Watchtower ONLINE LIBRARY
Watchtower
ONLINE LIBRARY
Abua
  • BIBLE
  • PUBLICATIONS
  • MEETINGS
  • w25 June opoḍi 26-31
  • Araraạr Dị Yoor Otuughạ Ḍighaạgh Ogbogh Otughemhiạ Phọ

No video available for this selection.

Sorry, there was an error loading the video.

  • Araraạr Dị Yoor Otuughạ Ḍighaạgh Ogbogh Otughemhiạ Phọ
  • Otu Okoriom Dị Ragbeelhom Omhạr Phọ Azihova (Ituughạ)—2025
  • Subheadings
  • Similar Material
  • EḌEENHAAN ODẸ R’ONHIIN AMHỊ
  • EḄẸL AMEM DỊ MỊ AANEMẠ RUKUMUAN OOMO AMEM
  • AGHUḌUM MỌ AYOOR IDIPHỌ ASIMISONARỊ
  • YOOR URỌL EUROPE KỤ OḄUẠ OGHỊ AFRICA
  • YOOR UGHỊ EPẸ AREELHE PHỌ ERUMUḌIO PHỌ REḄUẠ GHAN BỌ KEMITE
  • YOOR UḄILHẸ OḄULA AFRICA
  • Aḍisẹph Phọ AZihova Epel Ipẹ Mị Aatughiạn Bọ
    Otu Okoriom Dị Ragbeelhom Omhạr Phọ Azihova (Ituughạ)—2019
  • AZihova ‘Maḍighi Idị Areten Phọ Amhị Mesel’
    Otu Okoriom Dị Ragbeelhom Omhạr Phọ Azihova (Ituughạ)—2021
  • Ibo Dị Olhoghi U/seere Ḅilhẹ R’araraạr Ituughạ Dị Okumu AZihova Amiteom
    Otu Okoriom Dị Ragbeelhom Omhạr Phọ Azihova (Ituughạ)—2023
  • Aghuḍum Ogbaanyạn R’oḅaạl Olhoghi Siẹn Arukumuan Phọ AZihova
    Otu Okoriom Dị Ragbeelhom Omhạr Phọ Azihova (Ituughạ)—2024
Otu Okoriom Dị Ragbeelhom Omhạr Phọ Azihova (Ituughạ)—2025
w25 June opoḍi 26-31
Franco Dagostini.

IPHIRIGBA AGHUḌUM OYE

Araraạr Dị Yoor Otuughạ Ḍighaạgh Ogbogh Otughemhiạ Phọ

FRANCO DAGOSTINI KỤ AGHAẠPH

ANHỊR amhị r’amhị usoman ni iboom ipaanhaạn mem mọ yoor oḍighi bọ bukọy eten oomo amem r’amisonarị. Esi omaạm, yoor uzuan ghan ni weye eghạm dị omhereghạ eten, buọ igiri e/meera dị osuughị raraạr oḍue eten phọ. Yoor ughiil ghan kẹn osuma eeni amem loor araaghạm. Ghalhamọ r’iduọn phọ ni, yoor u/bilhẹ osopha phọ ayoor! Siẹn oomo aghuḍum mọ ayoor, aZihova mubakị ni iyoor aḅilhẹ usẹph iyoor. Idiphọ Ogbogh Otughemhiạ, odị mutughemhị ni iyoor ibadị araraạr.—Job 36:22; Isa. 30:20.

EḌEENHAAN ODẸ R’ONHIIN AMHỊ

Rekị oteẹny eekunha alhạ phọ 1950, odẹ r’onhiin ayoor usopha ni mọ yoor koḅuạ eelhe phọ ayoor Italy okeel Kindersley, epẹ Saskatchewan, Canada. Yoor osi bọ i/bia bịn bidị otuughạ igey phọ, kụ igey phọ imhạn agey maạr esi ayoor. Mị aatughiạn ni dị eghoroghọr amhị mị adạph ghan eghunotu phọ ayoor amite epẹ erugh phọ kụ arọl eminighạn amem dị tutụ mị ramaarọm ghan ni inhụ eeni amem koḅẹm mọ “mị ukọy eten opọ ekulha amem mọ” mem dị mị amhạn ophaanyạ asiạ!

