Iiḍighi Abutelhedom Mọ
25 Esi ịduon phọ, ạ Fẹstọs rosi ekool phọ romhiigh ọtooghi, kụ ạḅua Sịsạriạ ạghi Jeruselem mem dị ịraar aḍughul otu meten. 2 Kụ aruwo ẹmhu ạbupinyon rịkia phọ r’ịkpanha awe ạbuo a Ju phọ ọḅenhi Fẹstọs olhogh phọ bịdi ọḅem bọ mọ ạ Pọl asoor. Kụ bịdi omhiigh ọoḅereghian ọdi 3 mọ aḍighi bụno iiḅi esi orom mọ ạ Pọl aru Jeruselem. Kụolo bịdi ụmhoogh oḅian ọḅonha eten okori oghiigh ạ Pọl. 4 Kụolo ạ Fẹstọs ạphagharanhaan bịdi mọ ạ Pọl kạtol ẹpe Sịsạriạ ḅịlhe mọ ọno kaḅula ni ẹpe phọ mọony amem. 5 Kụ ọdi ạlhoghom mọ: “Esi ịduon phọ, abuḍiemhiom mọ sịen igbo phọ anyinha okori ụdaph ịmhi mem dị mị rạki, ọghaaph olhogh phọ oye phọ asoor bọ eru mạar dị ạkar ri asoor olhogh.”
6 Ạ Fẹstọs rọrol r’ạbidi dị rẹki ni ọmhan ọphaanya ọbobo ḍioph aḍughul otu, kụ aḅula Sịsạriạ, kụ ọdi asi bọ ẹpe phọ ạrolhom ni ạgada ịiruen phọ ḍio phọ etum bọ pạ kụ ạto ạḅem mọ ọsighe Pọl oru. 7 Rọsighe nyọdi roru, kụ ạbuo a Ju phọ ọḅua bọ Jeruselem oru ọmheregha okoom nyọdi, kụ omhiigh ọghaaph ịbadi ịkaraph ạraraar ọḅam ẹmhu ọdi kụolo útue ụma rạraar dị eḍeenhaan mọ aḍighi ni rạraar phọ ịpe phọ.
8 Kụolo ạ Pọl ạghaaph ni ịyaar ọphelhaam ẹmhu ọdi, ọdi ạḅem mọ: “Mị ụ́ka Olhogh ạbuo a Ju phọ ḅịlhe mị úḍighi ịyaar dị eeph sịphe otu ịiḅereghi phọ kụ mị ụ́piom kẹn Siza.” 9 Ạ Fẹstọs ạwa oḍighi ịdi kẹḅeraan bụo a Ju phọ, esi ịduon phọ apuru Pọl mọ: “Kẹḅeraan ni nyịnha dị yira kọki Jeruselem pịdi osophonhaan nyịnha ọoruen ẹpe phọ ghisigh ạmhi ḍụghum?” 10 Kụolo ạ Pọl ạḅem mọ: “Mị ạmeera ghisigh ạgada ịiruen phọ a Siza, sịen ẹkpe bọ ọrol osophonhaan ạmhi ọoruen. Mị úsoor Olhogh ạbuo a Ju phọ, kụ nạ mamhiigh ni rạmiin mọ ịphen mị rạkaaph bọ ịne ni. 11 Eru mạar dị mị ạkar ri aḍighi osoroghuom iilhogh kụ maḍighi ịyaar dị ẹkpe ọtuan oghiigh, pọ mị rákiilhaan omhugh; kụolo eru mạar dị awe phọ ạbuen phọ kótue ọkaaph rạraar dị eḍeenhaan mọ mị uḍighi ni rạraar phọ bịdi rọkaaph bọ, pọ oye ọ́mhoogh elhiom ọḅogh ạmhi ọngo ạbidi ọḅem mọ ọno raḍighi iiḅi. Mị rạlom mọ ọsighe ḍighiton phọ ạmhi ọghiom Siza!” 12 Ạ Fẹstọs rọḅaanhaan butomhoghiom mọ ọdi kụ ạḅem mọ: “Nạ mạlhom bọ mọ ọsighe ḍighiton phọ ạna ọghiom Siza, pọ nạ kạki ni ạteeny Siza.”
