕГОВА изыӡырҩуа ауаа наӡаӡатәи аԥсҭазаара ҳамҭас ишриҭо иҳәеит (Рим. 6:23). Ҳара уи аҳамҭа ҳаназхәыцуа Анцәа иахь ҳабзиабара еиҳагьы иӷәӷәахоит. Шәазхәыц: жәҩантәи Ҳаб даара бзиа ҳаибоит, убри аҟынтә наӡаӡа дҳацзаауеит.

2. Ишԥаҳацхраауеи Анцәа наӡаӡатәи аԥсҭазаара ҳахьақәиргәыӷуа?

² Анцәа наӡаӡатәи аԥсҭазаара ҳахьақәиргәыӷуа аԥышәарақәа рыхгара иҳацхраауеит. Ҳаӷацәа шәаҳшьуеит ҳәа иаҳҿагылозаргьы, ҳара ҳшәаӡом. Иҳазҭозеи уи аҩыза агәымшәара? Ҳаԥсыргьы, Иегова гәыкала ҳшизыҟоу ҳаанхазар, ахаан ҳамԥсуа ҳаԥсы ҭеиҵоит (Иоанн 5:28, 29; 1 Кор. 15:55—58; Аур. 2:15). Иабантәиаадыруеи наӡаӡа ҳанхалар шҳалшо? Еилҳаргап шьақәырӷәӷәарақәак.

ИЕГОВА НАӠАӠА ДЫҞОУП

3. Иабантәиаадыруеи Иегова наӡаӡа ҳанхалартә ҟаиҵар шилшо? (Аԥсалом 102:12, 24, 27).

³ Иегова наӡаӡа ҳанхалартә ҟаиҵар илшоит, избанзар иара аԥсҭазаара Дахыҵхырҭоуп, насгьы ихаҭагьы наӡаӡа дыҟоуп (Аԥсал. 36:9). Абар Иегова есымшагьы дшыҟаз, насгьы есымша дшыҟазаауа узырбо Абиблиаҿы иану жәеинраалақәак. Аԥсалом 90:2 аҿы Иегова абас изҳәоуп: «Уара наӡаӡа аахыс наӡаӡанӡа иҟазаауа Анцәа уоуп». 102-тәи Аԥсалом аҿгьы уи еиԥшу азхәыцра ануп. (Шәаԥхьа Аԥсалом 102:12, 24, 27.) Аԥааимбар Аввакумгьы жәҩантәи Ҳаб абас изиҳәеит: «Иегова, уҟаӡами уара жәытәнатә аахижьҭеи? О, Сынцәа, Сыцқьа, уара узыԥсӡом» (Авв. 1:12).

4. Хьаас иҳамазароума Иегова есымша дшыҟаз, насгьы есымша дшыҟазаауа аилкаара ҳцәыцәгьазар? Иҳаилшәыркаа.

⁴ Ишәцәыцәгьоума аилкаара Иегова наӡаӡа дшыҟоу? (Ис. 40:28). Ааи акәзар, шәымацара шәакәӡам ус иҟоу. Елиуи Анцәа изкны абас иҳәеит: «Иара ишықәсқәа еилкаашьа рымаӡам» (Иов 36:26). Ҳара ак ҳзеилымкаауазаргьы, уи иаанагаӡом уи ус акәӡам ҳәа, ус ауми? Иаҳҳәап, ҳара алашара закәу аҵыхәтәанынӡа иаҳзеилкааӡом, аха аӡәы иҳәар илшома уи ыҟаӡам ҳәа? Ҳәарада мап! Убас еиԥш ҳара, ауаа, иҟалап ахаан иаҳзеилымкаар Иегова есымша дшыҟаз, аԥхьаҟагьы есымша дшыҟазаауа. Аха уи иаанагаӡом уи ус акәӡам ҳәа. Ҳазшаз изку аҵабырг еилаҳкаауазаргьы иаҳзеилымкаауазаргьы, уи аҽаԥсахӡом (Рим. 11:33—36). Иара Адунеи, насгьы Амреи аеҵәақәеи реиԥш иҟоу ашамҭақәа ҟалаанӡагьы дыҟан. Иегова агәра ҳиргоит иара адгьыл имч ала ишишаз. Ус анакәха иара ажәҩан ишаанӡагьы дыҟан (Иер. 51:15; Аус. 17:24). Ишьақәзырӷәӷәозеи иҵегьы наӡаӡа анхара шҳалшо?

