Aḍipuru Dị Torobọ Oye Katue Ni Apuru

AMary r’olom odị John,a otugh pakirị aḅirinhi phọ dị ibadị awe aPhilippines rotu ghan oḍighi oḍighi. Kụ reḅaạl ghan olhoghi abidị iboom oghaạph iiḅi iinhaghạn phọ oḅenhị awe phọ. Mem ezẹgh aCOVID-19 phọ, aMary amhiigh ni otughemhị aBaibul phọ we areelhe kirokirọ siẹn aḅirinhi phọ. Ika kụ edị odị arue bọ aḍighi iduọn phọ?

AMary apuru ghan buphẹ odị ratughemhị bọ Baibul phọ mọ, “Nạ alegheri ni onhọn oye dị keḅeraạn aani otuughạ aBaibul phọ ḍughụm?” Eḍighi maạr dị oye phọ amheera mọ, ii, kụ aMary aḅenhị mọ ḍighi idị bidị kulhegheri imhị. Aḍipuru phọ aḍiphẹ phọ remiteom ghan ni imạ. Eeghe kụ iḍighi? Ibadị awe dị rotuughạ ghan Baibul phọ rowạ ghan ni oḅenhị aani abuọ eghunotu abidị r’arighirị abidị raraạr phọ bidị rotuughạ bọ. Ika kụ edị awe phọ aMary ratughemhị ghan bọ momhegheron oghị esi aḍipuru phọ odị rapuru ghan bọ?

Oye dị aMary ratughemhị ghan Baibul phọ dị oghol mọ Jasmin aghaạph ni ilọ aMary aḅenhị inya abunhọn awe dị rowạ otuughạ aBaibul phọ. Oniin onyọ abidị dị oghol mọ Kristine, aghelhọm ni ituughạ phọ odị iboom dị tutụ aḅenhị Mary mọ bidị otuughạ ghan iyạl amem wiki phọ. Mem dị aMary apuru nyodị mughumọ odị alegheri ni onhọn oye dị rawạ otuughạ aani aBaibul phọ, aKristine amheera mọ, “Ii, mị kaḅenhị righirị amhị mọ omhạgh nyinhạ.” Esi iyạl ikpo asiwiki, aKristine maḅenhị inya arighirị odị dị rowạ otuughạ aani aBaibul phọ ilọ aMary. AKristine aḅenhị kẹn bunhọn arighirị odị dị rowạ otuughạ aani aBaibul phọ, kụ arighirị phọ odị abuẹn phọ oḅilhẹ oḅenhị aani bunhọn arighirị abidị.

AKristine awạ kẹn dị abuọ eghunotu odị dị odi epẹ Philippines kotuughạ aani Baibul phọ. Esi iduọn phọ, odị aḅenhị onyanhị odị dị oghol mọ Andrea ilọ ituughạ aBaibul phọ. Eḅẹl amem mọ, Andrea aatughiạn ghan mọ, ‘Abugbaanhaạn phọ oḍighi okarạph otul, bidị u/meeraam Zizọs ḅilhẹ kẹn ogina aGenesis kụ esi Malachi kụ edị bidị omheeraam.’ Kuolọ, idiphọ odị amheera bọ kụ bidị otuughạ bọ mem bịn, odị amhiịn mọ araraạr phọ odị aatughiạn ghan bọ i/tu inẹ. Torobọ amem dị odị atuughạ emhoom iyaạr, odị alọ ghan mọ, “Tutụ aBaibul phọ kụ aghaạph bọ ni, pọ agey ni!”

