December

Eḍighi maạr dị yira opiọm ooḅakị anẹm mọ ayira, kekọm igbogh iiḅaghamhị ingọ iyira. Esi omaạm, mem dị nạ azuan oye dị odi ekpisi dị osophom oḍighi phọ ayira, nạ rasoman ghan ni odẹgh ophogh opuru k’anhị k’alhe ipẹ okạr bọ roḍighi oḍighi ph’ayira epẹ phọ ḍughụm? Iikia i/lo, iitughiạn phọ anạ enighẹ ni. Yira opomoghiạn bumor ph’ayira, kụ omoọgh ogbolhomaam ilọ ipẹ remitenhaan bọ bidị. Ḅilhẹ yira rowạ olhegheri ekạr iyaạr oghol kụ ooḅereghinhaạn abidị. Toroboiperolbọ, ophọn phọ amem dị ekpẹ oḅoorian. Kụ iḍighi kụ, eḍighi maạr dị nạ akpaariọm onyọ umor oghaạph araraạr dị i/wạ mọ onhọn oye anhaghạn, pọ nạ o/ḍeenhaan ephomhoghiạn oye phọ r’abumor r’abumarani phọ oḍuom bọ nyodị olhoghi mọ kabooghị ni iinhaghạn ilọ iiḍighi phọ. Okạr agey, onyọ ayira o/lho dị kawạ oḍighi idị kekparanhaạn bumor r’abumarani dị odiighi reelhe dị osophoghom rukumuan phọ ayira. Ḅilhẹ kẹn, Ke/nighẹ dị onyọ umor obobọ umarani dị rakumuan eelhe dị osophoghom oḍighi phọ ayira, kakaạph aḅenhị bunhọn ipẹ Abugbaanhaạn phọ ropạm ghan bọ rukumuan phọ epẹ phọ. w20.03 21 ¶11-12

Enhaạn o/lhẹm oye m’amhugh ghan. Kuolọ orue orọl k’agee-pọ, pọ iwạ m’Adạm r’Iv onhaghanhạn itọ phọ ipẹ aZihova aḅenhị bọ bidị mọ: “Idị egbolhomaam oreeny olhegheri iyaạr igey r’ikarạph phọ, nyinha ke/le, ḍio phọ aḍiphẹ nyinha kele bọ nyinha k’ekạr ri kụ emugh.” (Gen. 2:16, 17) Kụ aSetan abaraghian aru asi. Dị asighẹ aḍighinhom ekarạph iyaạr phọ, aḅenhị Iv ikpo onhụ ibạl arodon phọ. Dị eeph ni iboom, Iv amheeraam ni okpẹ phọ bịn akụ eemuma phọ alhe. Onyebeel roten olom mọ odị aạr eemuma phọ alhe aani. (Gen. 3:6) Esi iduọn phọ kụ edị ikarạph r’aḍuugh eteẹny bọ omhạr awe. (Rom. 5:12) Adạm r’Iv umhuughu ni, idiphọ Enhaạn aḅẹm bọ. Kuolọ ghalamọ r’iduọn phọ ni aSetan ko/wilhẹ ogbaaghị okpẹ ilọ aḍuugh. Esighẹ rekị bịn, odị amhiigh ogbaaghị okpẹ kirokirọ. Oniin okpẹ phọ p’itughemhị phọ eḅẹm bọ mọ: iyaạr edi ghan ni dị reḍuạ ghan kegheel omhạr iḍim mem dị aḍizu phọ emhugh. Okpẹ phọ ophọn phọ m’amaraghiạn okpẹ kirokirọ ḍi reekelheghi simuunịr awe k’aḍio arodon.—1 Tim. 4:1. w19.04 14-15 ¶3-4

Ibạm anmụny ko/kạr omaạr ilọ ootughiạn, osopha, obobọ olhọgh elhegh iiḅaghamị bịn ogbọl. Kụ iḍighi kụ edugh ni dị oye kaakeleghi bidị bịn abiighi. Abuọ ibiighi phọ rotughemiọm ghan ibạm anmụny phọ okpẹ mo; ibạm anmụny phọ kụ edị kokpalạm, mọ ku/kaạph uḅenị oye, mọ oye ka/meeraam bidị, obobọ mọ orolạn esi igbo obumoọny r’okumor oye pọ eḍeenhaan ephomoghiạn. Kesighẹ ni ibadị asiạ kụ obumoọny phọ agbi olhegheri mọ oomo ipẹ phọ eḍighi okpẹ. Odọ obumoọny phọ ophọn katue ni aatughiạn ghan mem lọ amanạm mọ onọ, maapuạn, ḅilhẹ mọ onọ o/kpeanaạn ophomoghiạn obobọ oodereghị. Iikia i/lo, ibiighi rekọm ghan iiḅaghamị dị ko/tue obula. Yira odi ruukuna amem mọ, mem dị awe “ko/moọgh ghan igbiririph” ḅilhẹ r’amem dị “abuḍighinom ikarạph r’awe iigbegheḍiom koIoghorị ghan ni bịn.”—2 Tim. 3:1-5, 13. w19.05 15 ¶7-8

Ighẹn areten kụ idị aZizọs atughemị ghan bọ? Eḅẹl phọ, odị atughemị ghan esi ikpo onhụ. Ikpo onhụ phọ odị imhoọgh iikpọ agey loor esi dị odị aghaạph ghan igey phọ ilọ Enaạn, odị atughemị ghan iyaạr phọ otụ bọ kụ olhẹm oye, kụ amạ ghan mọ Omhạr k’Enaạn bịn kụ katue asiemi eekuna oomo iminimiịn phọ omhạr awe. (Luk 24:19) AZizọs atughemiọm ghan kẹn esi oḍighi oḍeenhaan. Dị eego esi adọl aghuḍum mọ odị, odị aḍeenhaan ni bumatuạn phọ odị idị ekpẹ orọl. (Jọn 13:15) Pụr amem kụ edị aZizọs atughemị ghan bọ? Odị atughemị ghan mem mọ odị arọl bọ siẹn ade phọ. (Mat 4:23) Odị aḅilhẹ kẹn atughemị bumatuạn phọ odị, oọny ekula amem mọ oḅeton bọ nyodị. Esi omaạm, odị amitenaan ni egu abumatuạn—dị eeni ropel li 500—kụ angọ bidị itọ mọ ‘oḍighi we bumatuạn’ onọ. (Mat. 28:19, 20; 1 Kọr. 15:6) Idiphọ oḍiemiom ookpomoghan phọ, aZizọs akiọm ni ghisigh ratomoghiom bumatuạn phọ odị ghalamọ r’iduọn odị m’agheel bọ ni k’akẹ. Esi omaạm, igbo asiạ phọ 96 C.E., aKraist aaḅaakị ni otelhedom mọ Jọn oghi okparamị ḅilhẹ r’oroma aKristẹn phọ abuphẹ osagharạn bọ uwaloor phọ.—Kọl. 1:18; Ogan. 1:1. w19.05 3 ¶4-5