ҲАРА НАӠАӠА ҲАНХАЛАРЦ АЗЫ ҲШАН

5. Иарбан иҷыдоу лшароу Адами Евеи ирымаз?

⁵ Иегова адгьыл аҿы зыԥсы ҭоу зегьы анишоз, урҭ наӡаӡа инхалартә имшаӡеит. Ауаҩы заҵәык иоуп наӡаӡа дынхалартә иҷыдоу алшара зиҭаз. Иегова Адам игәиҽаниҵеит: «Ацәгьеи абзиеи уеилзыркаауа аҵла аҟынтә иумфан, избанзар уи ануфа аҽны хымԥада уԥсуеит» (Аҟаз. 2:17). Адами Евеи Иегова изыӡырҩызҭгьы, иԥсӡомызт. Ус анакәха абри аҩыза алкаа ҟаҳҵар ҳалшоит: ԥыҭрак ашьҭахь Иегова урҭ аԥсҭазаара аҵла аҟынтә ашәыр рфартә алшара риҭон. Уи иреилнаркаауан наӡаӡа ишынхало (Аҟаз. 3:22)b.

6, 7. а) Иҳаилзыркаауазеи иҵегьы ауаа мԥслар шакәыз? б) Шәахәаԥш асахьа. Шәызҿызар шәҭахузеи адунеи ҿыц аҿы?

⁶ Ааигәа имҩаԥыргаз аҭҵаарақәа инарықәыршәаны, ауаҩы ихшыбаҩ иԥсы ҭанаҵы иоуа аинформациа аасҭа акырӡа еиҳаны иакуеит. 2010 шықәсазы ажурнал «Саиентифик америкен маинд» аҿы ианын, ҳахшыбаҩ ҩ-миллионки бжаки гигабаит раҟара иҟоу аинформациа акыр шалшо. Ҳара уиаҟара аинформациа ҳаур ауан х-миллион сааҭк (даҽакала иуҳәозар, 300 шықәса инареиҳаны) ҳамгылаӡакәа ателевизор ҳахәаԥшуазҭгьы. Аха ҳахшыбаҩ уи ацифра аасҭа акырӡа еиҳангьы аинформациа акуазар ҟалап. Уи иаанарԥшуеит Иегова ҳахшыбаҩ акырӡа еиҳаны аинформациа акыртә еиԥш ишишаз, 70, ма 80 шықәса рыҩныҵҟа иакыр алшо аасҭа (Аԥсал. 90:10).

⁷ Иара убас Иегова аԥсҭазаара бзиа иаҳбалартә, насгьы аԥсра ҳҭахӡамкәа ҳаишеит. Абиблиа иаҳәоит, Анцәа «ауаа наӡаӡа инхаларц агәаҳәара рылеиҵеит» ҳәа (Еккл. 3:11). Уи аԥсра ӷа цәгьаны изыҳаԥхьаӡо амзызқәа ируакуп (1 Кор. 15:26). Ҳара ӷәӷәала ҳачмазаҩхар, иҳахьыз ҳахьит ҳәа ҳтәаны аԥсра ҳазыԥшызаауама? Ҳәарада мап! Ҳара аҳақьымцәа ҳрышьҭалоит, насгьы ахәшәқәа ҳажәлоит. Ҳамԥсырц азы иҳалшо зегь ҟаҳҵалоит. Иара убас иаҳзааигәоу аӡә данԥслак, уи шаҟа ихыҵуазаалакгьы, акыраамҭа ҳгәы иҭоу ахьаа тәаӡом (Иоанн 11:32, 33). Ҳәарада, бзиа ҳазбо Ҳазшаз наӡаӡа ҳанхалар иҭахымызҭгьы, уи аҩыза агәаҳәареи ус еиԥш иҟоу иџьоушьаша алшарақәеи ҳалаҵаны ҳаишаӡомызт. Аха ҳара наӡаӡа ҳанхалар шҳалшо шьақәзырӷәӷәо иҵегьы ирацәоуп. Иегова ажәытәан, насгьы иахьа иҟаиҵо ишьақәнарӷәӷәоит аханатә имаз игәҭакы шимԥсахыз. Иарбан усқәоу урҭ?

