Iiḍighi Abutelhedom Mọ
24 Oogh aḍughul otu reten, kụ ogbogh ọpinyon rịkia phọ Ạnạnạyạs r’abuniin ikumor awe r’ọgbaam iilhogh dị oghol mọ ạ Tạtọlọs ọḅua oru, kụ ọḅenhi opoghom mọ olhogh phọ bịdi ọḅem bọ mọ ạ Pọl asoor. 2 Rọmhagh Tạtọlọs mọ ạghaaph, kụ amhiigh ọgba ạraraar ọḅam ẹmhu ạ Pọl, ọdi ạḅem mọ:
“Yoor ọkar kụ rọkelhom eboom ẹepho loor ẹmhu ạna ḅịlhe kẹn ịma ạraraar remite ni sịen eelhe phọ ayoor loor ịduon nạ aḍighi bọ oye dị rạmaar ghan kagbiighi rạraar kụ agbi oḍighi, 3 kụ yoor rọkaaph ghan ni ịlo ịphen phọ tọrobo amem r’ạtorobo ekpisi, kụ yoor ọkar kụ rọseph nyịnha Ogbogh Opoghom mọ Filiks. 4 Mị ụ́wa ọsighe amem ạna iboom, esi ịduon phọ mị rạlom ni mọ kpạram ni ạnhaghan ephurukpu ịphen yoor kọkaaph bọ. 5 Yoor ọwa ọmiin mọ oye phọ ọphon phọ ọwaam asighiton, ọdi raḍighi ghan ịdi oomo ạbuo a Ju phọ odi bọ sịen ade phọ kọgbagharan bụo ịtooghi phọ, kụ aḍighi kẹn oḍiemhiom ẹku dị oghol mọ ‘ạbuo ạ Nạzạrẹt.’ 6 Ọdi ạwa ghan kẹn ọopu otu ịiḅereghi phọ, kụ yoor osiph nyọdi. 7* —— 8 Nạ apuru nyọdi sipuru, nạ kạmiin ni mọ oomo ạraraar phọ yoor rọkaaph bọ ịlo ọdi ịne ni.”
9 Kụ ạbuo a Ju phọ oḍighan aani ọgba rạraar ọḅam ẹmhu ọdi, esi ọḅem ghan mọ ạraraar phọ ọghaaph bọ ịne ni. 10 Kụ opoghom mọ ạyapha Pọl ạḅenhi mọ ạghaaph aani ịyaar, kụ ọdi mọ:
“Loor ịduon nạ maḍighi bọ oogboom ịiruen sịen eelhe phọ ẹphen phọ ịbadi ạsia, olhoghi ạmhi ạḅaal li ọghaaph ịyaar ọphelhaam ẹmhu ạmhi ghisigh ạna. 11 Eru mạar dị nạ ạghi ạwaaghi, nạ kạmiin ni mọ ke̋pel 12 aḍughul otu mị ạghi bọ ẹpe Jeruselem ooseeny Ẹnhaan; 12 kụ bịdi ụ́miin dị mị rạgbakian r’oye ẹpe otu ịiḅereghi phọ ọbobo dị mị aakpomhoghi ḍita awe dị kọkom ịiḅaghamhi ẹpe arubughotu phọ ọbobo ẹpe ẹmha phọ. 13 Kụ bịdi kótue ọkaaph kẹn rạraar dị eḍeenhaan mọ mị uḍighi ni ịphen bịdi ọgba bọ rọḅam ẹmhu ạmhi nyịidipho. 14 Kụ mị ụ́paranhaan mọ mị rạdaph ghan eten phọ bịdi rokol ghan bọ mọ ẹku, kụ eten phọ ẹphen phọ kụ ẹdi mị rakumuan ghan rukumuan iigbia kạngo Ẹnhaan ạburude ạburude phọ ạmhi, kụ mị ameeraam ni oomo ạraraar phọ edi bọ sịphe Olhogh phọ r’ịpe edi bọ sịphe ịge Ariil phọ. 15 Mị ạmoogh ni oḍuom olhoghi ạki esi Ẹnhaan, oḍuom olhoghi dị awe phọ ạbuen phọ ọmhoogh aani ni, mọ koḅerion ni bụo elhiom eḍighinhom ịyaar r’ạbuo ekeeny eḍighinhom ịyaar esi aḍuugh. 