Uḅeton Ni Ọony Ekpukelhe Ạnhir Phọ

Mem mọ ọpo ọlophia phọ ụ́loph bọ, a Jehova ạḅenhi ni Ẹlạịjạ mọ: ‘Kịa ẹpe Zạrẹfạt, ekpukelhe ạnhir dị odi ẹpe phọ kạngo ni nyịnha eḍien.’ Mem dị Ẹlạịjạ raḍigh ẹmha phọ, ọdi ạmhiin ni ekpukelhe ạnhir dị aḍighi uwo ekulhom dị rạwaragha ghan ịpe. Ẹlạịjạ ạlhom ni ạnhir phọ mọ ạngo aani nyọdi mụum ọphughol. Kụ ịduon ạnhir phọ rạki bọ oḍu ạmuum mọ, Ẹlạịjạ ạḅenhi mọ: ‘Seseeny, ḅạram eeḅoghoḍi ạ brẹd.’ Kụolo ekpukelhe ạnhir phọ ạḅem mọ: ‘Mị ụ́moogh ạ brẹd ọngo ạna. Mị ạmoogh ọony ẹnum ạ flạwạ r’ạmunum ọsighe oḍighinhom ọony ạ brẹd dị mị r’ọony phọ ạmhi kole.’ Ẹlạịjạ ạḅenhi ekpukelhe ạnhir phọ mọ: ‘A Jehova maguanhaan mọ eḍighi mạar dị nạ aḍighi ạ brẹd phọ ụngo ịmhi, ạ flạwạ phọ ạna r’ạmunum mọ kémunheen tụtu ọlophia ạḅilhe amhiigh ọlhoph.’

Ekpukelhe ạnhir phọ ạghi ni olhoghi otu aḍighi ạ brẹd ạngo oyil phọ a Jehova. Kụ ịdipho a Jehova aguanhaan bọ, ekpukelhe ạnhir phọ r’ọony phọ ụmhoogh ghan ni eḍien olhe mem mọ ọlophia phọ ụ́loph bọ. A Jehova amuzeḍi ghan bịn ạ flạwạ phọ r’ạmunum mọ.

Ịphen phọ reten, kụ ịyaar dị eeph iboom emite. Ọony ekpukelhe ạnhir phọ ạarurughian ni dị tụtu amhugh. Kụ ọdi ạaḅereghian Ẹlạịjạ mọ ạlhoghonhaan nyọdi ḍịghaagh. Ẹlạịjạ ạar ri ạnhir phọ ọbumoony phọ kụ aḍighom osoph dị odi sịphe otu ạnhir phọ. Ọdi ạmhunheeny ọbumoony phọ loor ẹmhinha kụ ạaḅereghi ạḅenhi a Jehova mọ: ‘Jehova, seseeny ḅeton ọony phọ ọphon phọ esi aḍuugh.’ Keḍighi ni ẹekia ịyaar eḍighi mạar dị a Jehova aḅeton ọony phọ esi aḍuugh, loor esi dị kőḅeton ghan oye esi aḍuugh. Kụ ekpukelhe ạnhir phọ r’ọony phọ ọdi, kạ́buo Izrẹl.

A Jehova ạḅilhe ni ạngo ọony phọ ghuḍum kụ ọony phọ aḅetenhu ạmheera! Ẹlạịjạ ạḅenhi ekpukelhe ạnhir phọ mọ: ‘Mịin, ọony phọ ạna maḅetenhu!’ Olhoghi ạnhir phọ ạḅaal li iboom kụ ạḅenhi Ẹlạịjạ mọ: ‘Nyịidipho mị mạkar alegheri mọ nạ oyil Ẹnhaan. Mị ulhegheri ịphen phọ loor esi dị ịpe a Jehova ạḅenhi bọ nyịnha bịn kụ ẹdi nạ rạkaaph ghan, kụ ịlo nạ ạghaaph rẹtuugh ghan ni kemite.’