Nạ Aatughiạn Ni?

Nạ mamhiigha ni loor abạl oomo arumhuoghaạph Otu Okoriom alhạ phọ arolool? Uguạ, pogh mughumọ nạ katue ni apanyanhaạn sipuru phọ iphẹn phọ:

Eeghe eḍeenhaan kụ edị aZihova amiteom ilọ ozoọm ghan anmariịr?

Odị ra/pogh ghan bidị kasooromhi, aZihova asereghiạn ni nmariịr eniin phọ eten phọ asereghiạn bọ lephiri anmụny. Odị raler ghan ni rurụ kangọ bidị, kaḅilhẹ amhoọgh ogbolhomaam aghị esi eten phọ epẹ bidị rologhoma ghan bọ. Odị aḍuom ni kẹn olhoghi mọ bidị kotue ni oḍighi oḍighi phọ odị.—w24.01, ipoḍi phọ 15-16.

Yira koḍighnhom ika oromha phọ odi bọ Efesọs 5:7, eḅẹm bọ mọ: “Ke/moọgh iyaạr oḍighinom odọ phọ awe phọ abuphẹ”?

Otelhedom mọ Pọl uphụr iyira rurụ mọ kuu/ḍikuan ghan we dị koḍighi idị kikparanhaạn iyira odaphạn asiigbu phọ aZihova. Awe phọ abuẹn phọ oḅarạm ni buphẹ yira roḅaanhaạn ghan bọ siphẹ intanẹt phọ.—w24.03, ipoḍi phọ 22-23.

Ighẹn ikarạph asiagbạ kụ edị ewạ mọ ogona loor?

Ewạ ni mọ yira ogona loor mem dị oye dị yira olhegheri ni uḅenhị iyira iyaạr dị u/kiririom upogh mughumọ etu ni inẹ, raraạr dị awe dị yira u/legheri kụ ofirimạ uruom iyira, ḅilhẹ awe dị momheel oḍuạ siẹn igey phọ kụ oḍighi mudị bidị omoọgh ni ḍiḅeraạn otuughạ aBaibul phọ.—w24.04, opoḍi phọ 12.

Eeghe kụ edị yira olhegheri ilọ iiruẹn phọ aZihova kasophonhaan bọ Uw-emhạ phọ Solomon, we phọ abuphẹ omhugh bọ epẹ Sodọm r’aGomorạ ḅilhẹ r’abuphẹ omhugh bọ mem Amuụm Aḍigho phọ?

Yira u/legheri mughumọ aZihova asophonhaan bidị muphe k’agee-pọ. Kuolọ, yira olegheri mọ odị alegheri ni oomo ariphigh phọ aḅilhẹ amoọgh oboom onmạ ighirigiir.—w24.05, ipoḍi phọ 3-4.

Eeghe okuphom owol kụ edị yira omhoọgh iduọn omaaniọm bọ Enhaạn “Ḍighiigh”? (Deut. 32:4)

AZihova katue ni aḍighi esi ibooghiạn ayira. Odị aḍighi oye dị akpẹ oḍuom olhoghi. Esi iduọn phọ, odị ramuneni ghan ni ruguanhaan odị. AZihova amiigh, kụ odọ oye phọ odị aru bọ r’ogbi phọ odị re/nmia ghan.—w24.06, ipoḍi phọ 26-28.

Eeghe kụ keḍighi idị nạ kakpạr apu ipaanhaạn dị retọl ghan mem dị oye aghị omhoom ookpomhoghan?

Beḍenhọm aZihova, odị kalhoghonhaạn ni nyinhạ ḍighaạgh idiphọ odị malhoghonhaạn bọ ḍighaạgh rebenhẹ phọ odị epẹ omhạn. Ka/sighẹ ogbaany ookpomhoghan phọ anạ atomaạm omhoom mọ. Ḍiiḍikuan ghan bumor r’abumaranhi omhoom ookpomhoghan phọ anạ aḅilhẹ aḍigh imhoom arighirị.—w24.07, ipoḍi phọ 26-28.

Eeghe kụ edị yira kotue otuughạ esi iraạr phọ asidogh phọ edi bọ Matiu emhụ phọ 25?

Aḍidogh iyool igạ phọ r’atụ igạ phọ itughemhị iyira oḍighi awe dị okpẹ oḍuomolhoghi ḅilhẹ oḅạr. Aḍidogh arisinha anmanyaạn phọ osụ bọ olhoghi r’abuphẹ olhoghi phọ u/sụ bọ itughemhị iyira mọ emạn ni maạr dị yira koomhanham kụ oḅilhẹ okori ghan. Aḍidogh ikpoki phọ itughemhị iyira mọ ewạ ni dị yira koḍighi we dị rokumuan ghan kụ oḅilhẹ okpạr ḍighaạgh.—w24.09, ipoḍi phọ 20-24.

Eḍighom otu iiḅereghị phọ aSolomon iphoph elheeny ika?

Siphẹ 2 Chronicles 3:4, iniin arinyạ aBaibul iḍiodi phọ eḅẹm mọ onhụ aḍibuo otu phọ amhạn “120 ekulhọm aḍighaạgh” ḍiphoph, iduọn phọ pọ 53 amita (175 ft). Kuolọ inhọn arinyạ aBaibul dị ogbạ otenheghi eḅẹm mọ onhụ aḍibuo otu iiḅereghị phọ aḍighi “20 ekulhọm aḍighaạgh” obobọ esugha amita (30 ft) ḍiphoph. Odaphạn ipẹ aḅidi eḍighom otu iiḅereghi phọ erọl bọ, ekịgh mudị aḍiphoph eḍighom otu iiḅereghị phọ imhạn 20 ekulhọm aḍighaạgh.—w24.10, opoḍi phọ 31.

Remạ eeghe dị abuphẹ rologhonhaạn bọ ḍighaạgh ikumor awe phọ kopin oniin anhịr? (1 Tim. 3:12)

Remạ ghan mọ oye phọ kapin oniin anhịr bịn kụ oye phọ ku/le emhạ. Oḅarạm isiphẹ oye phọ ka/pogh ghan bunhọn anmariịr eten dị i/kpeanhaạn.—w24.11, ipoḍi phọ 19.

Uḍighi ika kụ yira koḅẹm bọ mọ ipẹ edi bọ Jọn 6:53 i/ḍighi eten phọ kole ghan bọ Eḍien Adulhe Uw-emhoọgh phọ?

Jọn 6:53 ekaạph ilọ aạ iphulhupul phọ r’ophughọl iḅaạl phọ aZizọs. AZizọs aḅạ ikpo onhụ phọ ipẹ phọ aḅenhị we aJu dị ewạ mọ omhoọgh omheeraam oghị esi odị, lhạ phọ 32 C.E. Kuolọ, Eḍien Adulhe Uw-emhoọgh phọ uphighi mem dị alhạ meten epẹ Jeruselem. Siphẹ phọ odị aḅenhị ghan buphẹ kotooghị bọ r’odị epẹ k’akẹ.—w24.12, ipoḍi phọ 10-11.