Ḍio arodon, ibadị awe rokumuan ghan ni iboom omhoọgh aani ikpoki orolhọm. Ibadị abumor ayira rokumuan ghan ni iboom awạ orue omiteom ipẹ rewạ bọ ongọ arughunotu abidị. Resighẹ ghan ni erubal abunhọn iboom awạ oḍuạ oghị r’origheel aruutu iiḍighi abidị. Ologhonaạn aḍighaạgh siloor, ibadị roḍighiyogh ghan igbagarạ iiḍighi. Eekuna aḍio phọ, asiloor abumor r’abumarani phọ abuẹn phọ redugh ghan ni! Ibadị ro/moọgh ghan mun r’eẹny inyaạm otuughaạm aḍinyạ. Toroboiperolbọ, yira omoọgh omiteom amem otuughạ ghan aḍinyạ,—okuamị otuughạ—Ekpo onhụ phọ Enaạn ḅilhẹ r’arinyạ phọ ayira. Asiya phọ ayira r’aZihova ḅilhẹ r’aghuḍum k’agee-pọ phọ ekpasị esi ituughạ phọ ayira! (1 Tim. 4:15) Abuniin roḅetenu ghan eḅon aḍiroọr torobọ aḍio kụ otuughạ mem dị ariisi mephooghị ḅilhẹ bidị mosereghian, iduọn bidị monaanị bọ osumạ. Abunhọn omoọgh mem dị ephọ dị oseerean siphẹ eekuna aḍio phọ aạl ḅilhẹ rogbiran Ekpo onhụ phọ Enaạn. w19.05 26 ¶1-2

Onmia phọ ophọn phọ ra/mite ghan ekperenom; dị i/kuph u/lọgh. Kewạ ni dị yira kolọgh ikuph ‘okparamị ḍighaạgh’ ibadị asiạ. (2 Pit. 1:5) Ewạ dị torobọ onyọ ayira kalọgh ikuph dị emanạm onme oye olhoghi phọ ayira. Aradạ edi ni dị yira omhoọgh ogbariọn olhoghonhaạn ayira ḍighaạgh onmia. Iiḅereghị kụ eḅẹl iyaạr dị ewạ mọ oḍighi. Ewạ m’otuughaạny aani okọ suọr phọ aaḅereghị bọ mọ: “Lẹm alhọgh loor amị ekpom dị esererẹ, Sey Enaạn, kụ alhọgh loor amhị omhoom uwaloor, odị amhiigh.” (Ps. 51:10) Yira kolọgh elhegh mọ ewạ ni onme oye olhoghi phọ ayira, kụ olọm ologhonaạn aḍighaạgh aZihova. Ogbirima kụ iyaạr dị emuneniom iyạl dị ewạ mọ oḍighi. Mem lọ yira omiigha loor aạl Ekpo Onhụ phọ Enaạn torobọ aḍio, ewạ ni dị yira kolọgh mem ogbirima ghan obobọ okuamị ootughiạn ghan ilọ iitughiạn r’ologhoma dị ewạ mọ onme. (Ps. 119:59; Hib. 4:12; Jems 1:25)Yira olhọgh elhegh torobọ iitughiạn ayira dị rewạ oghịgh iitughiạn aḅirini phọ. Ewạ dị yira kolegheri ḍidugh ayira kụ okparaghạ onmia. w19.06 8 ¶1; 10 ¶10; 12 ¶11-12

Mem dị nạ rasopha osopha, seere ghan mem dị nạ kasighẹ aḍighinhom ipẹ nạ masopha bọ, kụ ka/nme. Kel oḅẹm ghan mọ amem k”eghị ipẹ nạ agbiighi bọ oḍighi phọ; legheri mọ amem mọ ke/tue ni bịn enighẹ epu siphẹ. (Eccl. 11:4) Miigha loor, ka/meera araraạr dị i/kạr imoọgh maạr oḍighinhom esighẹ mem r’inyaạm dị nạ kaḍighinhom iphigh araraạr. (Fil. 1:10) Edugh pọ saḅạr mem dị awe nyinhạ koo/ḅaghamhị. Ḍighi idị abueriphọ awe phọ kolegheri mọ nạ o/kạr omoọgh eepoogh. Nạ atue ni aḍime fon anạ ḅilhẹ kẹn abilhẹ oophoghogh asidom akomputa r’umoore afon mem mọ amuphẹ phọ. Ipẹ keḍuạ bọ emite esi osopha phọ anạ ekịgh idiphọ amem dị nạ rakị erelhe. Oḅẹm mọ nạ aḍuạ rakị kụ nạ amhiịn mọ moḍue eten phọ, nạ katue ni bịn agbạl enhọn eten akị asi ekpisi phọ nạ rakị bọ. Eniin phọ kẹn ni, eḍighi maạr dị yira ogbon ghan imạ phọ ipẹ osopha phọ ayira kekọm bọ emiteom, iyira ki/phẹr ghalhamọ r’amem dị yira osoman ipaanhaạn.—Gal. 6:9. w19.11 30 ¶17-18

Eeghe kụ ekpanạ ephigh iyaạr phọ nạ katuạn bọ aḍiiny muụm? Nạ matuughạ ni ibadị araraạr ilọ aZihova siphẹ ituughạ aBaibul phọ anạ,—ilọ odọ oye phọ odị aru bọ ḅilhẹ r’eten phọ epẹ odị raḍighi ghan bọ raraạr. Ipẹ nạ matuughạ bọ ilọ odị kụ iḅọgh ekpom anạ, eḅilhẹ enyu nyinhạ ophomhoghiạn odị. Ephomhoghiạn phọ epẹ nạ aphomhoghiạn bọ aZihova kụ eḍighi ekpanạ iyaạr phọ nạ atụ bọ kụ raḍiiny muụm. Enhọn ephigh iyaạr phọ nạ atuạn bọ kụ asopha oḍiiny amuụm pọ igey aBaibul phọ ipẹ nạ matuughạ bọ alhegheri. Ooḅeghiọn ipẹ aZizọs aḅẹm bọ mem mọ angọ bọ butelhedom mọ odị oḍighi iphelhegbeel Omhạr phọ. (Mat. 28:19, 20) Odaphạn ikpo onhụ phọ aZizọs, buphẹ koḍiiny bọ muụm mọ koḍiiny “esi aḍien Odẹ phọ, r’Oọny phọ, r’uwaloor iigbia phọ.” Iphẹn phọ remạ ghan eeghe? Remạ ghan mọ nạ kameeraam r’oomo ekpom anạ igey phọ ipẹ aBaibul phọ aghaạph bọ ilọ aZihova, Oọny phọ odị Zizọs, ḅilhẹ r’uwaloor iigbia phọ. Igey phọ iphẹn phọ emoọgh iikpọ agey, kụ ketue ni eḅọgh ekpom anạ. w20.03 9 ¶8-9

