Kel Eegharạ Owạ Ghan Ilọ Aloor Bịn Idiphọ Awe Aḅirinhi Phọ
ḌIO arodon, ibadị awe rowạ ghan mọ ozoọm ghan bidị eten dị egbatanhaạn oḅilhẹ omhiịn bidị idiphọ awe dị omhạn maạr opu bunhọn. Kụ ghalhamọ r’amem dị ozoọm bidị eten dị egbatanhaạn, re/gbaanyạn ghan bidị. Azin aḍiitughiạn phọ aḍiẹn phọ pọ eegharạ owạ ghan ilọ aloor awe aḅirinhi phọ omhoọgh bọ. Ilọ bidị omhoọgh, re/gbaanyạn ghan bidị.—2 Tim. 3:2.
Ii, eegharạ owạ ghan ilọ aloor phọ bịn i/miigh rodon. Eegharạ phọ ephẹn phọ kụ iḍighi bọ iyaạr phọ Adạm r’Iv oḅẹm bọ mọ bunọ kụ kosopha ghan ilọ bidị koḍighi. Kụ ipẹ phọ kụ ikọm bọ iiḅaghamhị phọ omhạr awe. Eniin phọ eegharạ phọ ephẹn phọ kụ iḍighi bọ iyaạr phọ Uw-emhạ phọ Uzziah opọ aJudah aatughiạn bọ mọ odị amoọgh ni elhiom osụ insẹns siphẹ otu iiḅereghị phọ, kụ ipẹ phọ iḍighi ni iboom ikarạph. (2 Chron. 26:18, 19) Iduọn kẹn ni kụ edị aFarisi r’aSadusi phọ ootughiạn ghan bọ mọ Enhaạn akpẹ ozoọm abidị eten dị egbatanhaạn, idị eḍighi bọ mọ bidị eemharạ eemharạ Ebraham.—Mat. 3:9.
Loor iduọn awe aḅirinhi phọ omhoọgh bọ eegharạ owạ ghan ilọ aloor, eegharạ phọ ephẹn phọ etue ni itir iyira. (Gal. 5:26) Yira otue ni omiigh ootughiạn mọ yira okpeanhaạn ni omhoọgh aroopoogh dị egbatanhaạn obobọ ekpẹ ni dị kuzoọm ghan iyira eten dị egbatanhaạn. Yira koḍighi ika kụ eten iitughiạn phọ iphẹn phọ iyira ki/tir? Omhiighom, omhiịn idị aZihova amhiịn aani eegharạ phọ ephẹn phọ. Ooḅeghiọn iyạl asinhị-iilhogh aBaibul dị kilhoghonhaạn iyira ḍighaạgh.
AZihova kụ rasopha ghan roopoogh dị ikpeanhaạn iyira. Ooḅeghiọn iniin areḍeenhaan.
Siphẹ iikolhobian eghunotu phọ, aZihova rawạ dị olom kaloghoma mọ anhịr phọ alọgh ni nyodị eegu ḅilhẹ anhịr phọ kaloghoma mọ olom mọ odị apomhoghiạn ni nyodị. (Efẹ. 5:33) Odị rawạ kẹn mọ olom obobọ anhịr amhoọgh ghan ḍiḅeraạn orolhạn esi aghị esi anhịr phọ odị obobọ olom mọ odị bịn. (1 Kọr. 7:3) Ewạ kẹn ni dị ibạm anmụny konaghanhạn burudẹ r’aburunhiin abidị, ḅilhẹ aburudẹ r’aburunhiin koḅilhẹ opomhoghiạn kụ ologhonhaạn ḍighaạgh ibạm anmụny phọ abidị.—2 Kọr. 12:14; Efẹ. 6:2.
Kụ siphẹ ookpomhoghan phọ, ekpẹ ni olhọgh eegu ikumor awe phọ. (1 Tẹs. 5:12) Toroboiperolbọ, bidị ku/ponomaam ghan bumor r’abumaranhi phọ.—1 Pit. 5:2, 3.
Enhaạn angọ ni buphẹ rotooghị bọ elhiom aanyị ghan iisogh buphẹ bidị otooghị bọ rongọ ḅilhẹ mọ awe phọ olhọgh ghan bidị eghuan.—Rom 13:1, 6, 7.
