December

Eeni amem, iniin ariisi aBaibul etue ni ikparanhaạn iyira onhaghanhạn. Obobọ eeni aZihova ka/pagharanhaạn iiḅereghị phọ ayira eten phọ epẹ yira ootughiạn bọ. Iphẹn phọ etue ni ekọm iikia ingọ iyira. Eḍighi maạr dị yira u/kiririom upogh iikia phọ ayira, ketue ni edughe omheeraam mọ ayira ḅilhẹ ekạ siya phọ ayira r’aZihova. (Jems 1:7, 8) Bịn eeni eḍighi idị yira kotoph oḍuomolhoghi phọ ayira ilọ aghisigh phọ. APọl asighẹ oḍuomolhoghi phọ ayira ilọ aghisigh phọ atomaạm ilumạ. (Hib. 6:19) Ilumạ phọ remiighemhi ghan unwunyarụ mem oghim. Kuolọ ilumạ phọ ke/moọgh maạr oḍighinhom mem dị izime phọ okpoọm bọ ilumạ phọ kụ esophaan. Idiphọ osarị rale ghan bọ izime kedughe, kụ edị iikia redughe ghan omheeraam mọ ayira. Mem isophoghom, oye dị amhoọgh iikia atue ni atoph omheeraam mọ odị, bịn amiigh ootughiạn mọ aZihova ka/munenhi ruguanhaan phọ odị. Yira oroph omheeraam mọ ayira, pọ yira moroph aani oḍuomolhoghi phọ ayira. Kekpạr ri kụ odọ oye phọ ophọn phọ amoọgh ibo! w21.02 30 ¶14-15

Eeni Ebraham m’amhạn ni 70 asiạ mem mọ eghunotu phọ odị r’odị oḍuạ bọ Ur. (Gen. 11:31–12:4) Kụ esi oniin okuron asiạ, odị arughogh ghan rogbogo, aḍuạ ghan esi agbạ esi siphẹ ade phọ aKenan. Ebraham amhugh mem dị odị m’amhạn 175 asiạ. (Gen. 25:7) Kuolọ odị o/mhiịn dị aZihova amhunhenhi oguanhaan phọ odị, ongọ eemharạ phọ odị de phọ odị arelhe ghan bọ aaghironhom. Odị o/rọl omhiịn dị ophighi egbogh emhạ phọ, Omhạr phọ k’Enhaạn. Ghalhamọ r’iduọn phọ ni, okaạph ilọ Ebraham idiphọ oye dị “arọl li siạ dị egbaanyạn kụ agbi omhugh.” (Gen. 25:8) Etigheri oomo ipaanhaạn phọ iphẹn phọ odị akaran bọ, Ebraham aphamhanhạm ni omheeraam dị akpạr ḅilhẹ amhoọgh ogbaanyạn kụ akoriom ghan aZihova. Eeghe kụ iḍighi kụ odị arue bọ ni akparạm? Loor esi dị siphẹ oomo adọl aghuḍum mọ Ebraham, aZihova aghoph ghan ni nyodị aḅilhẹ azoọm ghan nyodị idiphọ oyaghirị. (Gen. 15:1; Isa. 41:8; Jems 2:22) Idiphọ Ebraham, yira kẹn rokori aani ghan egbogh emhạ phọ epẹ Enhaạn metooghị bọ ephighi. Toroboiperolbọ, yira ro/kori ghan dị kolọgh. Idị eḍighi bọ Enhaạn mephighi ni itooghị Omhạr phọ lhạ phọ 1914, kụ m’amhiigh kẹn otooghị ongọ oomo epẹ k’akẹ phọ. (Ogan. 12:7-10) Kuolọ yira rokori ghan dị kamiigh otooghị aani oomo isiẹn ade phọ. w20.08 4-5 ¶11-12

Orue olher arurụ onhaghanhạn abunhọn, pọ ewạ mosooromi loor oḅilhẹ omhoọgh okparạm. Ewạ ni oḍighi iduọn phọ esi iraạr ariphigh. Eḅẹl phọ, yira ko/kureri ghan idị i/tu inẹ ilọ abunhọn awe. Edị etum siphẹ, yira kotọph ghan onaghanạn ipẹ abumor phọ ayira olhoghoma bọ r’ipẹ eḍighi bọ kụ bidị rozọ bọ eten phọ epẹ phọ, bịn milhoghonhaạn iyira ḍighaạgh oḍeenhaan abidị igbiririph. Omhunhenhiom iraạr, yira otue ni ologhonhaạn ḍighaạgh oye phọ olhegheri iyaạr ilọ aloor phọ odị. Loor esi dị eeni amem oye phọ ra/naghanhạn ghan loor odị tutụ aghaạph amiteom. Rekparanhaạn ghan ni buniin abumor r’abumarani ayira oghaạph ipẹ bidị olhoghoma bọ, loor emitonhom mọ abidị, eḍighinhom iyaạr abidị, obobọ eegharạ abidị. Eeni kesighẹ ni mem kụ bidị ogbi omhiigh oghaạph ipẹ bidị olhoghoma bọ oḅenhị ayira, legheri mọ amem dị bidị ughaaphạn iyira kụ edị yira kotue olegheri okạr ipẹ bidị olhoghoma bọ. Eḍighi maạr dị yira orue ni otuughaạny aani eegharạ okparạm mọ aZihova, pọ bidị kotue ni uḍuom iyira olhoghi. Kụ eḍighi maạr dị bidị rowạ oghaạph ipẹ bidị olhoghoma bọ oḅenhị ayira, olher ri rurụ ongọ. w20.04 15-16 ¶6-7

Ina retọl ghan pakirị dị ephoonhaạn bidị, ḅilhẹ eḍien edi. Amem mọ okoniọm akonị phọ kakị bọ emoọgh ni maạr oḍighinhom ḍughụm? Idị egbolhomaam okạr ogey amem ozẹ ina, lọgh elhẹgh idị oniin onyọ Ogbaanhaạn epẹ Pacific island aḅẹm, mem dị odị amhạgh aani oniin onyọ amisonarị mọ adạph nyinọ aghị akonị. Onyọ amisonarị phọ aḅenị nyodị mọ, “Mị katu esugha asuo ḍiroọr iḍuenheen.” Kụ onyọ umor phọ aphagharanhaạn mọ, “Nạ k”onhaghanhạn. Yoor rokị ghan mem dị koteẹny ina phọ ozẹ, ka/mem dị iḅeraạn iyoor. Iniin phọ kẹn ni, abumatuạn phọ aZizọs okonị ghan bọ we phọ siphẹ oḅẹl okuron asiạ phọ, ughiighị ghan riisi ḅilhẹ r’amem dị “ina” phọ ketọl. Esi omaạm, bidị ughaạph ghan oghaạph iiḅi iinhaghạn phọ epẹ otu iiḅereghị phọ, r’aruboghotu phọ, otu atum otu ḅilhẹ r’epẹ asiḍighi phọ. (Iiḍighi 5:42; 17:17; 18:4) Iniin phọ kẹn ni, kụ edị ewạ mọ yira olhegheri roozọ awe ekool phọ yira rokaạph ghan bọ iiḅi iinhaghạn phọ koḅenhị. Ookolhobian ni onmeeghi ghan igbiighi phọ ayira kụ oghaạph ghan iiḅi iinhaghạn phọ ekpisi r’amem dị komiịn we.—1 Kọr. 9:19-23. w20.09 4 ¶8-9