AZihova o/rom ruukpaạny oghị ophụr arurụ Lọt bịn, kuolọ oghị ologhonaạn aḍighaạgh nyodị okpetenaan amuphe phọ aSodọm. (Gen. 19:12-14, 17) Iniin phọ kẹn ni, eeni kemoghi ni dị yira kopụr rurụ onyọ umor dị rakị oḍigh esi iiḅaghamị. Ghalamọ iḍighi ni edị odị uu/gboron usighẹ uḍighinom oroma aBaibul dị ongọ, pọ ewạ ni okparạm. Tọl idiphọ iyạl phọ aruukpaạny phọ. Kparipẹ roḍuraan oḍuạ esi umor phọ ayira, ophogh ghụn reten dị yira kologhonaạn ḍighaạgh. (1 Jọn 3:18) Ewạ ni dị yira kongọ ḍighaạgh ayira mọ odị akpạph, esi omaạm, kụ ologhonaạn nyodị ḍighaạgh osighẹ oḍighinom imạ oroma phọ ongọ bọ nyodị. AZihova mutue ni agbon sipiomạn phọ aLọt. Kuolọ o/ḍighi idiphọ, odị aphum ghụn otelhedom mọ aPita oghaạph ilọ aLọt idiphọ oye elhiom eḍighinhom iyaạr. (Ps. 130:3) Yira kotue ni otuughaạny aani eten phọ epẹ aZihova aphogh bọ Lọt ḍughụm? Yira ogbon ghan ghụn imạ araagharạ abumor r’abumarani phọ ayira, pọ yira kotue ni okparaghạm ghan bidị. Bịn kẹn medughanaan bidị orue osighẹ ologhonaạn aḍighaạgh dị yira ongọ. w19.06 21 ¶6-7

Eḍighi maạr dị itooghị ekpisi phọ nạ odi ghan bọ kụ osophoghom iiḅereghị phọ ayira, olhoghi anạ atue ni aḍigh oḍuạ oghị enhọn eelhe dị eereẹgh edi orọl okumu aZihova. Ophọn phọ aḍighi osopha dị nạ r’aloor kụ kasopha, oye kụ nyinhạ ka/ḅenị ilọ oḍighi. Toroboiperolbọ, tutu nạ kasopha ilọ oḍighi, pọ tuughạ ni ilọ ipẹ aKristẹn oḅẹl okuron asiạ phọ oḍighi bọ mem mọ bidị osoman bọ igbiphoghọm mọ.Abumatuạn phọ abuphẹ orọl bọ epẹ Zeruselem usumughu ni oghelheghu epẹ Zudia r’aSameria ḅilhẹ r’epẹ Einisia r’aSaiprọs, r’Antiọk. (Mat. 10:23; Iiḍighi 8:1; 11:19) APọl aḍighi ni iyaạr mem mọ oḅilhẹ bọ rogbiphoghọm Kristẹn oḅẹl okuron asiạ phọ, otelhedom mọ aPọl asopha ni mọ onọ ka/ḍuạ rokool phọ ipẹ osophoghom bọ oḍighi iphelhegbeel phọ. (Iiḍighi 14:19-23) Yira otuughạ eeghe esi iphẹn phọ? Torobọ oḍiemiom eghunotu amoọgh osopha mughumọ ekpẹ ni dị bidị koḍuạ obobọ i/kpẹ. Kụ nạ odẹ phọ agbi osopha, miigha ni loor aaḅereghị aḅilhẹ aatughiạn dọl eghunotu phọ anạ ḅilhẹ r’ipẹ ketir bọ bidị eḍighi maạr dị nyinha egheel enhọn ekpisi. Yira ku/sophonhaan oye ooruẹn mem dị oye asopha idị odị kaḍighi, ilọ iphẹn phọ. w19.07 10 ¶8-9

AZizọs uḅenhị iyira mọ ‘ikị oomo areelhe aḅirinhi phọ eḍighi we bumatuạn amhị.’ (Mat. 28:19) Epel otughemhị oye phọ ilọ ipẹ aZizọs rawạ bọ ḍighaạgh abumatuạn phọ odị, ewạ dị yira kologhonhaạn ḍighaạgh oye phọ olhegheri ilọ orọl idiphọ ogey onyọ aKristẹn. R’okparạm ni yira kologhonhaạn nyodị ḍighaạgh idiphọ odị rakparaghạ bọ osighẹ asinị iilhogh aBaibul phọ oḍighinom. Abuniin ronmeeghi ghan ni iitughiạn r’aroozọ phọ abidị esi iyạl ikpo unwanyụ bịn, kuolọ bunhọn resighẹ ghan ni mem.Oniin onyọ amisonarị epẹ Peru aghaạph idị emitenhaan nyodị, dị eḍeenhaan odọ idị okparạm katue akọm imạ emiteom. Odị aḅẹm mọ: “Siẹn iyạl arinyạ mị matughemhị bọ Raúl. Kuolọ odị aḅilhẹ ni amoọgh iboom ipaanaạn siphẹ adọl aghuḍum mọ odị. Iiḅaghamhị irọl li siphẹ apinien phọ odị, aḅaaghị ghan igbagarạ ikpo onhụ, ḅilhẹ anmụny odị u/lọgh ghan nyodị eegu. Ghalhamọ r’iduọn phọ ni, odị o/wilhẹ ghan oru ituughạ, kụ iḍighi kụ mị ughiọm ni ghisigh aghị ghan aphogh nyodị r’eghunotu phọ odị. Iraạr asiạ meten ni esighẹ k’amem mọ yoor olhegherian bọ, kụ odị agbi oḍiiny amuụm.” w19.07 15 ¶3; 19 ¶15-17

Ooḅeghiọn omhiịn ipẹ aPọl akuọm bọ loor mem mọ odị agẹ bọ ḍinyạ phọ aghiọm we phọ aFilipai. Odị arọl ikoli olhoghi otu epẹ Rom. Idị odị kakị akaạph iiḅi iinhaghạn phọ i/tọl. Ghalhamọ r’iduọn phọ ni, odị angọ ghan ni ogbaanhaạn we lọ oghị ophogh odị, aḅilhẹ agẹ ghan rinyạ aghiọm rookpomhoghan dị ekelọgh ni iboom. APọl alhegheri ni mọ idiphọ aKraist, odị amoọgh okparamhị aloor odị tutụ k’epẹ eekunha phọ. Pọ kụ iyaạr phọ odị asighẹ bọ dọl aghuḍum onyọ aKristẹn atomaạm eghiil. (1 Kọr. 9:24-27) Okiilom eghiil ragbon ghan oghiil oteẹny aḍiigbu phọ bịn ra/wạ ghan mọ iyaạr egbaragbaramhị nyodị. Esi omaạm, abukiilom eghiil igbogh aramhạ aḍio arodon, rokiil ghan ni ekpisi dị romuul ghan ḍighi ḅilhẹ inhọn araraạr dị ketue ni egbaragbaramhị oye edi. Nạ ragbi mọ oye dị rakiil eghiil katue ni ameerạ okiririom ophogh iyaạr lọ omiteom esi ibool? Eeye, eḍighi maạr dị rawạ ni owin! Siẹn eghiil aghuḍum mọ, ewạ ni dị yira kokel raraạr dị kigbaragbaramhị iyira. Eḍighi maạr dị yira ogbon ḍiigbu phọ ayira, okparamhị siloor ayira idiphọ aPọl, yira koteẹny ni ḍiigbu phọ! w19.08 3 ¶4; 4 ¶7

