Ariisi oghị omhiịn ophanyanhaạn asipuru Aḍinyạ Ituughạ Ogboku Awiki Phọ
AUGUST 5-11
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | 2 TIMOTI 1-4
“Uwaloor Phọ Enaạn Ingọ Bọ Iyira . . . K/uwaloor Eepuph”
(2 Timoti 1:7) Uwaloor phọ Enaạn ingọ bọ iyira, olọ iikpọ r’ephomoghiạn r’ophamaghạn aloor, k/uwaloor eepuph.
w09 5/15 15 ¶9
Iḍoọgh—Iḍighi Idị Oomo Awe Komiịn Eghimọm Aghisigh Phọ Anyinha
9 Olhoghonhaạn aḍighaạgh Timoti, aPọl aḅilhẹ aghiọm nyodị olhoghi mọ: “Uwaloor phọ Enaạn ingọ bọ iyira, olọ iikpọ r’ephomoghiạn r’ophamaghạn aloor, k/uwaloor eepuph.” (2 Tim. 1:7) “Ophamaghạn aloor” phọ eḅaramaạm orue ghan ootughiạn kụ ogbiran r’osụ ologhi. Eḅaramaạm inyaạm okaran araraạr eten phọ epẹ bidị edi bọ—ke/ten phọ epẹ nạ awạ bọ mọ erọl. Buniin iḍoọgh dị k/omhiịn raraạr roḍeenhaan ghan uwaloor eepuph, kụ owạ reten osighẹ iiḅaghamhị olhoghi abidị esi omheel oḍigh onaanhị yogh ghan atuboom aralhạ obobọ ophogh ghan asifim, ophugholhọgh igbagarạ asirooghọ r’amiim obobọ orolhạn esi dị u/ḅaạl. Otoma Kristẹn mọ “owilẹ dọl dị Enaạn u/legheri r’aruuphuạ aḅirini phọ, orọl siẹn aḅirini phọ dọl osereghian, ooko loor [abidị]. Oseleman, olegheri Enhaạn.”—Taitọs 2:12.
(2 Timoti 1:8) Ka/kiil umugholoor oghaaphaạn ghan ilọ Omoọgh-we phọ ayira. Mị kẹn ku/ḍigh umugholoor esi anạ, idiphọ mị aghol bọ emụ phọ odị kụ odi bọ ikoli phọ. Kparipẹ ghụn, pin ni bin omiinọm mọ muọ anạ loor emụ ooḅi oghaạph phọ, idiphọ Enaạn engọ bọ nyinạ iikpọ phọ.
w03 3/1 9 ¶7
‘Ikparamị ni Iloghi Anyina Kụ Ekpạr!’
7 APọl agẹ bọ aghiọm Timoti aḅẹm mọ: “Uwaloor phọ Enaạn ingọ bọ iyira olọ iikpọ . . . k/uwaloor eepuph. Ka/kiil umugholoor oghaaphaạn ghan ilọ Omoọgh-we phọ ayira.” (2 Timoti 1:7, 8; Mạk 8:38) R’iphẹn yira m’aạl bọ, opuruan siloor mọ: ‘Mị rakiilhom ni umugholoor omheeraam mọ amhị, obobọ mị akparamhị ni olhoghi amhị? Siphẹ otu oḍighi phọ amhị (obobọ otu askul), mị aḍighi ni idị abuerị phọ olhegheri mọ mị Onyọ Ogbaanhaạn aZihova obobọ mị abooghị loor amhị? Mị rakiilhom ghan ni umugholoor ogbatanhaạn rabuerị phọ, obobọ mị raabagaam ghan ni oganhanhamhi aloor amhị loor asiya phọ amhị r’aZihova ḍughụm?’ Eḍighi maạr lọ nạ raloghoma ghan ekarạph eten ilọ oghaạph iiḅi iinaghạn phọ obobọ osighẹ aḍimeerạ dị ii/tura, pọ tuutughiạn oroma phọ aZihova angọ bọ Joshua: “Kpọ oḅio kụ akpạr.” Ka/bula mọ, yira ro/wạ mọ abuọ oḍighi obobọ abuọ askul phọ ayira k’usighẹ iyira kuolọ aZihova r’aZizọs Kraist.—Galetia 1:10.
Oguphogh Owạ Imạ Araraạr Dị Edi Siphẹ ABaibul Phọ
(2 Timoti 2:3, 4) Pin ni bin omiinọm mọ muọ anạ, idiphọ ogey onyọ eghạm k’aJizọs Kraist. 4 Onyọ eghạm dị odi ḍiikparạ adom rawạ ghan oḍighi idị keḅeraạn uw-emụ phọ abidị, o/meeraam mun ooḍikuan oopho awe.
w17.07 10 ¶13
Owạ Egey Ephua
13 ATimoti aḍighi ni oye omheeraam. APọl romhạgh bọ Timoti mọ “ogey onyọ eghạm k’aZizọs Kraist,” odị aḅenhị nyodị mọ: “Onyọ eghạm dị odi ḍiikparạ adom rawạ ghan oḍighi idị keḅeraạn uw-emụ phọ abidị, o/meeraam mun ooḍikuan oopho awe.” (2 Tim. 2:3, 4) Abumatuạn ph’aZizọs rodon, oḅarạm bọ ni ḍita abuọ arukumuan oomo amem dị opel li oniin erubal, rosighẹ ghan ni oroma phọ aPọl koḍighinhom odaphạn ipẹ asidọl phọ abidị emeera bọ. Dị u/meera mọ igbeelhom abumuul ḍighi r’aḅirinhi phọ kụ enyuughiom bidị, bidị rootughiạn ghan ni ḍinhị olhogh phọ eḅẹm bọ mọ: “Opọ alhe bọ omụgh phọ aḍighi ebenhẹ opọ aalhẹ bọ.” (Prov. 22:7) Iyaạr dị eḅeraạn Setan iboom pọ omhiịn dị yira olhọgh oomo amem r’inyaạm ayira oḍighi arebenhẹ aḅirinhi abumuul ḍighi ph’odị. Iniin odọ osopha ketue ni ilhọgh iyira eghoroghan e/moọgh ikpoki esi ibadị asiạ. Olheeghi iboom iimụgh oghoom otu, iboom iimụgh dị anmụny askul olhe dị k/orue okpẹ, ogho amoto dị amạn ḍighi, r’oḍighi yogh igbogh asipinien ketue ni elọgh oye dọl eboom ekulhom. Yira roḍeenhaan ghan ogey osụ-olhoghi mem lọ yira odughe dọl aghuḍum ayira, kụ oghome iimụgh r’amalhiom, bịn ongọ eepoogh siloor phọ ayira oḍighi arebenhẹ Enhaạn kparipẹ r’aḅirinhi abumuul ḍighi phọ ophọn.—1 Tim. 6:10.
(2 Timoti 2:23) Kporiọn raghaạgh inunuạn elologhi r’elegheri iyaạr. Nạ alegheri ni mọ iphẹn phọ kụ rekọm ghan bọ sighiton kesereghi.
w14 7/15 14 ¶10
Awe Phọ AZihova “R’okel Ghan Ikarạph”
10 Ḍio arodon, awe dị m’omheel oḅuạ u/lo siphẹ ookpomhoghan phọ dị rokomọgh ghan iiḅaghamhị k’ongọ we phọ aZihova. Ghalamọ r’iduọn phọ ni, mem lọ yira ozuan itughemhị dị i/lo Baibul, etigheri esi phọ eḍuạ bọ emite, oghel ghan egina amem. I/ḍighi osụ-olhoghi oogbaghanhaạn ghan r’abuẹn m’omheel bọ oḅuạ, mughumọ ghisigh r’aghisigh, siphẹ intanẹt phọ, obobọ enhọn eten oghaaphạn ghan abidị. Ghalamọ iitughiạn phọ iḍighi ilọ olhoghonhaạn oye phọ ḍighaạgh, odọ araghaạph phọ ipẹ i/meeraam r’oroma aBaibul phọ purukụ yira ooḅeghiọn bọ. Ii, idiphọ awe aZihova, oghel torobọ odọ omheel oḅuạ.