Eniin eten dị yira kotue oḍigh righirị r’aZizọs pọ obakị aani iikolhobian ookpomhoghan aKristẹn phọ. Asiya arighirị phọ ayira r’aZizọs uw-emhụ ookpomhoghan phọ kelegheri kụ ekpạr mem dị yira odaphạn iiḅakiọm abuphẹ omạ bọ ophogh ayira. (Efẹ. 4:16) Esi omaạm, ookpomhoghan phọ rowạ ni mọ omhaạr oḍighinhom siKindọm Họl phọ ayira. Esi iduọn phọ, mosighẹ iniin arookpomhoghan oḅophoghiọm inhọn. Iikolhobian phọ iphẹn phọ meḍighi iyaạr dị ookpomhoghan phọ romaạr koḍighinhom iisogh phọ. Toroboiperolbọ, rewạ ghan ni mọ buniin abukaaphọm ooḅenion sidọl abidị. Eeni abukaaphọm mọ abuẹn phọ morọl li ibadị asiạ iniin arookpomhoghan, ooḍikuan bumor r’abumarani phọ epẹ phọ. Kụ oḅenhị bọ m’oghị onhọn ookpomhoghan. Reḅeraạn ghan ni Zizọs omhiịn dị abumor phọ abuphẹ phọ osooromi loor bịn odaphạn iikolhobian phọ. w20.04 24 ¶14

Uw-emhạ epẹ esiinyọm mọ r’uw-emhạ epẹ esoorom mọ okiọm ni ghisigh roopikian oye lọ k’apạm iboom iikpọ. Esi omaạm, mem mọ Omhunhenhiom Iyạl Eghạm Oomo Aḅirinhi phọ emhunheen bọ, aSoviet Union r’abuphẹ oḍighan bọ bidị umhiigh ni otooghị ongọ ibadị areelhe aEurope. Ipẹ phọ iḍighi idị uw-emhạ epẹ esoorom mọ aakpomoghi ḍita awe eghạm areelhe kirokirọ, bịn omiteom ookpomoghan dị oghol mọ NATO. Uw-emhạ epẹ esiinyọm mọ akiọm ni ghisigh raapikian r’uw-emhạ epẹ esoorom mọ esi ookolobian araraạr eghạm dị emhạn ikpoki iboom. Uw-emhạ epẹ esiinyọm mọ aḅilhẹ kẹn eenan uw-emhạ epẹ esoorom mọ esi olhoghonhaạn aḍighaạgh reelhe dị oḍighi mulhọgh ḍien uw-emhạ epẹ esoorom mọ, reelhe Africa, Asia, r’aLatin America. Siạ dị ke/kạr ebia, aRussia r’abuphẹ r’odị oḍighan bọ momhoọgh igey phọ iikpọ siẹn oomo aḅirinhi phọ. Bidị oḅilhẹ kẹn osighẹ sikomputa kụ eenom uw-emhạ epẹ esoorom mọ. Iyạl phọ aruw-emhạ phọ oniin ragbaaghiọm ghan nyoniin mọ rakparaghạ ghan osighẹ asikomputa olerom aḍighi ophoriphọ, pidị itooghị phọ emeel. Kụ idiphọ aDaniel aghaạph bọ, uw-emhạ epẹ esiinyọm mọ akiọm ni ghisigh r’anyaaghiọm we phọ Enhaạn.—Dan. 11:41. w20.05 13 ¶5-6

“Onhiin katue ni abula moọny odị dị ramaạm ḍughụm?” AZihova kụ apuru ḍipuru phọ aḍiẹn phọ siiḍio oyil phọ Aizaya. Enhaạn iḅenhị we phọ odị mọ “ghalhamọ onhiin kabula ni moọny odị, mị inyinha ki/wula.” (Isa. 49:15) Odị o/gbor ghan otomaạm loor odị onhiin. Kuolọ toroboiperolbọ, odị aḍighi ni iduọn phọ mem mọ amuphẹ phọ. AZihova asighẹ muḅọph phọ ratọl ghan bọ igbo onhiin r’oọny kụ agananamhiom odọ ephomhoghiạn phọ odị amhoọgh bọ aghị esi arebenhẹ phọ odị. Ogbogh opol aburunhiin omeeraam aani idị oniin onyọ umarani dị oghol mọ Jasmin aḅẹm, odị aḅẹm mọ, “mem dị nạ kụ aakonhom obumoọny anạ, nạ kamoọgh ni siya dị egbatanhaạn r’oọny phọ, dị ketọl oomo adọl aghuḍum mọ anyinha.” AZihova ralegheri ghan ni ghalhamọ r’amem dị oniin obumoọny odị awilhẹ oru ghan ituughạ ḅilhẹ r’oghị epẹ erugh phọ. Ibadị abuuḅi abumor r’abumarani phọ abuẹn moophoọm bọ, oḅilhẹ ghan ni roḅula siẹn ookpomhoghan phọ, kụ olhoghi ayira raḅaạl ghan ni mem dị bidị oḅula! AZihova rawạ mọ bidị oḅula, kụ yira phọ kẹn ni.—1 Pit. 2:25. w20.06 18 ¶1-3

K/oomo aruphua kụ edị kotue omiinọm ekpeḍien. Ogbạ agey, ruphua dị ekạr emhạn maạr ro/miinọm ghan riḍien. Siphẹ anyụ eeḅarạph phọ aZizọs arọl bọ angọ oghaạph phọ, odị aghaạph ni aghol ruphua k’akẹ dị ekạr emhạn maạr epu eelạ. Kụ odị aḅarạm mọ: “Esi Iọ eelạ anyina edi, pọ kụ esi dị iloghi anyina ketọl.” (Mat. 6:19-21) Arokpom ayira rinyu ghan ni iyira ophorogh araraạr phọ ipẹ ekạr bọ emhạn maạr esi ayira. Yira rooko ghan koseerean eelạ ayira “epẹ k’akẹ” esi omhoọgh aḍigey aḍien, obobọ ḍigey aḍimeerạ r’Enhaạn. Edọ eelạ phọ ephẹn phọ, aZizọs aḅẹm mọ ko/tue opiemhi obobọ omhi. Otelhedom mọ aPọl uromha iyira mọ “[ipogh] ghan ghụn ipẹ ro/miịn ghan bọ ekpeḍien phọ” (2 Kọr. 4:17, 18) Aruphua phọ iphẹn ro/miinọm ghan bọ ekpeḍien phọ eḅaramaạm ḍisẹph kirokirọ phọ Enhaạn k’ingọ bọ iyira siphẹ omhoom Omhạr phọ. Yira roḍeenhaan ni mọ yira osereghiạn ni ruphua phọ iphẹn phọ ro/miinọm ghan bọ riḍien phọ ḍughụm? w20.05 26 ¶1-2

