A Jehova Ụlhoghonhaan Iyool Ḍịghaagh ‘Oḍum Ịsiphe Ụzuph Bọ Iyoor’

Umor r’umaranhi phọ Kassholms ụghi a skul a Gilead lhạ phọ 1979, kụ egbi k’amem mọ ạmuphe phọ “mọzuph” ni bịdi ọbobo ọsighe bịdi ọkimom rikpisi kịrokiro okumuan. Bịdi mọghi ni ẹpe Iran, Mauritius, Myanmar, Tanzania, Uganda, rạ Zaire. Mem mọ bịdi ọghi bọ a skul a Gilead phọ, umor phọ Jack Redford, aḍighi aani bọ oniin ọtughemhia phọ ạngo ni oroma dị ạlhoghonhaan bịdi ḍịghaagh ọdaphan ạdol phọ tọrobo amem dị “ọzuph” bịdi, “oruphuron,” kụ “ọḅilhe ọzuph.” Ọnhaghan ịpe bịdi ọghaaph bọ.

Umor phọ Mats nạ kụ pụr ạghaaph. Nạ ụnhaghan ika igey phọ?

Umor phọ Mats: Ọde ạmhi ạrol Poland mem mọ ee bọ Omhunhenhiom Ịyal Ẹgham Oomo Aḅirinhi phọ, kụ ọdi ạmhiin ni ịkaraph ạraraar phọ ạsiosi a Catholic oḍighi ghan bọ, kụolo ọdi ạḅem ghan mọ, “Egey ẹku ịiḅereghi kẹtol li ekpisi!” Ẹsighe rẹki bịn mị ạmhiin mọ ịpe ọde phọ ạmhi ạghaaph bọ ịne ni. Mị ugho ni ịbadi igbaany ạrinya mem mọ ạmuphe phọ. Aḍiniin ạḍinya phọ mị agho bọ ughol mọ The Truth That Leads to Eternal Life. Ẹmhuoghaaph ạḍinya phọ ạḍiphe phọ ịkar kụ ẹḍa ḍịḅeraan ạmhi, kụ mị ạal li ḍịnya phọ oomo aḍughul phọ ạḍiphe phọ. Rẹḅaal, bịn mị alhegheri mọ mị mạmhiin igey phọ!

Emhiigh April 1972 kụ ẹghi, mị ạal li ịbadi ạrinya Ạbugbaanhaan phọ kụ mị ạmhiin ọphanyanhaan asipuru phọ mị ạmhoogh bọ sịphe ạ Bạịbul phọ. Ịphen imitenhaan bọ ịmhi ịḅilhe ẹghigh ịdipho ogbogh omuul ḍighi phọ ạ Jizọs ạghaaph bọ aghol sịphe aḍidogh phọ ọdi. Omuul ḍighi phọ ạmhiin ekpo ẹḅe dị ẹmhan mạar iboom kụ ạghi aalhaghi oomo ạraraar dị ọdi ạmhoogh aghoom. Kụ ịpe kụ ịdi mị aḍighi, mị “aal” li iikolhobian phọ mị ạmhoogh bọ ọghi ogbogh a skul oḍighi oyil arookonhom, ọmhiin mọ mị ako ni “ekpo ẹbe” igey phọ mị mạmhiin bọ. (Mạt. 13:45, 46) Bịn December 10, 1972 mị aḍiiny mụum.

Rẹki ọmhan ạlha bịn ọde ạmhi, onhiin amhị, r’ọbam umor ạmhi ọtuugha aani igey phọ oḍiiny mụum. Kụ mị amhiigh ọkoy eten ọpo oomo amem mọ ụnwanyu a July 1973. Umaranhi dị aḍighi ọkoy eten dị oghol mọ Ann-Catrin ạrol li ookpomhoghan ayoor. Ọdi ụḅeraan ni ịmhi kụ yoor ạalhan lhạ phọ1975. Ịḅel inya ạsia phọ yoor ạalhan bọ, yoor ụrol ekpisi dị oghol mọ Strömsund ẹpe Sweden. Ekpisi phọ ẹnighe agey kụ ịbadi awe ọmoọgh ḍịḅeraan ọtuugha ạ Bạịbul phọ.