Ibạl ABaibul
(2 Timoti 1:1-18) Mị aPọI phọ Enaạn esaḅạr bọ oḍighi otelhedom aJizọs Kraist kụ ugẹ ḍinyạ phọ aḍiẹn raruomaan nyinạ aTimoti ooḅi oọny phọ amị. 2 Enaạn kụ irom ni imị oghaạph ghan ilọ aghuḍum mọ dị maguanaan bọ ongọ ayira phọ moḅophoghạn bọ Jizọs Kraist. Aḍisẹph r’onmạ ighirigiir r’eephọ k’Enaạn Odẹ phọ, r’aJizọs Kraist Omoọgh-we phọ ayira, erolonaạn nyinạ! 3 Mị rasẹph ni Enaạn phọ mị asighẹ bọ ologhi dị iyaạr ibooghiạn i/lo kụ raḍighinom bọ oḍighi phọ kangọ, idiphọ aburudẹ phọ amị. Mị raghol ghan ni nyinạ esi iiḅereghị ḍughul r’ootaany kangọ Enaạn ḍisẹph oomo amem. 4 Mị k”owuIa izin phọ nạ agharaghị bọ mem mọ mị kaḍuạ bọ, kụ mị rawạ ni iboom omiịn anạ, pidị mị amuzeḍi ibo phọ amị. 5 Mị rakiọm ghan ni oIoghi mọ nạ amoọgh ni omeeraam dị u/ḅarạm iguegue. Ophọn kụ odọ phọ omeeraam mọ aLoịs onhiin oko phọ anạ, r’aYunais onhiin phọ anạ, omoọgh bọ kụ mị aḍuom ni ologhi mọ nạ amoọgh aani ni. 6 Mị utuạn iduọn phọ kụ raghiọm ghan bọ nyinạ ologhi mọ tiitieni niạn aruunmo aruwaloor phọ Enaạn engọ bọ nyinạ, mem mọ mị aḅạm bọ raghaạgh phọ amị emụ phọ anạ. 7 Uwaloor phọ Enaạn ingọ bọ iyira, olọ iikpọ r’ephomoghiạn r’ophamaghạn aloor, k/uwaloor eepuph. 8 Ka/kiil umugholoor oghaaphaạn ghan ilọ Omoọgh-we phọ ayira. Mị kẹn ku/ḍigh umugholoor esi anạ, idiphọ mị aghol bọ emụ phọ odị kụ odi bọ ikoli phọ. Kparipẹ ghụn, pin ni bin omiinọm mọ muọ anạ loor emụ ooḅi oghaạph phọ, idiphọ Enaạn engọ bọ nyinạ iikpọ phọ. 9 Odị o/tuạn iiḍighi phọ ayira kụ uphẹl bọ iyira aḅilẹ bọ umạgh iyira aḍighi weye phọ odị. Enaạn isighẹ ni onmạ ighirigiir phọ odị kụ etooghiọm bọ k’agediidi mọ yira phọ moḅophoghạn bọ Jizọs Kraist omoọgh ooḅi oghọr. 10 Kụ nyiidiphọ odị magananami oghọr phọ ophọn uḍeenaan iyira, idiphọ aJizọs Kraist Opeliạ phọ ayira mamite bọ egaan phọ. Odị maphiemi iikpọ aḍuugh, kụ masighẹ ooḅi oghaạph phọ agananamiom ghuḍum k’agee-pọ phọ. 11 Enaạn mimạ imị oḍighi otelhedom dị kagbeelom ghan aḅilẹ atughemị ghan ooḅi oghaạph phọ ophọn. 12 Kụ mị utuạn emụ iduọn phọ kụ ramiinọm bọ iminimiịn phọ iphẹn. UmughoIoor imị ru/siph, idị eḍighi bọ mị alegheri ni nyopọ mị aḍuom bọ ologhi phọ, aḅilẹ akuphom owol mọ odị katue ni uphamanaạn imị ipẹ dị aḅọgh bọ alọgh ḍighaạgh phọ amị tutụ eteẹny ḍio phọ dị katu bọ. 13 Pạm ni igey ikpo onhụ phọ ipẹ mị atughemị bọ nyinạ, asighẹ aḍighi iyaạr dị komaạm ghan. Tolọm omeeraam mọ r’ephomoghiạn phọ yira phọ abuphẹ moḅophoghạn bọ Jizọs Kraist omoọgh bọ. 14 Maạr aphạm igey phọ ipẹ Uwaloor Iigbia phọ odi bọ loor phọ ayira maḅọgh bọ alọgh ḍighaạgh phọ anạ. 15 Nạ alegheri ni mọ torobọ oye epẹ eelhe phọ Esia, oḅarạm Fijelọs r’aHemojenis, ughinom ni imị. 16 Mị raaḅereghiạn ghan Omoọgh-we phọ mọ odị anmạ ni ighirigiir otọ k’Onesiforọs, idị eḍighi bọ odị kụ akparamị ghan ologhi amị ibadị amem. Adọl ikoli phọ amị i/siphe nyodị umugholoor. 17 Odị aru bọ asi Rom o/phiemi mem owạ amị omiịn. 18 Mị raaḅereghiạn ghan mọ Omoọgh-we phọ anmạ ni nyodị ighirigiir ḍio iiruẹn phọ. Nạ alegheri ni agey oomo phọ iiḅi phọ dị uḍighi bọ imị epẹ Efesọs.
AUGUST 12-18
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | TAITỌS 1–FAILIMỌN
“Maaghị Ikumor Awe”
(Taitọs 1:5-9) Mị uwilẹ nyinạ epẹ Krit, obọ nạ akori aselemi raraạr phọ ipẹ ekpẹ bọ oseIemi phọ, aḅilẹ amaaghị ikumor awe asiosị aseere emạ emạ. Tuutughiạn ipẹ mị aḅenị bọ nyinạ, 6 mọ ekpẹ ni mọ okumor oye asiosị aḍighi oye dị aḍipiomạn i/loonaan, ḅilẹ kẹn aphin nyoniin anịr bịn. Anmụny phọ odị omeeraam ni Enaạn, ku/moọgh roozọ dị kokoI ghan bidị mọ anmụny oIomoghian ḅiIẹ r’enaghanạn. 7 Loor esi dị odị kụ rapogh bọ oḍighi phọ Enaạn, opoghom abuọ asiosị phọ ku/moọgh ḍipiomạn. Ku/ḍighi oye iituma r’ekpom r’igbagbaar r’ekpooko ikpoki, ḅiIẹ r’ookọ miim. 8 Aḍighi ni oye dị aghuraam we, aḅiIẹ aphomoghiạn ipẹ enighẹ bọ! Aru ni oye dị arue ni raako Ioor, aaleeny ni esi oḍighi phọ odị! Aḍighi ni oye aruukuan, dị rapamaghạn ghan loor odị! 9 Aphạm ni dom mọ urom bọ iyira ḍiphẹ ekpẹ bọ ni oḍuom ologhi phọ akparamị, obọ odị arue asighẹ igey itughemị phọ aromoghiom bunọn awe, aḅilẹ kẹn arue akpạr apu buphẹ roogbaghanaạn bọ ipẹ dị atughemị bọ.