Mem dị yira osopha orọl idị eḅeeraạn Enhaạn, rekparanhaạn ghan ni buọ asiya phọ ayira onhaghanhạn omhoom omheeraam mọ r’adọl aghuḍum mọ ayira. Ibadị amem, bidị ropụr ghan komiịn mọ yira ro/ḍighan ghan mun bidị olheeghi arayaạl ḅilhẹ r’imirighan itooghị. Ibadị abuọ asiya ayira otue ni ughaghạm iyira olhoghi eḅẹl amem mọ. (Mat. 10:35, 36) Kuolọ yira ku/ḅonyonhu uzuan. Eḍighi maạr dị yira owilhẹ olhoghonhaạn abidị ḍighaạgh onhaghanhạn omheeraam mọ ayira, pọ yira mosoph ooruẹn ongọ bidị idiphọ awe dị u/kpeanhaạn omhoọgh aani aghuḍum k’agee-pọ. AZihova iyira u/ngọ oḍighi oogbonhaan awe iiruẹn—odị angọ oḍighi phọ opọ phọ Zizọs. (Jọn 5:22) Yira omhoọgh okparạm, eeni esighẹ rekị abuọ asiya phọ ayira konaghạn ni dom mọ ayira. We need to be firm but tactful, even if we must endure trials. (1 Kọr. 4:12b) Etue ni esighẹ mem kụ abuọ asiya phọ ayira ogbi okạr omhiịn idị okumu aZihova amhạn maạr esi ayira. w19.08 17 ¶10, 13; 18 ¶14

“Mem dị mị aatughiạn odẹgh ophogh phọ mị asoman bọ, mị ulhegheri ni mọ inyaạm amhị bịn obọ mị mu/tue ukaran.” Nạ maḅẹm aani ghan ni ikpo onhụ phọ ipẹ phọ ḍughụm? Ibadị ayira moḅẹm ghan ni. Eeni nạ uḅẹm iduọn phọ mem dị nạ aatughiạn idị nạ arue akaran egbagarạ e/moon obobọ mem dị oye dị nạ aphomhoghiạn amhugh. Mem dị nạ aatughiạn ipẹ nạ arue bọ akaran iiḅaghamhị phọ, nạ kamiịn ni mọ uwaloor iigbia phọ aZihova kụ angọ bọ nyinhạ “oomo iikpọ phọ” ewạ bọ, orue okparạm. (2 Kọr. 4:7-9) Yira omoghi kẹn uwaloor iigbia phọ, orue okaran inyuughiom okarạph aḅirinhi phọ ophọn phọ. (1 Jọn 5:19) Ḅilhẹ kẹn, kewạ ni mọ yira eenan “ikarạph aruwaIoor phọ.” (Efẹ. 6:12) Uwaloor iigbia phọ aZihova rulhoghonhaạn ghan iyira ḍighaạgh, esi ongọ ayira iikpọ phọ obobọ inyaạm mọ rewạ bọ oḍighi atorobọ iyaạr lọ isi iyira, etigheri odẹgh ophogh kirokirọ. Otelhedom mọ aPọl alhoghoma mọ obeḍenhọm “iikpọ phọ aKraist” kụ ilhoghonhaạn nyodị ḍighaạgh oghiọm aghisigh okumu aZihova kụ omuneni oḍighi phọ odị etigheri ipaanaạn.—2 Kọr. 12:9. w19.11 8 ¶1-3

ABaibul phọ bịn kụ aḍinyạ dị ephamhanhạm igey ilọ ipẹ aZizọs maḍighinhaan bọ nyinhạ. Tuughạ ilọ ophomhoghiạn aZizọs, bịn ephomhoghiạn phọ anạ esi aZihova kepoph ni. Utụ eeghe kụ oḅẹm bọ iduọn phọ? Loor esi dị aZizọs aaghironhaan raagharạ Odẹ phọ odị bịn ḅeer amadạn. Esi iduọn phọ, mem dị nạ akuamị atuughạ ilọ aZizọs, kelhoghonhaạn nyinhạ ḍighaạgh onhaghanhạn ḅilhẹ r’osereghiạn aZihova. Tuutughiạn odọ igbiririph dị aZizọs aḍeenhaan buphẹ ophogh bọ osooromi, rukulom mọ, buphẹ u/moonogh bọ, r’abuphẹ odugh bọ. Tuutughiạn kẹn ilọ imạ oroma phọ odị angọ bọ nyinhạ ḅilhẹ r’ipẹ adọl aghuḍum mọ anạ enighẹ bọ mem mọ nạ asighẹ bọ oroma phọ aḍighinhom. (Mat. 5:1-11; 7:24-27)Ephomhoghiạn phọ nạ amhoọgh bọ aghị esi aZizọs kepoph ni mem dị nạ aghiọm ghisigh aatughiạn ghan ilọ ekiạ phọ aZizọs aphighirọn bọ obọ osạr ikarạph ayira uwilhenhaạn iyira. (Mat. 20:28) Mem dị nạ anhaghanhạn mọ aZizọs amheeraam ni omhughanhaan anạ, etue ni enyu nyinhạ okiton esi ikarạph phọ anạ kụ olhọm aZihova osạr owilhenhaạn. (Iiḍighi 3:19, 20; 1 Jọn 1:9) Iduọn nạ aphomhoghiạn bọ Zizọs r’aZihova, kenyu nyinhạ oḍuraan otuman awe dị ophomhoghiạn aani aZihova r’aZizọs. w20.03 5-6 ¶10-12

Onyọ umor katue ni bịn amiigh ootughiạn mọ onọ kụ akạr asianhaan oḍighi iniin iiḍighi siphẹ ookpomhoghan phọ. Obobọ onyọ umarani katue ni aatughiạn mọ, ‘Obọ olom amhị kụ akạr akpeanhaạn oḍighi opeẹr oḍighi!’ Toroboiperolbọ, yira osooromhi loor k’ekpom, yira kokel li uwaloor iibaga. Yira kotue otuughạ iyaạr esi eten phọ epẹ aMozis azọ bọ mem dị abunhọn omhoọgh aani eepoogh arukumuan. AMozis asereghiạn ni oḍighi oḍiemhiom eelhe phọ Izrạl. AMozis azọ ika mem mọ aZihova angọ aani bọ bunhọn eepoogh okumuan r’odị? I/pin olhoghi odị. (Num. 11:24-29) Mem dị rokaạph ilọ oogbo iiruẹn, r’osooromhi aloor odị amheera ghan ni mọ abunhọn awe olhoghonhaạn nyodị ḍighaạgh. (Ex. 18:13-24) Iphẹn phọ keloghonhaạn ḍighaạgh dị konuụn ghan oogbo iiruẹn ongọ we phọ. Iphẹn phọ eḍeenhaan mọ, aMozis amhoọgh ḍiḅeeraạn awe phọ apuemhi eepoogh arukumuan phọ odị. P’eeghe imạ eḍeenhaan! Eḍighi maạr dị yira okạr rowạ mọ aZihova usighẹ iyira aḍighinhom, pọ ewạ osooromhi aloor kparipẹ r’aḍighalhanyạ. w19.09 5-6 ¶13-14