Umaranhi phọ Ann-Catrin: Ọde ạmhi ạtuugha igey phọ mem dị ọdi rạman ogbogh a skul phọ ọdi epẹ Stockholm. Mem mọ ạmuphe phọ mị odi ịraar ụnwanyu bịn, kụolo ọdi ụpham ghan ni ịmhi ạghimom ịtuugha r’ẹpe erugh phọ. Ịphen phọ ị́ḅeraan onhiin phọ ạmhi, kụ ạkparagha ghan ọma omiteom mọ ịtughemhi Ạbugbaanhaan phọ kị́ne. Kụolo ọdi órue, ẹsighe rẹki bịn onhiin phọ ạmhi aḍiiny aani mụum. Mị uḍiiny mụum mem dị mị ạmhan 13 ạsia kụ amhiigh ọkoy eten mem dị mị ạmhan 16 ạsia. Mị rokumuan ekpisi dị omhoghi bụkaaphom dị oghol mọ Umeå, bịn uḍighi ịmhi ọkoy eten ọpo ạgbatanhaan bọ.

Mem mọ ạ Mats r’ạmhi ạalhan bọ, yoor ụlhoghonhaan ni ḍịghaagh ịbadi awe ọtuugha igey phọ. Oniin, pọ ọbam ọnyanhi dị kọ̋mhan 20 ạsia dị oghol mọ Maivor, ọdi aphegh ghan reephegh kụolo ọdi anme ni olhoghi ọdi amhiigh okumu a Jehova. A Maivor r’ọbam umaranhi ạmhi uḍighi ni bụkoy eten, kụ ịyal phọ ạbidi ụghi ni a skul a Gilead lhạ phọ 1984, kụ rokumuan ni ịdipho ạ mịsọnạrị ẹpe Ecuador.

Sịphe arikpisi phọ ịsighe bọ inyinha ẹghimom ịdipho ạ mịsọnạri, ika kụ ẹdi nyinha erue bọ eḍighinhom oroma phọ ạḅem bọ mọ “ḍum sịphe ọzuph bọ nyịnha”?

Umor phọ Mats: Ugbor ghan ni “uruphuron” iyoor ọzuph ẹnhon esi sịphe arukumuan phọ ayoor. Kụolo eniin ịyaar dị ịlhoghonhaan iyoor ḍịghaagh pọ oḍighi ghan oomo ịpe yoor kotue bọ ọtuughaany eḍeenhaan phọ a Jizọs, ẹkar ẹkpaariom osooromhi aloor phọ ọdi. (Kọl. 2:6, 7) Esi ọmaam, Yoor úgon ghan dị abumor r’abumaranhi phọ koḍighi rạraar eten phọ yoor roḍighi ghan bọ, yoor ụkparagha ghan ghụn olhegheri ịyaar phọ eḍighi bọ kụ bịdi roḍighi bọ rạraar eten phọ ẹpe ạbidi. Yoor ụkparagha ghan kẹn olhegheri ịitughian r’iḍighinhom ạraraar ekpisi phọ ạbidi. Ịdipho yoor ọghiom bọ ghisigh ọtuughaany Jizọs, ịdipho kụ ẹdi yoor olhoghoma mọ ụzuph iyoor “okol ạmuum” oḍum ghan ạtorobo ekpisi dị ụsighe iyoor ọghi.—Ps. 1:2, 3.

Umaranhi phọ Ann-Catrin: Mem dị oruphuron oreeny ọzuph ẹnhon esi, oreeny phọ ramoghi ghan ni ogogo orue oḍum. A Jehova kụ “ogogo” phọ ruḍume ghan bọ iyoor. (Ps. 84:11) Ọdi ạkar kụ ụsephom iyoor bumor r’abumaranhi dị ụphomhoghian iyoor. Esi ọmaam, ookpomhoghan phọ ayoor ạrol bọ Tehran, ẹpe Iran, abumor r’abumaranhi phọ ụmhoogh ẹeghara abunhiin awe ạ Bạibul phọ ịdiphọ ọlhogh ghan awe otu r’ọko igoni. Ịkar kụ ịḅeraan iyoor ọrol ẹpe Iran, kụolo ụnwanyu a July 1980, usophoghom ni oḍighi phọ ayira kụ ụngo iyoor 48 ạwa ọḍua. Kụ ụsighe iyoor ọghi ẹpe Zaire (nyịidipho rokol ghan mọ Congo) ẹpe Africa.