w14 11/15 28-29
Asipuru Dị Abuẹn Robạl Ghan Bọ Rinyạ Phọ Ayira Opuru
Ii obọ aBaibul phọ o/ghaạph k’anhị k’alhe oomo areten phọ ipẹ omaaghị ghan bọ ikumor awe mem mọ opọ phọ, kuolọ omiịn ni raraạr dị eḍeenhaan ipẹ oḍighi ghan bọ. Uḅenhị iyira mọ amem mọ aPọl r’aBanabạs rotigheel bọ erelhe amisionarị phọ abidị kụ edị ‘osọn ikumor awe osereghi siosị asiosị phọ, r’iiḅereghị r’orọI okoọny kụ oḅọgh bidị ongọ Omoọgh-we phọ bidị omeeraam bọ.’ (Iiḍighi 14:23) Iyạl ikpo asiạ reten, aPọl agẹ aghiomaạn nyoọn rodị rokị ghan bọ erelhe phọ Taitọs, kụ aḅẹm mọ: “Mị uwilẹ nyinạ epẹ Krit, obọ nạ akori aselemi raraạr phọ ipẹ ekpẹ bọ oseIemi phọ, aḅilẹ amaaghị ikumor awe asiosị aseere emạ emạ. Tuutughiạn ipẹ mị aḅenị bọ nyinạ.” (Taitọs 1:5) Iniin phọ itọ phọ kụ edị ongọ aani Timoti, opọ agbor ghan bọ arelhe r’aPọl. (1 Tim. 5:22) Dị eegholaany ni, omaaghị ghan ikumor awe phọ aḍighi ghan oḍighi abupoghom eghir, abutelhedom mọ r’ikumor awe phọ orologhụ bọ Jeruselem ku/maaghị ghan.
Reḍighinhom iyaạr phọ ephẹn erọl bọ siphẹ amem aBaibul phọ, Aloor Phọ Repogh bọ Bugbaanhaạn AZihova m’eeḅenhion eten phọ epẹ romaaghị ghan bọ ikumor awe r’abuẹn rologhonhaạn bọ ḍighaạgh ikumor awe phọ. Emhiigh September 1, 2014, eten phọ ephẹn kụ edị rodaphạn ghan: Torobọ opoghom eghir ramaạr ghan kawaaghị ilọ awe phọ ikumor awe phọ ogẹ bọ oghiomaạn nyodị siphẹ eghir phọ. Mem lọ odị aghị ophogh ookpomhoghan phọ, odị rakparaghạ ghan olhegheri awe phọ abuẹn phọ, r’orelian aani abidị epẹ erugh phọ, eḍighi maạr lọ edugh. Mem lọ odị roghaaphạn r’ikumor awe phọ ilọ abuphẹ bidị ogeeghị bọ oghiọm nyodị, eḍighi oḍighi opoghom eghir phọ omaaghị ikumor awe r’abudị kologhonhaạn ḍighaạgh ikumor awe phọ siphẹ eghir ph’odị. Odaphạn eten phọ ephẹn, bịn m’eghịgh aani ipẹ erọl ghan bọ siphẹ oḅẹl okuron asiạ phọ.
Abuọ anhiạn kụ rongọ ghan bọ oomo iiḅakiọm ilọ iphẹn phọ ? Idiphọ edi ghan bọ, “ogey ebenẹ phọ opọ alegheri bọ maạr” kụ amhoọgh bọ okpanhạ oḍighi ongọ ghan eḍien rebenhẹ phọ. (Mat. 24:45-47) Iphẹn phọ eḅarạm owaaghị ghan araraạr siphẹ aBaibul phọ r’olhoghonhaạn aḍighaạgh uwaloor iigbia phọ, pidị ongọ iiḅakiọm ilọ osighẹ oḍighinhom asinhị iilhogh aBaibul dị emhoọgh maạr oḍighinhom r’ipẹ rooḅakị bọ raraạr ookpomhoghan phọ siẹn aḅirinhi phọ. Ogey ebenhẹ phọ kụ aḅilhẹ kẹn ramaaghị ghan bupoghom eghir r’abuọ Ekụ Phọ Repogh Bọ Olạ Agadạ Phọ. Odaphạn iphẹn phọ, torobọ olạ agadạ kụ ramiteom ghan olhoghonhaạn aḍighaạgh ilọ osighẹ oḍighinhom iiḅakiọm mọ iphẹn. Ikumor awe atorobọ ookpomhoghan omoọgh ogbogh oḍighi omiigha aloor osighẹ ipẹ aBaibul phọ aghaạph bọ ilọ awe dị osi omhanhanhaạm ophoghom abumor phọ bidị rogeeghị bọ m’omạ idiphọ ikumor awe rabudị kologhonhaạn ḍighaạgh ikumor awe phọ siphẹ ookpomhoghan ph’Enaạn. Torobọ opoghom eghir amoọgh ogbogh oḍighi omaạr ooḅeghiọn r’iiḅereghị we phọ ikumor awe phọ ogẹ bọ oghiọm nyodị, kụ omạ abulọ osi omhanhanhaạm.
Oguphogh Owạ Imạ Araraạr Dị Edi Siphẹ ABaibul Phọ
(Taitọs 1:12) Oniin onyọ aKrit r’aloor odị, dị aḍighi ni oyil imiịn, kụ aḅẹm ni mọ, “Abuọ aKrit rogbạ ghan okpẹ oomo amem. Bidị ilhom inạm, r’awe ekpooko r’egbogholeẹr.”
w89 5/15 31 ¶5
Asipuru Dị Abuẹn Robạl Ghan Bọ Rinyạ Phọ Ayira Opuru
Siẹn ph’aPọl ra/kaạph ghan eten osikị obobọ akpoom-okpo oomo awe aKrit. Yira umeeraam iphẹn phọ loor esi dị aPọl alhegheri ni mọ epẹ Krit, aKristẹn odi ni dị Enaạn esighẹ eloghomaạm ḅilhẹ kẹn osagharạn Uwaloor Iigbia Phọ. (Iiḍighi 2:5, 11, 33) “Emạ emạ” aKristẹn urọl li dị oḅọgh loor ongọ, dị oḍighi bọ rookpomhoghan phọ. Mem dị aKristẹn ph’abuẹn phọ u/ḍighi we dị omunughan, yira olegheri m’abidị u/ḍighi bugbaạm okpẹ r’awe ekpooko r’egbogholeẹr; mughumọ umoọgh raagharạ phọ iphẹn phọ obọ aZihova mu/loghomaạm bidị. (Filipai 3:18, 19; Ogananami 21:8) Iduọn yira romiịn ghan bọ ni ibadị areelhe rodon, awe dị omoọgh iiḅi arokpom urọl li Krit dị iḅoriạ araagharạ phọ iphẹn i/ḅeraạn, dị onyaaghiạn ni osighẹ oghaạph phọ Enaạn.—Ezekiel 9:4; poghom Iiḍighi 13:48.
(Failimọn 15, 16) Iini siẹn Onisimọs aḍuạ k’anạ moọny amem mọ amuẹn pidị odị aḅilẹ aḅula arolạn nyinạ k’agee-pọ, 16 idị eḍighi bọ nyiidiphọ odị k/ebenẹ mun bịn, mapu ebenẹ, maḍighi ooḅi onyọ asiya esi aKraist. Odị amạn ni iyaạr iboom esi amị. Kamạn ni iyaạr iḅoom apuemi esi anạ, idị eḍighi bọ odị ebenẹ anạ r’onyọ asiya esi Omoọgh-we phọ.
w08 10/15 31 ¶4
Oghaạph Ookaragh Araraạr dị Edi Rinyạ Phọ Ogẹ Bọ Oghiọm Taitọs, Failimọn, r’awe aHibru
15, 16—Eeghe kụ iḍighi kụ aPọl o/ḅenhị bọ Failimọn m’aseere Onisimọs? Iḅeraạn ni Pọl ophamanạm itọ ‘oghaạph ghan oghaạph iIọ Omạr phọ k’Enaạn, kụ otughemiọm ghan oḅom emụ iIọ aJizọs Kraist Omoọgh-we phọ.’ Esi iduọn phọ, odị o/wạ osighẹ aloor odị oghị olhọgh oghaaphọgh ilọ araraạr dị reeḅaghamhị we, iduọn iphẹn phọ.—Iiḍighi 28:31.
