Iiḍighi Abutelhedom Mọ
9 Kụolo ạ Sọl ạghiom ni ghisigh ạpaarogh ghan bụmatuan Uwo Ẹmhoogh phọ oghiigh. Kụ ạtuan ịphen phọ ạghi ạteeny ogbogh ọpinyon rịkia phọ 2 ạḅenhi mọ ạge rịnya ạghiom rubughotu phọ edi bọ Dạmạskọs, pịdi omeera mọ ọdi asiph arumhom Jeruselem tọrobo oye dị aḍighom aani ẹku phọ oghol bọ mọ Eten Phọ, mụghumo ạnhir ephoph ọbobo olhephiri ọony.
3 Kụ ọdi anyeenhe Dạmạskọs, ratuman ẹmha phọ kụ ạḍiḅaal ẹḅua ẹpe k’ạke esoorom nyọdi ekperenhom, 4 kụ ọdi amheel kụ ạnhaghan ẹḍogh dị ẹḅenhi nyọdi mọ: “Sọl, Sọl, uḍighi ika kụ nạ rụgbiphoghom bọ ịmhi?” 5 Kụ ọdi apuru mọ: “Uwo Ẹmhoogh, nạ ạnhian?” Kụ ẹḍogh phọ ẹḅem mọ: “Mị a Jizọs, ọpo nạ rạgbiphoghom bọ. 6 Kụolo ḅetenhu aḍigh ẹpe ẹmha phọ, bịn kọḅenhi ni nyịnha ịyaar dị nạ kaḍighi.” 7 Kụ awe phọ ọdaph bọ nyọdi ụmheregha ni pạ phọ kụ útue ụkaaph ịyaar, ii, bịdi ụnhaghan ẹḍogh bịn kụolo ụ́miin oye. 8 Kụ ạ Sọl aḅetenhu, kụ ọ́mhiin eten ghạlhamo r’ịduon ariḍien phọ ẹḅaranhu bọ ni. Esi ịduon phọ awe phọ ụpham ni ḍịghaagh ọdi kụ orelheom oḍigh Dạmạskọs. 9 Kụ esi ịraar aḍughul otu ọdi ọ́mhiin eten, kụ ólhe eḍien ḅịlhe ọ́phughol kẹn ịyaar.
10 Oniin ọnyo ạmatuan ạrol li Dạmạskọs dị oghol mọ Ạnạnạyạs, kụ Uwo Ẹmhoogh phọ ạḅenhi nyọdi esi uḍien mọ: “Ạnạnạyạs!” Kụ ọdi mọ: “Pọrono ạmhi sịen, Uwo Ẹmhoogh.” 11 Kụ Uwo Ẹmhoogh phọ ạḅenhi nyọdi mọ: “Ḅetenhu ạghi eten phọ oghol bọ mọ Onyen, sịphe kạ Judas, ạwa oye ọlo ạ Tạsọs dị oghol mọ ạ Sọl. Ịduon rọkaaph bọ ọdi rạaḅereghi ghan, 12 kụ mạmhiin oye dị oghol mọ Ạnạnạyạs esi uḍien dị aru ạḅamham nyọdi rạghaagh pịdi ọdi ạḅilhe ạmiin eten.” 13 Kụolo Ạnạnạyạs ạphagharanhaan mọ: “Uwo Ẹmhoogh, mị mạnhaghan ni ọnhu ịbadi awe ịpe oye phọ ọphon phọ ạmhiinhe bọ we phọ ạna ẹpe Jeruselem. 14 Kụ ẹphen phọ ọdi aru bọ aruwo ẹmhu ạbupinyon rịkia phọ kụ ụngo nyọdi ịikpo mọ aru asiphi oomo ạbuphe rokol ghan bọ ḍien phọ ạna.” 15 Kụolo Uwo Ẹmhoogh phọ ạḅenhi nyọdi mọ: “Kịa! loor esi dị mị mạsaḅar oye phọ ọphon phọ ọghi ọghaaph ịlo aḍien phọ ạmhi ọḅenhi awe areelhe phọ r’aruwo ẹmha r’awe phọ Izrẹl. 16 Kụ mị kaganhanhamhi ni aḍeenhaan nyọdi oomo ạraraar phọ ọdi kạmiinhom bọ loor ẹmhu aḍien phọ ạmhi.”