AFranco r’odẹ r’onhiin odị, ḅilhẹ umor r’abumaranhi phọ odị.

Eghunotu ayoor, eeni lhạ phọ 1966

Odẹ r’onhiin amhị u/kạr umoọgh ikpoki, ghalhamọ r’iduọn phọ ni bidị uphighi ni imạ eḍeenhaan esi ophinyọn ghan arikiạ orue okumu aZihova. Esi omạam, lhạ phọ 1963 bidị aalhaghi ni ibadị araraạr abidị orue omhoọgh ikpoki oghimọm ogbogh ookpomhoghan eephugh dị ophạm Pasadena, epẹ California, U.S.A. Kụ lhạ phọ 1972 yoor ughị ni epẹ Trail, British Columbia, Canada, ekpisi dị emhạn ni 20 itobi oghaạph iiḅi iinhaghạn phọ oḅenhị aweye Italy dị odi epẹ phọ. Odẹ ayoor aḅeerogh ghan riisi. Odị aghel li iiḍighi dị mingọ nyodị iboom ikpoki pidị odị agbon rukumuan phọ odị rangọ bọ aZihova.

Mị akạr kụ rasẹph odẹ r’onhiin phọ ayoor loor imạ eḍeenhaan phọ bidị uphighinhaan bọ inya phọ ayoor. Eḍeenhaan phọ abidị kụ emhiighom itughemhị phọ mị amhoọgh bọ ḍighaạgh aZihova, loor esi dị mị matuughạ mọ mị asighẹ Omhạr phọ aḍighi eḅẹl iyaạr siẹn aghuḍum mọ amhị, aZihova kuphogh ni imhị.—Mat. 6:33.

EḄẸL AMEM DỊ MỊ AANEMẠ RUKUMUAN OOMO AMEM

Lhạ phọ 1980, kụ edị imạ onyọ umaranhi dị oghol mọ Debbie r’amhị aalhạn. Odị onyọ umaranhi dị agbon okumu aZihova, esi iduọn phọ yoor usopha oḍigh arukumuan oomo amem mọ. Iraạr unwanyụ reten bịn aDebbie amhiigh okọy eten oomo amem. Kụ alhạ reten, yoor oghị obạm ookpomhoghan dị omhoghi bukaaphọm, kụ mị amhiigh aani okọy eten oomo amem mọ.

AFranco r’aDebbie ḍio apinien phọ abidị.

Ḍio apinien phọ ayoor, lhạ phọ 1980

Esighẹ rekị bịn yoor oḅonyonhu ozuan kụ yoor owạ oḅuạ ekpisi phọ. Yoor uphụr ri oḅaanhaan opoghom eghir phọ. Kụ r’ephomhoghiạn, odị aghị ni onyen uḅenhị iyoor mọ: “Nyinha eḍighom aani ni iiḅaghamhị phọ, nyinha regbon ghan ipaanhaạn phọ nyinha esoman bọ bịn. Nyinha emhiigha loor ephogh nyinha kemiịn ni imạ dị eḍuạ remite.” Yoor ukạr kụ omoghi oroma phọ opọ phọ. (Ps. 141:5) Egina amem bịn yoor oḍighinhom oromha phọ kụ omhiịn mọ imạ araraạr ogbon edi ni. Ibadị siphẹ ookpomhoghan phọ uwạ ni obughẹ arukumuan phọ bidị rongọ bọ aZihova, emhiigh iḍoọgh kụ esi bulọ ophin obobọ aạl we dị u/lo siẹn igey phọ. Yoor utuughạ ni iyaạr esi iphẹn phọ. Yoor utuughạ ogbon ghan imạ phọ eḅuạ bọ remite kụ oḍuom olhoghi mọ aZihova kulhoghonhaạn ni iyoor ḍighaạgh okaran ipaanhaạn dị yoor osoman. (Mic. 7:7) Yoor uḅilhẹ ni omhoọgh ibo phọ ayoor kụ araraạr eḅilhẹ emhiigh oghị imạ.

