Iḍoọgh—Nạ Kaḍighinom Eeghe Ghuḍum mọ Anạ?

“MỊ rawạ ilọ ekạr enighẹ epu esi aghuḍum.” Oniin oḍoọgh onyanị kụ aḅẹm. Iikia i/lo, ipẹ ku idị nạ rawa kẹn ni. Kụ olọ ika kụ idị nạ k’ateẹny bọ idị “enighẹ epụ” esi aghuḍum? Araraạr iinaghạn, r’iigbo anạ, eeni kẹn r’abutughemiạ anạ, k’oḅẹm mọ k’eḅuạ esi omoọgh iboom ikpoki ḅilẹ r’oghelọm ogbogh oḍighi—oḍighi oolhạ, kụ etu!

Kụ olọ, a Baibul phọ apụr rurụ iḍoọgh awe mọ ophorogh eelạ eḍighi ni “okururụ ophorogh ookugh” bịn. (Ecclesiastes 4:4) Idị edi bọ, enụm iḍoọgh bịn kụ roteẹny ghạn eelạ k’oḅilẹ ooleghaany. Bulọ oteẹny, rogbor ghan k’omiịn siloor abidị esi amabi dị aloghorị. Oniin odoọgh olọ aBritain dị aghị asukul eghuan aḅẹm mọ: “Ekịgh ipokoro igbe, nạ aḅiila aphogh, iyaạr pạ i/lo.” Agey ni, oḍighi, eeni amem k’atue ni atuom eela r’adịen. Kụ olọ ka/tue agbaanyamị ‘ekulom aruwaloor’ anạ. (Matiu 5:3) Epel siẹn phọ, 1 Jọn 2:​17 apụr rurụ mọ “aḅirini phọ . . . rape.” Ghalamọ nạ uteẹny nị eelạ aḅirini phọ ophọn phọ, re/bia.

Ecclesiastes 12:1 atụ iduọn phọ aḅenị iḍoọgh mọ: “Tuutughiạn Olemiạ phọ anạ siẹn nạ odi bọ iḍoọgh phọ.” (Today’s English Version) Ii, eten dị enighẹ epu orue oḍighinom aghuḍum mọ anạ edi esi okumu aJihova Enaạn phọ. Kụ olọ eḅẹl phọ, nạ k’amananaạm nị orọl oḍighi Enaạn kụ. Ika? Ḅilẹ eeghe kụ edi esi okumu Enaạn phọ?

Omananaạm Ilọ Oḍighi Ogbaanaạn aJihova

Omiighom, nạ k’alẹm eephuạ okumu Enaạn—kụ eephuạ phọ epẹ phọ re/tu ghan bịn, ghalamọ odẹ r’onhiin anạ aKristẹn nị. Nạ k’atu ni amoọgh siya ilọ anạ r’aJihova. Oniin oḍoọgh onyanị aḅẹm mọ: “Ooḅereghị ghạn k’eloghonaạn nyinạ ḍighaạgh osi asiya ilọ anạ r’aJihova.”​—Psalm 62:8; Jems 4:8.

Rom 12:2 amitiom enọn edạ dị nạ k’agbatạn. Eḅẹm mọ: “Kụ nyina egbi olegheri iitughiạn phọ [Enaạn]—ipẹ enighẹ bọ, eḅeraạn bọ nyodị kụ eseleman bọ.” Nạ m’aakia ghan ni iniin araraạr dị m’otughemị nyinạ? Pọ daphạn oroma aBaibul phọ kụ ‘alegheri’ mọ araraạr phọ iphẹn phọ inẹ ni! Waaghị elọ anạ. Bạl Baibul phọ r’arinyạ ilọ aBaibul phọ. Otuughạ ilọ Enaạn phọ, ii, ko/ḍighinom epul bịn. Lọgh mem kụ aatughiạn ilọ ipẹ nạ aạl bọ pidị esi k’ude ekpom mọ anạ omaaniọm bọ. Iphẹn phọ k’ekọm idị ephomoghiạn phọ anạ esi Enaạn k’ebụgh.​—Psalm 1:​2, 3.

Enọn, kparaghạ idị u/guan oḅenị aanị ipẹ nạ ratuughạ bọ, eeni buọ asukul phọ anạ. Oḅuạ eghuugh ogbạ eghuugh oghaạph kụ enọn edạ. Nạ k’atọ nị mem aazuanan onyọ asukul anạ iduọn nạ rakpaạph bọ, kụ etue ni eekperemi nyinạ eḅẹl amem mọ. Kụ olọ aBaibul phọ uḅenị iyira mọ ‘ku/kiilom umugholoor ooḅi oghaạph phọ.’ (Rom 1:​16) Adom aghuḍum r’oḍuomologhi kụ edị na arumom bọ! Umugholoor phọ olọ eeghe?

