Iiḍighi Abutelhedom Mọ

8 Ạ Sọl amheeraam ni mọ awe phọ oghiigh Stivin.

Kụ ḍio phọ ạḍiphe phọ umhiigh ni ọgbiphoghom ạbuo ookpomhoghan phọ odi bọ Jeruselem iboom; kụ oomo ạbidi epel butelhedom mọ, osumhughu ọghi rokool phọ a Judia rạ Sạmeria. 2 Kụolo awe dị ọmhoogh oghiilhaan Ẹnhaan ụsighe ni Stivin ọghi oḍi, kụ omhoghi eboom emoghi loor aḍuugh phọ ọdi. 3 Kụ ạ Sọl amhiigh ọoḅaghamhi ookpomhoghan phọ. Ọdi ạḅua ghan otu ạgba otu, ạghoghogh ghan lhephiri r’ạnmariir ạsighe ạghi ạlhogh ikoli.

4 Tọrobo ịpe ẹrol bọ, oomo ạbuphe ọwalhalha bọ ugbeelhom ghan ni iiḅi ịinhaghan phọ ịlo ekpo ọnhu phọ Ẹnhaan rikpisi phọ ịpe bịdi ọghi bọ. 5 Mem mọ ọpo phọ a Filip ạghi ni ẹmha phọ* ạ Sạmeria kụ amhiigh ọghaaph ịlo ạ Krạịst phọ ọḅenhi ạbidi. 6 Kụ oomo aḍita awe phọ olher rụru ọnhaghan ghan ịpe a Filip rạkaaph bọ ọḅilhe ọmhiin ghan ịiḍaany phọ ọdi raḍighi yogh bọ. 7 Kụ ịbadi awe ụrol li dị ịkaraph aruwaloor edi loor, kụ ịkaraph aruwaloor phọ ịlooghi ghan ni kụ emiteghu siloor awe phọ. Kụ uukonhom ni kẹn ịbadi ạbudi ariisi aloor emhuughu r’ạbudi oḍighi rụkugha. 8 Esi ịduon phọ awe ẹmha phọ ụmhoogh ni iboom ibo.

9 Kụ egbi bọ ọteeny amem mọ ạmuphe phọ oye dị oghol mọ ạ Sạịmọn ạrol li ẹmha phọ ẹpe phọ dị aḍighi yogh ghan ịiḍaany r’ọlhoghonhaan ạḍighaagh ịkaraph aruwaloor, kụ iiḍighi phọ ọdi iḍigh ni ḍiigu esi awe eelhe phọ ạ Sạmeria. Kụ ọdi aghophora ghan mọ ọno oye dị ạmhan mạar. 10 Kụ oomo ạbidi, emhiigh ọbam kụ esi ogbogh, ulher ghan ni rụru ọnhaghan ịpe ọdi rạkaaph bọ kụ ọḅem ghan mọ: “Igbogh ịikpo phọ Ẹnhaan edi ni loor oye phọ ọphon phọ.” 11 Esi ịduon phọ bịdi ulher ghan ni rụru ọngo nyọdi loor ịiḍaany phọ ọdi aḍighi yogh ghan bọ kụ eḍigh ghan bọ ḍiigu esi ạbidi. 12 Kụolo alhephiri r’ạnmariir ụghiom ni ghisigh oḍiiny ghan mụum, mem mọ omheeraam bọ Filip phọ agbeelhom ghan bọ iiḅi ịinhaghan ịlo Ọmhar phọ Ẹnhaan r’ịlo aḍien phọ a Jizọs Krạịst. 13 Kụ ạ Sạịmọn r’aloor bịn amheeraam aani ni kụ oḍiinye nyọdi mụum. Kụ ọdi ạghiom ni ghisigh ạdaph ghan Filip; kụ ịiḍaany phọ r’igbogh iiḍighi ịikpo phọ ọdi ạmhiin ghan bọ iḍigh ni ḍiigu esi ọdi.

14 Kụ mem mọ abutelhedom mọ odi bọ Jeruselem ọnhaghan bọ mọ awe phọ ạ Sạmeria momheeraam ekpo ọnhu phọ Ẹnhaan, bịdi urom ni Pita rạ Jọn ọghi ọteeny awe phọ; 15 kụ bịdi ọghi kụ ọoḅereghi pịdi awe phọ ọmoogh uwaloor iigbia phọ. 16 Loor esi dị mem mọ ọpo phọ moḍiinye ni bịdi mụum esi aḍien Uwo Ẹmhoogh phọ Jizọs, kụolo r’ọnyo ạbidi kọ̋mhoogh uwaloor iigbia phọ. 17 Kụ a Pita rạ Jọn ọḅamham rạghaagh ạbidi we phọ, kụ awe phọ omhiigh ọmhoogh uwaloor iigbia phọ.

