Iiḍighi Abutelhedom Mọ
10 Oye ạrol li Sịsạriạ dị oghol mọ ạ Kọnịlịọs, ọdi aḍighi uwo ẹmhu* eniin ẹkpigh egu ạbuo ẹgham* Itạli. 2 Ọdi aḍighi oye aruukuan kụ eghun otu phọ ọdi r’ọdi ọoḅereghi ghan Ẹnhaan, kụ aanmo ghan ruunmo ọlhoghonhaan ạḍighaagh bụlo ekuom ạḅilhe ạḅaanhaan ghan Ẹnhaan esi ịiḅereghi r’oomo ekpom. 3 Ḍiniin aḍio, rẹteeny omhunhenhiom esugha ạwa* phọ, kụ ọdi ạmhiin ọokpaany Ẹnhaan esi uḍien dị aru ạteeny nyọdi ạmhagh mọ: “Kọnịlịọs!” 4 Kụ ạ Kọnịlịọs aphogh nyọdi akanhanhaam, kụ apuru r’oghiilhaan mọ: “Uwo Ẹmhoogh, nạ rạwa mọ mị uḍighi eeghe?” Kụ ọokpaany phọ ạḅenhi nyọdi mọ: “Ịiḅereghi phọ ạna mẹteeny Ẹnhaan kụ ọdi rạmiin ghan ni ruunmo phọ nạ raanmo ghan bọ ọlhoghonhaan ạḍighaagh bụlo ekuom, kụ akol li ịphen phọ rạatughian ghan nyịnha. 5 Esi ịduon phọ tom we mọ ọghi Jọpạ ọmhagh oye dị oghol mọ ạ Sạịmọn dị rọmagh ghan kẹn mọ a Pita. 6 Ọdi odi iiruen k’oye dị oghol mọ ạ Sạịmọn dị raselhemhi ghan ruzu ịnham dị ọkpan, kụ otu oye phọ odi ọgbal ọphiiny ạbazi.” 7 Kụ ọokpaany phọ ạḅaanhaan bọ nyọdi rọḅua, bịn ọdi ạmhagh ịyal ạrebenhe ọdi r’ọnyo ẹgham dị ạmhoogh oghiilhaan Ẹnhaan dị rakumuan ghan k’ọdi, 8 kụ ạḅenhi bịdi oomo ịpe emite bọ kụ arom mọ ọghi Jọpạ.
9 Rẹteeny ḍio phọ etum bọ pạ, bịdi odi ni eten rọki dị motuman ẹmha phọ, kụ a Pita ạsiiny ạnyu otu phọ mem dị rẹki ọteeny omhunhenhiom odiiny ạwa* phọ ọoḅereghi. 10 Kụolo ọkoony asiph ni nyọdi iboom kụ ạwa olhe eḍien. Odi rookolhobian ghan ịyaar olhe phọ, kụ ọdi ạmhiin uḍien 11 dị ạke phọ aghughuronhu r’ịyaar dị ẹghigh oboom oodugha ukpe dị ọpham inya aruukunha phọ rosoore sịen ade phọ. 12 Kụ sịphe olhoghi phọ oomo ịnham ịsien ade phọ dị ẹmhoogh inya asike r’ịdi rekuura ghan r’ịnhun kụ ịrol. 13 Kụ ẹḍogh ẹḅenhi nyọdi mọ: “Ḅetenhu Pita, aghiigh ạany!” 14 Kụolo a Pita ạḅem mọ: “Eeye Uwo Ẹmhoogh, mị kátue, loor esi dị mị kạ̋any ghan ịyaar dị olhogh phọ ạḅem mọ eḍighi ugbinhi ugbinhi ḅịlhe mọ ị́ḅaal.” 15 Kụ ẹḍogh phọ ẹḅilhe ẹḅenhi nyọdi omhunhenhiom ịyal amem mọ: “Kạ́ḅem mọ ạraraar dị Ẹnhaan mạḅaalhamhi ị́ḅaal.” 16 Kụ ịphen phọ ịḅilhe ni emite omhunhenhiom ịraar amem, kụ eginha amem bịn ọsighe oḅulhemhi k’ạke.