Abumor phọ utughemhị bọ iyoor siphẹ oḅẹl askul abukọy eten phọ yoor oghị bọ, mokumuan ghan ni inhọn areelhe. Iduọn bidị uḍeenhaan bọ iyoor sifoto kụ oḅilhẹ oghaạph ghan ipaanhaạn dị bidị osoman r’aḍisẹph kirokirọ dị bidị momhoọgh, iisạ ni eephuạ phọ ayoor kụ yoor osopha oḍighi aani asimisonarị.

Esi dị rosul ghan simoto Kindọm Họl dị moḅoorogh ibikpo dị eghạr.

Mem dị mị odi oniin aKindọm Họl epẹ British Columbia, lhạ phọ 1983

Orue oteẹny aḍiigbu phọ aḍiphẹ phọ, lhạ phọ 1984 yoor uḅuạ ni oghị ookpomhoghan dị roḅạ ghan French epẹ Quebec. Oḅuạ aBritish Columbia osi Quebec emạn ni 2,485 itobi. Iphẹn mọ remạ ghan mọ yoor kotuughạ omhoom onhụ r’emhoom eḍighinhom iyaạr. Ipaanhaạn dị yoor oḅilhẹ osoman pọ ekulhom. Eniin amem, yoor ughị ni osọn ikenhekụ ozo apitiipị. ADebbie amhoọgh ni kirokirọ imạ areten dị odị asạ ghan apitiipị phọ! Etigheri ipaanhaạn phọ iphẹn phọ, r’ibo yoor ukparạm ni oghiọm ghisigh. Idị epelhom pạ, yoor umhiịn mọ aZihova akạr kụ ruphogh iyoor.—Ps. 64:10.

Ḍinhiin aḍio, umhạgh ni iyoor ḍimhạgh afon dị olhoghi yoor u/seere, mọ mumhạgh iyoor oghị okumuan epẹ Betẹl aCanada. Epẹ omhạn yoor ugẹ oghị askul aGilead, esi iduọn phọ yoor u/kạr ulegheri ilọ oḍighi. Kuolọ yoor ughị ni, kụ mem mọ yoor osi bọ, yoor upuru ni Umor phọ Kenneth Little, oniin odị rapogh aani ghan olạ agadạ phọ mọ, “Siẹn phọ kụ umhạgh iyoor oghị aGilead phọ yoor koḍighi ika?” Kụ odị aḅẹm mọ, “eteẹny mem mọ amuphẹ phọ, kolegheri ni ilọ oḍighi.”

Awiki roten, bịn umhạgh iyoor oghị askul aGilead phọ. Imhoghi ni mọ yoor osopha mughumọ yoor kokị ni obobọ kotọl siẹn aBetẹl phọ. Umor phọ Little uḅenhị iyoor mọ: “Torobọ osopha dị nyinha esopha, ḍiniin aḍio nyinha keetughiạn ghan ni mọ idị nyinha misighẹ ophoriphọ. Aparikị dị u/nighẹ o/lho; aḍisẹph aZihova edi ni torobọ agạ.” Yoor usopha oghị askul aGilead phọ, kụ k’arodon yoor omiịn ni mọ ipẹ odị aghaạph bọ inẹ ni. Ibadị amem yoor rosighẹ aani ghan ni oromha phọ odị koḅenhị aani bunhọn dị ewạ aani mọ osaḅạr esi iyạl iiḍighi dị ongọ bidị.