Yira u/kạr ulegheri iyaạr phọ keḍighi bọ kụ areelhe phọ kozuoghom bọ Babilọn Ogbogh phọ. Bidị otue ni oḅẹm mọ aruukụ iiḅereghị aḅirinhi phọ rokikima ghan eephọ ḅilhẹ kẹn mọ bidị rokparaghạ ghan onyuughiom abuọ itooghị phọ. Obobọ bidị otue ni oḅẹm mọ ikpoki r’aruphua dị aruukụ iiḅereghị phọ momhoọgh mephughạn. (Ogan. 18:3, 7) Eḍighi ni osụ olhoghi ootughiạn mọ izuoghom mọ iphẹn phọ ke/piemhi oomo abuphẹ odi aani bọ siphẹ aruukụ iiḅereghị okpẹ phọ. Kparipẹ ghụn ni aruukụ iiḅereghị phọ kụ edị kopiemhi bọ. Mem dị ophiemhi ruukụ iiḅereghị phọ, awe phọ oghị ghan bọ kologhoma ni loor mọ abuḍiemhiom aruukụ iiḅereghị phọ mookelheghi bunọ, kụ eeni omiigh oḍuraan oḍuạ esi abidị. Amuphe aBabilọn Ogbogh phọ ke/sighẹ mem. (Ogan. 18:10, 21) AZihova aguanhaan ni mọ “loor emụ abuphẹ dị masaḅạr bọ odị kasoph ni riiḍio phọ akpere” bịn eḍighi idị egey ekụ iiḅereghị phọ kokpetenhaan igbogh iiḅaghamhị phọ.—Mạk 13:19, 20. w19.10 15 ¶4-5

Burunhiin, eeni odẹ r’onhiin dị omhoọgh ofughughuuny, kụ roḅaanhaạn ghan igbagarạ ikpo onhụ nmụny abidị, kụ uukonhom nyinhạ. Loor esi iduọn phọ, eeni nạ kaatughiạn ghan mọ epẹ kụ emạ eten ookonhom ibạm anmụny. Ghalhamọ r’amem dị nạ matuughạ ni ilọ eten phọ epẹ phọ aZihova rawạ bọ mọ dạph aakonhom ibạm anmụny phọ anạ, keḍighi ni ipaanhaạn ophamaghạn aloor anạ ḅilhẹ r’okparạm mem lọ obumoọny phọ apiomạn nyinhạ, ekạr ekpaariọm mem dị aloor anạ medugh. (Efẹ. 4:31) Odọ amem dị erọl iduọn phọ ekạr ewạ dị nạ kawạ olhoghonhaạn aḍighaạgh aZihova esi iiḅereghị. (Ps. 37:5) Rekparanhaạn ghan ni buniin aburuniin oḍeenhaan ephomhoghiạn ibạm anmụny abidị. Eeni bidị umite eghunotu dị aburunhiin phọ u/moọgh ghan ephomhoghiạn ukị esi anmụny phọ abidị. Eḍighi maạr dị ookonhom nyinhạ idiphọ, pọ ka/sighẹ eten phọ epẹ phọ kụ aakonom ibạm anmụny phọ anạ. Onhiin dị asooromhi loor oḍighi ipẹ eḅeeraạn bọ aZihova katuughạ ilọ oḍeenhaan ghan ephomhoghiạn nmụny phọ odị. Etue ni eḍighi ipaanhaạn onmia. Kuolọ k’engọ ni nyodị r’eghunotu phọ odị suọ. w19.09 18-19 ¶19-20

Oye dị raaḅereghị aZihova kụ amhiigh olhọgh amuboom amem r’inyaạm owạ eelạ aḅirinhi phọ, pọ iduọn phọ rakparaghạ ghan okumu iyạl aburudẹ-otu. Bịn eḍighi idị odị ka/kuọm mun oomo aloor odị aZihova. Rekpụl bọ eekunha oḅẹl okuron asiạ phọ, abuniin abuọ ookpomhoghan phọ arọl bọ egbogh emhạ phọ aLodisia ubagaam ghan mọ: “Mineghenọm iyoor, yoor omoọgh eelạ, iyaạr iyoor i/kuom.” Kuolọ riḍien aZihova r’aZizọs, bidị oḍighi ‘aagiạ r’obịph. Rukulom dị odi edaḅạ, ḅilẹ eten u/miịn.’ AZizọs o/roma bidị, loor esi eelạ dị bidị omhoọgh, kuolọ loor esi dị ephomhoghiạn eelạ phọ abidị repuẹ siya phọ abidị r’aZihova. (Ogan. 3:14-17) Eḍighi maạr dị yira olhoghoma mọ yira momhiigh romoọgh ephomhoghiạn ikpoki siphẹ ekpom mọ ayira, pọ oogboronhom oolemhi iitughiạn phọ ayira. (1 Tim. 6:7, 8) Yira u/ḍighi iduọn phọ, ekpom mọ ayira k’aayạ ni bịn eḍighi idị aZihova ka/sighẹ mun iiseeny phọ ayira. Odị “rawạ ghan mọ okuọm nyodị oomo aloor bịn.”—Deut. 4:24. w19.10 27 ¶5-6

Ekpo onhụ aGrik phọ ogbạ bọ mọ “asiịny” “obobọ” anyu, remạ ghan “ophạm oḍuanhạm; obobọ ooḅakị. Ekpo onhụ aGrik dị eghighimaạn aani nyeẹn phọ kụ edị aLuk opọ agẹ bọ ḍinyạ Iiḍighi phọ asighẹ aḍighinhom aani, oghaạph ilọ oghuugh dị oghim mọ ‘ayoọm.’ (Iiḍighi 27:15) Oniin oye dị atuughạ Baibul phọ aḅẹm mo, mem mọ aPita agẹ bọ mọ ‘isiịny’ obobọ ‘inyu’ ni buphẹ ogẹ bọ Baibul phọ, odị asighẹ aḍighinhom ikpo onhụ dị keetughianạm we ilọ izoghị. P’iduọn phọ aPita aḅẹm ghan mọ idiphọ oghim rayoọm ghan bọ oghuugh umuụm kasiemhi epẹ rakị bọ, kụ idị uwaloor iigbia phọ anyu riil aBaibul phọ r’abugeọm mọ omhunhenhi oḍighi phọ abidị. Oye phọ aḅilhẹ aḅẹm mọ: “Iwạ oghịgh mudị ariil phọ uphoophe anyụ sigalagạ phọ abidị.” AZihova aḍighi ipẹ rewạ bọ pakirị opọ odị. Odị amhiteom “ookuugh phọ,” obobọ uwaloor iigbia phọ. Kụ abugeọm aBaibul phọ oḍighi aani ipẹ ewạ bọ ḍighaạgh abidị. Bidị ukumuan idị edaphạn iiḅakiọm uwaloor iigbia phọ. Ḍio arodon, idiphọ oyoonheẹn raloghonhaạn ghan bọ ḍighaạgh oghuugh izoghị osi epẹ rakị bọ, kụ edị uwaloor iigbia phọ kuloghonhaạn iyira ḍighaạgh okaran iiḅaghamhị okarạph aḅirinhi phọ ophọn phọ oghị osi isiphẹ omhoom aḅirinhi phọ Enhaạn meguanhaan bọ. w19.11 9 ¶7-9

