“Ogina Amhị Bịn Ko/rọl Ghan”

EḌEENHAAN ODẸ R’ONHIIN PHỌ AMHỊ

Odẹ r’onhiin amhị ukuọm loor ekụ iiḅereghị aCatholic. Kuolọ mem dị bidị otuughạ bọ Baibul phọ omhiịn mọ ḍien Enhaạn okol mọ aZihova, bịn iyạl phọ abidị oḍighi Bugbaanhaạn AZihova dị okuọm loor. Odẹ ayoor awilhẹ ni okaaghị igbudu aZizọs. Odị asighẹ ghụn ḍighalhanyạ okaạm amakạ phọ odị aselhemiom ude otu eedaneẹn phọ ayoor atenhe oḅẹl aKingdọm Họl phọ epẹ San Juan del Monte, emhạ dị i/kạr ikelhạn Manila, ekpanhạ emhạ phọ aPhilippine.

Iduọn umhạr bọ imhị 1952, bịn odẹ r’onhiin amhị omhiigh otughemhị amhị Baibul phọ idiphọ bidị rotughemhị ghan bọ buḅẹl inya abumor phọ amhị r’iraạr abumaranhi phọ amhị. Iduọn mị rapoph bọ kamhanhạm, odẹ ayoor uroma ni imhị aạl ghan eniin emhuoghaạph aBaibul phọ torobọ aḍio, kụ utughemhị imhị ibadị arinyạ ookpomhoghan phọ. Eeni amem, odẹ r’onhiin ayoor umhạgh ghan ni bupoghom eghir r’abumor dị rokumuan ghan epẹ olạ agadạ phọ, oru orọl k’ayoor. Araraạr phọ awe phọ abuẹn phọ oghaạph ghan bọ ingọ ghan iyoor ibo eḅilhẹ ikparamhị iyoor. Kụ inyu iyoor osighẹ aZihova oḍighi eḅẹl siphẹ aghuḍum mọ ayoor.

Odẹ r’onhiin ayoor uḍighi ni emạ eḍeenhaan omheeraam kụ ungọ imhị. 1971 kụ edị odẹ ayoor r’amhị omhiigh okọy eten, mem mọ onhiin ayoor amhugh bọ. Kuolọ lhạ phọ 1973 mem dị mị mamhạn 20 asiạ, bịn odẹ ayoor amhugh aani. Aḍuugh odẹ r’onhiin phọ amhị iḍighi idị aloor amhị epelelẹ, kụ mị alhoghoma dọl igini. Kuolọ, oḍuom olhoghi phọ ayira “oogho bọ oseere ḅilẹ kẹn ra/piigha ghan” bọ, odi bọ siphẹ aBaibul phọ ulhoghonhaạn ni imhị ḍighaạgh omhiigh reten iitughiạn ḅilhẹ r’oghiọm aghisigh rukumuan aKristẹn phọ amhị. (Hib. 6:19) Odẹ phọ amhị amhugh bọ, i/bia bịn umhạgh imhị oḍighi okọy eten opọ agbatanhaạn bọ, epẹ ekpu ogbo aCoron, epẹ Palawan. Mị usighẹ ni ḍimhạgh phọ.

MEM DỊ OGINA AMHỊ ARỌL RUKUMUAN DỊ EḄARẠM NI IPAANHAẠN

IMị umhạn 21 asiạ mem mọ mị asi bọ Coron. Idiphọ oọny dị ookonhom raamhạ, iḍighi ni iikia esi amhị omhiịn mọ ekpu ogbo edi ni dị aḍiḅaạl, amuụm apụmp, asimoto, r’asimesịn i/kạr ilo. Ii, obọ iphurukpu abumor r’abumaranhi urọl li, kuolọ okọy eten dị r’amhị kotelean ghan epẹ erugh phọ o/rọl. Kụ iḍighi kụ, eeni amem ogina amhị bịn kụ umite ghan. Oḅẹl unwanyụ phọ, inyaam otọ k’ayoor r’arighirị amhị isiph ni imhị iboom. Mem aḍughul, mị unhaan ghan okuaḍio phọ kụ izin amhị emiigh ogharaghụ. Iphụ ghan imhị bịn owilhẹ oḍighi phọ ogheel.