Ipẹ aMozis atughemhị bọ buọ Izrạl phọingọ ni bidị inyaạm eḅilhẹ eemhanhamhi bidị idiphọ olọph dị alhophọm iizuphạ. Ika kụ idị yira kotue oḍighi idị itughemhị phọ ayira ketọl aani idiphọ phọ? Mem dị yira rokaạph iiḅi iinhaghạn phọ otu atum otu obobọ esi ogbo, yira kotue ni oḍeenhaan we siphẹ aBaibul phọ mọ aZihova kụ okạr aḍien Enhaạn. Yira kotue ni ongọ bidị ḍimạ aḍinyạ, oḍeenhaan imạ asividio obobọ iyaạr dị edi siphẹ osoph intanẹt phọ ayira dị rekueni aZihova. Epẹ otu oḍighi, ruutu askul, obobọ mem dị yira rokị erelhe, yira kotue ni omoọgh roopoogh oghaạph ipẹ Enhaạn ephomhoghiạn phọ ayira erọl bọ. Mem dị yira oḅenhị buphẹ yira oozuanhaan bọ ilọ arigbiom mọ Enhaạn amhooghonhaạn bọ omhạr awe r’ade phọ, bidị kolọgh ni elhegh idiphọ eḅẹl amem idị aZihova uphomhoghiạn iyira iboom. Mem dị yira oghaạph igey phọ idị egbolhomaam Odẹ ephomhoghiạn phọ ayira oḅenhị aani bunhọn, pọ yira rologhonhaạn ghan ḍighaạgh oḅaalhamhị aḍien phọ odị. Yira rogbuurogh ghan ḍien phọ odị kosighẹ esi okpẹ r’iḅoroghom mọ abunhọn awe motughemhị bọ ilọ aḍien phọ aZihova. Yira rotughemhị ghan we itughemhị phọ iphẹn ekạr bọ reemhanhamhi ghan keḅilhẹ engọ inyaạm we.—Isa. 65:13, 14. w20.06 10 ¶8-9

Ighẹn araagharạ kụ edị yira komoọgh eḍighi maạr dị yira rowạ olhoghonhaạn aḍighaạgh bulọ rowạ oḅula esi aZihova? Omhiịn iniin araraạr dị yira kotue otuughạ esi oghaạph omaaniọm mọ aZizọs ilọ oọny uruur phọ aḅuạ bọ olhoghotu. (Luk 15:17-24) Oọny uruur phọ alhoghoma ni loor kụ asopha oḅilhẹ oḅula olhoghotu. Odẹ phọ aghiil li aghị ateẹny oọny phọ odị, kụ aghuraam ongọ odị okuphom owol mọ onọ apomoghiạn ni nyodị. Ooruẹn olhoghi oọny uruur phọ agụr ri dị tutụ alhoghoma mọ onọ o/kpeanhaạn mun dị koḅẹm mọ onọ oọny odẹ phọ odị. Odẹ phọ aseenyạn ni oọny phọ odị mem mọ aghaạph bọ ipẹ odị alhoghoma bọ aḅenhị nyodị. Odẹ phọ agbariọn ni radạ oḍeenhaan mọ onọ asighẹ ni nyodị idiphọ oọny olọ olhoghotu dị okạr ophomhoghiạn. Oḍighi oḍeenhaan iphẹn phọ, odẹ phọ aakolhobian ni male, aḅilhẹ angọ oọny phọ imạ asuomạ. AZihova akịgh idiphọ odẹ phọ siphẹ aḍidogh phọ. Odị apomoghiạn ni bumor r’abumarani phọ ayira moophoọm bọ kụ rowạ bọ ni oḅula esi odị. Esi otuughaạny aZihova, yira kotue ni ologhonhaạn bidị ḍighaạgh oḅula. Oḍighi iduọn phọ ewạ okparạm, oseenyạn, ḅilhẹ r’ephomhoghiạn ḍighaạgh ayira. w20.06 25-26 ¶8-9

AZizọs aḅẹm mọ buniin konaghạn ni igey phọ “r’oḅaạl ologhi,” kuolọ omheeraam mọ abidị kadugh ni mem lọ osoman iiḅaghamhị. (Mat. 13:3-6, 20, 21) Eeni bidị u/lọgh elhegh mọ buphẹ rodạph bọ Zizọs Kraist kosoman ni ipaanaạn obobọ ḍikparamineẹn. (Mat. 16:24) Eeni bidị uutughiạn ghan mọ oḍighi onyọ aKristẹn ketagharạn bidị esighẹ esi iiḅaghamhị—engọ bidị ḍisẹph bịn ipaanhaạn bidị ko/moọgh. Kuolọ siẹn okarạph aḅirinhi phọ ophọn phọ, ipaanhaạn emoọgh orọl. Asidọl phọ etue ni enmia bịn eḍighi idị yira ko/moọgh mun oḅaạl olhoghi. (Ps. 6:6; Eccl. 9:11) Ogbogh opol abumor r’abumarani moḍeenhaan ni mọ bunọ omeeraam ni okuphom owol igey phọ. Ika? Omheeraam mọ abidị ra/piigha ghan ghalhamọ r’amem dị onyọ umor aḍighi bidị idị i/nighẹ, obobọ aḍighi igbogh ikarạph. (Ps. 119:165) Torobọ odẹgh ophogh dị bidị osoman rekparamhị ghan ghụn omheeraam mọ abidị, re/dughe ghan. (Jems. 1:2-4) Ewạ mọ omhoọgh aani odọ omheeraam mọ opọ phọ. w20.07 8 ¶1; 9 ¶4-5

Kụ nạ agbi omhiigh aạl aBaibul phọ, ḅeeḅereghị alhọm aZihova mọ odị alhoghonhaạn nyinhạ ḍighaạgh omhooghọm asuọ ipẹ nạ kabạl bọ. Esi omaạm, eḍighi maạr dị nạ rawạ oromha ilọ orue okaran iiḅaghamhị lọ nạ asoman, pọ ḅeeḅereghị alhọm aZihova alhoghonhaạn nyinhạ ḍighaạgh omhiịn asinhị iilhogh aBaibul dị edi siphẹ Ekpo Onhụ phọ odị dị kelhoghonhaạn nyinhạ ḍighaạgh osopha ogey osopha ilọ iiḅaghamhị phọ. (Fil. 4:6, 7) AZihova ungọ iyira eekiạ epul iitughiạn. Orue oḍighi idị eḍeenhaan oye phọ nạ rabạl bọ siphẹ aBaibul phọ ketu eye esi anạ, kparaghạ ghan ogbiom olhoghi mọ nạ kụ oye phọ. Kparaghạ ghan omhiịn araraạr eten phọ epẹ oye aBaibul phọ nạ rabạl bọ ilọ odị amhiịn bọ aḅilhẹ alhoghoma. Edị etum siẹn, gbirima ghan. Ogbirima remạ ghan omhaạr omhiigha aloor ootughiạn ilọ iyaạr phọ nạ aạl bọ ḅilhẹ r’ipẹ egbolhomaam bọ nyinhạ. Ogbirima ghan kalhoghonhaạn nyinhạ ḍighaạgh ookpomoghi oomo ipẹ nạ aạl bọ kụ omhoọgh ogey onhaghạn aḍughụm. Oye dị aạl Baibul phọ kụ u/gbirima akịgh idiphọ oye dị amhoọgh ni raraạr ogirom amooboph kuolọ uu/kpomoghi raraạr phọ u/lọgh guugh usạ. Ogbirima rulhoghonhaạn ghan iyira ḍighaạgh olhegheri oomo ipẹ ekạr bọ emite. w21.03 15 ¶3-5