17 Kụ Ạnạnạyạs ạghi aḍigh otu phọ, kụ ạḅamham rạghaagh nyọdi kụ ạḅem mọ: “Sọl, umor ạmhi, Uwo Ẹmhoogh phọ Jizọs, ọpo amitenhaan bọ nyịnha ẹpe eten phọ mem mọ nạ ratu bọ kụ urom ịmhi oru ọteeny ạna pịdi nạ ạḅilhe ạmiin eten ḅịlhe uwaloor iigbia phọ amuza loor ạna.” 18 Mem mem mọ bịn ạraraar dị ẹghigh ipholhopol ina ẹḅua riḍien ọdi ẹgharaghu, kụ ọdi ạḅilhe amhiigh ọmhiin eten. Kụ ọdi aḅetenhu kụ oḍiinye nyọdi mụum, 19 kụ ọdi alhe eḍien ạmhoogh ịnyaam.
Ọdi ạrol li r’ạbumatuan phọ ẹpe Dạmạskọs iphurukpu asiḍughul otu, 20 kụ óobinya ọghi ghan ẹpe arubughotu phọ ọghaaph mọ a Jizọs kụ Ọony phọ Ẹnhaan. 21 Kụ ịpe ọdi rạkaaph bọ iḍighi ni iikia esi oomo ạbuphe rọnaghan bọ kụ ọḅem ghan mọ: “Ọphon kóye phọ ạaḅaghamhi ghan bọ bụphe oghol ghan bọ ḍien phọ ạḍien phọ ẹpe Jeruselem? Ọdi ọ́tuan ḍịen osiphi ạbidi ọghiom aruwo ẹmhu ạbupinyon rịkia phọ kụ aru bọ ẹphen phọ?” 22 Kụ ạ Sọl ạghiom ghan bịn ghisigh asilor ọghaaph iiḅi ịinhaghan phọ kụ ịpher ri bụo a Ju phọ orugh bọ Dạmạskọs mem mọ ọnhaghan bọ ịpe ọdi rạkaaph bọ eten dị eegholhaany mọ a Jizọs kụ ạ Krạịst phọ.
23 Ịbadi asiḍughul otu reten, kụ ạbuo a Ju phọ oḅian oghiigh ọdi. 24 Kụolo ạ Sọl aru ni alhegheri oḅian phọ ạbidi. Kụ bịdi ụrol ghan ni kẹn ẹpe ọnhu aḍibuo ẹmha phọ ogon ghan nyọdi ḍịroor r’adulhe oghiigh. 25 Esi ịduon phọ ạbumatuan phọ ọdi ụlhogh nyọdi egunhum ḍughul kụ oḅughe nyọdi epogh dị ẹrol iikpe ẹmha phọ osoore.
26 Ọdi rosi Jeruselem kụ ạkparagha ghan ooḍikuan ạbumatuan phọ, kụolo oomo ạbidi ughiilhaan ni nyọdi loor esi dị úmeeraam mọ ọdi maḍighi ọnyo ạmatuan. 27 Kụ ạ Bạnạbạs aru ni ạlhoghonhaan nyọdi ḍịghaagh kụ ạpham nyọdi ạghi aḍeenhaan butelhedom mọ, kụ ạḅenhi bịdi ịlo esi r’esi ịpe ạ Sọl ạmhiin bọ Uwo Ẹmhoogh phọ ẹpe eten phọ, kụ Uwo Ẹmhoogh phọ ạḅaanhaan bọ Sọl, r’ịpe ạ Sọl ạghaaph ghan bọ ịlo aḍien phọ a Jizọs r’ạkpo oḅio ẹpe Dạmạskọs. 28 Kụ ọdi ạrol r’ạbidi kụ arelhe ghan r’ẹereegh ẹpe* Jeruselem, ạghaaph ghan ịlo aḍien Uwo Ẹmhoogh phọ r’ạkpo oḅio. 29 Ọdi ạghaaph ghan ạḅilhe ạagbaghanhaan r’ạbuo a Ju phọ rọḅa ghan bọ ọnhu a Grik phọ, kụolo bịdi ụwa ghan reten oghiigh ọdi. 30 Abumor phọ rolhegheri ịphen phọ, kụ ọsighe nyọdi ọghimhom Sịsạriạ kụ ọdi ạḅua pạ phọ ạghi Tạsọs.