Simem mọ iphẹn phọ ogina amhị bịn arọl ghan bọ, mị ukạr ghan azu ekpom amhị angọ aZihovah. Mị uutughiạn ghan ni ikpo onhụ okparamhị dị mị m’aạl ghan siphẹ aBaibul phọ r’arinyạ phọ ayira. Psalm 19:14 kụ igbor ghan eru olhoghi amhị. Mị ulhoghoma ni mọ aZihova kaḍighi ni “Ḍighiigh amhị r’Opelia amhị,” eḍighi maạr dị mị agbirima ghan ilọ araraạr dị eḅeraạn nyodị, idiphọ iiḍighi phọ r’araagharạ phọ odị. Emhuoghaạph aWatchtower phọ eḅẹm bọ mọ “You Are Never Alone”a ilhoghonhaạn imhị ḍigaạgh agey. Mị aạl kụ aḅilhẹ aạl kụ eḅilhẹ eghịgh mudị aZihova r’amhị kụ odi simem mọ iphẹn phọ. Ipẹ phọ ingọ ni imhị emạ eepoogh ooḅereghị, otuughạ aBaibul phọ, ḅilhẹ r’ogbirima.

Mị asi bọ Coron, i/bia bịn umạ imhị oḍighi okumor oye ookpomhoghan. Idiphọ ogina okumor oye, mị bịn kụ uphạm ghan Theocratic Ministry School phọ, ruupuruan omite epẹ erugh phọ, ituughạ arokool, ḅilhẹ r’ituughạ Otu okoriom mọ. Mị kẹn bịn kụ ungọ ghan oghaạph ogbo phọ torobọ awiki. Arukumuan phọ iphẹn phọ iḍighi idị mị u/moọgh ghan mun mem ootughiạn ghan mọ ogina amhị bịn kụ odi!

Arukumuan phọ amhị epẹ Coron ikọm ni imạ emiteom. Abuniin abuẹn mị atughemhị bọ Baibul phọ uḍiiny ni muụm iduọn amem rekị bọ. Kuolọ ipaanhaạn irọl li. Eeni amem, tutụ mị atelhe rasi ekool phọ mị kakaạph bọ iiḅi iinhaghạn phọ meḍighi ootaany, kụ mị u/ḍuom olhoghi kẹn esi dị mị kaminạ. Arokool phọ ookpomhoghan phọ oghaạph ghan bọ iiḅi iinhaghạn phọ eḅaramaạm inhọn ibạm arukpu ogbo. Ghalhamọ r’iduọn mị u/maạr bọ mughị, ibadị amem mị uḍigh ghan oghuugh izoghị riphiịny dị oolhogh raaḅaghamhị ghan. Etigheri oomo ipaanhaạn phọ iphẹn phọ, aZihova ughoph ni imhị aḅilhẹ uphạm imhị. Onyebel roten, mị umhiịn ni mọ aZihova ruukolhobian ghan imhị ilọ ipaanhaạn dị epelhom iphẹn phọ dị mị kasoman siẹn oḍighi phọ amhị.

ADỌL AMHỊ EPẸ PAPUA NEW GUINEA

Lhạ phọ 1978, usighẹ ni imhị oghimọm epẹ Papua New Guinea, epẹ esiinyọm mọ Australia. APapua New Guinea aḍighi eelhe araaḅarạph. Iḍighi ni iikia esi amhị omhiịn mọ onhụ abạl awe dị rokị ni omhạn iraạr erubal roḅạ ghan runhụ aḍiaḅạ dị epel 800. Enhighenhaạn bọ ibadị awe roḅạ ghan Pidgin aMelasia dị oghol mọ Tok Pisin.

