A Jehova Ạlhoghonhaan Ḍịghaagh Jehosạfạt

A Jehosạfạt uwo ẹmha phọ a Judia aphiemhi ni renmeny ạrikia phọ a Bel r’ịkaanheen ạrumhugh phọ ẹrol bọ Judia. Ọdi ạwa ghan mọ awe phọ a Judia ọtuugha iilhogh phọ a Jehova kụ ọḅilhe ooko. Esi ịduon phọ, ọdi arom buḍiemhiom mọ a Judia r’ạbuo a Livạị phọ ọghi ọtughemhi iilhogh phọ a Jehova we phọ.

Areelhe phọ otuman bọ Judia ughiilaan ni ọghi ozuom awe phọ a Judia loor esi dị ulhegheri mọ a Jehova odi ni r’awe phọ a Judia. Esi ịduon phọ, unmo ghan ruunmo Uwo ẹmha phọ Jehosạfạt. Kụolo awe phọ Ạmọn ra Moạb, r’ạbuo a Sai phọ ụghi ni ozuom we phọ a Judia ẹgham. A Jehosạfạt alhegheri ni mọ ọdi amoghi ni ọlhoghonhaan ạḍighaagh a Jehova. Kụ iḍighi kụ ọdi aakpomhoghi oomo alhephiri ạnmuny r’ạnmariir r’ịbam ạnmuny sịphe Jeruselem. Sịphe ogbo phọ ạbidi, ọdi ạaḅereghi mọ: ‘Jehova, eḍighi mạar lọ nạ iyoor ụ́lhoghonhaan ḍịghaagh, pọ yoor kótue ọkpar opu. Seseeny, ụḅenhi iyoor ịlo yoor koḍighi.’

A Jehova ạphagharanhaan mọ: ‘Kékiilaan. Mị kịlhoghonhaan ni inyinha ḍịghaagh. Ịmeregha sịphe ariisi phọ anyinha, ekori, kụ ẹmhiin ịdi mị kịphel inyinha.’ Ika kụ ẹdi a Jehova ạphel bọ bịdi?

Ḍịroor ạḍieripho aḍio phọ, a Jehosạfạt ạsaḅar bụmoor sụor kụ ạḅenhi bịdi mọ oḍia ghisigh kụ ạbuo ẹgham mọ otum bịdi. Kụ bịdi ọḍua Jeruselem orelhe osi erugh ẹgham dị oghol mọ Tẹkoa.

Ịduon ạbumoor sụor phọ rọmoor bọ r’ẹḍogh dị ẹghi ạnyu koboom a Jehova r’ọḅaal olhoghi, a Jehova eenhaan ni we phọ a Judia. Ọdi ạgbaragbaramhi we Ạmọn r’awe a Moạb phọ. Bịdi úlegheri ịlo oḍighi kụ omhiigh ọzean asiloor dị r’oniin úsugha. A Jehova aghoph ni oomo awe phọ a Judia. Mem mọ areelhe phọ orugh bọ otuman Judia ọnaghan bọ ịpe emite bọ, bịdi ulhegheri ni mọ a Jehova rakoph ni we phọ ọdi. Kụ a Jehova rạsighe ghan ni ịbadi areten kọphelhom we phọ ọdi. Kụ ọdi rámoghi ghan ọlhoghonhaan ạḍighaagh awe oḍighi ịduon phọ.