18 Ạ Sạịmọn rọmhiin mọ amem dị abutelhedom mọ ọḅamham rạghaagh ạbidi oye kụ ẹdi oye phọ rạmoogh ghan uwaloor iigbia phọ kụ apuruom bịdi ikpoki 19 mọ: “Ịngo aani ịmhi ịikpo phọ ịphen phọ, pịdi tọrobo oye dị mị ạḅamham rạghaagh ạmhi ạmoogh uwaloor iigbia phọ.” 20 Kụolo a Pita ạḅenhi nyọdi mọ: “Ikpoki* phọ ạna ephe r’ạna, loor ịduon nạ ạatughian bọ mọ nạ katue ni ạsighe ikpoki kụ akoom inmo phọ Ẹnhaan rạngo ghan bọ oopho. 21 Nạ káḍighi oḍighi phọ ọphon phọ, kụ nạ kápinhom kẹn bin, loor esi dị ịitughian phọ ạna íileeny ghisigh Ẹnhaan. 22 Esi ịduon phọ kiton esi ịkaraph phọ ạna, kụ ạaḅereghi r’oomo ekpom ạlhom a Jehova* mọ lọ edugh ni, ọdi ạsar ịkaraph ịitughian phọ ạna ạwilhenhaan nyịnha; 23 loor esi dị mị ạmiin mọ ẹḍim kụ imuza olhoghi ạna kụ nạ aḍighi kẹn ẹbenhe ạraraar dị ị́nighe ghisigh Ẹnhaan.” 24 Kụ ạ Sạịmọn ạḅenhi bịdi mọ: “Ịlom a Jehova* mọ ạraraar phọ ịphen nyinha ẹghaaph bọ ịmhi kímitenhaan.”

25 Bịdi rọkuamhi rogbeelhom iiḅi ịinhaghan phọ rọḅilhe ọghaaph ekpo ọnhu phọ a Jehova* rọḅenhi we phọ, kụ onyeenhe Jeruselem, kụ ogbeelhom ghan iiḅi ịinhaghan phọ ọḅenhi we ịbadi ạramha ạ Sạmeria ịduon bịdi rọki bọ.

26 Kụ ọokpaany a Jehova* ạḅenhi Filip mọ: “Ḅetenhu ạghi ẹpe esoorom mọ ẹpe eten phọ ẹḍua bọ Jeruselem rẹki Gạzạ.” (Eten phọ ẹphen phọ edi ẹdala.) 27 Kụ ọdi aḅetenhu anyeenhe, kụ ạmhiin ogbogh oye ọlo Itiopia dị rakumuan ghan kạ Kạndesi, ukuenhi ạbuo Itiopia phọ, ọdi kụ rapogh ghan oomo aruphua ukuenhi phọ. Ọdi ạghi Jeruselem ọoḅereghi Ẹnhaan 28 raḅula, kụ ạtol ude oghuugh ọdi rạbal ghan kamiteom ḍịnya oyil phọ Ạịzạyạ. 29 Kụ uwaloor iigbia phọ ạḅenhi Filip mọ: “Kịa ạteeny oghuugh phọ ọpo phọ.” 30 Kụ a Filip aghiil ạghi ẹpe ọgbal oghuugh phọ kụ ạnhaghan dị oye phọ rạbal ghan kamiteom ḍịnya oyil phọ Ạịzạyạ, kụ apuru mọ: “Nạ ạkar ri ạnaghanhan ịpe nạ rạbal bọ?” 31 Kụ oye phọ mọ: “Mị kạnaghanhan bọ ika emuton dị ọnhon oye kụ ạgba ẹmhu phọ ụḅenhi ịmhi?” Kụ oye phọ ạḅenhi Filip mọ aḍigh sịphe oghuugh phọ ạrol ude. 32 Esi Ịge Iigbia phọ ọdi ạal ghan bọ ẹḅem mọ: “Ụpham ni nyọdi ọghimhom esi dị kokiigh mụdi oyool ọga, kụ ọdi aḅoorian ni bịn mụdi ọony oyool ọga dị rọsam suphuuph phọ. 33 Mem mọ roofolhomhi bọ nyọdi, oye ósophonhaan nyọdi elhiom ọoruen. Kụ sịen moghiigh bọ nyọdi ạnhian kụ kạkaaph ịlo esi r’esi ịpe ọdi amite bọ sịen aḅirinhi phọ?”

34 Kụ oye phọ apuru Filip mọ: “Kạ́le, oyil phọ rạkaaph ghan ịlo ạnhian? Ịlo ọdi r’aloor ọbobo ịlo ọnhon oye?” 35 Kụ a Filip amhiigh ọghaaph iiḅi ịinhaghan phọ ịlo a Jizọs ọḅenhi oye phọ, esi omhiighom esi ịge iigbia phọ ẹpe phọ. 36 Kụ ịduon bịdi oghiil bọ ni rọki, kụ ọmhiin esi dị ạmuum odi, kụ oye phọ ạḅem mọ: “Pọrono ạmuum; eeghe kụ kikikima bọ ịmhi oḍiiny ạmuum?” 37* —— 38 Ọdi rọghaaph ịphen phọ kụ ạmheremhi oghuugh phọ, kụ a Filip r’ọdi osoor sịphe ạmuum mọ, kụ a Filip aḍiinye nyọdi mụum. 39 Bịdi rophun bịn mem mem mọ uwaloor iigbia phọ a Jehova* arelheom Filip ạḍuanham, kụ oye phọ ọ́mhiin mụn Filip, kụolo anyeenhe ni ogheel r’ibo. 40 Kụolo a Filip ạmhiin loor ọdi ẹpe Ạsdọd, kụ ạḅua ghan ẹmha ạgba ẹmha ekool phọ ẹpe phọ agbeelhom iiḅi ịinhaghan phọ tụtu asi Sịsạriạ.