Ẹḅel amem mọ mị ạnhaghan bọ mọ mụḅenhi iyoor ọghi Africa, mị umhoghi yogh ni. Loor esi dị mị ụnhaghan mọ ạrakaraph ạraraar r’ạreezegh emuza ẹpe phọ, kụ mị aghiilhaan. Kụolo oniin ọnyo umor r’ạnhir ọdi dị mokumuan ghan Africa esi ịbadi ạsia ụḅenhi iyoor mo: “Kékiilhaan, nyinha ke̋ghi ghan Africa! Ịki kụ ẹmhiin aani, nyinha kẹkelhom ni.” Kụ yoor ụghelhom ni! Abumor r’abumaranhi phọ ẹpe Africa ụkar kụ ughuraam iyoor r’ẹenyuum. Ọkar ọghaaph, odiiny ạsia reten, ịwa ni mọ yoor ụḅua Zaire loor esi dị usophoghom oḍighi phọ ayira ẹpe phọ, kụolo mị ụuḅereghi ni ạḅenhi a Jehova mọ, “Seseeny ni, yoor ụtol li ẹphen Africa.”

Eeghe ạḍiseph kịrokiro kụ ẹdi nyinha mẹmhoogh?

Umor phọ Mats: Loor oḍighi phọ ayoor, yoor mọmhoogh ịbadi ạrighiri dị oḍighi mịsọnạrị dị ọḍua rikpisi kịrokiro kụ oru. Ẹnhon pọ, yoor mọmhoogh ibo phọ rẹḍua ghan bọ keru esi ọtughemhi ịbadi awe Bạịbul phọ. Eeni amem ịyal phọ ayoor ụmhoogh ghan ni 20 awe dị yoor ọtughemhi ghan Bạịbul phọ! Mị kábulha ẹeghara ọko igoni r’ọlhogh awe otu abumor r’abumaranhi phọ ẹpe Africa ọmhoogh bọ. Mem dị yoor ọghi ophogh arookpomhoghan ẹpe Tanzania, yoor usul ghan ruutu abumor r’abumaranhi phọ moto phọ ayoor oghol bọ mọ Volkswagen Kombi yoor “ọmhinha” ghan bọ ẹpe olhoghi phọ. Bịdi uḍeenhaan ghan ni iyoor ẹphomhoghian ghạlhamo r’ịduon bidị oḍighi bọ ni “rukulhom.” (2 Kọr. 8:3) Ịmhoogh ni ịyaar dị ẹgbatanhaan dị yoor ọghelhom ghan mem mọ ạmuphe phọ dị yoor oghol mọ amem ạraghaaph. Mem dị ẹteeny mem mọ ạmuphe phọ, mị r’ạnhir phọ ạmhi Ann-Catrin kọtol ude kụ ọkaaph oomo ịpe aḍio phọ ẹghi bọ, ọḅilhe ọseph a Jehova loor ịduon ọdi ạrol bọ r’ayoor.

Umaranhi phọ Ann-Catrin: Ẹlo ạmhi mị ạmiin mọ eḍighi ḍiboom ạḍiseph olhegheri abumor r’abumaranhi arikpisi kịrokiro oomo ịsien aḅirinhi phọ. Yoor mọtuugha kẹn ịbadi ạrunhu—ịdipho Farsi, French, Luganda, rạ Swahili. Yoor mọtuugha kẹn imhoom ịdighinhom ạraraar. Yoor kẹn mọlhoghonhaan ḍịghaagh ịbadi awe oḍigh aani ịsien igey phọ, ọmoogh bugey ạrighiri dị r’ayoor rokumu rukumuan phọ a Jehova.—Zeph. 3:9.