31 Ọkar agey, oomo ookpomhoghan phọ ẹpe Judia rạ Gạlili rạ Sạmeria ụmhoogh ni ẹepho, kụ ookpomhoghan phọ ạghiom ghisigh aphoph ghan; kụ bịdi ọbugh ghan bịn, loor ịduon ọghiom ghan bọ ghisigh oḍeenhaan mọ bịdi ọmoogh ni oghiilhaan a Jehova* ḅịlhe ọrolhom ghan bọ ịidereghi phọ bịdi ọmhoogh bọ dị eego esi uwaloor iigbia phọ.
32 Kụ ịduon a Pita ạḅua bọ ekpisi rạgba ekpisi ekool phọ ẹpe phọ, aru ni ạteeny aani we phọ Ẹnhaan orugh bọ ẹpe Lida. 33 Kụ ọdi ạmhiin ni ẹpe phọ oye dị oghol mọ Aniạs, dị ariisi aloor phọ emhuughu, kụ mạrol ẹmhinha ọphaanya ạsia. 34 Kụ a Pita ạḅenhi nyọdi mọ: “Aniạs, a Jizọs Krạịst raakonhom nyịnha. Ḅetenhu ạde ẹmhinha phọ ạna.” Kụ ọdi aḅetenhu eginha amem. 35 Kụ oomo awe phọ orugh bọ ẹpe Lida rạ Sạrọn umheeraam ni Uwo Ẹmhoogh phọ mem mọ ọmhiin bọ oye phọ.
36 Kụ oniin ọnyo ạmatuan ạrol li ẹpe Jọpạ dị oghol mọ ạ Tạbịtạ, kụ ọgba rotenhe ọnhu a Grik pọ, “ạ Dọkạs.”* Ọdi agbor ghan ni aḍighi we iiḅi ạḅilhe aanmo ghan ruunmo ọlhoghonhaan ạḍighaagh bụlo ekuom.* 37 Kụolo riiḍio phọ ịpe phọ ọdi ạrol li émoon bịn amhugh. Kụ ạbumatuan phọ owur nyọdi mụum kụ ọmhunheeny osoph ạnyu. 38 Kụ loor ịduon a Lida atuman bọ Jọpạ, ạbumatuan phọ urom ni ịyal awe mọ ọghi ọteeny Pita mem mọ ọnhaghan bọ mọ ọdi odi ẹpe Jọpạ ọḅenhi mọ: “Seseeny gboogborion aru ụmhiin iyoor.” 39 Kụ a Pita aḅetenhu ạdaph bịdi. Ọdi rosi, kụ ọsighe nyọdi ọghimhom ẹpe osoph phọ; kụ oomo arukpukelhe ạnmariir phọ oru ọteeny nyọdi romoghi, kụ oḍeenhaan ghan nyọdi oomo iinmenhan phọ r’ịgorogoro ạrusuoma* phọ ạ Dọkạs ạkolhonhaan bọ bịdi mem mọ kőmhugh bọ. 40 Kụ a Pita ạḅenhi oomo awe phọ mọ omiteghu erugh, kụ akpuḍian ạaḅereghi. Kụ ọdi akiton ạphogh oḍim mọ kụ ạḅem mọ: “Tạbịtạ, ḅetenhu!” Kụ ạ Tạbịtạ ạḅarion riḍien ọdi, kụ rọmhiin Pita kụ aḅetenhu ạrol ude. 41 Kụ a Pita ạngo Tạbịtạ ḍịghaagh ọdi, kụ ạpham Tạbịtạ ạmheremhi, kụ ạmhagh we phọ Ẹnhaan r’arukpukelhe ạnmariir phọ ạḅogh Tạbịtạ phọ odi bọ r’ighuḍum ạngo bịdi. 42 Kụ ịphen phọ iilheghaany ni oomo ạ Jọpạ, kụ ịbadi awe omheeraam Uwo Ẹmhoogh phọ. 43 Kụ ọdi ạrol ẹpe Jọpạ ịminighan asiḍughul otu k’oye dị oghol mọ ạ Sạịmọn dị raselhemhi ghan ruzu ịnham dị ọkpan.