NẠ AATUGHIẠN NI?

Nạ mamhiigha ni loor abạl oomo arumhuoghaạph Otu Okoriom alhạ phọ arolhool? Uguạ, pogh mughumọ nạ katue ni apanyanhaạn sipuru phọ iphẹn phọ:

Remạ ghan eeghe oḅọl ilhoghi phọ ayira? (Rom. 12:2)

Epelhom ni oḅẹm mọ oḍighi ghan iyạl ikpo igey araraạr siẹn aghuḍum mọ ayira bịn. Kparipẹ ghụn remạ ghan okiririom ophogh odọ oye phọ yira oru bọ siphẹ ekpom mọ ayira kụ onmeeghi raraạr pidị adọl aghuḍum mọ ayira emhoọgh muḅọph r’asiigbu phọ aZihova.—w23.01, ipoḍi phọ 8-9.

Ika kụ idị yira kopogh ghan eten dị eeleeny raraạr phọ remite bọ siẹn aḅirinhi phọ?

Yira omoọgh ni igey ariphigh otuạn ogon ghan omhiịn idị araraạr dị remite siẹn aḅirinhi phọ remunenhi imiịn aBaibul phọ. Kparipẹ rokọm igbaragbarạ olhọgh isiẹn ookpomhoghan phọ esi oghaaphọgh idị yira bịn kụ ootughiạn mọ kemite, okpasị ghan ghụn raghaạph phọ ayira esi ipẹ oḍighom mọ aZihova ogẹ bọ omiteom. (1 Kọr. 1:10)—w23.02, opoḍi phọ 16.

Ika kụ edị oḍiiny amuụm mọ aZizọs agbatanhaạn r’ipẹ abumatuạn phọ odị?

I/wạ mọ odị aḅilhẹ aḅọgh loor angọ aZihova, loor esi dị umhạr nyodị eelhe dị moḅọgh ni ongọ Enhaạn. AZizọs aḍighi oye dị amhunhughan dị ko/ḍighi ghan ikarạph. Esi iduọn phọ i/moghi mọ odị akiton esi ikarạph.—w23.03, opoḍi phọ 5.

Ika kụ edị nạ katue aloghonhaạn bunhọn ḍighaạgh ongọ ophagharanhaạn mem dị oru ituughạ?

Ongọ ghan ophagharanhaạn dị akper, pidị abunhọn omoọgh aani eepoogh oghaạph aani iyaạr. Miịn mọ nạ oo/karagh ibadị araraạr. Eḍighi idiphọ bịn abunhọn awe momhiịn iyaạr oghaạph aani.—w23.04, opoḍi phọ 23.

Eeghe kụ “Eten Iigbia” phọ oghaạph bọ oghol siphẹ Isaiah 35:8?

Eten phọ ephẹn phọ pọ eten phọ abuọ aJu phọ oogo bọ oḍuạ Babilọn ogheel de phọ Izrạl. Kokaạph ika ilọ aḍio arodon? Esi ibadị arukuron asiạ kụ egbi bọ oteẹny alhạ phọ 1919, kụ edị omhiigh ookolhobian eten aruwaloor phọ ephẹn phọ, esi ogbạ otenheghi ḅilhẹ r’omiteghom aBaibul, ḅilhẹ r’inhọn araraạr. Awe phọ Enhaạn okị ni ghisigh rotelhe “Eten Iigbia” phọ erorori bọ rekị “ologhi oghoony [aparadais] phọ Enaạn” epẹ k’akẹ, resighẹ ghan bọ keru ḍisẹph kirokirọ omhạr phọ.—w23.05, ipoḍi phọ 15-19.

AProverbs emhụ phọ 9 angọ oroma ilọ ighẹn iyạl anmariịr dị oghaạph omaaniọm?