Eḍighi idị odẹ r’onhiin anạ kụ oru Kristẹn, pọ nạ m’amiigh ni odạph abidị oḍighi phọ ophọn phọ. Kụ olọ nạ m’arue ni aḍighi idị epu omeerạ aanị ogbạl eghuugh bịn oḅoorian obobọ ongọ asimagazin r’ipoḍi arinyạ bịn? Nạ atue ni raḅạ pạ ogbạl eghuugh phọ raloor karomoghiom uwotu phọ Baibul? Mọ ki/diphọ, pọ kiạ odẹ r’onhiin anạ obobọ olọ ookpomoghan phọ lọ amanạm aloghonaạn ḍighaạgh. Gbon omananaạm idiphọ okaaphọm ooḅi oghaạph phọ lọ ko/ḍiiny muụm!

Eteẹny, k’enyu ni nyinạ oḅọgh aloor ongọ—oghunyian esi Enaạn mọ nạ k’akumu nyodị emiigh sien. (Rom 12:1) Kụ olọ, oḅọgh aloor ongọ phọ k/oopho oghaạph ogina anạ. Enaạn ewạ mọ oomo awe “oghaạph omiteom [ophẹl] otene” phọ. (Rom 10:10) Pạ amem oḍiiny amuụm mọ, kụ edị nạ aphụr ragbeelom omeeraam mọ anạ iidoronhụ. Kụ oḍiiny amuụm adaphạn. (Matiu 28:19, 20) U/paranaạn, oḍiiny amuụm ke/bạm iyaạr. Kụ olọ ka/bilẹ oḍiiny loor idị nạ aloghoma mọ eeni nạ kapiomạn. Lọ na abeḍenọm ni Enaạn ilọ inyaạm, pọ odị k’angọ nị nyinạ ‘iikpọ dị epel ipẹ ana’ omeremị anạ giph.​—2 Korịnt 4:7; 1 Pita 5:​10.

Mem oḍiiny amuụm mọ, bịn nạ maḍighi oniin Ogbaanaạn aJihova. (Isaiah 43:10) Iphẹn phọ etir ri nyinạ agey esi ipẹ nạ k’adịghinom bọ ghuḍum mọ anạ. Oḅọgh aloor ongọ apạmạm ‘opharanaạn aloor anạ.’ (Matiu 16:24) Na k’abilẹ yogh ni iniin araraạr dị nạ agbon oteẹny kụ ‘apụr ghụn awạ omạr phọ k’Enaạn.’ (Matiu 6:​33) Esi iduọn phọ oḅọgh aloor ongọ r’oḍiiny amuụm ekunyon ibadị aroopoogh oḍighi iduọn phọ. Ophogh iniin.

Aroopoogh Okumu Enaạn Oomo-Amem

● Okoịeten eniin edọ eepogh phọ. Okoịeten pọ okaaphọm onyọ aKristẹn dị m’aḍiiny muụm kụ raḍighi agey, dị aakolobian oghaaphọm ooḅi oghaạph phọ 70 awạ unwanyụ-unwanyụ. Obughẹ amem olọgh epẹ erugh phọ k’engọ nyinạ ophophe emaạr oghaạph ḅilẹ r’itughemị phọ anạ. Ibadị abukoịeten m’omiịn nị ibo ologhonaạn aḍighaạgh buọ ituughạ aBaibul phọ abidị oḍighi aBugbanaạn di m’oḍiiny muụm. Oghẹn oḍighi epẹ aḅirini phọ kụ k’atue angọ ibo aḅilẹ agbaanyamị oye iduọn phọ?

Ogbogh opol abukoịeten roḍighi ghan ni nmụny iiḍighi. Omoọgh ikpoki orolọm buniin rookolobian ghạn oletian adool pho aḍiẹn pho ghisigh kụ otuughạ emaạr otu asukul obobọ k’odẹ r’onhiin abidị. Eru dị nạ r’odẹ r’onhiin anạ ologhoma mọ k’enighẹnị oḅarạm inọn ituughạ mem lọ nạ amạn otum asukul phọ, pọ miịn nị mọ inyuughiom mọ anạ, ke/lọ omoọgh iboom ikpoki, kụ olọ ophạm arukumuan phọ ḅilẹ eeni oḍighi oye arukumuan oomo-amem.

Ii, aghuḍum okoịeten o/gbon oḍighi ikpoki odị, arukumuan phọ odị ghụn—oḍighi idị abunọn k’omoọgh ghuḍum! Eeghe kụ nạ o/seerian bọ oḍighi aani okoịeten? Oḍighi okoịeten ramiteom ghạn inọn aroopoogh. Esi omaạm, abuniin abukoịeten rokeel ghan rikpisi dị rewạ bukaaphọm Omạr phọ. Abunọn otuughạ ooruen onhụ kụ rokumu esi ookpomoghan ooruen onhụ pạ emạ phọ obobọ eeni okeel ḍiiruen ade. Ii, okoịeten phọ okạr eten aghuḍum asuọ!