ИЕГОВА ИГӘҬАКЫ ИМԤСАХӠЕИТ

8. Ианузеи Исаиа 55:11 аҿы Иегова игәҭакы иазкны?

⁸ Адами Евеи агәнаҳа шыҟарҵазгьы, насгьы уи иахҟьаны рхәыҷқәа аԥсра шырҭынхазгьы, Иегова игәҭакы имԥсахӡеит. (Шәаԥхьа Исаиа 55:11.) Иара гәыкала изыҟоу ауаа наӡаӡатәи аԥсҭазаара риҭар иҭахуп. Иабантәиаадыруеи уи ҳара? Шәааи еилаҳкаап Иегова игәҭакы наӡарц азы ииҳәаз, насгьы иҟаиҵаз.

9. Ҳзықәиргәыӷзеи Анцәа? (Даниил 12:2, 13).

⁹ Иегова ҳақәиргәыӷит иԥсхьоу рыԥсы шҭеиҵо, насгьы урҭ наӡаӡа анхара алшара шроуа (Аус. 24:15; Тит 1:1, 2). Ауаҩ иаша Иов агәраганы дыҟан, Анцәа гәыкала ишиҭаху иԥсхьоу рыԥсы ҭеиҵарц (Иов 14:14, 15). Аԥааимбар Даниил идыруан, ауаа рыԥсы ҭалар, насгьы уаҳа имԥслар шрылшо (Аԥсал. 37:29; шәаԥхьа Даниил 12:2, 13). Иисус ихаан инхоз ауриацәагьы ирдыруан, Иегова гәыкала имаҵ зуа ауаа наӡаӡатәи аԥсҭазаара риҭар шилшо (Лука 10:25; 18:18). Иисус уи аӡбахә зныкымкәа иҳәахьан. Уи адагьы, иара ихаҭагьы иԥсы ҭаҵан (Матф. 19:29; 22:31, 32; Лука 18:30; Иоанн 11:25).

10. Ишьақәдырӷәӷәозеи Абиблиа иану аԥсҭалара иазку ахҭысқәа? (Шәахәаԥш асахьа.)

¹⁰ Иегова — зегьы аԥсҭазаара рызҭо иоуп. Иара иԥсхьоу рыԥсы ҭеиҵартә амч имоуп. Ишәгәалашәыршәа Анцәа аԥааимбар Илиа амч шииҭаз, Сарепта иатәыз аԥҳәысеиба лыҷкәын иԥсы ҭеиҵарц азы (1 Аҳ. 17:21—23). Ԥыҭрак ашьҭахь аԥааимбар Елисеи Анцәа ицхыраарала Шунем иатәыз аԥҳәыс лыҷкәын иԥсы ҭеиҵеит (2 Аҳ. 4:18—20, 34—37). Арҭ, насгьы аԥсҭалара иазку егьырҭ ахҭысқәа ишьақәдырӷәӷәоит, Иегова иԥсхьоу рыԥсы ҭеиҵарц азы амч шимоу. Иисус адгьыл аҿы даныҟаз ибзианы иааирԥшит, иара уи азы Анцәа иҟынтә амч шимоу (Иоанн 11:23—25, 43, 44). Уажәы Иисус ажәҩан аҿы дыҟоуп, насгьы иара «Анцәа... ажәҩан аҿгьы адгьыл аҿгьы амчра зегь» ииҭеит. Убри аҟынтә иара ҳзықәиргәыӷыз наигӡар илшоит, насгьы «адамрақәа ирҭоу зегьы... рыԥсы [ҭалоит]». Урҭ ахаан имԥсыртә алшара рымазаауеит (Матф. 28:18; Иоанн 5:25—29).

