Ilọ Oḍighi Ogey Oyaghirị

NẠ MAMHOỌGH ghan ni iiḅaghamhị dị oye olhoghonhaạn anạ ḍighaạgh u/lo? Yira odi mem dị ekpạr ḅilhẹ eḍighi “ooto r’osooromineen.” Iphẹn phọ ketue ni eḍighi idị yira koḅonyonhu ozuan mem dị yira u/moọgh oye oghaaphạn. (2 Tim. 3:1) Toroboiperolbọ, i/wạ mọ ogina ayira okururuọm iiḅaghamhị dị yira omhoọgh. ABaibul phọ amạ ni amiteom mọ abugey arighirị kotue ni ulhoghonhaạn iyira ḍighaạgh “mem iiḅaghamhị.”—Prov. 17:17.

IPẸ ABUGEY ARIGHIRỊ ROLOGHONHAẠN GHAN BỌ ḌIGHAẠGH

Otelhedom mọ aPọl amhooghọm ni suọ olhoghonhaạn aḍighaạgh arighirị phọ odị odạph ghan bọ nyodị oghiighị rikpisi kirokirọ. (Kọl. 4:7-11) Mem mọ otelhedom mọ aPọl arọl bọ ikoli phọ epẹ Rom, arighirị odị ulhoghonhaạn ni nyodị ḍighaạgh oḍighi raraạr dị odị u/tue mun uḍighi. Esi omaạm, Epafroditọs asighẹ ni aruomnaan Pọl raraạr dị abumor r’abumaranhi phọ epẹ Filipai ongọ mọ oruomnaan nyodị. (Fil. 4:18) ATikikọs asighẹ ni rinyạ dị otelhedom mọ aPọl agẹ aghiomaạn rookpomhoghan phọ. (Kọl. 4:7; miịn iyaạr ituughạ.) R’olhoghonhaạn aḍighaạgh arighirị odị, aPọl arue ni aghiọm ghisigh akparamhị rookpomhoghan phọ ghalhamọ r’amem dị odị arọl ikoli olhoghi otu r’otu ikoli. Ika kụ idị nạ katue aḍighi ogey oyaghirị rodon?

Abumor r’abumaranhi rodon moḍeenhaan idị arighirị omhạn maạr. Umaranhi dị oghol mọ Elisabet dị rakọy ghan eten epẹ Spain, aghaạph ni idị umaranhi dị aḍighi oyaghirị odị alhoghonhaạn nyodị ḍighaạgh mem iiḅaghamhị. Mem dị oniin oyil arookonhom aghaạph mọ onhiin Elisabet mamhoọgh ezẹgh akansạ, oyaghirị phọ Elisabet agẹ ni aghiomaạn Elisabet sidom dị eḅarạm riisi aBaibul, kụ ikparamhị ni nyodị. Elisabet aḅẹm mọ, “iphẹn phọ ingọ ni imhị inyaạm okaran iiḅaghamhị phọ torobọ aḍio, dị mị u/loghoma mun mọ ogina amhị kụ odi.”—Prov. 18:24.

Yira kotue ni okiọm ghisigh okparamhị siya phọ ayira r’abumor r’abumaranhi phọ mem dị yira olhoghonhaạn ghan bidị ḍighaạgh oḍighi araraạr siẹn ookpomhoghan phọ. Esi omaạm, nạ atue ni asaạny onyọ umor obobọ umaranhi dị asiạ meghị asighẹ akimọm otu ituughạ obobọ epẹ erugh phọ. Nạ aḍighi iduọn phọ, pọ nyinha kekelhọm ni raghaạph dị kikparamhị inyinha. (Rom 1:12) Kuolọ, abuniin abumor r’abumaranhi ro/tue ghan komite erugh. Idiphọ abugey arighirị, ika kụ idị yira kotue ologhonhaạn bidị ḍighaạgh?

ḌIGHI OGEY OYAGHIRỊ ABUPHẸ E/MOON MELHỌGH BỌ OTU

Abuniin abumor r’abumaranhi ayira osoman ni iiḅaghamhị kirokirọ idiphọ e/moon r’inhọn odọ asidọl dị rekikima ghan bidị oghị ituughạ Kindọm Họl. Ooḅeghiọn eḍeenhaan aDavid dị amhoọgh ezẹgh akansạ. Odị arọl bọ rookonhom akansạ phọ ipel li odiiny unwanyụ. Oomo amem mọ odị arọl bọ rookonhom mọ, aDavid r’anhịr odị Lidia uḍighan aani ghan ituughạ phọ dị eego esi azoom.

Ika kụ idị arighirị abidị siphẹ ookpomhoghan phọ olhoghonhaạn bidị ḍighaạgh? Torobọ amem lọ omhạn ituughạ, abuniin abumor r’abumaranhi pạ aKindọm Họl phọ ulhọgh ghan ni ikuph oḅaanhaạn aDavid r’aLidia dị eego esi azoom mọ. Ḅilhẹ kẹn, mem dị aDavid r’aLidia ophagharanhaạn ḍipuru, abumor r’abumaranhi phọ ugẹ ghan ni dom afon osephọm bidị ilọ ophagharanhaạn phọ abidị. Eeghe kụ iḍuạ emite? ADavid r’aLidia ulhoghoma mọ ogina abidị bịn kụ u/lo.