Ibạl ABaibul
(Taitọs 3:1-15) Kiọm ghan ologhi we phọ anạ mọ bidị osooromi loor, onaghanạn ghan itooghị abuphẹ odạ bọ bidị, ookolobian ghan oḍighi atorobọ iyaạr Iọ enighẹ. 2 Ḅenị bidị mọ ku/kaaphaạn ghan oye ikarạph, owileghị iruonụ, omoọgh igbiririph, oḅilẹ osooromi ghan loor esi oomo awe, 3 idị eḍighi bọ mem dị eten yira r’aloor ayira urọl ghan ni dọl eIegheri iyaạr r’enaghanạn r’oyeeIa. Yira uḍighi ni rebenẹ ongọ ikarạph aruuphuạ r’eedughạ kirokirọ. Yira uphiemi ni ghuḍum mọ ayira orọl ghan dọl ighughiạn r’iIoghi eḍịm. Bunọn awe ulọgh ni iyira ḍien kụ yira ulọgh aani ni bidị. 4 Kụ mem mọ Enaạn OpeIiạ phọ ayira egananami bọ onmạ ighirigiir r’ephomoghiạn phọ odị, odị uphẹl li iyira. 5 O/tuạn iiḅi iiḍighi dị yira r’aloor ayira oḍighi yogh, atuạn ghụn onmạ ighirigiir phọ odị kụ uphẹI bọ iyira, loor esi amuụm mọ uwur bọ iyira ootolom ikarạph phọ, r’emoom emarạm r’akumoom aghuḍum mọ Uwaloor Iigbia phọ rungọ ghan bọ iyira. 6 Enaạn ighol emụ aJizọs Kraist Opeliạ phọ ayira, kụ ebalabalamị bọ Uwaloor ligbia phọ iseenaan iyira, 7 obọ etuạn onmạ ighirigiir phọ odị esighẹ mọ yira awe aruukuan ni, yira ophin aani bin aghuḍum k’agee-pọ phọ yira oḍuom bọ ologhi phọ. 8 Ophọn phọ ogey oḅẹm ni. Mị rawạ ni mọ kaạph ni raraạr phọ iphẹn akpaariọm, pidị buphẹ omeeraam bọ Enaạn ozuumaam iiḅi iiḍighi phọ oḍighi ghan. lphẹn phọ enighẹ ni, eḅilẹ kẹn ni emoọgh iyaạr oḍighinom esi awe. 9 Kụ olọ ka/lọgh ḍighaạgh anạ esi inunuạn elologhi, r’oodoọny oḍigh eemarạ etum eemarạ, r’iruonụ, r’iigbaghanaạn ilọ iilogh phọ aMozis. Iphẹn phọ oopho ni bịn, suọ i/moọgh. 10 Pụr ghan ni rurụ amuneni iyạl amem oye lọ raḍighi ghan iIọ ogbaragbaramị awe phọ, kụ agbi omutonaan odị. 11 Nạ aIegheri ni mọ odọ phọ oye phọ opọ maphụ, ḅilẹ kẹn ikarạph phọ odị egbạ ni emiteom mọ odị apiomạn ni. 12 Mem lọ mị arom Atemạs m’aTikikọs oru oteẹny anạ, u/biIẹ ghan oru aNikopolịs oteẹny amị, idị eḍighi bọ mị maguan orọI epẹ runwanyụ eephoọm mọ. 13 U/biIẹ ghan oIoghonaạn aḍighaạgh Zenạs ogbaạm iiIogh phọ, r’ApoIọs, iIọ bidị koḅetenu ereIhe phọ abidị, aḅiIẹ aḍighi idị iyaạr bidị ke/kuom. 14Tughemị we phọ ayira mọ omaạr okuọm mem mọ abidị oḍighi yogh ghan iiḅi iiḍighi, pidị ologhonaạn ghan ḍighaạgh bulọ ekaraghị ekuom. Bidị ku/tọl ḍighiil adọl. 15 Oomo phọ abuphẹ r’amị odi bọ ephẹn mopuru nyinạ. Upurunaan iyoor iiḅi asiya phọ ayira esi omeeraam mọ. Ooḅi oghọr phọ k’Enaạn iroIonaạn inyina!
AUGUST 19-25
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN | HIBRU 1-3
“Pomhoghiạn Ruukuan Kụ Alhọgh Ḍien Ikarạph”
(Hibru 1:8 NW) Kụ olọ, Enaạn ighaạph ilọ Oọny phọ odị mọ, “Enaạn kụ agadạ odaạm emạ phọ anạ k’agee-pọ k’agee-pọ. Ikparạ phọ nạ kadaạm bọ ilọ aruukuan ni.
w14 2/15 5 ¶8
Iboom Kraist, Uw-emhạ Eghuan phọ!
8 AZihova arolomhị Oọny ph’odị idiphọ Uw-emhạ Itooghị aMesaya phọ epẹ k’akẹ 1914. ‘Ikparạ odaạm mọ odị ilọ aruukuan ni,’ esi iduọn phọ, yira okạr okuphom owol mọ itooghị ph’odị keḍighi ilọ aruukuan ḅilhẹ r’elhiom ooruẹn. Itooghị phọ odị eḍighi ni igey, loor esi dị ‘Enhaạn kụ agadạ odaạm emhạ phọ odị.’ Iphẹn phọ remạ ghan mọ aZihova kụ iphighiom itooghị omhạr ph’odị. Idị epelhom siẹn, itooghị phọ aZizọs ketọl bịn “k’agee-pọ k’agee-pọ.” Olhoghi anạ o”ḅaạl okumu aZihova eeḍiạn itooghị ogbogh Uw-emhạ dị Enhaạn kụ amạ?
(Hibru 1:9) Nạ maphomoghiạn ruukuan phọ kụ alọgh ḍien ikarạph. Iduọn kụ iḍighi kụ Enaạn, Enaạn phọ anạ, esaḅạr bọ nyinạ ekueni epuemi iigbo phọ anạ engoọm nyinạ iboom ibo.”
w14 2/15 4-5 ¶7
Iboom Kraist, Uw-emhạ Eghuan phọ!
7 Bạl Psalm 45:6, 7. Loor eboom ephomhoghiạn ph’aZizọs amhoọgh bọ aghị esi adọl aruukuan, aḅilhẹ alhọgh ḍien torobọ iyaạr dị ke/kuenhi Odẹ ph’odị, aZihova m’amạ nyodị idiphọ Uw-emhạ Itooghị aMesaya phọ. Usaḅạr Zizọs kụ ‘oghuenhi’ opuemhi “iigbo” phọ odị, iduọn phọ pọ aruw-emhạ phọ aJuda siphẹ aḍikoọl phọ aDevid. Ika? Eniin eten pọ, aZihova r’aloor kụ aghuenhi Zizọs. Idị epelhom siẹn, aZihova aghuenhi nyodị idiphọ Uw-emhạ r’Ogbogh Opinyọn rikiạ. (Ps. 2:2; Hib. 5:5, 6) Opumom isiẹn, Zizọs phọ u/sagharạn elo kuolọ r’uwaloor iigbia, kụ adọl uw-emhạ phọ odị i/ḍighi ilọ isiẹn ade phọ kuolọ epẹ k’akẹ.