AProverbs akaạph mọ aḍimhạgh “elologhi anhịr” phọ retorori ghan kengọ ḍuugh kụ aḍimhạgh anhịr phọ amherenyạn bọ “ogey osụ-olhoghi” phọ rengọ ghan “olhegheri iyaạr” r’aghuḍum. (Prov. 9:1, 6, 13, 18)—w23.06, ipoḍi phọ 22-24.

Ika kụ edị osooromhi aloor phọ ḅilhẹ r’oḍeenhaan onhaghanhạn aḍughụm mọ aZihova eganhanhan esi eten phọ epẹ odị azoọm bọ Lọt?

AZihova atọ aḅenhị Lọt mọ odị aghiil aghị epẹ araaḅarạph phọ. Kuolọ loor oghiilhaan aLọt alhọm ghụn oghị epẹ Zoar, Enhaạn amheera ni mọ aLọt aghị Zoar.—w23.07, opoḍi phọ 21.

Eeghe kụ edị anhịr katue aḍighi edighi maạr dị olom odị rapogh ghan sifoto edaḅạ?

Odị r’amem r’amem ku/kpalhạm loor. Odị agbon siya phọ odị r’aZihova kụ agbirima ghan reḍeenhaan anmariịr siphẹ aBaibul phọ dị osoman iiḅaghamhị kuolọ omhoọgh iidereghị esi aZihova. Odị katue ni aloghonhaạn ḍighaạgh olom mọ odị oghel araraạr dị ketue eḍighi odẹgh ophogh engọ nyodị.—w23.08, ipoḍi phọ 14-17.

Mem dị ogbagharạn omheeraam mọ anạ, ika kụ edị orọph omhiịn katue alhoghonhaạn nyinhạ dighaạgh omhegheron eyoghoyoghọ eten?

Kparipẹ r’omhiịn aḍipuru phọ idiphọ izuoghom, miịn ghụn idiphọ eten osighẹ olhegheri ipẹ oye phọ alhoghoma bọ. Iphẹn phọ kilhoghonhaạn iyira ḍighaạgh ongọ ophagharanhaạn dị ayoghoyoghọ.— w23.09, opoḍi phọ 17.

Eeghe kụ edị yira otuughạ ḍighaạgh aMeri ilọ omhoọgh ghan inyaạm?

AMeri amhoọgh ni inyaạm ḍighaạgh abunhọn, mem mọ aGebriel aḅenhị bọ nyodị mọ odị kụ kamạr aMesaya phọ. Gebriel r’Elizabet ukparamhị ni Meri r’igẹ iigbia phọ. Yira kotue kẹn ni omoọgh inyaạm ḍighaạgh abumor r’abumaranhi phọ.—w23.10, opoḍi phọ 15.

Ika kụ edị aZihova katue apagharanhaạn iiḅereghị phọ ayira?

AZihova aguanhaan onhaghạn r’okiririom ghan ophogh amuḅọph phọ ilọm mọ ayira emhoọgh bọ r’ogbi phọ odị. (Jer. 29:12) Odị atue ni apagharanhaạn ilọm dị eḍighi ni iniin, reten dị egbaranhaạn, kuolọ odị ka/bilhẹ obakị ghan ayira.—w23.11, ipoḍi phọ 21-22.

Moghaạph bọ ni oghol “oḍuomologhi” siphẹ Rom 5:2, eeghe kụ iḍighi kụ oḅilhẹ bọ okol siphẹ ekpịgh phọ 4?

Mem dị oye anhaghạn iiḅi iinhaghạn phọ, oye phọ atue ni amoọgh oḍuomolhoghi oghelhọm aghuḍum k’agee-pọ siẹn ade phọ dọl aparadais. Kuolọ mem dị oye phọ asoman iiḅaghamhị, akparạm, kụ alhoghoma mọ onọ mamhoọgh kuuḅi aghisigh Enhaạn oḍuomolhoghi oye phọ rakpạr ghan kapu ipẹ arọl ghan bọ eḅẹl amem mọ kụ ekạr etu onọ esi oye pho.—w23.12, ipoḍi phọ 12-13.