Otelhedom mọ aPọl mutue ni aatughiạn mọ mughumọ onọ mu/ḍighi bọ onyọ aKristẹn, obọ oye mu/moọgh iyaạr otuạn osiph odị olhọgh ikoli. Odị mutue ni aghaghạm olhoghi bumor phọ orọl bọ epẹ eghir phọ Asia mowilhẹ bọ nyodị, ḅilhẹ odị mutue ni aroph oḍuomolhoghi phọ odị amhoọgh bọ aghị esi abueriphọ arighirị phọ odị. APọl o/ḍighi r’eniin iphẹn phọ. Ghalhamọ r’iduọn odị alhegheri bọ ni mọ moọny amem kokiigh nyodị, aPọl o/wulha idị emhạn maạr—osighẹ arughuenhian oruom aZihova. Odị aghiọm ghisigh aatughiạn ghan ipẹ odị katue bọ akparamhị bunhọn. Odị abeḍenhọm aZihova esi ogbor ghan ooḅereghị. Kparipẹ rootughiạn ghan ipẹ abumor phọ abuphẹ owilhẹ bọ nyodị, odị asẹph ghụn righirị phọ abuphẹ oḅạr bọ nyodị kụ rologhonhaạn bọ nyodị ḍighaạgh ibadị areten. Oḅarạm isiẹn, aPọl aghiọm ghisigh atuughạ ghan Ekpo Onhụ phọ Enhaạn. (2 Tim. 3:16, 17; 4:13) Edị emhạn maạr epelheghiom pọ, odị aḍuom olhoghi mọ aZihova r’aZizọs opomoghiạn ni nyodị. w21.03 18 ¶17-18

Eniin amem, siphẹ omhunhenhiom iyạl okuron asiạ phọ, ukol aKristẹn uḍigh ni ookpomhoghan aKristẹn phọ bịn omhiigh otughemhị yogh itughemhị okpẹ, kụ aaghị igey phọ edi bọ siphẹ Ekpo onhụ phọ Enhaạn. Egbi k’amem mọ amuphẹ phọ kụ eghị eteẹny elọ epẹ eekunha 19 okuron asiạ phọ, Enhaạn o/mhoọgh ghan mun ookpomhoghan siẹn ade phọ. Ibiakpạ akeIedeẹny ukol aKristẹn phọ isi ni bịn eekpereghiom bugey aKristẹn phọ. (Mat. 13:36-43) Uḍighi ika kụ ekpẹ bọ ni olhegheri iphẹn phọ? Iphẹn phọ remạ ghan mọ ipẹ yira aạl bọ siphẹ Daniel emhụ phọ 11 ilọ uw-emhạ epẹ esiinyọm mọ r’uw-emhạ epẹ esoorom mọ, i/gbolomaam itooghị phọ erọl bọ omhunhenhiom iyạl okuron asiạ phọ kụ eghị eteẹny elọ epẹ eekunha okuron asiạ phọ amuneniom bọ 19 phọ. Idị eḍighi bọ ookpomhoghan Enhaạn o/rọl mem mọ amuphẹ phọ dị bidị kozuoghom. Toroboiperolbọ, yira olegheri mọ uw-emhạ epẹ esiinyọm mọ ḅilhẹ r’uw-emhạ epẹ esoorom mọ koḅilhẹ ni omite mem dị okuron asiạ phọ aḍighi bọ 19 rasi eekunha. 11:25. w20.05 3 ¶5

AJuẹl amhiịn imiịn mọ aḍita igurubia keegulhemhi ni de phọ Izrạl, epiemhi torobọ iyaạr dị emhiịn! (Joel 1:4) Esi ibadị asiạ, yira roḅẹm ghan mọ imiịn phọ iphẹn phọ remạ ghan eten phọ epẹ awe phọ aZihova rokaạph ghan bọ iiḅi iinhaghạn phọ, idiphọ igurubia dị ko/tue osophoghom. Yira umeeraam ghan mọ oghaạph iiḅi iinhaghạn phọ katir ri “de” phọ, obobọ buphẹ odi bọ eeḍiạn abuḍiemhiom aruukụ iiḅereghị phọ egbagarạ eten dị ko/legheri ilọ oḍighi. Kuolọ mem dị yira omhaạr ooḅeghiọn oomo ipẹ imiịn phọ rekaạph bọ, onhaghanhạn aḍughụm mọ ayira k’anmia ni. Lọgh elhegh oguanaan phọ aZihova ilọ iminimiịn phọ igurubia phọ kekọm bọ: “Mị kaporogh ni buọ esiinyọm mọ [igurubia phọ] akelẹ esi anyinha.” (Joel 2:20) Eḍighi maạr dị igurubia phọ remạ ghan Bugbaanhaạn AZihova phọ onhaghanhạn bọ itọ phọ aZizọs, oghaạph iiḅi iinhaghạn phọ r’oḍighi awe bumatuạn, eeghe kụ iḍighi kụ aZihova aḅilhẹ bọ aḅẹm mọ onọ kaporogh bidị akelẹ? (Ezek. 33:7-9; Mat. 28:19, 20) Eegholhaan ni mọ aZihova ra/porogh ghan rebenhẹ phọ odị okpẹ bọ oḍuom olhoghi, kuolọ raporogh ghan kakelẹ oye obobọ iyaạr dị elhọgh ḍien we phọ odị. w20.04 3 ¶3-5

Yira koḍighi ika eḍighi maạr dị eghịgh mudị aZihova o/phagharanhaạn iiḅereghị ayira mem mem mọ? AJems aḅẹm mọ kiọm ghisigh “alọm Enaạn.” Re/pin ghan olhoghi aZihova eḍighi maạr dị yira oghiọm ghisigh olhọm ghan nyodị osụ olhoghi. Odị iyira ku/ḅaạm. Odẹ k’akẹ phọ ayira “raa/kpukiạn ghan ongọ inmo” mem dị yira ooḅereghị olhọm osụ olhoghi okaran iiḅaghamhị ayira. (Ps. 25:12, 13) Odị ramiịn ghan ni iiḅaghamhị phọ ayira, kụ odị ruseenyạn ghan ni iyira, ḅilhẹ amoọgh ni ikpukpụ olhoghonhaạn ayira ḍighaạgh. Iphẹn phọ ringọ ghan iyira oḅaạl olhoghi! Ika nuụn kụ edị aZihova rungọ ghan bọ iyira osụ olhoghi? Dị eego esi Ekpo Onhụ phọ odị. (Prov. 2:6) Orue omhoọgh osụ olhoghi phọ opọ phọ, yira omoọgh otuughạ ghan Ekpo Onhụ phọ Enhaạn ḅilhẹ r’arinyạ phọ ayira. Kuolọ ki/mineen ghan esi otuughạ olhegheri bịn. Osighẹ ghan oroma phọ Enhaạn oḍighinhom siphẹ aghuḍum mọ ayira bịn meḍeenhaan mọ yira omoọgh ni osụ olhoghi phọ opọ k’Enhaạn. AJems agẹ mọ: “Ke/naghạn ghan bịn kụ i/ḍighi ghan ipẹ Enaạn rekaạph bọ.” (Jems 1:22) Yira koḍighi ni weye eephọ, osooran, ḅilhẹ kẹn omoọgh onmạ ighirigiir eḍighi maạr dị yira osighẹ oroma phọ Enhaạn oḍighinhom. (Jems 3:17) Araagharạ phọ ipẹ phọ rilhoghonhaạn ghan iyira ḍighaạgh ophamhanhạm ibo phọ ayira mem dị yira rokparaghạm iiḅaghamhị. w21.02 29 ¶10-11