Oguphogh Owạ Imạ Araraạr Dị Edi Siphẹ ABaibul Phọ
(Hibru 1:3) Odị ramuọm ghan ḍiḅaạl eegu phọ Enaạn. Aroozọ phọ odị bịn kụ ikạr eghịgh ipẹ Enaạn. Odị kụ asighẹ bọ ikpo onhụ iikpọ phọ odị rapamạm ghan aḅirini phọ kameremị. Odị mawoph we phọ aḅaalamị, kụ marọl ude ḍighaạgh eliom mọ Enaạn oomo iikpọ phọ.
it-1 1185 ¶1
Akpoghoronaạn
Ipẹ aZizọs aghịgh bọ Odẹ ph’odị nyiidiphọ eeleeny ni r’inhọn odọ asimem ḍughụm?
Oḅẹl Oọny ph’Enaạn, opọ aḍighi bọ Zizọs, akpoghoronaạn Odẹ phọ odị bịn amadạn. (2Kọr 4:4) Eten dị eegholaany ni, loor esi dị Oọny phọ opọ phọ kụ aḍighi bọ nyoọn Enaạn eḅaanhaạn bọ eḅenhị mọ, “Olhẹm oye oghighimaạm loor ayira,” okpoghoronhaạn phọ Oọny phọ akpoghoronhaạn bọ Odẹ ph’odị, olemiạ phọ, amiigh mem mọ olhẹm bọ Moọny phọ. (Ge 1:26; Jọn 1:1-3; Kọl 1:15, 16) Mem mọ odị arọl bọ siẹn ade phọ idiphọ oye dị amunughan, odị akpoghoronhaạn raagharạ r’ipẹ odẹ phọ odị arọl bọ bịn amadạn idiphọ oye, esi iduọn phọ odị arue ni aḅẹm mọ “olọ mumiịn imị mamiịn ni Odẹ phọ.” (Jọn 14:9; 5:17, 19, 30, 36; 8:28, 38, 42) Toroboiperolbọ, okpoghoronhaạn phọ ophọn phọ aḅilhẹ ni apu siẹn mem mọ oḅeton bọ Zizọs idiphọ uwaloor, kụ Odẹ ph’odị, aZihova Enhaạn phọ angọ bọ nyodị “oomo phọ iikpọ phọ epẹ k’akẹ r’isiẹn ade phọ”. (1Pit 3:18; Mat 28:18) Eḍighi bọ edị Enhaạn m’ephophe bọ Zizọs “k’epẹ anyụ,” Oọny phọ Enhaạn m’akpoghoronhaạn eghuan Odẹ phọ odị eten dị ebụgh epu mem m’odị aḍuạ bọ k’akẹ aru siẹn ade phọ. (Faị 2:9; Hib 2:9) Nyiidiphọ “aroozọ phọ odị bịn kụ ikạr eghịgh ipẹ Enaạn” emadạn.—Hib 1:2-4.
(Hibru 1:10-12) Enaạn iḅilẹ ken ni eḅẹm mọ, “Emiighom mọ, nạ Omoọgh-we phọ kụ ulẹm bọ de phọ, kụ asighẹ raghaạgh phọ anạ alemọm kẹ phọ. 11 Oomo phọ abidị kope ni omadạn, kụ nạ katọl li. Bidị koḍighi ni igbaany idiphọ arukpe. 12 Nạ kakpooghi bidị idiphọ asuomạ, kụ aanmeghi bidị idiphọ oye raanmeeghi ghan bọ rukpe. Kụ olọ, nạ katọl li bịn, nạ ka/ḍighi ogbaany.”
it-1 1063 ¶7
Akẹ
Ikpo onhụ phọ edi bọ Psalm 102:25, 26 rekaạph ghan ilọ aZihova Enhaạn phọ, kuolọ otelhedom mọ aPọl asighẹ ni aḍighinhom mem dị rakaạph ilọ aZizọs Kraist. Iḍighi iduọn phọ loor esi dị oginha Oọny phọ Enhaạn bịn kụ edị Enhaạn esighẹ elhemọm aḅirinhi phọ romiịn bọ. APọl agbạ ni agbatạn ogbaranhaạn dị odi igbo Oọny phọ k/atue bọ anmia r’olhẹm mọ romiịn bọ, iphẹn phọ eḍighi maạr dị Enhaạn awạ katue bọ ni bịn ‘akpooghi idiphọ asuomạ’ aseere ogbạl.—Hib 1:1, 2, 8, 10-12; poghom 1Pit 2:3.
Ibạl ABaibul
(Hibru 1:1-14) Mem dị meten, Enaạn irom ni riil odị kụ oghaạph ghan ibadị amem reten kirokirọ oḅenị burudẹ aburudẹ phọ ayira, 2 kụ siẹn ariiḍio ekureriom mọ, odị arom Moọny phọ odị kụ aghaạph bọ uḅenị iyira. Enaạn isighẹ ḍighaạgh odị kụ elemọm bọ aḅirini phọ, eḅilẹ esaḅạr nyodị mọ amoọgh oomo araraạr ruukuna phọ. 3 Odị ramuọm ghan ḍiḅaạl eegu phọ Enaạn. Aroozọ phọ odị bịn kụ ikạr eghịgh ipẹ Enaạn. Odị kụ asighẹ bọ ikpo onhụ iikpọ phọ odị rapamạm ghan aḅirini phọ kameremị. Odị mawoph we phọ aḅaalamị, kụ marọl ude ḍighaạgh eliom mọ Enaạn oomo iikpọ phọ. 4 Mophophe nyodị iboom opuemi ruukpaạny phọ Enaạn, idiphọ aḍien phọ Enaạn eghol bọ nyodị ebụgh bọ epu ipẹ abidị. 5 Enaạn r’amem i/ḅẹm ilọ oniin ookpaạny phọ odị mọ, “Nạ Oọny phọ amị. Rodon mị magbạ aḍeenaan loor amị mọ mị Odẹ phọ anạ.” Enaạn i/ḅẹm kẹn ilọ oniin ookpaạny phọ odị mọ, “Mị kaḍighi Odẹ odị kụ odị aḍighi Moọny amị.”? 6 Mem mọ Enaạn reetughiạn bọ ilọ orom okpanạ Oọny phọ odị mọ aru siẹn aḅirini phọ, odị aḅẹm kẹn ni mọ, “Oomo aruukpaạny phọ Enaạn kooseeny ni nyodị.” 7 Iphẹn kụ idị Enaạn eghaạph ilọ aruukpaạny phọ odị mọ, “Enaạn resighẹ ghan ruukpaạny phọ odị keghighemị oghim, resighẹ ghan kẹn buọ oḍighi phọ odị keghighemị sinem aniạn.” 8 Kụ olọ, Enaạn ighaạph ilọ Oọny phọ odị mọ, [“Enaạn kụ agadạ odaạm emạ phọ anạ k’agee-pọ k’agee-pọ.NW ] Ikparạ phọ nạ kadaạm bọ ilọ aruukuan ni. 9 Nạ maphomoghiạn ruukuan phọ kụ alọgh ḍien ikarạph. Iduọn kụ idighi kụ Enaạn, Enaạn phọ anạ, esaḅạr bọ nyinạ ekueni epuemi iigbo phọ anạ engoọm nyinạ iboom ibo.” 10 Enaạn iḅilẹ kẹn ni eḅẹm mọ, “Emiighom mọ, nạ Omoọgh-we phọ kụ ulẹm bọ de phọ, kụ asighẹ raghaạgh phọ anạ alemọm kẹ phọ. 11 Oomo phọ abidị kope ni omadạn, kụ nạ katọl li. Bidị koḍighi ni igbaany idiphọ arukpe. 12 Nạ kakpooghi bidị idiphọ asuomạ, kụ aanmeghi bidị idiphọ oye raanmeeghi ghan bọ rukpe. Kụ olọ, nạ katọl li bịn, nạ ka/ḍighi ogbaany.” 13 Enaạn r’amem i/ḅenị nyoniin ookpaạny phọ odị mọ, “Tọl ude siẹn ḍighaạgh eliom mọ amị, tutụ mị asighẹ bumulọgh ḍien phọ anạ aḍighi ikasị dị nạ kakpasaghiọm ruwol.” 14 Buanhiạn nuụn kụ aruukpaạny phọ Enaạn? Oomo phọ abidị aruwaloor phọ reḍighi ghan bọ oḍighi phọ kengọ Enaạn, kụ Enaạn kụ retom ghan ni bidị mọ ologhonaạn ghan ḍighaạgh buphẹ komoọgh bọ pelieẹny phọ?
