A Jehova Aḍeenhaan Mọ Ọdi Kụ Egey Ẹnhaan Phọ

Ḍioph phọ arughunhughun phọ Izrẹl ụmhoogh ni ruwo ẹmha dị oḍighi ghan ịkaraph ạraraar. Kụolo oniin ọdi oghol mọ Ehạb kụ ạlhoghori apu. Ọdi aphin ọkaraph ạnhir dị oghol mọ Jẹzịbẹl dị rạaḅereghi ghan Bel. Ehạb rạ Jẹzịbẹl ụze ni ịbadi ariil a Jehova bịn omuzeḍi de phọ ịiḅereghi a Bel. A Jehova aḍighi eeghe? Ọdi arom oniin oyil ọdi dị oghol mọ Ẹlạịjạ ọghi ọteeny Ehạb.

Ẹlạijạ ạḅenhi Uwo Ẹmha phọ Ehạb mọ loor ẹkaraph eḍighinhom ịyaar phọ ọdi, ọlophia kạ́loph de phọ Izrẹl. Kụ dị epel li ịraar ạsia, ịizupha íḍum kụ ịgbakuro ẹrol de phọ Izrẹl. Ẹsighe rẹki kụ a Jehova ạḅilhe arom Ẹlạijạ ọghi ọteeny Ehạb. Uwo ẹmha phọ ạḅenhi Ẹlạijạ mọ: ‘Nạ oye dị rạkom ghan ịiḅaghamhi. Ịiḅaghamhi phọ edi bọ sịen ade phọ Izrẹl nạ kụ ụkom.’ Ẹlạijạ ạphagharanhaan mọ: ‘Mị kúḍighi bọ ịyaar phọ ọlophia phọ ụ́loph bọ. Nạ kụ uḍighi loor ịduon nạ rạaḅereghi bọ Bel. Yira kọwaaghi olegheri egey Ẹnhaan phọ. Kpookpomhoghi oomo awe eelhe phọ r’ariil phọ a Bel sịphe ạnyu Ẹeḅaraph ạ Kạmẹl.’

Oomo phọ awe phọ uukpomhoghan ni sịphe Ẹeḅaraph ạ Kạmẹl. Kụ Ẹlạijạ ạḅem mọ: ‘Isopha sịphe ilhoghi phọ anyinha ọpo aḍighi bọ egey Ẹnhaan phọ. Eḍighi mạar dị a Jehova kụ aḍighi egey Ẹnhaan phọ, pọ ịnaghanhan nyọdi. Kụ eḍighi mạar dị a Bel kụ aḍighi, pọ ịnaghanhan nyọdi. Nyịidipho yira kolegheri egey Ẹnhaan phọ. Inya okuruon r’oogh dị ariil phọ a Bel ookolhobian ẹkia kụ ọmhagh ḍien ẹmhugh phọ ạbidi. Mị kẹn kaakolhobian ẹkia kụ ạmagh ḍien phọ a Jehova. Ẹmhugh phọ ẹpe ketom bọ nịan olhe ẹkia phọ kụ egey Ẹnhaan phọ.’ Kụ oomo phọ awe phọ omheeraam.

Ariil phọ a Bel uukolhobian ni ẹkia, kụ ọmhagh ẹmhugh phọ ạbidi oomo ẹmhu aḍio phọ. Bịdi ụlo ghan mọ: ‘Seseeny Bel, ụphagharanhaan iyoor!’ Mem dị a Bel ụ́pagharanhaan, Ẹlạijạ ạmhilhogh ni bịdi kụ ạḅenhi mọ: ‘Ịlo agey. Eeni rạnaanhi ni kụ ẹwa mọ ọsumeeny nyọdi.’ Bịdi ụmhagh ni Bel tụtu adulhe ẹteeny, kụolo a Bel ọ́phagharanhaan.

Ẹlạijạ ạḅam ni ẹkia phọ ọdi sịphe enmeny ẹkia phọ kụ azuughiom mụum kụ ạaḅereghi ạḅenhi a Jehova mọ: ‘Seseeny Jehova, ḍighi ịdi awe phọ ạbuen phọ kolegheri mọ nạ bịn kụ egey Ẹnhaan.’ Eginha amem bịn a Jehova aḍighi ịdi ạnian elhe ẹkia phọ r’enmeny phọ. Kụ oomo awe phọ ọyughuron kụ ọlo mọ: ‘A Jehova kụ egey Ẹnhaan phọ!’ Ẹlạijạ ạḅenhi we phọ mọ: ‘Isiphi oomo ariil phọ a Bel, r’oniin kúkpetenhaan!’ Ḍio phọ ạḍiphe phọ, ụze ni 450 ariil a Bel.

Mem dị ọony ọotu amite ẹpe ọphiiny phọ, Ẹlạijạ ạḅenhi Ehạb mọ: ‘Ogbogh ọlophia r’oghim ratu. Gboogborion pịdi nạ ạnuun asi olhoghi otu.’ Aḍio phọ ighire ni kụ oboom oghim amhiigh oghim, kụ ogbogh ọlophia amhiigh ọlhoph. Awe phọ ubo ni loor ịduon bịdi ọmhiin bọ ọlophia phọ. Ehạb aghiilhom ni oghuugh phọ ọdi r’oomo ịnyaam ọdi. Kụolo r’ọlhoghonhaan ạḍighaagh a Jehova, Ẹlạijạ aghiil li apu oghuugh phọ Ehạb. Nạ ragbi mọ Ẹlạijạ kạ́moogh mụn ịnhon ịiḅaghamhi ḍụghum? Ọmhiin ịdi emite esi ịtuugha phọ etum bọ sịen.