Oye dị rotughemhị Baibul rapoph ghan k’aghị ghisigh mem dị oomo awe siphẹ ookpomhoghan phọ kụ olhoghonhaạn ḍighaạgh. Torobọ okaaphọm katue ni aloghonhaạn aani ḍighaạgh omhoom oye oḍighi aani olọ ookpomhoghan phọ. Oniin okọy eten aḅẹm mọ: “Oḅẹm odi ni dị roḅẹm ghan mọ, ekpom emhạ kụ rookonhom ghan obumoọny. Mị aatughiạn mọ iduọn kẹn kụ idị edi aani mem dị rokaạph ilọ oḍighi awe bumatuạn phọ; oomo ookpomhoghan phọ kụ rologhonhaạn ghan ḍighaạgh osighẹ oye olhọgh isiẹn igey phọ.” Odẹ r’onhiin, arighirị abuọ eghunotu phọ, ḅilhẹ r’abutughemhiạ askul kụ rologhonhaạn ghan ḍighaạgh ookonhom obumoọny phọ. Bidị roḍighi ghan iduọn phọ esi oromhoghiom ghan ḅilhẹ r’otughemhị ghan obumoọny phọ raraạr dị emhạn maạr. Iniin phọ kẹn ni, abumor r’abumarani phọ kotue ni otomoghiom, okparamhị, ḅilhẹ opighi emạ eḍeenhaan ongọ buphẹ rotuughạ bọ Baibul phọ, olhoghonhaạn abidị ḍighaạgh ophoph oghị aghisigh oḍiiny amuụm. (Prov. 15:22) Uḍighi ika kụ ekpẹ bọ ni dị opọ ratughemhị bọ kameera mọ abunhọn abukaaphọm olhoghonhaạn aani ḍighaạgh? Loor esi dị ibadị kotue ni ologhonhaạn ḍighaạgh opọ rotughemhị bọ ophoph oghị aghisigh siẹn igey phọ. w21.03 8 ¶1-3

Ewạ dị oomo aKristẹn, iḍoọgh, r’ikumor awe kokel dọl ughelhe. Otelhedom mọ aJọn amạ ni amiteom mọ yira ko/tue otolhọm igey phọ r’adọl aghuḍum dị i/ḅaạl. (1 Jọn 1:6) Eḍighi maạr dị yira rowạ omhoọgh akuuḅi aghisigh Enhaạn nyiidiphọ r’epẹ ghisigh, pọ ewạ ni dị yira kootughiạn mọ Enhaạn ramiịn ni torobọ iyaạr dị yira roḍighi. Iduọn phọ pọ, iyaạr i/lo dị eḍighi ikarạph dị eeghiạn, loor esi dị oomo araraạr phọ ozu ni awaạy ghisigh aZihova. (Hib. 4:13) Ewạ mọ yira oghel eten phọ epẹ aḅirinhi phọ ophogh bọ ikarạph. Siḍio phọ aJọn, abuphẹ momheel bọ oḍuạ siẹn igey phọ uḅẹm ghan mọ, oye katue ni alegheri aḍighi ikarạph kụ aḅilhẹ amoọgh imạ asiya r’Enhaạn. Ḍio arodon, yira odi aani igbo awe dị omhoọgh aani ḍidọ aḍiitughiạn phọ aḍiphẹ phọ. Ibadị opu ni oḅẹm mọ bunọ omeeraam ni Enhaạn, kuolọ u/meeraam aani ephoghom mọ epẹ aZihova rapogh ghan bọ ikarạph, ekạr ekpaariọm mem dị eḍighi oghaạph orolhạn esi. Iniin areten orolhạn esi edi ni dị aZihova asighẹ m’ikarạph, kuolọ bidị roḅẹm ghan mọ eḍighi maạr dị oye phọ kụ asopha oḍighi ipẹ eḅeraạn bọ oye phọ, pọ i/beeph. w20.07 22 ¶7-8

Nạ rakaaphanhaạn ghan ni bumarani phọ odi bọ siẹn ookpomhoghan phọ mem lọ emhoghi oḍighi iduọn phọ ḍughum? Ooḅeghiọn ilọ onyọ umarani dị aạl oye dị ra/tu aani ghan ituughạ, kụ ra/nuụn ghan karu ituughạ, kụ ranuụn ghan ogheel mem dị ituughạ phọ memiteghu, ḅilhẹ kẹn ra/gbor ghan ka/phạm ibạm anmụny phọ odị arumom ituughạ. Abumor dị omhiịn iphẹn umarani phọ raḍighi ghan bọ, komiigh ni opuru mọ eeghe kụ iḍighi kụ odị o/ḅenhị bọ olom mọ odị m’amheraam ibạm anmụny phọ oru ghan ituughạ egbạ gbạ amem. Kuarị onyọ umarani phọ raḍighi ni oomo ipẹ odị katue bọ. Ogina odị bịn kụ o/mhoọgh mem mọ odị, obobọ ogina odị bịn kụ ka/kaạph bịn emineen idị egbolhomaam ibạm anmụny phọ odị. Eḍighi maạr dị nạ aghaạph ilọ imạ onyọ umarani phọ aḅenhị bumor phọ abuphẹ rokaạph bọ ikarạph ilọ onyọ umarani phọ, pọ ketue ni ekikima bidị oghiọm aghisigh oghaạph ikarạph odị. Ikumor awe phọ olhegheri ni mọ aZihova awạ mọ ozoọm bidị eten dị ekpeanhaạn. (Jems. 1:27) Kụ iḍighi kụ bidị rotuughaạny ghan osụ olhoghi phọ aZizọs, bịn bidị ro/loghoḍị ghan iilhogh mem dị ekạr emhoghi oḍeenhaan oseenyạn r’onhaghanhạn. (Mat. 15:22-28) Mem dị ikumor awe phọ ogbatạn eḍạ oghị olhoghonhaạn aḍighaạgh nmariịr ookpomhoghan phọ, reḍighi ghan iyaạr dị anmariịr phọ rologhoma ghan mọ opomhoghiạn ni bunọ siẹn ookpomhoghan phọ. w20.09 24-25 ¶17-19

Oyil phọ Daniel awạ ghan iiḅakiọm aZihova oomo amem. Esi omaạm, mem mọ aZihova asighẹ bọ nyodị agbaạm malạ phọ aNebuchadnezzar, aDaniel o/ghophora mọ onọ kụ asighẹ olhegheri iyaạr onọ agbaạm malạ phọ. Kparipẹ ghụn odị asooromhi ni loor angọ aZihova eegu phọ ḅilhẹ r’iiseeny phọ. (Dan. 2:26-28) Ipẹ phọ itughemhị iyira eeghe? Eḍighi maạr dị abumor phọ oghelhọm oghaạph ayira, obobọ yira omhoọgh eboom ekol epẹ erugh phọ, yira ootughiạn ongọ ghan aZihova oomo phọ eegu phọ, osooromhi ni loor olhọgh elhegh mọ yira ko/tue oḍighi dị olhoghonhaạn aḍighaạgh aZihova u/lo. (Fil. 4:13) Yira omhoọgh eegharạ phọ ephẹn phọ, pọ yira rotuughaạny ghan kẹn imạ eḍeenhaan phọ aZizọs. AZizọs abeḍenhọm ghan ni aZihova. (Jọn 5:19, 30) Odị o/kparaghạ omhirighan iikpọ ḍighaạgh Odẹ k’akẹ phọ odị. Filipai 2:6 iḅenhị iyira mọ aZizọs “oo/tughiạn mọ, idiphọ onọ aalenyan bọ [Enhaạn], mọ onọ kasighẹ eekparạ ekpeḍien kụ atolọm.” Idiphọ Oọny dị asooromhi loor, aZizọs alhọgh ni elhegh esi dị inyaạm odị esi, kụ alhọgh eegu iikpọ Odẹ k’akẹ phọ odị. w20.08 11 ¶12-13