● Oḍighi aMisonarị p’enọn eepoogh dị oghughuron. Emiigh 1943 aWatchtower Bible School of Gilead m’angọ nị bukoịeten dị omananaạm imạ itughemị ilọ oḍighi amisonarị. Bulọ omite rosighẹ ghạn oḍighi okumu idiphọ abukaaphọm oomo-amem iiruen arere. Ibadị arere phọ iphẹn phọ, asidọl awe ekpạr rị, esi iduọn phọ ewạ ni ogey omoon aloor r’inyaạm oḍighi amisonarị. Ghalamoriduọn phọ nị, amisonarị rokelọm ni sighudụm ibo r’ogbaanyạn.

● AMinisterial Training School phọ umiteom otughemị ikumoor awe r’arebenẹ arukumuan lọ k’o/phin anhịr kụ omananaạm. Ituughạ ophaanyạ awiki phọ elhom bọ emadạn odọ araraạr idiphọ asidool ikumoor awe r’arebenẹ arukumuan, iikolobian, r’oghaạph esi ogbo. Buniin otom okumu ipạ eelhe abidị. Bunọn oḅeni okumu iiruen arikpisi.

● Oḍighi aBetẹl apamạm okumu r’ophooph ologhi esi oniin olạ otu oḍighi aBugbaanaạn aJihova. Buniin abuọ eghunotu aBetẹl phọ rokumu onyen esi olhẹm arinyạ ilọ aBaibul phọ. Bunọn ongọ iiḍighi oḅeghom, idiphọ ookoḍị aruutu r’araraạr oḍighi phọ obobọ oḍighinaan ilọ ewạ pạ eghunotu aBetẹl phọ. Oomo iiḍighi phọ eḍighi roopoogh iigbia okumu ongọ aJihova. Ḅilẹ kẹn, buphẹ odi bọ Betẹl omoọgh ibo olegheri mọ torobọ ilọ bunọ oḍighi rengọ suọ ḍiboom aḍita abumor phọ abunọ oomo aḅirini phọ.

Eeni amem k’omạgh bumor lọ omoọgh emaạr okumu esi aBetẹl. Kụ olọ, ogbogh opol k’osi Betẹl kụ otughemị. Buọ aBetẹl phọ ro/kumu ghan omooghọm eelạ, kụ olọ ongọ eḍien, esi orọl r’oọny ikpoki ophoghaam aloor lọ ongọ bịn egbaanyạn nị. Oniin oḍoogh olọ eghunotu aBetẹl aghaạph ilọ arukumuan phọ odị iduọn: “Iikiạ nị! Edeọm aḍio phọ i/dugh, kụ olọ mị m’amoọgh nị ḍisẹph kirokirọ okumu isiẹn phọ.”

● Oḍighi areelhe angọ eepoogh ophinom aani odoghoḍi ilạ aruutu iiḍighi r’asị Kingdom Hall. Buọ oḍighi areelhe phọ, rokị ghạn iiruen arere odoghoḍi naan aruutu. Ophọn phọ odọ oḍighi iigbia, dị aghịgh oḍighi abuphẹ olọgh bọ otu iiḅereghị phọ aSolomon. (1 Kings 8:​13-​18) Bu iiḍighi areelhe phọ abuẹn phọ ropạm ghạn idiphọ ropạm ghạn bọ bua aBetẹl. Eḍighini eboom eepoogh dị abumọr r’abumarani phọ abuẹn phọ omoọgh okumu esi apakirị iiḍighi phọ iphẹn phọ oboomi aJihova!

Kumu aJihova r’Oomo Ekpom

Okumu aJihova kụ eten oḍighinom aghuḍum mọ anạ dị enighẹ epu. Eeghe kụ na oo/tughiạn bọ oseerian ilọ okumu Enaạn oomo-amem? Kaaphạn odẹ r’onhiin anạ, ikumoor awe phọ, r’opoghom eghir phọ, ilọ arukumuan oomo-amem mọ. Eḅeeraạn nyinạ oghị aBetẹl, Gilead, obobọ Ministerial Training School phọ, pọ kiighị rookpomoghan abulọ k’ogeạ ḍien lọ ophạm mem akonvensọn adistrikt r’ookpomoghan eghir.

U/paranaạn mọ, k/oomo awe kụ k’omạn obobọ otue okumu oomo-amem. Eeni amem e/moon, ekulom, r’adool eghunotu k’ekome ni ipẹ yira kotue bọ oḍighi. Ghalamọriduọn phọ nị, bịn oomo aKristẹn lọ m’oḅọgh loor ongọ omoọgh onaghanạn itọ aBaibul phọ mọ: “Pomoghiạn Emụgh phọ anạ r’oomo ologhi anạ, r’oomo uwaloor anạ, r’oomo iitughiạn anạ.” (Matiu 22:37) AJihova awạ mọ ḍighi oomo ipẹ asidọl anạ emeera bọ oḍighi. Esi iduọn phọ, torobọ adọl phọ anạ, gbon okumu aJihova ghuḍum mọ anạ. Seerian oteẹny raraạr itoemụgh lọ nạ k’atue. Ii, “tuutughiạn Olemiạ phọ anạ siẹn nạ odi bọ iḍoọgh phọ”—bịn k’osẹph nị nyinạ k’agee-pọ oḍighi idiphọ phọ!