13 Iphurukpu asiḍughul otu reten, kụ Uwo Ẹmha phọ Ạgrịpạ rạ Bẹnis oru Sịsạriạ ọmhagh aani ạ Fẹstọs. 14 Kụ loor ịduon bịdi kọtol bọ ni iphurukpu asiḍughul otu, ạ Fẹstọs ạḅenhi ni uwo ẹmha phọ ịlo aḍighiton phọ ạ Pọl, ọdi ạḅem mọ:
“Ẹmoogh ni oye dị a Filiks ạkasaghiom kụ úseere, 15 kụ mem mọ mị ạghi bọ Jeruselem aruwo ẹmhu ạbupinyon rịkia phọ r’ikumor awe ạbuo a Ju phọ ụghaaph ni ịlo oye phọ ụḅenhi ịmhi, kụ ọḅem mọ mị usophonhaan nyọdi ọoruen aḍuugh. 16 Kụolo mị ụphagharanhaan bịdi mọ olhogh a Rom ómheeraam mọ ọtuan oḍighi iiḅi ọḅogh oye ọngo we dị r’ọdi rọokonhoghian, mem dị kọ̋ngo oye phọ eepoogh ọmheera aghisigh awe phọ ọghaaph aani ịyaar ọphelhaam ẹmhu ọdi. 17 Esi ịduon phọ mem mọ bịdi oru bọ, mị útoph mem, mị ụrolhom ni ạgada ịiruen phọ ḍio phọ etum bọ pạ kụ mị ạto ạḅem mọ ọsighe oye phọ oru. 18 Kụ mem mọ awe phọ r’ọdi rọokonhoghian bọ oḅerenhu bọ omhiigh ọghaaph, ụ́kaaph ẹkaraph ịyaar dị ọdi aḍighi ịdipho mị ạatughian ghan bọ. 19 Bịdi ụukonhoghian ghan ghụn ịlo ịiḅereghi ẹmhugh ạbidi r’ịlo oye dị oghol mọ a Jizọs dị mamhugh kụ ạ Pọl rạḅem ghan mọ odi ni r’ighuḍum. 20 Kụ loor ịduon mị úlegheri bọ ịlo ọkar ọpham aḍighiton phọ ạḍien phọ, mị upuru ni Pọl mụghumo kẹḅeraan ni nyọdi dị yoor kọki Jeruselem kụ ọtol ẹpe phọ osophonhaan nyọdi ọoruen. 21 Kụolo ạ Pọl ạḅem mọ ọno kạtol li sịphe ikoli phọ akori ọnhaghan osopha a Siza,* kụ mị ạto ạḅem mọ ọwilhe nyọdi sịphe ikoli phọ tụtu mị arom mọ ọsighe nyọdi ọghiom Siza.”
22 Kụ Ạgrịpạ ạḅenhi Fẹstọs mọ: “Kịḅeraan ni ịmhi ọnhaghan aani ọnhu oye phọ.” Kụ ạ Fẹstọs ạḅenhi nyọdi mọ, “Nạ kạnaghan ni ọnhu ọdi iḍue.” 23 Kụ ḍio phọ etum bọ pạ Ạgrịpạ rạ Bẹnis uru ni r’eboom eegu kụ bịdi r’abuḍiemhiom ạbuo ẹgham r’ịkpanha awe ẹmha phọ oḍigh ẹpe esi ịiruen phọ kụ ạ Fẹstọs ạngo ịto mọ ọghi ọsighe Pọl oru. 24 Kụ ạ Fẹstọs ạḅem mọ: “Uwo Ẹmha phọ Ạgrịpạ r’oomo anyinha phọ edi bọ sịen, ịmiin oye phọ ọphon phọ, oomo ạbuo a Ju phọ odi bọ Jeruselem r’ẹphen ụsighe ni ḍighiton ọdi uruom ịmhi kụ ọlo ghan mọ ọdi ọ́kpe mụn ọrol. 25 Kụolo mị ụmhiin mọ ọdi óḍighi ịyaar dị ẹkpe ọtuan oghiigh. Esi ịduon phọ mem mọ ọdi r’aloor kụ ạḅem bọ mọ ọdi rạwa mọ ọsighe ḍighiton phọ ọdi ọghiom Siza,* mị usopha ni ọsighe ọdi ọghi ẹpe phọ. 26 Kụolo mị úlegheri ịyaar ọkar ọge kụ ọghiom Uwo Ẹmhoogh phọ ạmhi ịlo ọdi. Pọ kụ ịyaar phọ mị ạsighe bọ nyọdi aru ạmheremhi sịen ghisigh anyinha, ẹkar nụun ẹkpaariom nyịnha Uwo Ẹmha phọ Ạgrịpạ, pịdi mem dị ọoḅeghion ḍighiton phọ ọdi ọmhan mị ạmoogh ịyaar ọge. 27 Ịdi eḍighi bọ íḍighi ọsu olhoghi esi ạmhi ọsighe ọnyo ikoli ọghimhom a Rom dị mị ụ́kaaphom olhogh phọ ọdi asoor bọ.”