Yoor ụmhiin ghan ni ịbadi ịma ạraraar dị a Jehova ạlhem. Kụ tọrobo amem dị ụsighe iyoor ọghimom ẹnhon ekpisi kụ yoor rọki ekpisi phọ, ịghigh ghan mụdi a Jehova kụ ụpham iyoor rạkimom kạḅilhe ụuḅaki iyoor. Ọdi mụtughemhi kẹn iyoor ịbadi ạraraar dị yoor mútue ni bịn ụtuugha ulegheri.

Ịghen kụ iniin ịpaanhaan dị nyinha esoman, kụ ika kụ ịdi nyinha erue bọ ekaran?

Umor phọ Mats: Yoor umheel ghan ni émoon ịbadi amem. Eeni amem ạnhir ạmhi amheel ghan ni émoon dị ẹwa mọ ạay. Yoor ụuḅaghamhian ghan ni loor ịlo ạburude r’aburunhiin phọ ayoor mọkpo bọ, kụolo yoor rọseph ni bụo eghun otu phọ ayoor ophogh ghan bọ bịdi pịdi yoor orue oḍighi oḍighi phọ ayoor. Bịdi uḍeenhaan ni ọkparam, ibo, r’ẹphomhoghian ịduon bịdi ropogh bọ bụrude r’aburunhiin phọ ayoor. (1 Tim. 5:4) Ghạlhamo r’ịduon yoor ọlhoghonhaan ghan bọ ni bịdi ḍịghaagh, eeni amem ịiḅaghamhi ghan ni iyoor ịduon yoor úlo bọ r’ạbidi.

Umaranhi phọ Ann-Catrin: Lhạ phọ 1983, mem dị yoor rokumuan ẹpe Zaire, mị ụmhoogh ni ẹzegh azu r’ạni. Kụ oyil arookonhom mọ ạḅenhi olom mọ ạmhi mọ, “Pạm nyọdi ạḍuanham sịen eelhe phọ ẹphen rodon phọ!” Kụ ḍio phọ ạḍiphe etum bọ sịphe, yoor uḍigh ni oghuugh ạnyu dị rạsaany ghan sidool—loor esi dị ọpo phọ bịn kụ ogina oghuugh ạnyu dị rạki Sweden.

Umor phọ Mats: Yoor umhoghi ni iboom, loor esi dị yoor ụutughian ghan mọ oḍighi ạ mịsọnạrị phọ ayoor masi eekunha. Dị ẹgbagh r’ịpe oyil arookonhom mọ ạghaaph bọ mọ kemite bo, ạnhir phọ ạmhi aḍum ni. Ạlha reten kụ yoor ọḅilhe oḅulha Zaire, kụolo egi phọ ẹphen phọ yoor ụghi ọbam ookpomhoghan dị rọḅa ghan ọnhu a Swahili ẹpe Lubumbashi.

Umaranhi phọ Ann-Catrin: Mem mọ yoor odi bọ Lubumbashi rokumuan, eghun dị mị asoph ịḍua ni. Ghạlhamo r’ịduon yoor úgbiighi bọ ọmhar ọbumoony, iphin ni agey mem mọ eghun phọ ẹḍua bọ. Kụolo a Jehova ụseph ni iyoor eten dị yoor úseere olhoghi mem mọ ạmuphe phọ. Yoor umhiigh ni ọtughemhi ịbadi awe Bạịbul phọ eten dị kẹ́rol ghan. Ị́man lhạ bịn ọnhu ạbukaaphom mọ oḍighi bọ 35 oru ọmhan 70, kụ awe dị omhiigh oru ịtuugha ọḍua 40 ọmhan 220. Oḍighi iphelhegbeel phọ ạkar kụ uḅogh iyoor, kụ a Jehova ạseph ni ikuph phọ yoor ọlhogh bọ, kụ ịphen phọ ịkar kụ ịngo ịmhi ịidereghi. Ghạlhamo r’ịduon phọ ni, eeni amem yoor rọotughian ghan ni ịlo ọbumoony phọ ayoor. Yoor rogon ni ọmhiin amem mọ a Jehova kạsighe bọ eephinha phọ yoor olhoghoma bọ sịphe Pạrạdạịs.

