Ụlhiom Ni Ọkaraph Ukuenhi

Uwo ẹmha phọ Ehạb ạrol li eghuugh ookuugh ọdi ạmhiin ozo ạ vạịn oye dị oghol mọ Nebọt. Ehạb ạwa ni ogho ozo phọ kụolo a Nebọt ómheera loor esi dị a Jehova ạto mọ ọlo Izrẹl kúbool ghan de dị ọdi alhe erua. Olhoghi Ehạb ạḅaal li loor ịduon a Nebọt úmeera bọ uḍighi ịyaar dị ẹgbagh ịto a Jehova ḍụghum? Eeye. Ehạb ạghagh ghụn olhoghi bịn ómheera omite osoph ọdi, kụ eḍien ómheera olhe.

Ọkaraph ạnhir dị Ehạb aphin dị oghol mọ Jẹzịbẹl, ạḅenhi ni Ehạb mọ: ‘Nạ kụ uwo ẹmha Izrẹl. Nạ ạkpe ni ọmhoogh ạtorobo ịyaar lọ nạ rạwa. Mị kaḍighi ịdi nạ kạmoogh de phọ.’ Ạnhir phọ Ehạb ạge ḍịnya ạghiom ikumor awe ẹmha phọ, kụ ạḅenhi bịdi mọ ọgba ọkpe ọḅam ẹmhu a Nebọt mọ atonyon Ẹnhaan kụ oroḅol ikpo oghiigh. Ikumor awe phọ ụtuugh ni ịpe ạ Jẹzịbẹl ạghaaph bọ oḍighi. Kụ ạ Jẹzịbẹl ạghi ạḅenhi Ehạb mọ: ‘A Nebọt mamhugh. Ozo ạ vạịn phọ ọdi maḍighi ọlo ạna.’

Ạ Jẹzịbẹl ạḅilhe ni ạze bụnhon awe dị ịkaraph úḍighi r’ịbadi ạbunhon dị ọphomhoghian a Jehova. Ọdi ạaḅereghi ghan kẹn ni ịkaanheen ạrumhugh ạḅilhe aḍighi ghan ịnhon ịkaraph ạraraar. A Jehova ạmhiin ghan ni ịkaraph ạraraar phọ ạ Jẹzịbẹl aḍighi yogh ghan bọ. Nạ ragbi mọ ọdi kaḍighi ni ịyaar ḍụghum?

Ehạb amhugh ni, kụ ịduon amem rẹki bọ ọony ọdi dị oghol mọ Jehorạm aḍighi uwo ẹmha. A Jehova arom ni oye dị oghol mọ Jihu ọlhiom ạ Jẹzịbẹl r’eghunotu phọ ọdi.

A Jihu aḍigh ni oghuugh ẹgham anyeenhe Jẹzrịẹl, ọghi ọteeny ạ Jẹzịbẹl. Kụ a Jehorạm aḍigh oghuugh ẹgham ạghi ạteeny Jihu eten, kụ apuru mọ: ‘Nạ atu ni r’ẹepho?’ A Jihu ạphagharanhaan mọ: ‘Ẹepho kétue ẹtol loor ịduon onhiin phọ ạna Jẹzịbẹl raḍighi ghan bọ ịkaraph ạraraar.’ A Jehorạm aaghiremhi ni oghuugh ẹgham mọ ọdi osuma. Kụolo a Jihu ạraph ni ẹkpinha a Jehorạm bịn a Jehorạm amhugh.

Ịpe reten kụ a Jihu anyeenhe ẹpe otu phọ ạ Jẹzịbẹl odi bọ. Mem dị ạ Jẹzịbẹl ạnaghan mọ a Jihu ratu, ọdi ạmaar ri aanmenan, aselhemian sịlhaal ọdi kụ ạrol sịphe eghuugh ookuugh phọ edi bọ ẹpe otu ạnyu phọ ọdi akori ghan. Mem dị a Jihu asi sịphe otu phọ, ạ Jẹzịbẹl ạḅaanhaan ni nyọdi r’ịgbagara ikpo ọnhu. Kụ a Jihu ạlo ạḅenhi rẹbenhe phọ ọmheera bọ otuman Jẹzịbẹl mọ: ‘Itoph nyọdi ude!’ Kụ bịdi osiph Jẹzịbẹl oroph ude kụ ọdi amhugh.

A Jihu ạḅilhe ni ạze oḍual dị ạnmuny Ehạb r’ạbuphe ọoḅereghi ghan bọ Bel. Ịphen phọ eḍeenhaan mọ a Jehova rạmiin ghan ni tọrobo ịyaar dị remite, kụ mem dị ẹkasian ọdi rạliom ghan ni we dị roḍighi ghan ịkaraph ạraraar.