11. Ишԥаҳзаанарти аҿыхра наӡаӡатәи аԥсҭазаарахь амҩа?

¹¹ Избан Иегова бзиа иибо Иԥа дыргәаҟны дыршьыртә зиуз? Иисус уи абас дахцәажәеит: «Анцәа адунеи убриаҟара бзиа ибеит, Иԥазаҵәгьы димеигӡаӡакәа ауаа дриҭеит, Иԥа дхазҵо дарбанзаалак дҭамхарц азы, наӡаӡатәи аԥсҭазаара иоурц азы» (Иоанн 3:16). Анцәа Иԥа ҳагәнаҳақәа рҟынтә ҳҿихырц азы дҳаиҭеит. Убас иара наӡаӡатәи аԥсҭазаарахь амҩа ҳзааиртит (Матф. 20:28). Апостол Павел Анцәа игәҭакы уи ихадоу ахәҭа абас дахцәажәеит: «Аӡәы ила аԥсра адунеи ишықәнагалаз еиԥш, аӡәы илоуп иԥсхьоугьы рыԥсы шҭало. Адам ихҟьаны зегь шыԥсуа еиԥш, Христос ибзоурала зегь рыԥсы ҭалоит» (1 Кор. 15:21, 22).

12. Ишԥананагӡо Аҳра Иегова ҳара ҳзы ииҭаху?

¹² Иисус ишьҭанеицәа идирҵон Анцәа Иаҳра ааирц, насгьы Анцәа ииҭаху адгьыл аҿы иҟаларц азы Анцәа иҳәаларц (Матф. 6:9, 10). Иара ииҭаху ауаа адгьыл аҿы наӡаӡа инхаларц ауп. Иегова игәҭакы наигӡарц азы Мессиантәи Аҳра Аҳас Иԥа дахаиргылеит. Иисус ауаа рҟынтә иалху 144 000-ҩык ацхырааҩцәа имазаауеит. Анцәа урҭ ажәҩан аҿы реизгара даҿуп. Дара Христос ивагыланы Анцәа ииҭаху анагӡаразы аџьабаа рбалоит (Аат. 5:9, 10).

13. Иҟаиҵозеи Иегова иахьа, насгьы дыззыԥшузеи иара шәара шәҟынтә?

¹³ Иара убас Иегова «ҵҩа [змам]... ажәлар» еизигоит, насгьы Аҳра анапхгара аҵаҟа анхара иазыҟаиҵоит (Аат. 7:9, 10; Иак. 2:8). Иахьа адунеи цәымӷралеи аибашьрақәеи рыла ишҭәугьы, ҵҩа змам ажәлар ирылшо зегь ҟарҵоит ауаа амилаҭтә, арасатә, ма даҽа цәымӷрак рхы-ргәы иҭамларц азы. Урҭ, инықәырԥшны иуҳәозар, уажәнатә раҳәақәа ацәеихақәа рылырхуеит (Мих. 4:3). Дара ауаа ахьындырҵәо аибашьрақәа рыҽрыладырхәӡом. Урҭ ауаа ииашаҵәҟьоу аԥсҭазаара роурц азы ирыцхраауеит — Иеговеи иара игәҭакқәеи рыӡбахә рзеиҭарҳәоит (1 Тим. 6:19). Дара Анцәа Иаҳра иахьадгыло азы рҭынхацәа рылҵыр ауеит, насгьы ԥарада иаанхар рылшоит. Аха Иегова урҭ зда ԥсыхәа рымам зегь риҭоит (Матф. 6:25, 30—33; Лука 18:29, 30). Ари зегь агәра ҳнаргоит Анцәа Иаҳра шыҟаҵәҟьоу, насгьы уи Иегова игәҭакы хымԥада ишынанагӡо.

