Eelhe Dị Edia

Ẹepho ịrol li Izrẹl mem mọ ạ Sọlọmọn rakumu bọ ni a Jehova. Kụolo ạ Sọlọmọn aphin ni ịbadi ạnmariir dị úḍighi bụo Izrẹl. Ạnmariir phọ ạbuen phọ ụuḅereghi ghan ịkaanheen ạrumhugh. Ẹnum ẹnum bịn ạ Sọlọmọn amhiigh ọoḅereghi aani ịkaanheen ạrumhugh. A Jehova ạghagham ni olhoghi Sọlọmọn kụ ạḅenhi mọ: ‘Mị kadi ni ịtooghi phọ ạna ịyal abin, kụ mị ạngo mugbogh abin phọ oniin ẹbenhe ạna. Kụ eghun otu phọ ạna ọtooghi ọngo bin phọ aghom bọ.’

A Jehova ạḅilhe ni aḍighi ịyaar dị eḍeenhaan ịphen ọdi masopha bọ oḍighi phọ. Oniin ẹbenhe ạ Sọlọmọn dị oghol mọ Jeroboam atelhe rạki esi kụ aazuanhaan oyil phọ Ạhạịjạ. Oyil phọ Ạhạịjạ ạphanyi ni ạsuoma ọdi kụ adi 12 abin, kụ ạḅenhi Jeroboam mọ: ‘A Jehova kadi ni ịtooghi phọ ạ Sọlọmọn ịyal abin. Sịghe ḍioph ịpherepe ạsuoma phọ ạmhi loor esi dị nạ kaḍighi uwo ẹmha aḍioph arughunhughun phọ Izrẹl.’ Uwo Ẹmha phọ Sọlọmọn ạnhaghan ni ịphen phọ kụ ạwa ghan oghiigh a Jeroboam. Pọ kụ esi dị a Jeroboam aghiil asuma ạghi Ijipt. Ẹsighe rẹki bịn ạ Sọlọmọn amhugh kụ ọony ọdi dị oghol mọ Rihoboam aḍighi uwo ẹmha. Ịduon a Jeroboam ạnhaghan bọ mọ ạ Sọlọmọn mamhugh, ḅịlhe mọ a Rihoboam ọony phọ ọdi maḍighi uwo ẹmha, a Jeroboam aḅula ni Izrẹl.

Ikumor awe phọ Izrẹl ụḅenhi Rihoboam mọ: ‘Eḍighi mạar dị nạ ạzoom we phọ egey eten, bịdi kọnhaghanhan ni nyịnha.’ Kụolo ạrighiri a Rihoboam dị oḍighi iigbo ọdi ụḅenhi Rihoboam mọ: ‘Zọom we phọ ẹgbagara eten! Ḍighi ịdi bịdi kokumuan opu ịpe bịdi rokumuan bọ!’ A Rihoboam ạdaph ni oroma ạrighiri phọ ọdi. Ọdi ạzoom we phọ ẹgbagara eten kụ aḍioph phọ arughunhughun phọ Izrẹl ọgbagharan nyọdi. Bịdi ụma ni Jeroboam oḍighi uwo ẹmha ạbidi, kụ oghol ghan ḍioph phọ arughunhughun phọ ọḅar bọ Jeroboam mọ eelhe Izrẹl. Kụolo ughol ghan ịyal phọ arughunhughun phọ ọḅar bọ Rihoboam mọ eelhe a Judia. Nyịidipho, aḍioph r’ịyal arughunhughun phọ Izrẹl media.

A Jeroboam ọ́wa mọ awe phọ ọdi rạtooghi bọ ọghi Jeruselem ọoḅereghi a Jehova sịphe otu ịiḅereghi phọ ạrol bọ ẹeḍian ịtooghi a Rihoboam. Nạ alegheri ni ịyaar phọ eḍighi bọ? A Jeroboam ạatughian mọ awe phọ koḍighan Rihoboam eḍighi mạar dị ọghi ghan ẹpe phọ. Esi ịduon phọ, a Jeroboam ạka ni ịyal ạsinam kụ ạḅenhi we phọ mọ: ‘A Jeruselem ạkel ạpughan, nyinha etue ni ẹeḅereghi ẹmhugh phọ ẹphen phọ.’ Kụ awe phọ omhiigh ọoḅereghi ạsinam mọ ạkaam bọ gol phọ bịn owulha a Jehova.