Usighẹ ni imhị oghimọm ookpomhoghan aḅekeeny epẹ ekpanhạ emhạ phọ, Port Moresby, eẹny ekulha amem. Kuolọ mị uḅuạ ni aghị ookpomhoghan dị roḅạ ghan Tok Pisin kụ amhiigh otuughạ onhụ phọ. Mị usighẹ ni ipẹ mị ratuughạ bọ aḍighinhom epẹ erugh phọ. Iphẹn phọ ilhoghonhaạn imhị ḍighaạgh onhuụn omhaạr onhụ phọ. I/bia bịn mị angọ oghaạph ogbo onhụ aTok Pisin. Mem mọ mị asi bọ Papua New Guinea, I/mạn lhạ bịn umạ imhị oḍighi opoghom eghir rookpomhoghan dị roḅạ ghan Tok Pisin epẹ ekool phọ epẹ phọ. Kụ iphẹn phọ iḍighi ni iikia esi amhị.

Loor iduọn arookpomhoghan phọ eekelhạn ghan bọ iboom, iwạ mọ mị upạm ghan ibadị arookpomhoghan eghir, kụ agbor ghan kẹn aḅuạ ekpisi agbạ ekpisi. Eḅẹl amem mọ, mị ulhoghoma ghan mọ ogina amhị bịn kụ odi mem dị mị asi emhoom ekpisi dị roḅạ onhọn onhụ r’enhọn eḍighinhom iyaạr. Mị u/tue ghan uḍigh moto kụ aghị ophogh arookpomhoghan phọ iphẹn phọ loor iduọn areten phọ egbughagbugha bọ loor araaḅarạph phọ. Esi iduọn phọ, mị uḍigh ghan oghuugh anyụ torobọ awiki. Eeni amem, ogina amhị kụ uḍigh ghan rughuugh anyụ dị i/kạr imoon. Eghiil phọ ephẹn phọ iḍighi ghan ni idị oḅio amhị akaph ghan idiphọ amem mọ mị aḍigh ghan bọ oghuugh izoghị phọ!

Iyạl ikpo awe bịn kụ umhoọgh ghan fon. Esi iduọn phọ, mị ughaaphạn ghan rookpomhoghan phọ dị eego esi ogẹ arinyạ. Ibadị amem, mị usi ghan ni kụ arinyạ phọ amhị egbi osi. Iphẹn phọ iḍighi ghan idị mị kaapuruan kụ agbi omhiịn abumor r’abumaranhi phọ. Torobọ amem dị mị asi kụ amhiịn ipẹ abumor phọ uzoọm bọ imhị oḅilhẹ usereghiạn imhị, mị umhiịn ghan mọ ekpẹ ni otuạn abumor phọ ophinyọn arikiạ phọ mị rapinyọn bọ. Mị umhiịn ghan ni reten dị aZihova rulhoghonhaạn imhị ḍighaạgh, kụ asiya phọ amhị r’odị ekpạr ghan bịn.

Iḅẹl ituughạ dị mị aghị ekpu ogbo dị oghol mọ Bougainville, olom r’anhịr uru ni uteẹny imhị kụ oyighọgh, kụ upuru imhị mọ: “Nạ uutughiạn ni iyoor?” Mị uutughiạn ni dị mị angọ ogbaanhaạn olom r’anhịr phọ ophọn phọ mem mọ purukụ mị asi bọ Port Moresby. Mị umhiigh ni otughemhị abidị Baibul kụ agbi bọ oḅọgh abidị ongọ onyọ umor dị arugh ekool phọ abidị. Nyiidiphọ, bidị moḍiiny muụm! Ḍiẹn phọ aḍinhiin esi aḍisẹph kirokirọ phọ mị amhoọgh bọ esi iraạr asiạ phọ mị arọl bọ Papua New Guinea.