Eeni amem, yira otue ni ologhoma oḅonyonhu ozuan. Kuolọ ku/meera iiḅaghamhị phọ ayira esighenhọm iitughiạn ayira. Eḍighi maạr dị eḍighi iduọn phọ, pọ kikikima ni iyira oḍuomolhoghi ruguanhaan phọ aZihova. (Ogan. 21:3, 4) Oḅonyonhu ozuan katue ni akpạ inyaạm mọ ayira bịn eḍighi idị yira kobilhẹ okumu aZihova. Ooḅeghiọn omhiịn idị oniin onyọ umarani epẹ United State rapamanhạm ni omheeraam odị, etigheri egbagarạ e/moon olom mọ odị. Odị agẹ mọ: “Adọl phọ ayoor rekọm ghan ni oboom ooḅaghamhiạn aloor r’oḅonyonhu ozuan eeni amem, kuolọ oḍuomolhoghi phọ ayoor akpạr ri. Mị akạr kụ rasereghiạn oomo phọ areten phọ aZihova asighẹ bọ raḍighinhom ghan okparamhị omheeraam mọ ayoor ḅilhẹ r’okparamhị ayoor. Yoor okạr kụ omoghi iromoghiom r’okparamhị phọ ophọn phọ. Rinyaamhị ghan iyoor oghiọm aghisigh okumu aZihova ḅilhẹ r’okparaghạm.” Oghaạph onyọ umarani phọ ophọn phọ utughemhị iyira mọ yira kotue ni okpạr opu oḅonyonhu ozuan! Ika? Legheri ghan mọ aSetan kụ redẹgh nyinhạ ophogh ipẹ nạ kaḍighi bọ. Miịn ghan aZihova idiphọ azin iidereghị. Ḅilhẹ amhaghamhị ghan maạr itughemhị phọ odị. w19.11 16 ¶9-10

Ekạr ewạ dị ikumor awe phọ kodaphạn ḍinị olhogh phọ ophọn phọ. Okumor oye alhegheri mọ i/kpẹ dị odị kakaạph “raghaạph ibooghiạn” abumor r’abumarani phọ aḅenhị anhịr odị. Eḍighi iduọn phọ, kepuẹ ḍien odị bịn odị ka/kpẹ mun oḍuomolhoghi. Buphẹ omạ bọ ophạm iiḍighi ookpomhoghan phọ “ku/moọgh iyạl asinem.” (1 Tim. 3:8) Iduọn phọ pọ, bidị kuu/kelheghi oye obobọ u/kaạph ghan ilọ abunhọn. Okumor oye dị aphomhoghiạn anhịr odị ka/leti nyodị dool iinhaghạn dị i/wạ m’odị alhegheri. Anhịr phọ katue ni aloghonhaạn ḍighaạgh olom odị ophamhanhạm aḍigey aḍien, dị odị ka/kpaariọm ghan nyodị oghaạph araraạr ibooghiạn. Anhịr lọ adaphạn oroma phọ ophọn phọ pọ rabakị ghan olom odị, kaḅilhẹ aḍeenhaan olhọgh eegu buphẹ oghaạph bọ ilọ ibooghiạn abidị oḅenhị olom m’odị. Edị emhạn maạr epelhom pọ odị raḍighi ghan idị olhoghi aZihova kaḅaạl, idị eḍighi bọ odị ralọgh kaphophe eephọ r’amuḅọph ookpomhoghan phọ.—Rom. 14:19. w20.03 22 ¶13-14

Lhạ phọ 1512 B.C.E. mem mọ ophighi bọ ogbogo iiḅereghị phọ siphẹ ogbạl Eeḅarạph phọ aSinai, aMozis kụ aḍighi otolhọm agadạ ḍio phọ olhe bọ eyaạl omaạm Eeron ḅilhẹ r’anmụny phọ odị oḍighi abupinyọn rikiạ. (Ex. 40:17; Lev. 9:1-5) Ika kụ idị aZihova aḍighi aḍeenhaan mọ onọ asighẹ ni bumhoom abupinyọn rikiạ phọ omạ bọ? Idiphọ Eeron r’aMozis osẹph bọ we phọ, bịn aZihova aḍighi idị aniạn emite bịn elhe ekiạ phọ siphẹ enmeny phọ ḅeẹr emhadạn. (Lev. 9:23, 24) Iyaạr aḍiigu phọ emite bọ ḍio phọ omạ bọ bupinyọn rikiạ phọ, imhunhenhi eeghe? Ipẹ kụ idị aZihova asighẹ aḍeenhaan mọ onọ akạr ri abakị Eeron r’anmụny phọ odị, odị masaḅạr bọ oḍighi abupinyọn rikiạ phọ. Mem mọ awe phọ Izrạl okạr bọ omhiinhọm riḍien abidị mọ aZihova abakị ni bupinyọn rikiạ phọ omạ bọ, bidị umhiịn ni mọ ekpẹ ni dị bidị kobakị aani. Ipẹ igbolhomaam aani ni iyira ḍughụm? Ii! Loor esi dị abupinyọn rikiạ phọ orọl ghan bọ epẹ Izrạl uḍighi oogho abugbogh abupinyọn rikiạ dị kotọl ghisigh —144,000 phọ dị kokumuan r’aKraist epẹ k’akẹ. (Hib. 4:14; 8:3-5; 10:1) Eten dị iikia i/lo, aZihova raaḅakị ni kaḅilhẹ asẹph oḍighom mọ odị ḍio arodon. w19.11 23 ¶13; 24 ¶14, 16

Mem dị odị arọl ghan epẹ Korịnt, otelhedom mọ aPọl arolhạn ghan r’Akuilạ r’aPrisiliạ “idị eḍighi bọ odị r’abidị oḅọph oniin oḍighi okoIọgh ghan arukpe ologhoḍiọm arugbogo.” Mọ aPọl akumuan ghan “ḍughuI r’ootaany” pọ re/mạ ghan mọ odị o/mhoọgh ghan mem ophooghian. Odị aphooghian ghan ni siphẹ oḍighi okolhọgh arogbogo phọ, Ḍio Ophooghian phọ. Aḍio phọ aḍiphẹ phọ ingọ ghan nyodị eepoogh oḍighi ghan ogbaanhaạn ongọ awe aJu phọ, idị eḍighi bọ aJu phọ u/kumuan aani ghan rukumuan Ḍio Ophooghian phọ. (Iiḍ. 13:14-16, 42-44; 16:13; 18:1-4) Ghalhamọ r’iduọn aPọl akumuan ghan bọ ni omhoọgh iyaạr olhe, odị agbor ghan ni aphinom aani bin “ooḅi oghaạph phọ [Enhaạn].” (Rom. 15:16; 2 Kọr. 11:23) Odị akpaariọm buerị phọ abumor phọ oḍighi aani igini phọ. Pọ kụ iyaạr phọ yira kotue bọ ni oḅẹm mọ, Akuilạ r’aPriska ḅilhẹ r’aPọl uḍighi we dị “oḅọph . . oḍighi ghan oḍighi phọ [aZizọs] Kraist.” (Rom. 12:11; 16:3) APọl akpaariọm we aKorịnt phọ mọ “Isighẹ oomo inyaạm mọ anyina eḍighinom engọ Omoọgh-we phọ.” (1 Kọr. 15:58; 2 Kọr. 9:8) AZihova aḅilhẹ kẹn ni aphum otelhedom mọ Pọl ogẹ mọ: “Oye Iọ ra/ḍighi ghan, ku/Ie ghan.”—2 Tẹs. 3:10. w19.12 5 ¶12-13