ҲАԤХЬАҞА ЗЕИԤШЫҞАМ АԤСҬАЗААРА ҲЗЫԤШУП!

14, 15. Ишԥанаӡо аԥсра аҵыхәтәа шыԥҵәахо иазку Иегова иқәыргәыӷра?

¹⁴ Иахьа Иисус — напхгара зуа Аҳ иоуп. Уи Иегова ҳзықәиргәыӷыз зегь наигӡоит (2 Кор. 1:20). 1914 шықәса раахыс Иисус иаӷацәа рыбжьара аҳра иуеит (Аԥсал. 110:1, 2). Иаарласны напхгара ицызуеи иареи ауаа цәгьақәа зегь ықәыргоит (Аат. 6:2).

¹⁵ Иисус Зқьышықәсатәи инапхгара аан иԥсхьоу рыԥсы ҭеиҵоит, насгьы Иегова изыӡырҩуа ауаа наӡахарц дрыцхраауеит. Аҵыхәтәантәи аԥышәара ашьҭахь Иегова уаа иашақәаны ииԥхьаӡо «адгьыл рҭынхоит, иагьынхалоит уа наӡаӡа» (Аԥсал. 37:10, 11, 29). Убасҟан аҵыхәтәантәи ҳаӷа — аԥсра ықәгахоит. Зегьы уи еигәырӷьалоит (1 Кор. 15:26).

16. Ҳгәазҭазҵалар акәзеи Иегова имаҵ аура?

¹⁶ Ишаҳбаз еиԥш, наӡаӡа анхаразы иҳамоу агәыӷра ашьаҭа ӷәӷәа амоуп, уи Анцәа Иажәа ауп. Уи агәыӷра ҳацхраауеит арҭ ицәгьоу аҵыхәтәантәи амшқәа рзы аҵабырг амҩа анымҵра, насгьы Иеговеи Иисуси гәыкала ҳшырзыҟоу аанхара. Аха Иегова игәы ҳақәшәаларц азы, уи аҟаҵара ҳгәазҭазҵо Анцәеи иара Иԥеи рахь иҳамоу абзиабара ӷәӷәа акәзароуп, ҳхы еиқәҳархап ҳәа акәымкәа (2 Кор. 5:14, 15). Абзиабара ауп ҳгәазҭазҵо Иеговеи Иисуси рҿыԥшра, насгьы ҳгәыӷра аӡбахә егьырҭ ауаа рзеиҭаҳәара (Рим. 10:13—15). Ак феида алаҳгандаз ҳәа ҳаҟамзарц азы, насгьы агәыҳалалра ҳалазарц азы ҳхы аус адаҳулозар, Иегова наӡаӡа даҳҩызазар иҭаххоит (Аур. 13:16).

17. Иҟаҳҵалар ҳахәҭоузеи ҳара зегьы? (Матфеи 7:13, 14).

¹⁷ Ҳҟалома ҳара наӡаӡатәи аԥсҭазаара зауа ауаа рыбжьара? Иегова уи аҩыза алшара ҳаурц азы иаҭахыз зегь ҟаиҵеит. Уажәшьҭа ҳара ҳауп изыӡбаша аԥсҭазаара амҩа ҳаныланы ҳцалоу-ҳамцалоу. (Шәаԥхьа Матфеи 7:13, 14.) Аха изеиԥшрахозеи аԥсҭазаара уи ҵыхәаԥҵәара анамоуа? Ари азҵаара аҭак анаҩстәи астатиаҿы еилаҳкаауеит.