17 A Pita odi ni rạatughian ghan ịlo ẹmhu uḍien phọ ọdi ạmhiin bọ bịn awe phọ ạ Kọnịlịọs arom bọ ọwa ọto kạ Sạịmọn ọmhiin kụ ọmheregha ẹpe ọnhu aḍibuo phọ. 18 Kụ bịdi ọmhagh uwo otu phọ opuru mụghumo ạ Sạịmọn phọ rọmagh ghan bọ kẹn mọ a Pita odi ni iiruen pạ phọ. 19 A Pita odi ni rạatughian ịlo uḍien phọ, kụ uwaloor iigbia phọ ạḅenhi nyọdi mọ: “Mịin! Ịraar awe rọwa ni nyịnha. 20 Esi ịduon phọ, ḅetenhu asoor ude ạdaph bịdi ạghi, kụ kạ́moogh iikia, loor esi dị mị kụ urom bịdi.” 21 Kụ a Pita asoor ude ạghi ạteeny we phọ kụ ạḅenhi mọ: “Pọrono ạmhi, mị kụ oye phọ nyinha rẹwa bọ. Nyinha ịtu eeghe kụ eru bọ?” 22 Kụ bịdi ọḅem mọ: “Oniin oye odi ni dị oghol mọ ạ Kọnịlịọs, ọdi uwo ẹmhu ạbuo ẹgham dị aḍighi oye aruukuan dị rakiilhaan ghan Ẹnhaan, kụ oomo ạbuo a Ju phọ rọkaaph ghan ni ịma ịlo ọdi. Dị eego esi ọokpaany, Ẹnhaan ạḅenhi nyọdi mọ arom we oru ọmhagh nyịnha ọghi k’ọdi pịdi ọdi ạnaghan rạraar phọ nạ kạkaaph bọ.” 23 Kụ ọdi ạmhagh bịdi ạlhogh olhoghi otu kụ bịdi ọrol r’ọdi.
Rẹteeny ḍio phọ etum bọ pạ, kụ ọdi ạdaph bịdi ạghi, kụ buniin abumor ẹpe Jọpạ ụdaph aani ni nyọdi. 24 Ọdi asi Sịsạriạ ḍio phọ etum bọ pạ. Kụ mem mọ ọpo phọ ạ Kọnịlịọs maakpomhoghi siya ọdi r’igbogh ạrighiri ọdi kụ rakori ghan bịdi. 25 A Pita rosi, kụ ạ Kọnịlịọs aru ạteeny nyọdi, kụ akpuḍian ghisigh ọdi. 26 Kụolo a Pita ạpham ni nyọdi ạmheremhi, kụ ạḅenhi mọ: “Mẹera; mị oye aani ni ịduon ạna.” 27 Ịduon a Pita rạkaaphan bọ Kọnịlịọs, kụ aḍigh ẹpe olhoghi otu phọ ạmhiin dị ịbadi awe ookpomhoghan. 28 Kụ ọdi ạḅenhi bịdi mọ: “Nyinha elegheri ni mọ ọnyo a Ju ọ́kpe ooḍikuan ọbobo ọghi ophogh oye ọlo ẹnhon eelhe, kụolo Ẹnhaan muḍeenhaan ịmhi mọ mị kụ́ḅem mọ oye ọ́ḅaal. 29 Pọ kụ ịyaar phọ mem mọ oru bọ ụmhagh ịmhi, mị ụ́ḅem mọ mị rátu, mị uru bịn. Esi ịduon phọ, ịḅenhi ịmhi ịyaar phọ nyinha ẹtuan bọ ịmhagh ịmhi.”
30 Kụ ạ Kọnịlịọs ạḅem mọ: “Inya aḍughul otu ẹpe ọmhan, ọdo phọ oogho phọ ọphon, mị ụuḅereghi ghan sịen k’ạmhi omhunhenhiom esugha ạwa* phọ; bịn oye dị ạkpolhoghian ạsuoma dị rạmu aru ạmheera ghisigh ạmhi 31 kụ ạḅem mọ: ‘Kọnịlịọs, Ẹnhaan mạnhaghan ịiḅereghi phọ ạna, ạḅilhe ạatughian ruunmo phọ nạ raanmo ghan bọ ọlhoghonhaan ạḍighaagh bụlo ekuom. 32 Esi ịduon phọ, tom we mọ ọghi Jọpạ ọmhagh oye dị oghol mọ ạ Sạịmọn dị rọmagh ghan kẹn mọ a Pita. Ọdi odi iiruen k’oye dị oghol mọ ạ Sạịmọn dị raselhemhi ghan ruzu ịnham dị ọkpan, kụ otu oye phọ odi ọgbal ọphiiny ạbazi.’ 33 Bịn mem mem mọ mị arom mọ oru ọmhagh nyịnha, kụ nạ aḍighi ni agey oru phọ. Kụ nyịidipho oomo ayoor mookpomhoghan ghisigh Ẹnhaan ọnhaghan oomo ạraraar phọ a Jehova* mạto bọ ạḅenhi nyịnha mọ kạaph.”