Umor phọ Mats: Eniin amem, aloor ạnhir ạmhi imhiigh ni odugh. Kụ eniin phọ amem mọ, mị aru ạmhoogh ẹzegh ạ kạnsạ dị emhoghi mọ ạay ịmhi. Kụolo ạnhir phọ ạmhi Ann-Catrin aḍighi ni ịpe ọdi katue bọ.

Yoor mọmhiin mọ ogina ayoor bịn kúsoman ịiḅaghamhi. Mem mọ ẹgham mọ ee bọ ẹpe Rwanda lhạ phọ 1994 esi bọ eekunha, yoor ụghi ni oophoghogh ịbadi abumor r’abumaranhi ẹpe bịdi ạaghian bọ loor ẹgham mọ. Mem mọ yoor ọmhiin bọ ẹeghara ọkparam mọ, omheeraam mọ, ọko igoni phọ, r’oghuraam awe phọ bịdi ọmhoogh bọ, ịitughianham ni iyoor mọ a Jehova ạmoogh ni ịikpo ọlhoghonhaan awe phọ ọdi ḍịghaagh ọkparam ạtorobo ịiḅaghamhi.—Ps. 55:22.

Umaranhi phọ Ann-Catrin: Yoor usoman ni ịiḅaghamhi mem dị yoor ọghi aani mem mọ rọḅogh bọ kọngo ọla ạgada phọ Uganda lhạ phọ 2007. R’ọmhan, kụ mị, olom ạmhi, rạ 25 ạbunhon ạsịmịsọnạrị r’ạbuo ạ Bẹtẹl oḍigh moto rọki Nairobi, ẹpe Kenya. Mem dị yoor mọrol ropogh Kenya bịn ọodoony amoto aghiil li bịn aru aḍigh ẹphen amoto phọ ayoor rakiil bọ bịn ụzam iyool. Ọpo aghiilhom bọ ḅịlhe r’oogh abumor r’abumaranhi umhugh ni mem mem mọ, kụ ẹsighe rẹki bịn ọnhon ọnyo umaranhi amhugh ẹpe otu arookonhom mọ. Kụ yoor rogon ni ọmhiin ạbidi sịphe omhoom aḅirinhi phọ!—Job 14:13-15.

Eekuna phọ ariisi phọ mị aḍighima bọ igheel li. Kụolo mị, olom mọ ạmhi, ḅịlhe r’ạbunhon abumor r’abumaranhi ọkiom ni ghisigh rọotughian ghan ịpe emite bọ loor unmam mọ. Ẹlo ạmhi, ogbo aḍughul kụ mị akperenhom ạsuma kụ oḅio ạmhi amiigh okaph, kụ ịkparanhaan ịmhi ophooghu. Ịphen phọ iḍighi ghan ịdi yoor ọmhoogh ghan oghiilhaan. Kụolo ogbor ghan ọoḅereghi r’ạal ghan ariisi ạ Bạịbul dị ẹkar ịḅeraan iyoor ịlhoghonhaan ni iyoor ḍịghaagh okaran. Yoor ụghi ni ọteeny oyil arookonhom dị ạmhaar ookonhom ịlo ịiḅaghamhi phọ ịphen phọ, kụ ịkar kụ ịlhoghonhaan iyoor ḍịghaagh. Nyịidipho ịiḅaghamhi phọ ịpe phọ mephoorom, kụ yoor rọlom ni dị a Jehova kụlhoghonhaan iyoor ḍịghaagh ọodereghi ạbunhon dị osoman aani iniin phọ ịiḅaghamhi phọ.

Mem mọ nyinha rẹkaaph bọ ịpe nyinha erue bọ ekaran ịpaanhaan phọ nyinha esoman bọ, nyinha ịḅem mọ a Jehova ịpham inyinha ịdiphọ “eghelhe ạkenegh.” Nyinha ịtu eeghe kụ ẹḅem bọ ịduon phọ?