AZihova alhemọm oḅẹl olom r’anhịr phọ ḍiḅeeraạn omhạr ibạm anmụny. Kuolọ anhiạn kụ kasopha mughumọ olom r’anhịr komạr ri obumoọny ḅilhẹ r’amem mọ komạr bọ? Iniin arikpisi, awe rootughiạn ghan m’olom r’anhịr dị m’aalạn omhiighom emariạ mem mem mọ. Abuọ eghunotu abidị r’abunhọn otue ni okpaariọm bidị odaphạn eḍighinhom iyaạr phọ epẹ phọ. Epẹ Asia oniin onyọ umor dị oghol mọ Jethro, aḅẹm mọ, “Siphẹ ookpomhoghan phọ, abudị omhoọgh ibạm anmụny rokpaariọm ghan budị ko/mhạr m’omhiigh emariạ.”, onhọn onyọ umor dị oghol mọ Jeffrey, epẹ Asia, aḅẹm mọ: “Abuniin roḅenhị ghan bulọ ko/mhạr mọ oye dị kapogh bidị mem lọ bidị okpọ ka/tọl.” Toroboiperolbọ, olom mọ r’anhịr phọ kụ kosopha mughumọ bunọ komạr ri obobọ ko/mạr. Edi esi abidị osopha; aḍiphẹ adool abidị. (Gal. 6:5) Olegheri ni mọ arighirị r’abuọ eghunotu abulọ purukụ aalhạn rowạ ghan ni dị bidị komoọgh oḅaạl olhoghi. Kuolọ ewạ ni dị bidị kolegheri mọ olom mọ r’anhịr phọ kụ kosopha idị egbolomhaam emariạ.—1 Tẹs. 4:11. w19.12 22 ¶1-3

Ekparanhaạn ni nyinhạ osighẹ aZihova idiphọ Odẹ anạ ḍughụm? Abuniin awe otue ni ologhoma mọ bunọ u/manạm obobọ u/moọgh maạr oḍighinhom esi aZihova. Bidị rookia ghan mughumọ Enhaạn Oomo-iikpọ phọ akạr ri rapogh ghan bidị r’aloor. Odẹ ephomhoghiạn ph’ayira o/wạ mọ olhoghoma idiphọ. Odị kụ ungọ iyira ghuḍum kụ rawạ mọ yira omhoọgh imạ asiya r’odị. Epẹ kụ iyaạr phọ otelhedom mọ aPọl aḅenhị bọ we phọ Atẹns mọ aZihova “o/kạr okeIạn torobọ onyọ ayira.” (Iiḍighi 17:24-29) Enhaạn rawạ mọ torobọ onyọ ayira aḅaanhaạn ghan nyodị idiphọ oọny raḅaanhaạn ghan bọ odẹ r’onhiin dị ophomhoghiạn oḅilhẹ ropogh ghan nyodị. Rekparanhaạn ghan kẹn bunhọn osighẹ aZihova idiphọ Odẹ loor esi dị eeni odẹ phọ opọ amhạr bọ bidị o/kạr ghan oḍeenhaan bidị ephomhoghiạn r’ogbolhomaam. Oniin onyọ umarani aḅẹm mọ “odẹ amhị amhaạr agey iitunyan. Esi iduọn phọ, mem mọ mị amhiigh bọ otuughạ aBaibul phọ, ikparanhaạn ni imhị otuman Odẹ k’akẹ phọ amhị.” Nạ raloghoma aani ghan ni eten phọ epẹ phọ ḍughụm? Pọ ka/ḅonyonhu azuan, legheri mọ nạ katue ni asighẹ aZihova idiphọ Odẹ dị anhighẹ apelheghiom. w20.02 3 ¶4-5

AZizọs utughemhị iyira mọ, ghalhamọ ikuph phọ r’inyaạm mọ yira olhọgh bọ i/manhạm ni loor esi aḍikpọ, aZihova amaghamhị ni maạr torobọ ipẹ yira kotue bọ oḍighi siphẹ arukumuan phọ odị. (Ps. 92:12-15; Luk 21:2-4) Kụ iḍighi kụ, gbon ghan ipẹ nạ katue bọ aḍighi. Esi omaạm, nạ katue ni akaạph ilọ aZihova, aaḅereghinhaạn bumor phọ, akparamhị bunhọn ophạm omheeraam mọ abidị okparamị. Legheri mọ aZihova o/tuạn ipẹ nạ katue bọ aḍighi kụ asighẹ bọ nyinhạ idiphọ oye dị aḅọph oḍighi r’odị, kuolọ aloor esi dị nạ asooromhi bọ loor ranaghanhạn nyodị. (1 Kọr. 3:5-9) P’eeghe idị olhoghi iyira aḅaạl okumu aZihova, opọ aḍighi bọ Enhaạn dị amhaghamhị maạr buphẹ rokumu bọ nyodị! Odị ulhẹm iyira oḍighi ogbi odị, kụ aghuḍum ayira ramoọgh ghan emhụ mem dị yira okumu nyodị. (Ogan. 4:11) Aḅirinhi phọ otue ni umhiịn iyira idiphọ awe dị u/moọgh maạr oḍighinhom, kuolọ aZihova iyira ru/ghiilom umugholoor. (Hib. 11:16, 38) Torobọ amem dị iirurughiạn, aḍikparamineẹn adọl, obobọ aḍikpọ eḍighi iyaạr dị yira oḅonyonhu ozuan, ewạ dị yira kootughiạn ghan mọ iyaạr i/lo dị kigbariọn iyira siphẹ ephomhoghiạn Odẹ k’akẹ phọ ayira.—Rom. 8:38, 39. w20.01 18 ¶16; 19 ¶18-19