EẸNY EGHUNOTU R’IBOOM ARUKUMUAN

Kụ mị agbi bọ oḍuạ aCoron lhạ phọ 1978, mị ulhegheri ni oniin onyọ umaranhi dị amhaạr anhighẹ kụ amhaạr kẹn rukumuan, dị oghol mọ Adel. Odị aḍighi onyọ okọy eten oomo amem mọ, dị amhoọgh iyạl ibạm anmụny dị raakonhom. Okol nmụny phọ mọ Samuel r’aShirley. Odị kẹn kụ aḅilhẹ aphogh ghan onhiin odị dị makpọ ni. Unwanyụ aMay 1981, mị uḅula ni Philippines ophin odị. Yoor aalhạn bọ, yoor ughiọm ni ghisigh okọy ghan eten opọ oomo amem mọ kụ oḅilhẹ oḅophoghạn ophogh eghunotu phọ ayoor.

Etigheri iduọn mị mamhoọgh bọ ni eghunotu, lhạ phọ 1983 uḅilhẹ ni umạ imhị idiphọ okọy eten dị agbatanhaạn, kụ usighẹ imhị oghị Linapacan Island, emhạ dị edi Palawan. Kụ oomo phọ ayoor ookoroghian ogheel epẹ phọ. Ekpisi phọ ephẹn phọ, Abugbaanhaạn u/lo. Yoor oghị bọ osi epẹ phọ, alhạ reten bịn onhiin phọ Adel amhugh. Toroboiperolbọ, iyaạr dị ikparamhị iyoor siẹn aḍuugh onhiin anhịr phọ amhị pọ okuọm aloor rukumuan epẹ erugh phọ. Ibadị awe dị yoor otughemhị ghan Baibul phọ epẹ Linapacan uphoph ni oghị ghisigh. Esi iduọn phọ, imhoghi mọ yoor omhoọgh Kindọm Họl, kụ yoor olhọgh nyoniin. Yoor osi bọ epẹ phọ iraạr asiạ reten, olhoghi ayoor aḅaạl li omhiịn 110 awe dị oru aani aMemorial phọ. Kụ ibadị abidị ughị ni ghisigh oḍiiny muụm.

Lhạ phọ 1986, usighẹ ni imhị oghị epẹ ekpu ogbo aCulion, dị awe dị omhoọgh ghan ezẹgh okụ ufe omuza. Epẹ phọ, umạ ni Adel idiphọ onyọ okọy eten dị agbatanhaạn. Eḅẹl amem mọ, yoor ughiilhaan ghan ni oghị oghaạph oghaạph iiḅi iinhaghạn phọ oḅenhị awe dị ezẹgh okụ ufe melhọgh eghạ. Kuolọ abumor phọ odi bọ emhạ phọ epẹ phọ uḅenhị iyoor mọ yoor ku/moọgh oghiilhaan loor esi dị mookonhom ni bidị ezẹgh phọ, kụ ezẹgh phọ kee/teneghian. Kụ ibadị abidị dị mookonhom ezẹgh phọ, uru aani ghan ni ituughạ dị ophạm ghan otu oniin onyọ umaranhi. I/bia bịn yoor oluạn oghaạph ghan iiḅi iinhaghạn phọ oḅenhị awe dị olhoghoma mọ Enhaạn r’awe u/maghamhị bidị maạr. Olhoghi ayoor aḅaạl li iboom omhiịn ibo phọ bidị omhoọgh bọ mem mọ bidị oru bọ olhegheri mọ ḍiniin aḍio bidị komoọgh ni omhoon aloor dị amhunhughan.—Luk 5:12, 13.

Eeghe kụ ilhoghonhaạn bọ ḍighaạgh ibạm anmụny phọ ayoor orue oluạn ephẹn Culion? Anhịr amhị r’amhị umhạgh ni iyạl iḍoọgh abumaranhi dị odi Coron oru orọl r’ayoor pidị anmụny phọ ayoor omoọgh we dị bidị kotelean ghan. ASamuel, Shirley, r’iyạl phọ iḍoọgh abumaranhi phọ ukạr ri oghelhọm iboom otughemhị ghan ibạm anmụny igey phọ. Kụ mem dị bidị rotughemhị ibạm anmụny phọ, mị r’anhịr phọ amhị utughemhị ghan burunhiin r’aburudẹ anmụny phọ. Okạr oghaạph, amem irọl li dị yoor otughemhị ghan 11 arughunotu. I/bia bịn awe phọ yoor rotughemhị ghan bọ ophoph oghị ghisigh bịn omhoom ookpomhoghan amite!