16 Kụ loor ịphen phọ mị rạkparagha ghan ni oḍighi ạraraar dị ọoruen olhoghi ạmhi ịmhi kụ́uḅaghamhi ghisigh Ẹnhaan r’awe. 17 Ịminighan ạsia meten ni mị ạḅua bọ, kụ mị uḅula ọngo aruunmo ọlhoghonhaan ạḍighaagh bụlo ekuom bụo eelhe phọ ạmhi r’ọphinyon ạrikia. 18 Kụ mị raḍighi bọ rạraar phọ ịphen phọ, bịdi ụmhiin ni ịmhi ẹpe otu ịiḅereghi phọ dị mị ạḅaalhamhi loor ạmhi ọdaphan ịpe Olhogh phọ a Mozis ạḅem bọ, kụ mị ụ́pam we kụ ạghimhom ḅịlhe mị ụ́kom ịiḅaghamhi. Kụolo buniin ạbuo a Ju dị ọḅua Esia kụ oru ụrol aani ni ẹpe phọ, 19 kụ ọbo bịdi ọkpe ni oru ọmheera ghisigh ạna ọghaaph olhogh phọ bịdi ọḅem bọ mọ mị asoor eru mạar dị bịdi ọkar ri ọmhoogh ịyaar ọghaaph. 20 Ịdipho kụ ílo pọ awe phọ odi bọ sịen ọghaaph ịyaar phọ bịdi ọmhiin bọ mọ mị aḍighi mem mọ mị ạmheera bọ ghisigh ạ Sạnhẹdrin phọ, 21 epel ịpe mị ạghaaph bọ mem mọ mị ạmheera bọ sịphe igbo phọ ạbidi mọ: ‘Ọtuan ịduon mị amheeraam bọ mọ oḅetenhu esi aḍuugh odi ni kụ rọwa bọ osophonhaan ạmhi ọoruen rodon phọ ghisigh anyinha!’”
22 Tọrobo ịpe ẹrol bọ, a Filiks ạḅem mọ ọwooriom ḍighiton phọ, loor ịduon ọdi alhegheri bọ ni ịminighan ạraraar ịlo Eten Phọ, ọdi ạḅem mọ: “Tọrobo amem dị a Lisiạs oḍiemhiom ạbuo ẹgham mọ aru, mị kịḅenhi ni inyinha osopha ạmhi ịlo ạraghaaph phọ ịphen phọ.” 23 Kụ ọdi ạto ạḅenhi uwo ẹmhu ạbuo ẹgham mọ mọ ạsighe Pọl ạghi ạkasaghiom, kụolo mọ ạngo ni nyọdi ẹeny ẹereegh ạḅilhe amheera mọ awe ọdi oru ghan ọlhoghonhaan nyọdi ḍịghaagh.
24 Iphurukpu asiḍughul otu reten kụ a Filiks ạpham ạnhir phọ ọdi Drusilạ, aḍighi bọ ọnyo a Ju arumhom, kụ ạḅem mọ ọsighe Pọl oru kụ alher rụru ạngo nyọdi ịduon ọdi rạkaaph bọ ịyaar dị omheeraam ạ Krạịst Jizọs rẹma ghan. 25 Kụolo ịduon ạ Pọl rạkaaph bọ ịlo elhiom eḍighinhom ịyaar r’ọphamhaghan aloor r’ọoruen phọ ratu bọ, a Filiks ạmhoogh ni oghiilhaan kụ ạḅenhi nyọdi mọ: “Kịa, mẹnhighe ni, mem dị mị ạmhoogh eepoogh kụ mị ạḅilhe ạmhagh nyịnha.” 26 Kụolo ọdi aḍuom ghan olhoghi mọ ạ Pọl kạngo nyịnho ikpoki. Esi ịduon phọ, agbor ghan ni ạmhagh Pọl kụ ịyal ạbidi ọghaaphan. 27 Ịyal ạsia reten, kụ ạ Pọsịọs Fẹstọs ạsighe esi a Filiks ịdipho opoghom; kụolo loor ịduon a Filiks ạwa bọ oḍighi ịdi kẹḅeraan bụo a Ju phọ, ọdi ạwilhe ni Pọl ẹpe ikoli phọ.