Umor phọ Mats: Awe a Swahili rọḅem ghan mọ “Tumebebwa kama mayai mabichi,” kụ ịphen phọ rẹma ghan mọ “Ụpham iyoor dẹghedeghe ịdipho eghelhe ạkenegh.” Ịdiphọ oye ramiigha ghan bọ loor kạpham reghelhe ạsikenegh ọbo keḅomoghian ghan bọ, ịdipho kụ ịdi a Jehova amhiigha loor ụpham iyoor dẹghedeghe ạḅilhe ụbaki iyoor sịen oḍighi phọ ayoor. Tọrobo ịyaar dị yoor omhoghi kụ ẹdi yoor ọmhoogh ghan, kụ yoor ụmhoogh ghan kẹn ịdi epu ịpe yoor ọwa bọ. Eniin eten dị a Jehova uḍeenhaan iyoor ẹphomhoghian pọ eten phọ Aloor Phọ Repogh Bọ ruphogh bọ iyoor.

Umaranhi phọ Ann-Catrin: Mị ụma eniin eḍeenhaan dị a Jehova ụbaki iyoor. Ḍiniin aḍio ụmhagh ni ịmhi mọ ọde ạmhi ómhoon dị úmoon kụ odi otu arookonhom. Mem mọ ạmuphe phọ pụruku osipheeny rạḍua loor olom ạmhi. Kụ yoor ụ́moogh ikpoki ọkpe ọghi a Sweden, esi ịduon phọ, yoor osopha aal amoto ayoor. Kụolo olom r’ạnhir dị ọnhaghan ịphen emite bọ, ụmhagh ni iyoor fon kụ ọḅem mọ bụno kọkpe ikpoki oniin ọnyo ayoor. Ọnhon ọnyo umaranhi dị ạsia mẹghi ụmhagh ni iyoor fon kụ ụngo iyoor ikpoki dị ọdi aseerian esi dị ọdi ạge mọ “Ịlo oye dị amhoghi ọlhoghonhaan ạḍighaagh.” Ịphen kụ ịdi a Jehova ạsighe umor r’abumaranhi phọ ạbuen phọ ụlhoghonhaan iyoor ḍịghaagh!—Hib. 13:6.

Eeghe kụ ẹdi nyinha mẹtuugha sịen 50 ạsia phọ nyinha mẹrol bọ rukumuan oomo amem mọ?

Umaranhi phọ Ann-Catrin: Mị maru ạmiin mọ yoor kọmoogh ịnyaam esi “ophoomhị ghan aloor kụ oḍeenhaan oḍuomolhoghi.” Mem dị yira oḍuom olhoghi a Jehova, ọdi kụ k’eenhaan iyira ẹgham mọ. (Isa. 30:15; 2 Chron. 20:15, 17) Loor ịduon yoor oḍighi bọ ni oomo ịpe yoor kotue bọ sịen arukumuan phọ a Jehova tọrobo ekpisi dị ụsighe iyoor ọghimom, a Jehova mụngo iyoor ḍịseph dị yoor mútue ni bịn ụ́moogh ẹnhon esi.

Umor phọ Mats: Ẹkpanha ịyaar dị mị ạtuugha pọ ọbeḍenhom ghan a Jehova esi ạtorobo ạdol dị mị asoman kụ ogon ọmhiin ịpe ọdi kụlhoghonhaan bọ ịmhi ḍịghaagh. (Ps. 37:5) R’amem ọdi kọ́wilhe ọlhoghonhaan ghan ạmhi ḍịghaagh ịdipho ọdi aguanhaan bọ. Kụ yoor rọmiin ni ịphen phọ sịen oḍighi ạ Bẹtẹl phọ yoor odi bọ ẹphen Myanmar.

Yoor oḍuom ni olhoghi mọ ịḍoogh phọ ạbuphe rọwa bọ ọbughe arukumuan phọ ạbidi kọmiin aani ni ẹphomhoghian ọḅar phọ a Jehova muḍeenhaan bọ iyoor. Yoor okuphom ni owol mọ bịdi kọmiin ni eḍighi mạar dị bịdi omheera ni dị a Jehova kạloghonhaan bịdi ḍịghaagh oḍum ạtorobo esi dị ọzuph bịdi.