Buniin abuẹn rokiil aani bọ eghiil aghuḍum mọ osoman ni ipaanhaạn dị nyinhạ uḅenhị nạ ka/legheri. Eḍighi maạr dị nạ alhoghoma mọ oye o/naghanhạn dọl phọ anạ, pọ nạ atue ni amoọgh okparamhị esi eḍeenhaan phọ aMephibosheth. (2 Sam. 4:4) Odị aḍigh ni eghạ, ḅilhẹ Uw-emhạ phọ aDevid adạph idị odị anhaghạn dị i/tu inẹ, bịn azoọm nyodị eten dị i/kpeanhaạn. Ghalhamọ r’iduọn phọ ni, odị o/tuạn ikarạph araraạr phọ emiteghunhaan bọ nyodị bịn oḅonyonhu ozuan; kparipẹ ghụn odị asereghiạn ni imạ araraạr dị emitenhaan nyodị. Odị asereghiạn ni iiḅi phọ Uw-emhạ phọ aDevid aḍighi bọ nyodị igbaany. (2 Sam. 9:6-10) Esi iduọn phọ, mem mọ aDevid azoọm bọ nyodị eten dị i/kpeanhaạn, odị anhaghanhạn ni oomo ipẹ emite bọ. Odị o/tuạn opiomạn phọ aDevid bịn oghạgh olhoghi. Ḅilhẹ odị o/kpalhạm aZihova loor esi ipẹ aDevid aḍighi bọ. AMephibosheth agbon ghụn ipẹ odị katue bọ aloghonhaạn ḍighaạgh Uw-emhạ phọ aZihova masagharạn bọ elo phọ. (2 Sam. 16:1-4; 19:24-30) AZihova aḍighi ni idị ogẹ imạ eḍeenhaan phọ aMephibosheth oseere ilọ asuọ ayira.—Rom. 15:4. w20.04 26 ¶3; 30 ¶18-19

Otue ni omạ buniin siẹn ookpomhoghan phọ okumu idiphọ amisonarị, okọy eten dị agbatanhaạn, obobọ okọy eten oomo amem. Abidị mosighẹ oomo amem mọ abidị olọgh ogbạ ikpo onhụ phọ ḅilhẹ r’oḍighi awe bumatuạn. Ghalhamọ r’iduọn abukaaphọm mọ abuphẹ phọ u/moọgh bọ ni ruphua, aZihova m’asephọm ni bidị ibadị igey araraạr. (Mạk 10:29, 30) Yira opomhoghiạn iikiạ bumor r’abumarani phọ abuẹn phọ, kụ olhoghi ayira aḅaạl li agey iduọn bidị oḍighi aani bọ pakirị ookpomhoghan phọ! Ogina abumor phọ abuphẹ phọ omaaghị bọ ḅilhẹ r’abuphẹ odi bọ rukumuan oomo amem mọ bịn kụ uphạm riisi siẹn ookpomhoghan phọ ḍughụm? Eeye! Torobọ okaaphọm iiḅi iinhaghạn phọ, amoọgh ni maạr oḍighinhom esi Enhaạn r’ookpomhoghan phọ. (Rom. 10:15; 1 Kọr. 3:6-8) Okạr oghaạph, aḍinhiin aḍikpanhạ aḍiigbu ookpomhoghan phọ pọ oḍighi awe bumatuạn Uw-emhoọgh phọ ayira, Zizọs Kraist. (Mat. 28:19, 20; 1 Tim. 2:4) Oomo abukaaphọm iiḅi iinhaghạn phọ, bulọ moḍiiny muụm r’abulọ ko/ḍiiny, rokparaghạ ghan ni osighẹ oḍighi phọ ophọn oḍighi eḅẹl siphẹ adọl aghuḍum mọ abidị.—Mat. 24:14

Esi aBaibul phọ arodon eḍeenhaan mọ mem dị yira osoman ipaanhaạn, aZizọs kụ ubakị ni iyira. Iikia i/lo mọ ikpo onhụ phọ aZizọs ketue ni ikparamhị iyira. Eeghe kụ iḍighi? Loor esi dị iniin asiḍio rikparanhaạn ghan ni iyira okparạm. Esi omaạm, mem dị oye ephomhoghiạn ayira amhugh, yira rokaran ghan ni eephinha phọ esi asiḍughul otu, ḅilhẹ r’ibadị asiạ. Abunhọn rokaran ghan igbagarạ asiḍio loor esi aḍikpọ, Abunhọn kẹn rokaran ghan igbagarạ asiḍio loor esi oḅonyonhu ozuan r’ooḅaghamhiạn aloor. Ghalhamọ r’iduọn phọ ni, yira romoọgh ghan ni inyaạm okparạm loor esi dị yira olegheri mọ aZizọs odi ni r’ayira “ḍio etum ḍio,” ghalhamọ r’asiḍio phọ ipẹ egbagarạ bọ siẹn adọl aghuḍum mọ ayira. (Mat. 11:28-30) Ekpo Onhụ phọ Enhaạn ingọ iyira okuphom owol mọ aZihova rulhoghonhaạn ghan iyira ḍighaạgh dị eego esi aruukpaạny phọ. (Hib. 1:7, 14) Esi omaạm, aruukpaạny phọ ribakị ghan ni iyira keḅilhẹ iiḅakị iyira iduọn yira rogbeelhom bọ “ooḅi oghaạph [Omhạr] phọ” koḅenhị we “oomo areelhe phọ r’arughunughun r’arunhụ r’aramạ.”—Mat. 24:13, 14; Ogan. 14:6. w20.11 13-14 ¶6-7

Ewạ ni mọ ḍighi idị opọ nạ ratughemhị bọ kalegheri mọ ipẹ odị ratuughạ bọ eḍighi Ekpo Onhụ Enhaạn. (1 Tẹs. 2:13) Ika kụ idị nạ katue aḍighi iphẹn phọ? Ngọ ni eepoogh dị opọ nạ ratughemhị bọ kakaạph aani ghan iyaạr dị odị atuughạ. Kparipẹ dị nạ bịn kụ kagbạ ghan ipẹ nạ anhaghanhạn bọ esi aBaibul phọ aḅenhị nyodị, ḅenhị ghan mọ odị aghaạph idị odị anhaghanhạn esi aBaibul phọ. Loghonhaạn ḍighaạgh opọ nạ ratughemhị ghan bọ omhiịn idị Ekpo Onhụ phọ Enhaạn egbolhomaam aani nyodị r’aloor. Puru nyodị sipuru dị keloghonhaạn nyodị ḍighaạgh oghaạph—idị odị aatughiạn aani ḅilhẹ alhoghoma ilọ esi phọ nyinha aạl bọ. (Luk 10:25-28) Esi omaạm, puru mọ: “Eghẹn eegharạ aZihova kụ edị nạ amhiịn siẹn esi aBaibul phọ ephẹn phọ?” “Ika kụ idị iphẹn phọ kelhoghonhaạn nyinhạ ḍighaạgh?” “Nạ aloghoma ika ilọ iphẹn nạ atuughạ bọ nyiidiphọ?” Ipẹ opọ nạ ratughemhị ghan bọ alhegheri bọ kụ ki/yaạr phọ, kuolọ ipẹ odị asighẹ bọ raḍighinhom ipẹ odị malhegheri bọ aḅilhẹ aphomhoghiạn, kụ ekạr iyaạr phọ. Ngọ ghan eepoogh aBaibul phọ kụ aghaaphạn ghan uwotu phọ. Ewạ ni osooromhi aloor orue oḍighi aani otughemhiạ dị asilor. w20.10 15 ¶5-6