AZihova rungọ ghan iyira raraạr dị epu ipẹ yira rowạ bọ, loor ephomhoghiạn. Loor ikarạph phọ ayira, yira okpẹ omhuughu. (Rom 6:23) Kuolọ loor ephomhoghiạn oḅạr phọ aZihova amhoọgh bọ esi ayira, odị usẹph ni iyira reten kirokirọ. (Ps. 103:10, 11) Aloor esi onmạ ighirigiir phọ odị yira u/kpeanhaạn bọ kụ edị odị rusẹph ghan bọ iyira kaḅilhẹ ungọ iyira roopoogh kirokirọ.—Rom 12:6-8; Efẹ. 2:8.
IDỊ YIRA KOTUE OKEL IITUGHIẠN OWẠ GHAN ILỌ ALOOR BỊN
Gona loor obọ nạ kaatughiạn ghan bọ idiphọ awe aḅirinhi phọ. Eten dị yira u/seere olhoghi, yira kotue ni omiigh ootughiạn mọ yira kụ umhạn maạr opu bunhọn. AZizọs aghaạph idị iphẹn phọ ketue emite mem mọ odị aghaạph bọ amaaniọm ilọ abuẹn oghị bọ oḍighi ozo phọ okpẹ bọ oniin adenarius phọ. Buniin uḅon ni kụ oghị, kụ oḍighi oomo emhụ aḍio phọ r’ogogo phọ ragụr bọ bidị. Kuolọ abunhọn, uḍighi oniin awạ bịn. Buẹn oḍighi bọ oomo emhụ aḍio phọ ugbi mọ kokpẹ bidị iboom ikpoki loor oḍighi phọ bidị oḍighi bọ. (Mat. 20:1-16) AZizọs asighẹ oghaạph omaaniọm mọ ophọn phọ aḍeenhaan mọ abutelhedom mọ odị omhoọgh ghan ogbaanyạn esi atorobọ iyaạr dị eḅaạl olhoghi aZihova ongọ abidị.
Awe phọ oḍighi bọ oḍighi phọ oomo emhụ aḍio phọ uutughiạn mọ kokpẹ ni bidị opelhom ipẹ bidị omherenyan bọ
Moọgh eegharạ osereghiạn ghan, ka/gon ghan inhọn araraạr. (1 Tẹs. 5:18) Tuughaạny otelhedom mọ Pọl, odị o/gon ghan dị abumor phọ orọl bọ Korịnt kongọ nyodị raraạr ghalhamọ r’iduọn odị amhoọgh bọ ni elhiom oḍighi iduọn phọ. (1 Kọr. 9:11-14) Osereghiạn ghan torobọ iyaạr dị oye ungọ iyira obobọ uḍighinhaan iyira, ku/moọgh eegharạ ogon ghan dị awe kuḍighinhaan iyira obobọ ungọ iyira raraạr.
Otelhedom mọ aPọl o/gon ghan dị abunhọn kongọ ghan nyodị ikpoki
Sooromhi loor. Mem dị oye aatughiạn mọ odị amạn maạr iboom reḍighi ghan idị oye phọ kaloghoma mọ odị asi ni omhoọgh inhọn araraạr. Eḍighi maạr dị yira osooromhi loor, kilhoghonhaạn iyira ḍighaạgh oghel ikarạph iitughiạn phọ iphẹn phọ.
Eegharạ osooromhi aloor phọ oyil phọ Daniel amhoọgh bọ kụ iḍighi bọ iyaạr phọ odị amhạn bọ maạr esi aZihova
Oyil phọ Daniel aḍighi ni emạ eḍeenhaan oye dị asooromhi loor. Egbogh eghunotu phọ odị aḍuạ bọ amite, enhighẹ phọ odị, r’asighalhanyạ phọ odị amhoọgh bọ mitue ni eḍighi iyaạr dị odị mumiigh ootughiạn mọ ipẹ ozoọm bọ nyodị r’aroopoogh phọ odị amhoọgh bọ ikạr esi nyodị. (Dan. 1:3, 4, 19, 20) Ghalhamọ r’iduọn phọ, odị aḍighi ni oye dị asooromhi loor, kụ eegharạ osooromhi aloor phọ kụ iḍighi bọ iyaạr phọ odị amhạn bọ maạr esi aZihova.—Dan. 2:30; 10:11, 12.
Yira oghel eegharạ owạ ghan ilọ aloor r’ophoophe aloor phọ emuza bọ siẹn aḅirinhi phọ. Omhoọgh ghụn oḅaạl olhoghi esi atorobọ iyaạr dị aZihova musephọm iyira loor esi onmạ ighirigiir phọ odị.