Eḅẹl amem mọ, mị bịn kụ okumor oye ookpomhoghan dị arọl ghan epẹ phọ. Loor iduọn phọ, olạ agadạ phọ uḅenhị imhị mọ mị upạm ghan ituughạ oomo awiki phọ r’ophaanyạ abukaaphọm mọ odi bọ Culion. Kụ oḅilhẹ ghan oghị ophạm r’abunhọn esugha abukaaphọm, emhạ dị oghol mọ Marily, ekpisi dị kesighẹ ni iraạr awạ oghiil abot osi. Mem dị ituughạ phọ remineen, kụ eghunotu phọ ayoor otelhe ibadị awạ eten dị araaḅarạph edi, oghị emhạ dị oghol mọ Halsey otughemhị awe Baibul phọ.

Esighẹ rekị bịn ibadị awe epẹ Marily r’aHalsey oḍighi aani Bugbaanhaạn, kụ olhọgh Kindọm Họl iyạl phọ arikpisi phọ. Idiphọ emite bọ epẹ Linapacan, abumor phọ r’awe dị omhoọgh ḍiḅeraạn kụ umiteom ibadị araraạr phọ osighẹ bọ oḍighinhom oḍighi phọ kụ oḅilhẹ ophinomaam aani bin oḍighi phọ. AKindọm Họl phọ opọ aMarily katue ni aḍigh 200 awe, kụ aḍighi kẹn ni Kindọm Họl dị kotue ni ootariọn. Esi iduọn phọ, uphạm ghan siphẹ phọ ookpomhoghan eghir phọ.

OTỌ, ADỌL IGINI, R’IMHOOM IBO

Lhạ phọ 1993, mem dị ibạm anmụny phọ ayoor momhanhạm, anhịr phọ amhị r’amhị umhiigh ni oḍighi opoghom eghir epẹ Philippines. Kụ reteẹny 2000, bịn mị aghị aani Ministerial Training School otuughạ idị mị katughemhị ghan bunhọn dị oru askul phọ opọ phọ. Mị ulhoghoma ghan mudị mị u/sianhaan oḍighi aani oniin otughemhị askul phọ opọ phọ, kuolọ anhịr phọ amhị kụ ukparamhị ghan imhị. Odị uutughianhạm imhị mọ aZihova kungọ ni imhị olhegheri iyaạr r’inyaạm, orue oḍighi omhoom oḍighi phọ ungọ bọ imhị. (Fil. 4:13) Anhịr phọ amhị aghaạph iphẹn phọ loor idị emitenhaan nyodị. Loor esi dị, etigheri e/moon phọ odị, odị raḍighi ni oḍighi phọ odị.

Lhạ phọ 2006, mem dị mị odi ratughemhị eniin ekụ, anhịr phọ amhị amheelhom ni ezẹgh Isaghạ. Iphẹn phọ idughe ni iyoor. Mem dị mị aḅenhị anhịr phọ amhị mọ mị kabilhẹ oḍighi phọ pidị mị atue apogh nyodị, odị aḅẹm mọ, “Wạ ghụn oye arookonhom dị kuphogh imhị, mị alegheri ni mọ aZihova kulhoghonhaạn ni iyira ḍighaạgh oghiọm aghisigh oḍighi phọ.” Etigheri e/moon phọ odị, esi oḍiiny asiạ anhịr phọ amhị aghiọm ni ghisigh rukumuan phọ odị rangọ bọ aZihova, dị u/ḅarạm igum. Mem dị odị u/tue mun utelhe, arọl ghan agadạ iiḍighila kụ aghaạph ghan iiḅi iinhaghạn phọ. Mem dị odị u/tue mun uḅạ agey kụ rapagharanhaạn ḍipuru otu ituughạ, aḅạ ghan ekpo obobọ iyạl ikpo onhụ bịn. Abumor r’abumaranhi phọ ufirimạ ghan ni sidom osereghiạn oghiomaạn Adel, loor emạ eḍeenhaan okparạm mọ odị, tutụ k’amem mọ odị amhugh bọ 2013. Esi 30 asiạ, mị ughelhọm ghan ni muḅọph ooḅi anhịr phọ amhị akpẹ bọ oḍuomolhoghi phọ. Kuolọ siẹn odị mamhugh bọ, okururu r’otọ meḅilhẹ iphạm imhị.