AUGUST 26–SEPTEMBER 1
ARUPHUA DỊ OSIGHẸ SIPHẸ EKPO-ONHỤ PHỌ ENHAẠN| HIBRU 4-6
“Kparamhị Igey Ḍighaạgh Oḍighi ilọ Nạ Kaḍigh Dọl Ophooghian phọ Enhaạn”
(Hibru 4:1) Idiphọ oguan phọ Enaạn mọ yira koḍigh aani ni dọl ophooghian phọ onọ udianaan bọ ni iyira, ekpẹ ghụn ni dị yira komiigha loor obọ r’oniin onyọ anyina kapiọm ghan bọ owol oḍigh aani adọI ophooghian phọ aḍiphẹ phọ.
(Hibru 4:4) Eniin esi siphẹ aḍinyạ iigbia phọ okaạph iphẹn ilọ aḍio phọ aḍiphẹ emuneniom bọ oḍual phọ mọ, “Enaạn iphooghian esi oomo iiḍighi phọ odị, ḍio phọ aḍiphẹ emuneniom bọ oḍual phọ.”
w11 7/15 24-25 ¶3-5
Eeghe Kụ Adọl Ophooghian Phọ Enhaạn?
3 Iyạl ariphigh araraạr kụ iḍighi bọ iyaạr phọ yira omeeraam bọ m’adọl ophooghian phọ Enhaạn edi ni rekiọm ghisigh siphẹ oḅẹl okuron asiạ phọ C.E. Eḅẹl phọ, ooḅeghiọn ikpo onhụ phọ aZizọs aḅenhị bọ buphẹ ozuoghom bọ nyodị m’odị aakonhom oye ḍio ophooghian, ipẹ bidị oḅẹm bọ mọ eḍighi rukumuan. Uw-emhoọgh phọ aḅenhị bidị mọ: “Odẹ phọ amị ra/pooghian ghan oḍighi, kụ mị raḍighi aani ghan bọ.” (Jọn 5:16, 17) AZizọs raḅẹm ghan mọ eeghe? Usiph Zizọs mọ aḍighi oḍighi ḍio ophooghian. Kụ ophagharanhaạn phọ odị mọ: “Odẹ phọ amị ra/pooghian ghan oḍighi,” aalemi ni iiḅaghamhị phọ. Siẹn phọ, aZizọs raḅenhị ghan buphẹ ozuoghom bọ nyodị mọ: ‘Odẹ phọ amị r’amị roḍighi ghan oniin phọ odọ oḍighi phọ. Tutụ Odẹ phọ amhị aghiọm bọ ni ghisigh rakumuan ghan siphẹ Ophooghian asimuunịr asiạ phọ odị, pọ ekạr kụ ekpeanhaạn dị mị k’akị ghisigh akumuan aani ghan, ghalamọ aḍio Ophooghian ni.’ Esi iduọn phọ, aZizọs raḅẹm ghan mọ idị egbolhomaam de phọ, Aḍigbogh aḍio Ophooghian phọ Enhaạn, aḍio phọ emhunhenhiom bọ oḍual phọ, i/minheen siphẹ aḍio phọ odị.
4 Ephigh dị emhunhenhiom iyạl pọ epẹ otelhedom mọ aPọl amiteom bọ. Mem mọ odị aghaạph bọ rakol Genesis 2:2 idị egbolhomaam ophooghian phọ Enhaạn, dị ophum nyodị aPọl aḅẹm mọ: “Yira phọ momeeraam bọ kụ roḍigh ghan dọl ophooghian phọ Enaạn.” (Hib. 4:3, 4, 6, 9) Esi iduọn phọ, k’amem mọ opọ aPọl, aḍio ophooghian phọ Enhaạn edi ni rekiọm ghisigh. Aḍio ophooghian phọ aḍiẹn kesighẹ ekị esiemhi ḍighen?
5 Omhiịn ophagharanhaạn aḍipuru phọ aḍiẹn, pọ ootughiạn iyaạr phọ otuạn bọ omiteom ḍio ophooghian phọ. Genesis 2:3 ekaạph ni iyaạr phọ: “Enhaạn eghiọm ghisigh kụ esẹph ḍio phọ emhunhenhiom bọ oḍual phọ kụ eḍighi ḍio iigbia.” AZihova aḍighi ḍio phọ aḍiphẹ phọ ‘ḍio iigbia’—aḅaalhamhị, obobọ agbatạn—orue omhunhenhi arigbiom mọ odị. Arigbiom mọ ipẹ phọ pọ idị omhạr awe dị ronaghanạn Enhaạn k’omaạr opogh de phọ r’ipheriphọ araraạr phọ edi bọ. (Gen. 1:28) Oḍighi ilọ omhunhenhi arigbiom mọ ipẹ phọ kụ edị aZihova Enhaạn phọ r’aZizọs Kraist phọ “amooghọm [bọ] ḍio ophoghian phọ,” ‘u/pooghian bọ oḍighi’ phọ. (Mat. 12:8) Aḍio ophooghian phọ Enhaạn k’ekiọm ni ghisigh tutụ iyaạr phọ otuạn bọ oseere ḍio ophooghian phọ ekạr emhunhughan emadạn siphẹ eekunha Itooghị Oonịr Asiạ phọ aKraist.
(Hibru 4:6) Abuḅẹl phọ onaghạn bọ ooḅi oghaạph phọ upiọm ni owol bịn u/ḍigh aani dọl ophooghian phọ Enaạn, idị eḍighi bọ bidị u/meeraam; kụ abunọn abudị momeeraam koḍigh ni.
w11 7/15 25 ¶6
Eeghe Kụ Adọl Ophooghian Phọ Enhaạn?