34 A Pita rọnhaghan ịphen phọ kụ ạḅem mọ: “Nyịidipho mị mạkar ạnaghanhan mọ Ẹnhaan rạ́aphelheghan ghan, 35 kụolo tọrobo eelhe, oye phọ ọpo rakiilhaan ghan bọ nyọdi kạḅilhe aḍighi ịpe ẹnhighe bọ kụ ẹdi ọdi rạloghoma ghan. 36 Ọdi agbeelhom ni iiḅi ịinhaghan phọ ịlo ẹepho ạḅenhi we phọ Izrẹl dị eego esi a Jizọs Krạịst phọ aḍighi bọ Uwo Ẹmhoogh oomo awe. 37 Mem mọ ạ Jọn agbeelhom bọ ịlo oḍiiny ạmuum mọ eten, nyinha elegheri ni ịlo ạraraar phọ ọghaaph ghan bọ oomo a Judia emhiigh kạ Gạlili: 38 ịlo a Jizọs ọpo ạ Nạzạrẹt phọ, ịpe Ẹnhaan ạsagharan bọ nyọdi uwaloor iigbia r’ịikpo, kụ ọdi ạghi ghan bọ oomo ạramha phọ aḍighi ghan we iiḅi ạḅilhe aakonhom oomo ạbuphe Eru phọ rạmiinhe bọ, loor ịduon Ẹnhaan ạrol bọ r’ọdi. 39 Kụ yoor ụmhiin ni oomo ạraraar phọ ọdi aḍighi yogh bọ ẹpe ạramha phọ ạbuo a Ju phọ orughogh bọ r’ẹpe Jeruselem; kụolo bịdi ụkan ni nyọdi loor oreeny bịn oghiigh. 40 Kụ Ẹnhaan aḅeton nyọdi esi aḍuugh omhunhenhiom ịraar aḍughul otu phọ kụ amheera mọ awe ọmhiin nyọdi, 41 kụolo oomo awe kụ ụ́miin nyọdi, yoor phọ olhean bọ ọḅilhe ọphughol r’ọdi mem mọ ọdi aḅetenhu bọ esi aḍuugh phọ kụ ụmhiin. Yoor kụ ẹdi Ẹnhaan ạma k’ẹpe ọmhan mọ ọmhiin nyọdi ọḅilhe ọghaaph ịlo ọdi. 42 Kụ ọdi ạto kẹn ụḅenhi ịyoor mọ yoor ọghaaph ọḅenhi we phọ ọḅilhe ọkuamhi ogbeelhom mọ ọdi kụ ẹdi Ẹnhaan mạma mọ aḍighi oogboom ịiruen ạbuen odi bọ r’ighuḍum r’ạbuphe momhuughu bọ. 43 Oomo ariil phọ ụghaaph ni ịlo ọdi, mọ tọrobo oye dị ạmhoogh omheeraam ạghi esi ọdi, Ẹnhaan kạsar ri ạbilhenhaan ịkaraph oye phọ dị eego esi aḍien phọ ọdi.”
44 A Pita odi ni rạkaaph rạraar phọ ịphen phọ, bịn uwaloor iigbia phọ asoorom oomo ạbuphe rọnaghan bọ ekpo ọnhu phọ Ẹnhaan. 45 Kụ iḍighi ni iikia esi ạbumatuan phọ moḍunha yogh bọ, bụphe ọdaph bọ Pita oru, loor ịduon rookuom aani bọ we areelhe phọ uwaloor iigbia phọ Ẹnhaan rạngo ghan bọ oopho. 46 Bịdi ụnhaghan dị awe phọ rọḅa ghan rụnhu kịrokiro ọḅilhe rogbeelhom ghan igbogh phọ Ẹnhaan. Kụ a Pita ạḅem mọ: 47 “Ạnhian kụ kạḅem mọ kúḍiinye mụum we phọ ạbuen phọ mọteeny aani bọ uwaloor iigbia phọ ịduon ayira?” 48 Kụ ọdi ạḅem mọ oḍiinye bịdi mụum esi aḍien phọ a Jizọs Krạịst. Kụ bịdi ọḅem mọ ọdi ạrol aani iphurukpu asiḍughul otu r’ạbuno.