A Jehova Ạkparamhi Ni Ẹlạịjạ

Mem mọ a Jẹzịbẹl ạnhaghan bọ mọ mọze oomo ariil phọ a Bel, ịkar kụ ephin olhoghi ọdi. Esi ịduon phọ, ọdi arom ni mọ ọghi ọḅenhi Ẹlạịjạ mọ: ‘Iḍuenheen, nạ ạmoogh omhugh aani ịdipho ariil phọ a Bel.’ Ẹlạịjạ ạmhoogh ni oghiilhaan mem mọ ạnhaghan bọ dom mọ a Jẹzịbẹl kụ aghiil ạghi ẹpe ẹdala phọ. Ẹpe phọ ọdi ạaḅereghi ni ạḅenhi a Jehova mọ: ‘Jehova, mẹnhighe ni. Ughiigh ịmhi.’ Loor ịduon aloor ọdi medugh bọ, ọdi ạrol ẹeḍian oreeny bịn amheel rạla.

Ọokpaany a Jehova amhiigha ni loor ạsumeeny nyọdi kụ ạḅenhi mọ: ‘Ḅetenhu alhe eḍien.’ Ẹlạịjạ ạsuma bọ, ạmhiin eeḅoghoḍi ạ brẹd dị ọḅam ạnyu ịgholhoghol iiḅu r’izoki ạmuum. Ọdi rolhe eḍien phọ r’ọḅilhe ọphughol mụum mọ bịn ạḅilhe amheel rạlha. Ọokpaany phọ ạḅilhe ni ạsumeeny nyọdi kụ ạḅenhi mọ: ‘Le ịyaar, pịdi nạ ạmoogh ịnyaam ọghimom ekpisi phọ nạ rạki bọ.’ Kụ Ẹlạịjạ ạḅilhe aḅetenhu alhe eḍien phọ. Ịpe reten kụ Ẹlạịjạ arelhe 40 aḍughul otu asi Ẹeḅaraph a Horẹb kụ aḍigh epogh dị ẹrol sịphe ẹeḅaraph phọ ọnhaanhi. Kụolo a Jehova apuru ni nyọdi mọ: ‘Ẹlạịjạ, nạ raḍighi ghan eeghe sịen phọ?’ Kụ Ẹlạịjạ ạphagharanhaan mọ: ‘Awe phọ Izrẹl úḍighi mụn ịpe bịdi oguan bọ nyịnha. Bịdi molhereghi kẹn enmeny ạrikia phọ ạna ọḅilhe ọze riil phọ ạna. Nyịidipho rụwa ghan ịmhi oghiigh aani.’

A Jehova ạḅenhi nyọdi mọ: ‘Kịa ạmheera ạnyu ẹeḅaraph phọ.’ Ẹlạịjạ ạmhiin dị oboom oghim aghim aten sịphe epogh phọ ọdi ạrol bọ. Ịpe reten kụ ade phọ ephiigha, kụ ạnian esoor mem dị ade phọ ephiigha ẹmhan. Ekureriom mọ kụ Ẹlạịjạ ạnhaghan ẹḍogh dị ẹḅaanhaan nyọdi eten dị ẹyoghoyogho, kụ ạsighe ạsuoma ọdi azuom risigh ọdi kụ ạmheera. A Jehova ạḅilhe ni apuru nyọdi ịyaar phọ eḍighi bọ kụ ọdi aghiil bọ asuma. Kụ Ẹlạịjạ ạphagharanhaan mọ: ‘Oginha ạmhi bịn kụ usugha dị rạaḅereghi nyịnha.’ Kụolo a Jehova ạḅenhi nyọdi mọ: ‘Oginha ạna bịn kụ ósugha. Awe dị ọmhan 7,000 odi ni Izrẹl dị rụuḅereghi ịmhi. Kịa ạma Ẹlạịsạ ịdipho oyil dị kạsighe esi ạna.’ Mem mem mọ bịn Ẹlạịjạ ạghi ni aḍighi ịpe a Jehova ạḅenhi bọ nyọdi. Nạ ragbi mọ a Jehova kạlhoghonhaan ni nyịnha ḍịghaagh eḍighi mạar dị nạ aḍighi ịpe ọdi rạwa bọ ḍụghum? Ii, a Jehova kạlhoghonhaan ni nyịnha ḍịghaagh. Ọmhiin ịdi emite mem mọ ọlophia phọ ụ́loph bọ esi ịtuugha phọ etum bọ sịen.