Osooromhi aloor r’ogbaanyạn ketue ni ilhoghonhaạn iyira ḍighaạgh okpạr opu eḍịm. Mem dị imạ phọ araagharạ phọ iphẹn phọ kụ emuza rokpom ayira, eḍịm ke/moọgh esi orọl. Osooromhi aloor kulhoghonhaạn iyira ḍighaạgh dị yira koo/tughiạn ghan iboom ilọ odọ oye phọ yira oru bọ. Oye dị asooromhi loor ra/gbiighiom ghan mọ onọ kụ akpẹ omhoọgh opu abueriphọ. (Gal. 6:3, 4) Oye dị amhoọgh ogbaanyạn, torobọ iyaạr dị amhoọgh regbaanyạn ghan ni, kụ ra/sighẹ ghan loor odị katomaạm bunhọn. (1 Tim. 6:7, 8) Oye dị asooromhi loor aḅilhẹ amhoọgh ogbaanyạn, kụ amhiịn onhọn oye dị amhoọgh emạ iyaạr, olhoghi odị raḅaạl ghan ni. Yira omoghi olhoghonhaạn aḍighaạgh uwaloor iigbia phọ, orue okpạr opu eḍịm, kụ omhoọgh osooromhi aloor r’ogbaanyạn. (Gal. 5:16; Fil. 2:3, 4) Uwaloor iigbia phọ aZihova katue ni ulhoghonhaạn iyira ḍighaạgh ooḅeghiọn ophogh iitughiạn phọ ayira r’iyaạr phọ yira rotụ ghan bọ kụ koḍighi iyaạr. R’olhoghonhaạn aḍighaạgh Enhaạn, yira kotue ni osigheọgh ikarạph iitughiạn r’olhoghoma dị u/kpeanhaạn, kụ olọgh idị enhighẹ.—Ps. 26:2. w20.02 15 ¶8-9

Oḅọgh aloor ongọ aḍighi oguan dị aZihova rawạ ni m’otuụgh adaphạn. Kụ iḍighi kụ maạr aḅạr ookpomhoghan ph’anyinha. Abumor phọ r’abumarani phọ siẹn ookpomhoghan phọ okịgh idiphọ abuọ eghunotu anạ. Kụ nạ kakparamhị masiạn phọ anạ r’abidị esi ogbor ghan oghị ituughạ. Bạl ghan aḅilhẹ agbirima ghan Ekpo onhụ phọ Enhaạn ḍio ḍio ḍio. (Ps. 1:1, 2) Lọgh ghan mem akuamhị aatughiạn ilọ ipẹ nạ aạl bọ. Bịn ikpo onhụ phọ Enhaạn keḅọgh ni ekpom mọ anạ. ‘Aaḅereghị ghan.’ (Mat. 26:41) Nạ kaḍuraan atuman aZihova mem dị nạ aaḅereghị ghan r’oomo ekpom. “Pụr ghụn awạ Omhạr phọ [NWT].” (Mat. 6:33) Eten dị nạ katue aḍighi iduọn phọ, pọ osighẹ oghaạph iiḅi iinhaghạn phọ idiphọ ephigh iyaạr siphẹ aghuḍum m’anạ. Ogbor ghan ophinhom aani abin oghaạph Omhạr phọ, kekparamhị omheeraam m’anạ. Torobọ ipaanhaạn dị nạ asoman siẹn aḅirinhi phọ ophọn phọ eḍighi olọ “ekulha amem” ni bịn. (2 Kọr. 4:17) Ḍieriphọ aḍighaạgh phọ, oḅọgh aloor ongọ phọ r’oḍiiny amuụm m’anạ kaghughuronhaan nyinhạ eten adọl aghuḍum ogbaanyạn nyiidiphọ ḅilhẹ “okaraghị akugey aghuḍum” ghisigh. I/kpeanhaạn ophinyọn arikiạ phọ iphẹn phọ ḍughụm? Ekạr kụ ekpeanhaạn!—1 Tim. 6:19. w20.03 13 ¶19-21

Mem dị oye phọ nạ ratughemhị ghan bọ kụ u/poph ukị ghisigh, pọ kewạ ni mọ puruan loor anạ mọ, ‘Mị kabilhẹ otughemhị odị ḍughụm?’ Mem dị nạ raatughiạn ipẹ nạ kaḍighi bọ, puruan loor anạ mọ: ‘Oye phọ mị ratughemhị ghan bọ Baibul phọ apoph ni rakị ghisigh, odaphạn inyaạm r’asidọl phọ odị ḍughụm?’ ‘Odị mamhiigh ni “ooko,” obobọ osighẹ oḍighinhom araraạr phọ odị ratuughạ bọ ḍughụm?’ (Mat. 28:20) Dị eeph ni iboom, abuniin abuphẹ yira rotughemhị ghan bọ otọl idiphọ awe phọ Izrạl, orọl bọ mem mọ Ezekiel. Idị egbolhomaam bidị, aZihova aḅenhị Ezekiel mọ: “Pogh! Nạ akịgh esi abidị idiphọ aḍuọr ephomhoghiạn iḍọ, dị omhoorọm imạ eḍọgh r’onẹ dị omhaạr opheghom. Bidị konaghạn ni ikpo onhụ phọ anạ, kuolọ r’onyọ abidị ka/daphạn.” (Ezek. 33:32) Eeni kikparanhaạn ni iyira oḅenhị oye dị yira rotughemhị ghan Baibul mọ yira ko/kị ghan mun otughemhị odị. Toroboiperolbọ, “oọny enụm amem bịn kụ mesugha.” Kparipẹ rophiemhi amem otughemhị ghan oye dị ra/poph k’aghị ghisigh, ewạ mọ yira oghị ghụn oteẹny buphẹ “[Enhaạn] mesaḅạr bọ omoọgh aghuḍum k’agee-pọ phọ.”—Iiḍighi 13:48. w20.01 6 ¶17; 7 ¶20

AKristẹn Uḅenheẹn ro/tughemhị ghan igey phọ ipẹ edi bọ siphẹ aBaibul phọ eḅẹm bọ mọ, aḍio ketọl li dị abugey awe kotọl siẹn ade phọ k’agee-pọ. (2 Kọr. 4:3, 4) Ḍio arodon, ibadị aKristẹn uḅenheẹn rotughemhị ghan mọ oomo abugey awe rokeel ghan k’akẹ mem dị omhuughu. Kuolọ Anmụny Askul ABaibul phọ odiighi ghan bọ we Watch Tower phọ emhiigh lhạ phọ 1879 kụ rekị, u/tughemhị ghan idiphọ. Bidị unaghanhạn ni mọ Enhaạn k’eḅilhẹ ni eḍighi de phọ Paradais, kụ ariisi erubal awe phọ abuphẹ onhaghanhạn bọ Enhaạn, kụ kotọl siẹn ade phọ—ko/tọl k’akẹ. Toroboiperolbọ, isighẹ ni mem kụ Anmụny Askul ABaibul phọ ogbi okuamhị olhegheri awe phọ koḍighi bọ we phọ abuẹn phọ ronaghanhạn ghan bọ Enhaạn. Anmụny Askul ABaibul phọ uḅilhẹ kẹn ni owaaghị omhiịn siphẹ igẹ iigbia phọ mọ bunhiin egu awe koḍighi budị “motagharạn . . . osighẹ oḍuanạm siẹn ade phọ”, oghị otooghị r’aKraist epẹ k’akẹ. (Ogan. 14:3) Awe dị omhạn 144,000 kụ koḍighi egu phọ epẹ phọ, kụ bidị koḍighi Kristẹn dị moḅọgh ghuḍum abidị ongọ aZihova ḅilhẹ kokumu nyodị eten dị ekpẹ oḍuomolhoghi mem mọ bidị kotọl bọ siẹn ade phọ. w19.09 27 ¶4-5