Otu Ịiḅereghi Dị Ọlhoghonhaan A Jehova

Mem mọ ạ Sọlọmọn aḍighi bọ uwo ẹmha Izrẹl, a Jehova apuru ni nyọdi mọ: ‘Nạ rạwa mọ mị ụngo nyịnha eeghe?’ Ạ Sọlọmọn ạḅem mọ: ‘Mị ọbumoony, kụ mị úlegheri ịlo ophogh awe phọ ạna. Seseeny, ụngo ịmhi ọsu olhoghi dị mị kạsighe apoghom we phọ ạna.’ Pọ kụ esi dị a Jehova ạḅem mọ: ‘Loor esi ịduon nạ ụlhom bọ ịmhi ọsu olhoghi, mị kạngo nyịnha ọsu olhoghi dị apu ọlo ạtorobo oye dị odi sịen ade phọ. Kụ mị kạngo kẹn nyịnha ẹela. Kụ eḍighi mạar dị nạ ụnhaghanhan ịmhi, pọ nạ kạtol li abia.’

Ạ Sọlọmọn amhiigh ni ọlhogh otu ịiḅereghi phọ. Ọdi ạsighe gol, silva, ireeny r’asighiigh dị ẹnhighe epelheghom kụ ạlhoghom otu phọ. Ạsimuunir ạnmariir r’alhephiri dị ọmhaar oḍighi phọ kụ uḍighi oḍighi ọlhogh otu ịiḅereghi phọ. Oḍual ạsia reten bịn ọlhogh otu ịiḅereghi phọ ọmhan kụ ookolhobian ọḅogh ọngo a Jehova. Ụlhogh ni enmeny ạrikia sịphe otu ịiḅereghi phọ, kụ ọḅilhe ọḅam ạnyu ẹkpan phọ rạraar ọphinyonhom ạrikia phọ. Kụ ạ Sọlọmọn akpuḍian ghisigh enmeny ạrikia phọ kụ ạaḅereghi mọ: ‘Sey Jehova, ạḍibugh r’ẹnhighe otu ịiḅereghi phọ ọphon phọ ísi oḍighi ọlo ạna, kụolo, seseeny sịghe ni iiseeny phọ ayoor ạḅilhe ạnhaghan ịiḅereghi ayoor.’ A Jehova ạnhaghan ni ịiḅereghi phọ ạ Sọlọmọn ḍụghum? Ạ Sọlọmọn r’ọmhan ịiḅereghi phọ, bịn ạnian ẹḅua ẹpe k’ạke phọ esoor elhe rịkia phọ oseere bọ sịphe enmeny ạrikia phọ. Ịpe phọ iḍeenhaan mọ a Jehova ạsighe ni otu ịiḅereghi phọ. Kụ mem dị awe phọ Izrẹl ọmhiin ịpe phọ, bịdi ụmhoogh ni ibo.

Awe Izrẹl r’awe ịnhon arikpisi dị ẹkel ulhegheriom Uwo Ẹmha phọ Sọlọmọn ịdipho oye dị ạsu olhoghi. Awe dị ọmhoogh sighiton ụghi ghan ni ọteeny Sọlọmọn dị kạloghonhaan bịdi ḍịghaagh. Ghạlhamo r’ukuenhi phọ a Siba bịn ạghi ni apuru Sọlọmọn sipuru ọmhiin olhegheri ịyaar phọ ọdi. Mem dị ọdi ạnhaghan ịpe ạ Sọlọmọn ạphanyanhaan bọ sipuru phọ ọdi, ạḅem ni mọ: ‘Mị úmeeraam oomo ịpe awe phọ ọghaaph bọ ịlo ạna, kụolo nyịidipho mị mạmhiin r’ariḍien ạmhi mọ ịpe bịdi ọghaaph bọ ụḅenhi ịmhi ísi r’ẹraaph ịphen mị mạmhiin bọ. A Jehova Ẹnhaan phọ ạna, mạseph nyịnha.’ Ạraraar ịghi ni ịma sịphe eelhe phọ Izrẹl, kụ awe phọ ọmhoogh ọḅaal olhoghi. Kụolo ạraraar ịrol li ịduon phọ ẹghiom ghisigh ḍụghum?