Yira kotue ni okuphom owol mọ dị ke/bia mun, yira komadạn ni oghaạph iiḅi iinhaghạn phọ mem mọ amuphẹ ekpeanhaạn bọ. Ooḅeghiọn ipẹ emite bọ siḍio phọ aNoa. AZihova aḍeenhaan ni mọ onọ kụ ogbogh Odaphạm Amem. Esi 120 asiạ epẹ omhạn, aZihova agbiighi ni ilọ amem mọ Amuụm Aḍigho phọ katu bọ. Ibadị asiạ r’eten, aZihova atọ ni aḅenhị Noa okạ oghuugh, eeni esi 40 obobọ 50 asiạ kụ egbi bọ oteẹny amem mọ Amuụm Aḍigho phọ aru bọ. ANoa aghiọm ni ghisigh akumuan ghan etigheri iduọn awe phọ u/naghạn bọ oghaạph phọ odị, odị aghiọm ni ghisigh agbeelhom dom iphụr arurụ phọ tutụ aZihova aḅẹm bọ mọ meteẹny oḍigh oghuugh phọ. Mem mọ amuphẹ ekasiạ bọ, aZihova ‘aghughi ni eghuugh phọ.” (Gen. 6:3; 7:1, 2, 16) Moọny amem, aZihova kasiemhi eekunha oḍighi iphelhegbeel Omhạr phọ; odị ‘kakughi ni eghuugh phọ’ siẹn aḅirinhi phọ aSetan, kụ urorori iyira alọgh omhoom aḅirinhi elhiom eḍighinhom iyaạr. Kụ egbi oteẹny amem mọ amuphẹ phọ, eḍighi idị yira kotuughaạny Noa, ḅilhẹ r’abunhọn abuẹn phọ u/meera bọ mọ aḍighaạgh abidị ephooghian. Eḍighi edị yira kogbon, omoọgh okparạm, ḅilhẹ opamanhạm omheeraam dị akpạr okị esi aZihova ḅilhẹ r’aruguanhaan phọ odị. w20.09 13 ¶18-19

Iikolhobian aruw-emhụ phọ kụ mi/lo bọ, obọ eghunotu phọ aZihova miwalhawalhạ ni ḅilhẹ oḅaạl olhoghi mu/tọl. Esi omaạm, obọ oye r’oye mu/legheri oye dị akpẹ ghan ongọ osopha mem lọ ophạm raghaạph ḅilhẹ r’oye dị kaḍiemhiom oḍighi ipẹ mosopha bọ. Eḍighi maạr dị iikpọ phọ uw-emhụ eghunotu amhoọgh bọ eḍighi ni inmo k’Enhaạn, eeghe kụ iḍighi kụ ibadị anmariịr ḍio arodon ologhoma bọ mọ owiririom ni bunọ? Loor esi dị ibadị alhephiri anmụny mogunhọm siigbu phọ aZihova aphighinhaan bọ rughunotu, bịn osaḅạr odạph iḍighinhom araraạr ekpisi abidị. Ḅilhẹ kẹn bidị otue ni otuạn ogbaanyamhị eephuạ abidị bịn ozoọm nmariịr phọ abidị eten dị i/nighẹ. Esi omaạm, olom atue ni aponomaam anhịr phọ odị ilọ oḍeenhaan mọ onọ aḍigh ni eghuan ḅilhẹ mọ onọ “olhephiri oọny.” Eeni odị atue ni aatughiạn mọ onọ ka/tue akpaariọm anhịr phọ odị ophomhoghiạn odị, kuolọ mọ onọ katue ni aḍighi idị anhịr phọ odị kakiilhaan ghan nyodị. Bịn eeni anhịr phọ aḍighi ghan torobọ ilọ odị aḅẹm loor oghiilhaan. Aḍiitughiạn phọ aḍiẹn phọ ḅilhẹ r’eegharạ phọ ephẹn phọ repiemhi ghan eegu phọ r’eghuan phọ anmariịr omhoọgh bọ, kụ iphẹn phọ ekạr kụ egbạgh r’ipẹ aZihova rawạ bọ esi aburulom.—Efẹ. 5:25, 28. w21.02 3 ¶6-7

AKristẹn dị osoman ooḅaghamhiạn aloor loor iiḅaghamhị, kotue ni ooḅereghị olọm aZihova olhoghonhaạn aḍighaạgh. AZihova katue ni apagharanhaạn iiḅereghị phọ anạ esi ongọ anạ “eephọ phọ k’Enaạn epel bọ dị oye katue alegheri.” (Fil. 4:6, 7) AZihova kangọ nyinhạ eephọ phọ epẹ phọ dị eego esi uwaloor iigbia phọ odị. (Gal. 5:22) Mem lọ nạ rakaaphạn aZihova esi iiḅereghị, kaạph oomo phọ ipẹ nạ alhoghoma bọ aḅenhị nyodị. Kaạph onyen. Kaạph iiḅaghamhị phọ aḅenhị nyodị, kụ aghaạph ipẹ nạ alhoghoma bọ ilọ iiḅaghamhị phọ. Eḍighi maạr dị kotue ni opamaghạn iiḅaghamhị phọ, po lọm nyodị osụ-olhoghi olhegheriom eten dị enhighẹ r’inyaạm oḍighinhom. Kụ eḍighi maạr dị r’ilọ oḍighi i/lo, pọ lọm aZihova olhoghonhaạn aḍighaạgh ilọ orue ophamaghạn ooḅaghamhiạn aloor phọ anạ. Nạ atuụgh ipẹ reḍighi bọ nyinhạ kụ aghaạph aḅenhị nyodị mem lọ nạ raaḅereghị, bịn medughanhaan nyinhạ olhegheri amem dị aZihova maphagharanhaạn iiḅereghị phọ anạ. Nạ aaḅereghị kụ ko/phagharanhaạn pọ nyinhạ ki/phẹr. AZihova rawạ mọ kaạph ghan onyen ipẹ reḍighi bọ nyinhạ, kụ aḅilhẹ aghiọm ghisigh alhọm ghan.—Luk 11:8-10. w21.01 3 ¶6-7

Siẹn ookpomhoghan phọ ḍio arodon, arughunotu dị ophạm ibạm anmụny ḅilhẹ r’abudị ko/mhạr kụ odi. Ghalhamọ r’iduọn phọ ni, ibadị abumor r’abumarani dị ko/phin obobọ k/aạl ilhom odi aani ni. Ika kụ idị yira kopogh ghan buẹn ko/phin bọ obobọ k/aạl bọ ilhom? Ooḅeghiọn eten phọ epẹ aZizọs aphogh bọ dọl egelenyạ. Mem mọ odị arọl bọ siẹn ade phọ akumuan, odị o/phin anhịr. Odị arọl dọl egelenyạ kụ agbon mem mọ odị r’arukumuan phọ odị. AZizọs o/tughemhị mọ iten dị oye phọ aphin anhịr obobọ arọl dọl egelenyạ. Odị aḅẹm mọ toroboiperolbọ abuniin aKristẹn kotọl li dị kosopha mọ bunọ ko/pin anhịr obobọ ilhom ko/bạl. (Miịn iyaạr ituughạ dị edi Matiu 19:12) AZizọs alhọgh ni eegu buphẹ nmariịr u/pin bọ obobọ ilhom u/bạl bọ. Odị o/mhiịn buphẹ orọl bọ dọl egelenyạ idiphọ awe dị osoorom, obobọ we dị rotoph iyaạr siphẹ adọl aghuḍum mọ abidị. Idiphọ aZizọs, otelhedom mọ aPọl aphamhanhạm ni rukumuan phọ odị idiphọ egelenyạ. Amem i/tọl dị aPọl atughemhị mọ ebeeph ni dị onyọ aKristẹn kabạl ilhom obobọ apin anhịr. Odị alhegheri ni mọ torobọ oye kụ kasopha. w20.08 28 ¶7-8