Yira kotue ni ookolhobian idị abuphẹ e/moon melhọgh bọ otu kopinom aani bin rukumuan epẹ erugh phọ ḍughụm? Yira orue ni ooḅenhion raraạr enụm oḍighi iduọn phọ, keḍeenhaan ni buphẹ e/moon melhọgh bọ otu mọ yira u/ḅitonhaạn bidị. (Prov. 3:27) Yira kotue ni oḍighi idị bidị kuḍighan aani iyira mem dị yira rowạ ongọ ogbaanhaạn dị eego esi afon obobọ ogẹ aḍinyạ. Abuphẹ e/moon melhọgh bọ otu otue ni oḍighan aani ruupuruan omite epẹ erugh phọ dị eego esi azoom. ADavid r’aLidia usereghiạn ni iikolhobian phọ iphẹn phọ ookpomhoghan phọ omiteom bọ. ADavid aḅẹm mọ, “Oḍighan ookpomhoghan phọ ruupuruan omite epẹ erugh phọ r’iiḅereghị okureriom mọ ingọ ghan ni iyoor onhinhọm.” Oḅarạm isiphẹ, mem emhạn mem nạ atue ni apạm nyopọ nạ ratughemhị ghan bọ Baibul phọ akimọm k’opọ e/moon melhọgh bọ otu phọ, dị iyạl anyinha ketughemhị.

Yira ooḍikuan ghan bumor r’abumaranhi phọ abuphẹ e/moon melhọgh bọ otu eten phọ ephẹn phọ, yira komiịn ni imạ araagharạ abidị eḅilhẹ iḍur iyira egbiemhị bidị. Esi omaạm, mem dị nạ aḍighan bidị epẹ erugh phọ kụ amhiịn magheel phọ bidị oḍighinhom bọ oteẹny ekpom opọ bidị rotughemhị bọ Baibul phọ, kebughẹ ni ḍiḅeraạn phọ nạ amhoọgh bọ esi abidị. Mem dị nạ alhoghonhaạn ghan ḍighaạgh bumor r’abumaranhi phọ ophinom aani abin rukumuan epẹ erugh phọ ḅilhẹ r’ituughạ phọ, nạ kamoọgh ni buboom arighirị.—2 Kọr. 6:13.

APọl amhoọgh ni iidereghị mem mọ aTaitọs oyaghirị phọ odị arọl bọ r’odị. (2 Kọr. 7:5-7) Eḍeenhaan phọ ephẹn phọ ighiọm iyira olhoghi mọ oodereghị r’okparamhị oye i/loonhaan esi oseenyaạn abidị bịn, kuolọ eḅaramaạm kẹn ni omiteom ghan amem orọl r’abidị kụ oḍighi ghan oomo ipẹ yira kotue bọ olhoghonhaạn abidị ḍighaạgh oḍighi araraạr.—1 Jọn 3:18.

ḌIGHI OGEY OYAGHIRỊ MEM IGBIPHOGHỌM

Abumor r’abumaranhi ayira epẹ Russia opighi ni emạ eḍeenhaan dị oniin kabakị ghan oniin. Ooḅeghiọn eḍeenhaan aSergey r’anhịr phọ odị, Tatyana. Abuọ iḍiil uru ni olhoghi otu abidị owaaghị araraạr, kụ ophạm bidị oghimọm ofịs abidị oopuru yogh abidị sipuru. ATatyana kụ edị ophụr oseere, kụ odị agheel olhoghi otu. ASergey aḅẹm mọ: “Iduọn [aTatyana] asi bọ olhoghi otu, bịn oniin onyọ umaranhi r’akpọ oḅio aru ni asi k’ayoor. Abunhọn arighirị ayoor uru ni kẹn ulhoghonhaạn iyoor ḍighaạgh oḅilhẹ oḅoonhomhị raraạr siphẹ olhoghi otu phọ ayoor.”

ASergey aḅarạm mọ: “Proverbs 17:17 eḍighi esi aBaibul dị ekạr iḅeraạn imhị agey, kụ eḅẹm mọ: ‘Ogey oyaghirị raḍeenhaan ghan ephomhoghiạn oomo amem, ḅilhẹ aḍighi umor dị omhạr mem iiḅaghamhị.’ Siẹn amem igbiphoghọm mọ ayoor, mị ukạr kụ amhoghi olhoghonhaạn aḍighaạgh arighirị phọ amhị, kụ mị mamhiịn mọ ikpo onhụ phọ edi bọ Proverbs 17:17 ekạr etu inẹ. AZihova mungọ imhị righirị dị rakpọ oḅio rubakị ghan imhị oomo amem.”a

Iduọn yira rosoman bọ sidọl dị ekpạr epu iphẹn aSergey, yira komoghi ni righirị dị kubakị iyira. Yira kokạr kụ omoghi odọ arighirị phọ abuẹn phọ mem igbogh iiḅaghamhị phọ. Esi iduọn phọ, torobọ onyọ ayira akparaghạ oḍighi ogey oyaghirị nyiidiphọ!—1 Pit. 4:7, 8.