Esighẹ rekị bịn Andrea aghaạph ilọ aMary aḅenhị iyạl arighirị odị r’oye dị r’odị roḍighi ghan oḍighi, kụ abuẹn phọ omhiigh otuughạ aani aBaibul phọ. Ḅilhẹ kẹn aMary o/lhegheri mọ umaranhi odẹ Andrea dị oghol mọ Angela, dị eten ra/miịn ghan arọl ghan ni ogbạl anhaghạn ghan mem dị bidị rotuughạ. Eniin aḍio, Angela aḅenhị Andrea mọ aḅenhị aMary mọ odị rawạ otuughạ aani aBaibul phọ. Ipẹ Angela ratuughạ bọ ikạr kụ eḅeraạn nyodị. Bidị rotuughạ esi oniin unwanyụ, Angela arue ni aatughiạn ibadị ariisi aBaibul kụ aḅenhị aMary mọ bidị otuughạ ghan inya amem wiki! R’olhoghonhaạn aḍighaạgh Andrea, Angela amhiigh ni oghị aani ghan ituughạ phọ dị eego esi azoom.

Mem dị aMary alhegheri bọ mọ aJoshua olom mọ aKristine ratọl ghan ogbạl torobọ amem dị aKristine ratuughạ, aMary apuru nyodị mughumọ keḅeraạn ni nyodị odạph abidị otuughạ. AJoshua aphagharanhaạn mọ, “ii, kuolọ mị kanaghạn ghan bịn; imhị ku/puru ḍipuru oo. Nạ upuru imhị ḍipuru, pọ nạ imhị ku/mhiịn mun.” Iḅẹl oogh ikalhạ phọ bidị omhiigh bọ otuughạ, aJoshua apuru sipuru dị epu ipẹ aKristine. Odị aḅẹm mọ odị rawạ omhiigh otuughạ aani aBaibul phọ.

Oọny aḍipuru phọ aMary apuru ghan bọ, iḍighi ni idị odị amhoọgh ibadị awe dị odị ratughemhị ghan Baibul phọ. Iduọn awe phọ odị ratughemhị bọ Baibul phọ robụgh bọ, odị aakolhobian ni dị abunhọn Abugbaanhaạn kotughemhị buniin. Nyiidiphọ aMary ratuughạ ghan Baibul phọ r’iyạl-dị r’ophaanyạ awe dị odi inya areelhe kirokirọ.

AJasmin oḅẹl oye phọ aMary amhiighom bọ ituughạ phọ aḍiiny muụm unwanyụ April 2021. AKristine aḍiiny muụm May 2022, kụ maḅula epẹ Philippines orọl r’eghunotu odị. Iyạl abunhọn awe dị aKristine aghaạph ilọ aMary aḅenhị kụ omhiigh otuughạ aani aBaibul phọ moḍiiny kẹn ni muụm. Iyạl ikpo arunwanyụ reten egbi k’amem mọ aKristine aḍiiny bọ muụm mọ, bịn Angela aḍiiny aani muụm. Kụ Angela maḍighi nyiidiphọ okọy eten opọ oomo amem mọ. AJoshua olom mọ aKristine r’onyanhị phọ abidị Andrea, r’abunhọn ibadị awe dị aMary ratughemhị ghan Baibul phọ okị ni ghisigh roḍighinhom raraạr phọ bidị rotuughạ bọ.

Mem mọ aZizọs r’abutelhedom mọ odị orọl bọ siẹn ade phọ, ibadị awe dị otuughạ ilọ aZizọs ughaạph ni oḅenhị buọ eghunotu abidị r’arighirị abidị. (Jọn 1:41, 42a; Iiḍ. 10:24, 27, 48; 16:25-33) Nạ atue ni apuru oye dị nạ ratughemhị ghan Baibul phọ r’abunhọn awe dị oḍeenhaan ḍiḅeraạn otuughạ aBaibul phọ mọ, “Nạ alegheri ni onhọn oye dị kiḅeraạn aani ni otuughạ aBaibul phọ ḍughụm?” Mem dị nạ apuru ḍipuru phọ aḍiẹn phọ, eeni nạ katue ni alegheri bunhọn awe dị rowạ otuughạ aani aBaibul phọ.