Aghuḍum mọ otelhedom mọ aJọn adoọny ni ḅilhẹ odị amhiịn ni ibadị araraạr. Odị asoman ni ipaanhaạn kirokirọ dị mitue ni edughe omheeraam mọ odị, kuolọ egbagbạ amem odị akparaghạ ghan ni oḍighi ipẹ odị katue bọ ooko itọ phọ aZizọs, eḅaramaạm ipẹ eḅẹm bọ mọ odị aphomhoghiạn bumor r’abumarani phọ odị. Esi iduọn phọ, aJọn akuphom ni owol mọ aZihova r’aZizọs opomhoghiạn ni nyodị ḅilhẹ mọ kongọ ni nyodị inyaạm mọ odị rawạ bọ okpạr opu ipaanhaạn. (Jọn 14:15-17; 15:9, 10) ASetan r’aḅirinhi phọ odị u/tue usophoghom Jọn ophomhoghiạn abumor r’abumarani phọ odị, ḅilhẹ r’oḍeenhaan ghan abidị ephomhoghiạn esi ipẹ odị aghaạph ghan bọ aḅilhẹ aḍighi. Idiphọ aJọn, yira odi aḅirinhi dị aSetan kụ ratooghị kụ odị o/mhoọgh ephomhoghiạn awe. (1 Jọn 3:1, 10) Ghalhamọ r’iduọn odị rawạ bọ ni dị yira kolọgh ḍien bumor r’abumarani phọ ayira, odị ka/tue amoọgh ekol eḍighi maạr dị yira u/ngọ nyodị eepoogh. Osopha ophomhoghiạn abumor r’abumarani phọ ayira, ḅilhẹ r’oḍeenhaan mọ yira opomoghiạn ni bidị esi ipẹ yira rokaạph ghan bọ koḅilhẹ oḍighi. Mem dị yira oḍeenhaan ghan ephomhoghiạn, yira komoọgh ogbaanyạn, ibo, ḅilhẹ r’aḍimạ adọl aghuḍum.—1 Jọn 4:7. w21.01 13 ¶18-19

Aghuḍum siẹn aḅirinhi phọ ophọn aSetan kụ raaḅakị bọ akpạr ri, eeni amem yira ro/legheri ghan ilọ oḍighi. (2 Tim. 3:1) Kuolọ, i/wạ mọ yira omhoọgh oboom ooḅaghamhiạn aloor obobọ oghiilhaan. AZihova alegheri ni ipẹ yira rokaran bọ. Mem lọ yira omheel, odị aguanhaan ni ophạm ayira omheremhị r’aḍighaạgh elhiom mọ odị. (Isa. 41:10, 13) R’oḍuomolhoghi mọ aZihova katue ni ubakị iyira, yira kotue ni omoọgh inyaạm mọ Aḍinyạ iigbia phọ rengọ ghan bọ bịn okpạr opu ipaanhaạn lọ yira osoman. Asividio phọ ayira, ilọ onhaghanhạm arurụ, aregberi dị eḍighi ilọ onhaghanhạm arurụ, ḅilhẹ r’ipẹ edi bọ siphẹ eeḍiạn emhuoghaạph phọ “Imitate Their Faith” reḍighi ghan idị ibạl aBaibul phọ ketu eye. Kụ nạ agbi ophogh avidio, m’ilọ onhaghanhạm arurụ, obobọ aạl iphẹn ogoolhạ bọ siẹn phọ, ḅeeḅereghị alhọm aZihova alhoghonhaạn nyinhạ ḍighaạgh omhiịn ikpanhạ araraạr ituughạ dị nạ kasighẹ aḍighinhom. Gbiom olhoghi mọ nạ kụ oye aBaibul phọ nạ rabạl bọ ilọ odị. Gbirima ilọ ipẹ arebenhẹ phọ aZihova abuẹn phọ okpẹ bọ oḍuomolhoghi oḍighi bọ ḅilhẹ r’ipẹ aZihova alhoghonhaạn bọ bidị ḍighaạgh okpạr opu iiḅaghamhị phọ bidị osoman bọ. Kụ asighẹ aḍighinhom aani ipẹ nạ atuughạ bọ esi eḍeenhaan phọ abidị. Sẹph aZihova olhoghonhaạn aḍighaạgh phọ odị rangọ ghan bọ nyinhạ k’aḍio phọ. Kụ aḍeenhaan mọ nạ asereghiạn ni, esi owạ ghan aroopoogh okparamhị r’obakị aani abunhọn. w21.03 19 ¶22-23

Eḍighi maạr dị nyinha m’aalhạn ni kụ rewạ ni omhạr ibạm anmụny, pọ ipuruan siloor anyinha sipuru phọ iphẹn: ‘Yoor oḍighi ni we dị omhoọgh igey asiya r’aZihova ḅilhẹ osooromhi loor, dị aZihova katue ni aḅọgh obumoọny angọ ḍughụm?’ (Ps. 127:3, 4) Kụ eḍighi maạr dị nyinha memhoọgh ni nmụny, pọ ipuruan siloor anyinha mọ: ‘Yoor rookonhom ni nmụny phọ ayoor eten dị bidị kokpạr ḍighaạgh ḍughụm?’ (Eccl. 3:12, 13) ‘Yoor roḍighi ni oomo ipẹ yoor kotue bọ oghoph anmụny phọ ayoor osighẹ esi izuoghom r’aroozọ dị i/ḅaạl dị eeni bidị kosoman ḍughụm?’ (Prov. 22:3) Nyinha ke/tue ekoph nmụny phọ anyinha esighẹ esi oomo ipaanhaạn phọ bidị kosoman bọ. Kuolọ r’eten ephomhoghiạn, enụm enụm nyinha ketue ni eekolhobian bidị ilọ araraạr phọ bidị kosoman bọ ghisigh esi otughemhị abidị ilọ osighẹ ghan oroma Ekpo Onhụ phọ Enhaạn. (Prov. 2:1-6) Esi omaạm, eḍighi maạr dị onyọ asiya anyinha alhegheri kụ awilhẹ igey phọ, pọ iloghonhaạn ḍighaạgh ibạm anmụny phọ anyinha otuughạ omhiịn isiphẹ Ekpo Onhụ phọ Enhaạn, iyaạr phọ emhạn bọ maạr dị bidị koḅạr aZihova. (Ps. 31:23) Obobọ eḍighi maạr dị aḍuugh esighẹ oye ephomhoghiạn anyinha, pọ iḍeenhaan ibạm anmụny phọ anyinha riisi aBaibul dị keloghonhaạn bidị ḍighaạgh orue ophamhaghạ emoghi phọ abidị kụ omhoọgh eephọ olhoghi.—2 Kọr. 1:3, 4; 2 Tim. 3:16. w20.10 27 ¶7