6 Rigbiom mọ Enhaạn ukạr ri omạ oogholomhi oḍeenhaan Adam r’Iv, kuolọ bidị u/meera udaphạn. Ii, Adam r’Iv kụ abuḅẹl awe dị odạph okol oḅaạr emhụ. Kụ emhiigh k’amem mọ opọ phọ m’oḅilhẹ ni omoọgh riisi erubal abunhọn. Ghalamọ awe phọ Enhaạn esaḅạr bọ, eelhe phọ Izrạl bịn umheel li oḍigh okol okitonhaan. Dị eḍighan ni elhegh, aPọl aphụr ri rurụ Kristẹn phọ abuphẹ orọl bọ siphẹ oḅẹl okuron asiạ phọ mọ ipẹ emitenhaan bọ Izrạl ketue ni emitenhaan bidị. Odị agẹ mọ: “Loor iphẹn phọ, okparamị igey ḍighaạgh oḍighi ghan ilọ yira koḍigh dọI ophooghian phọ Enaạn! R’oniin onyọ ayira ku/ḅaạr emụ, idiphọ abuḅẹl phọ oḍighi bọ kụ ophe bọ eten phọ.” (Hib. 4:11) Lọgh elhegh m’aPọl akọm oḅaạr emhụ r’idị oye phọ k’apiọm oḍigh aani adọl ophooghian phọ Enhaạn. Iduọn phọ pọ odị ruḅenhị ghan iyira eeghe? Eḍighi maạr dị yira okitonaan oghị esi iniin arigbiom mọ Enhaạn, pọ iduọn phọ yira r”olọgh dọl oḍigh aani ophoghian phọ k’Enhaạn esi iiḅaghamhị? Dị eegholaany ni, ophagharanhaạn aḍipuru phọ aḍiphẹ phọ amoọgh igey maạr oḍighinhom ayira, kụ yira kooḅeghiọn ni okiọm ghisigh. Toroboiperolbọ, siẹn m’esi bọ, oḅilhẹ omiịn ilọ yira k’oḍigh aani ophooghian phọ Enhaạn esi ooḅeghiọn ekarạph eḍeenhaan awe phọ Izrạl.
(Hibru 4:9-11) Otuạn iduọn phọ erọl bọ, oseenaan ni we phọ Enaạn dọl ophooghian, dị eghighọm ḍio phọ emuneniom bọ oḍual phọ Enaạn ephooghian bọ. 10 Torobọ oye lọ maḍigh dọl ophooghian phọ Enaạn, pọ rapooghian esi oḍighi phọ odị, idiphọ Enaạn ephooghian bọ. 11 Loor iphẹn phọ, okparamị igey ḍighaạgh oḍighi ghan ilọ yira koḍigh dọI ophooghian phọ Enaạn! R’oniin onyọ ayira ku/ḅaạr emụ, idiphọ abuḅẹl phọ oḍighi bọ kụ ophe bọ eten phọ.
w11 7/15 28 ¶16-17
Eeghe Kụ Adọl Ophooghian Phọ Enhaạn?
16 Ḍio arodon, iyạl ikpo aKristẹn kụ rokaạph ghan ilọ ooko iniin apakirị olhogh phọ aMozis kụ omhoọgh apelieẹny. Ikpo onhụ phọ ophum bọ Pọl oḅenhị awe Efesọs ekạr kụ eegholaany: “Kụ Enaạn ituạn omeeraam mọ anyina kụ menmạ bọ ighirigiir iphẹl inyina etene. I/tuạn eḍighinom iyaạr anyina. Enaạn kụ inmoom inyina. Iyaạr otuạn obaga i/lo, idị eḍighi bọ k/okpạr aIoor anyina.” (Efẹ. 2:8, 9) Esi aKristẹn remạ ghan eeghe oḍigh aani ophooghian phọ Enhaạn? AZihova kụ agbatạn aseere omhunhenhiom oḍual aḍio phọ—ḍio ophooghian ph’odị—pidị odị amunhenhi rigbiom m’odị ilọ ade phọ r’eghuan. Yira kotue ni oḍigh aani dọl ophooghian phọ aZihova—obobọ oḍighan aani ophooghian phọ odị—esi onhaghanhạn ghan kụ odaphạn r’amuḅọph rigbiom m’odị remunughan bọ, idiphọ oḍighom m’odị raganhanhamhi bọ kuḍeenhaan iyira.
17 Ḍierị phọ aḍighaạgh phọ, eḍighi maạr lọ yira ophogh osooromhi oromha aBaibul phọ rungọ ghan bọ iyira dị eego esi ebenhẹ phọ esụ bọ olhoghi phọ eḅilhẹ ekpẹ oḍuom olhoghi, kụ osaḅạr oḍighi ilọ iḅeraạn iyira, pọ rigbiom mọ Enhaạn remunughan bọ yira ko/mooghọm aani suọ. Iphẹn phọ ketue ni elọgh esi iiḅaghamhị imạ asiya phọ ayira r’aZihova. Siphẹ ephediphọ ekpịgh phọ, yira k’ooḅeghiọn iyạl ikpo asidọl dị ketue ni etir we phọ Enhaạn, kụ otuughạ idị osopha kirokirọ phọ ayira, mughumọ usopha onhaghanhạn obobọ oḍighi ilọ iḅeraạn iyira, k’emạ emiteom mughumọ yira m’okạr ri oḍigh ophooghian phọ Enhaạn.
Oguphogh Owạ Imạ Araraạr Dị Edi Siphẹ ABaibul Phọ
(Hibru 4:12) Oghaạph phọ Enaạn raḅạ ni eye, ḅilẹ ralom ni. Atoph apu elool-eghạm iyạl omạn, agim ghan ni rateẹny okụ uwaloor r’aghuḍum, ḅilẹ ophuụny r’ariikpighonụ. Raaḅeghiọn ghan ni iitughiạn r’iloghi awe phọ kaphogh.
w16.09 13
Asipuru Dị Abuẹn Robạl Ghan Bọ Rinyạ Phọ Ayira Opuru
Eeghe kụ “oghaạph phọ Enaạn” aHibru 4:12 aḅẹm bọ mọ “raḅạ ni eye ḅilẹ ralom ni”?
▪ Igẹ phọ eeghironhom bọ eḍeenhaan mọ otelhedom m’aPọl akaạph ghan rakol dom mọ, obobọ rigbiom mọ Enhaạn ogẹ bọ siphẹ aBaibul phọ.
Rogbor ghan ni k’oghaạph oghol Hibru 4:12 siphẹ arinyạ phọ ayira, oḍeenhaan mọ aBaibul phọ amoọgh ni iikpọ onme asighuḍum, kụ ekạr ekpeanhaạn osighẹ oḍighinhom iduọn phọ. Toroboiperolbọ, k’eḍighi ni ilọ asuọ ophogh oomo ipẹ Hibru 4:12 ekạr bọ eghaạph. APọl aḅenhị ghan Kristẹn abuọ aHibru phọ dị kodaphạn aani rigbiom mọ Enhaạn. Ibadị arigbiom mọ ipẹ edi ni siphẹ aBaibul phọ. APọl amạ idiphọ eḍeenhaan we phọ Izrạl otagharạn bọ epẹ Ijipt. Bidị umoọgh oḍuom olhoghi oḍigh aani ade phọ oguanhaan bọ, de dị “amamaạm r’enhuụm aḍiowo kụ rekil,” siphẹ phọ bidị mukelhọm ogey ophooghian.—Ex. 3:8; Deut. 12:9, 10.
Ipẹ kụ idị Enhaạn aghaạph oḍighi. Kuolọ awe phọ Izrạl uḅilhẹ bịn okparamhị ilhoghi abidị bịn u/ḍeenhaan omheeraam, esi iduọn phọ ibadị abidị u/ḍigh aani siphẹ ophooghian phọ opọ phọ. (Num. 14:30; Josh. 14:6-10) Toroboiperolbọ, aPọl aḅilhẹ aḅẹm mọ “oguan phọ Enaạn mọ yira koḍigh aani ni dọl ophooghian phọ onọ udianaan” ni iyira. (Hib. 3:16-19; 4:1) Dị eegholaany ni, “oguan” phọ opọ phọ aḍighi pakirị arigbiom mọ Enhaạn eghaạph bọ. Idiphọ aKristẹn aHibru phọ, yira kotue ni obạl oḅilhẹ odaphạn rigbiom mọ ipẹ phọ. Oghaạph okparamhị mọ aruguanhaan phọ ipẹ phọ ekpasị siphẹ aBaibul phọ, aPọl aghaạph aghol pakirị Genesis 2:2 ḅilhẹ Psalm 95:11.