Mem mọ anhịr phọ amhị Adel arọl bọ, odị awạ ghan mọ mị ukiọm ghisigh rukumuan phọ amhị, kụ idiphọ kụ edị mị aḍighi. Iphẹn phọ kụ rilhoghonhaạn bọ imhị ḍighaạgh orue okaran adọl igini phọ. Emhiigh 2014 kụ esi 2017, usighẹ ni imhị oghị rookpomhoghan dị roḅạ ghan onhụ aTagalog, reelhe dị osophoghom oḍighi phọ ayira. Iphẹn phọ reten, mị aghị ghan oophoghogh arookpomhoghan dị reḅạ ghan onhụ phọ Tagalog epẹ Taiwan, United States, ḅilhẹ r’aCanada. Lhạ phọ 2019, mị utughemhị askul aKingdom Evangelizers epẹ India r’aThailand. Oomo iiḍighi phọ iphẹn phọ ingọ ghan imhị oboom oḅaạl olhoghi. Olhoghi amhị akạr raḅaạl ghan kapu mem dị arukumuan phọ aZihova kụ iḅogh imhị.

OLHOGHONHAẠN AḌIGHAẠGH IYIRA U/KELHẠN

Torobọ omhoom oḍighi lọ ungọ imhị, mị uphomhoghiạn ghan agey bumor r’abumaranhi phọ r’amhị roḍighi bọ, dị owilhẹ abidị ukparanhaạn ghan ni imhị. Mem lọ eḍighi iduọn phọ, mị matuughạ ilọ okpasị ghan emooph amhị esi aZihova. Ibadị amem, mị mamhiịn idị odị rubakị ghan imhị, kụ iphẹn phọ milhoghonhaạn imhị ḍighaạgh osighẹ ghan atorobọ omhoom oḍighi lọ ungọ imhị r’oomo olhoghi. Rodon, mị rakọy ghan eten opọ agbatanhaạn bọ, epẹ Philippines. Mị rakelhọm ni omhoom ookpomhoghan phọ mị odi bọ, idị eḍighi bọ aḍighi idiphọ eghunotu dị rubakị imhị ḅilhẹ rulhoghonhaạn imhị ḍighaạgh. Mị akạr kụ raabagaam Samuel r’aShirley iduọn bidị rotuughaạny bọ omheeraam onhiin phọ abidị.—3 Jọn 4.

Ii, mị masoman ni odẹgh ophogh kirokirọ siẹn adọl aghuḍum mọ amhị. Eḅaramaạm ni odẹgh ophogh orọl kụ omhiịn dị ezẹgh eekpoḍị ooḅi anhịr phọ amhị bịn eghiigh. Mị maaḅenion ni raraạr ibadị amem orue odaphạn mem dị araraạr enmia. Esi oomo araraạr phọ iphẹn phọ, mị makạr amiịn mọ aZihova “o/kạr okeIạn torobọ onyọ ayira.” (Iiḍ. 17:27) Aḍighaạgh aZihova “i/kper ipughạn” dị ka/tue aloghonhaạn ḍighaạgh aḅilhẹ akparamhị rebenhẹ phọ odị, ghalhamọ r’amem lọ bidị odi ni ekpisi dị eḍighi sạm. (Isa. 59:1) AZihova Aḍighiigh phọ amhị, odi ni r’amhị siẹn oomo aghuḍum mọ amhị. Mị akạr kụ rasẹph nyodị. Ogina amhị bịn ko/rọl ghan.