Okạr agey, itir iyira mọ “oguan [dị] yira koḍigh aani dọl ophooghian phọ Enhaạn udianaan ni iyira.” Yira omeeraam ni mọ oḍuom olhoghi phọ odi bọ siphẹ aBaibul phọ ilọ oḍigh aani ophooghian phọ Enhaạn adugh ni oteẹny, kụ yira m’ogbariọn radạ oḍigh aani. Yira u/ḍighi ipẹ phọ eten okparaghạ ghan ooko olhogh aMozis obobọ omoọgh akuuḅi aghisigh aZihova dị eego esi inhọn iiḍighi. Kparipẹ ghụn, r’omeeraam yira oḅaạl olhoghi ronaghanạn ghan kụ okiọm ghisigh rodaphạn ghan rigbiom mọ Enhaạn rogananamhi bọ. Opumom isiẹn, idiphọ m’oghaạph bọ ni, asimuunịr awe oomo isiẹn aḅirinhi phọ m’omiigh otuughạ aBaibul phọ ḅilhẹ r’ipẹ Enhaạn eghaạph bọ ilọ ogbi ph’odị. M’enyu ni ibadị onme adọl aghuḍum mọ abidị, oḍeenhaan omheeraam, kụ oḍiiny amuụm idiphọ aKristẹn. Eten phọ epẹ renme ghan bọ bidị ekạr emạ emiteom mọ “oghaạph phọ Enaạn raḅạ ni eye, ḅilẹ ralom ni.” Arigbiom mọ Enhaạn oghaạph bọ siphẹ aBaibul phọ m’ekạr kụ etir sighuḍum mọ ayira, kụ k’ekị ni ghisigh elom siẹn aghuḍum mọ ayira.
(Hibru 6:17, 18) Enaạn iwạ ni ogananami oḍeenaan abuphẹ koboọr bọ ipẹ dị aguanaan bọ mọ onọ ka/nme iitughiạn phọ onọ. Iduọn phọ, pọ odị asighẹ iikunyian phọ kụ aḅarạm oguan phọ. 18 lyạI phọ araraạr phọ iphẹn phọ re/nmia ghan bọ, kụ Enaạn iyira okpẹ ki/gbaạm bọ, imoogh ni iyira phọ moḍigh bọ ḍibuo phọ odị, ophạm oḍuom oIoghi phọ opọ odi bọ ghisigh phọ ayira okparamị.
it-1 1139 ¶2
Oḍuom-olhoghi
Oḍuom olhoghi aghuḍum k’agee-pọ ḅilẹ re/mugh ghan phọ edianhaan bọ buphẹ “Enaạn memạgh aani bọ eegho eseerean” (Hib 3:1) opighi ni okparamhị ḅilhẹ kotue kẹn ni oḍuom olhoghi. Okpasị esi iyạl araraạr dị Enhaạn okpẹ ke/gbaạm, iduọn phọ pọ, oguan phọ ḅilhẹ r’iikunyian phọ odị, kụ oḍuom olhoghi phọ ayira kamunhughan loor esi aKraist, opọ nyiidiphọ ka/tue mun bọ amugh, odi bọ k’akẹ. Esi iduọn phọ, okaạph ilọ oḍuom olhoghi phọ ophọn mọ “akịgh idiphọ ekạn dị okananaạn (loor) phọ ayira; oogho ni oseere ḅilẹ kẹn ra/piigha ghan. [Ḅilhẹ mọ] raḍigh ghan ni k’akẹ katenom omạn ukpe phọ osophom bọ, aghị asi ephạn phọ [idiphọ uw-emhụ opinyọn rikiạ phọ aḍigh ghan bọ Osoph Ephạn phọ Riiḍio Otuạn Iiḅereghị Orọl Okoọny phọ]. [Siphẹ phọ] aJizọs maghol rumụ ayira apụr akị epẹ phọ. Odị maḍighi uw-emụ opinyọn rikiạ k’agee-pọ siphẹ abaạy abupinyọn rikiạ phọ k’aMelkisidẹk.”—Hib 6:17-20.
Ibạl ABaibul
(Hibru 5:1-14) Uw-emụ opinyọn rikiạ o/lo ghan, dị ro/pogh ghan siphẹ aḍita awe phọ kụ komạ mọ aghol emụ abidị aḍighi ghan oḍighi angọ Enaạn, angọ ghan Enaạn inmo, aphinyonaạn ghan bidị rikiạ. 2 ldiphọ odị r’aloor odị adugh aani bọ ni ibadị areten, odị katuụgh ni kọl kọl kụ atolọm buphẹ ropiomạn ghan bọ r’elegheri iyaạr phọ. 3 Ḅilẹ kẹn idiphọ odị r’aloor odị adugh aani bọ ni, odị ka/kạl ghan ikarạph ipẹ odị amuton, mem lọ odị rapinyọn rikiạ phọ. 4 Oye kụ ra/waanaạn ghan Ioor odị eghuan oḍighi aani uw-emụ opinyọn rikiạ. Aḍimạgh phọ Enaạn bịn kụ reḍighi ghan oye uw-emụ opinyọn rikiạ, idiphọ emeghenom bọ Eeron. 5 lgina phọ iduọn phọ kẹn ni kụ idị aKraist kụ u/waanaạn bọ loor phọ odị eghuan oḍighi uw-emụ opinyọn rikiạ phọ. Enaạn kụ iḅenị nyodị mọ, “Nạ Oọny phọ amị. Rodon mị magbạ aḍeenaan loor amị mọ mị Odẹ phọ anạ.” 6 Eḅilẹ kẹn ni eḅẹm enọn esi mọ, “Nạ kaḍighi opinyọn rikiạ k’agee-pọ siphẹ abaạy abupinyọn rikiạ phọ k’aMelkisidẹk.” 7 Siphẹ aghuḍum mọ odị siẹn ade phọ, aJizọs aaḅereghị ghan ni alooghị amoghi ghan, kụ aḅarạm ilọm mọ odị esi Enaạn phọ ketue bọ epẹl nyodị esi aḍuugh. Kụ Enaạn inaghanạn ni nyodị, idị eḍighi bọ odị asooromi ni loor alọgh eegu. 8 Ghalamọ r’idiphọ odị aḍighi bọ ni Moọny phọ Enaạn bịn asighẹ ni iminimiịn phọ odị atuughaạm amaạr onaghanạn aḍughụm. 9 Odị rokạr bọ roseleman bịn aḍighi zin apelieẹny k’agee-pọ phọ oomo abuIọ onaghanạn nyodị komoọgh bọ. 10 Kụ Enaạn emiteom nyodị egananami mọ aḍighi uw-emụ opinyọn rikiạ siphẹ abaạy abupinyọn rikiạ phọ k’aMeIkisidẹk. 11 Obọ yoor omoọgh ni ibadị araraạr oghaạph iIọ oye phọ ophọn phọ, kụ ekpạr iikiạ oḅenị anyina, idị eḍighi bọ onaghanạn aḍughụm mọ anyina rakoronaạn ghan kaphughạn. 12 Obọ nyiidiphọ nyina mekasiạn otughemị aani abunọn, kụ nyina edi ni niiniịn dọI dị onọn oye kụ kitughemị inyina iḅẹl araraạr adom mọ Enaạn. Nyina memanạm ole eḍien kụ remaạm niiniịn mamaạm. 13 Oye lọ amamaạm k”oḍuạ onhụ, pọ obumoọny ni, dị k”olegheri ilọ eru igey r’ikarạph. 14 Kụ buphẹ momanạm bọ oonemạ olegheri ilọ eru igey r’ikarạph kụ role ghan eḍien lọ ekpạr.