AGHUḌUM MỌ AYOOR IDIPHỌ ASIMISONARỊ

(Ekeeny) Ulysses Glass

(Elhiom) Jack Redford

Olhoghi ayoor aḅaạl li orolhọm aani igbo 24 awe phọ orọl bọ askul aGilead phọ amhunhenhiom bọ 83, ophạm bọ epẹ Brooklyn, New York, unwanyụ April 1987. Abumor phọ Ulysses Glass r’aJack Redford kụ uḍiemhiom otughemhị ayoor siphẹ ekụ phọ. Oogh unwanyụ reten, kụ yoor omhạn askul phọ unwanyụ aSeptember 6, 1987. Usighẹ iyoor r’aJohn r’aMarie Goode oghimọm epẹ Haiti

AFranco r’aDebbie omeerạ ogbạl esiḍia ḍio dị bidị omite epẹ erugh phọ epẹ Haiti.

Mem dị mị odi Haiti, lhạ phọ 1988

Ko/sighẹ mun simisonarị oghimọm Haiti egbi k’amem mọ ewạ bọ dị abuḅẹl asimisonarị phọ orọl bọ eelhe phọ koḍuạ. Yoor romhạn askul phọ, iraạr awiki reten bịn yoor oghị obạm ookpomhoghan epẹ Haiti dị 35 abukaaphọm kụ odi, ekpisi araaḅarạph. Olhegheri iyaạr ayoor k”obụgh, kụ oginha ayoor kụ asimisonarị dị odi epẹ phọ. Awe ekpisi phọ igbogh arukulhom, kụ ibadị abidị u/maạr aạl iyaạr. Eḅẹl amem mọ yoor omhiigh bọ oḍighi phọ ayoor, yoor usoman ni ipaanhaạn. Esi omaạm, yoor uzuanhaan ghan ni buọ igiri e/meera dị osuughị raraạr oḍue eten phọ, ogbagarạ oghim, raaghạm, ḅilhẹ r’amem dị awe owạ ghan ogboton agadạ otooghiạ phọ.

Yoor utuughạ ni ibadị araraạr esi abumor r’abumaranhi phọ u/dugh bọ. Adọl phọ ikparanhaạn ni ibadị kuolọ bidị uphomhoghiạn ni aZihova r’arukumuan epẹ erugh phọ. Imhoọgh ni oniin onyọ umaranhi dị asiạ meghị dị u/maạr aạl iyaạr, kuolọ odị alhegheri ni 150 ariisi aBaibul dị katue ni akaạph dị esi u/pogh. Araraạr phọ emite ghan bọ torobọ aḍio ikparamhị ni iyoor oghiọm aghisigh oghaạph adom Omhạr phọ, loor esi dị opọ bịn kụ oḍuom olhoghi omhạr awe. Reḅaạl ghan ni olhoghi ayoor omhiịn dị abunhiin abudị yoor otughemhị ghan moḍighi bukọy eten oomo amem, bukọy eten dị ogbatanhaạn ḅilhẹ r’ikumor awe ookpomhoghan.

Mem mọ yoor orọl bọ Haiti, yoor uzuan ni oḍoọgh oọny dị oghol mọ Trevor, dị aḍighi ogbogh onyọ asiosị. Yoor ughaaphạn ni nyodị ilọ aBaibul phọ eeni amem. Asiạ reten, odị ugẹ ni imhị ḍinyạ dị olhoghi mị u/seere. Odị agẹ mọ: “Mị raḍiiny muụm ookpomhoghan eghir phọ ratu bọ! Mị rawạ oḅulha epẹ Haiti kụ okumu idiphọ okọy eten dị agbatanhaạn, okạr ekool phọ epẹ mị arọl ghan bọ aghị siosị phọ.” Odị r’anhịr odị ukạr ri oḍighi iphẹn phọ esi ibadị asiạ.

YOOR URỌL EUROPE KỤ OḄUẠ OGHỊ AFRICA

AFranco odị ofịs odị raḍighi ghan oḍighi.

Mem dị mị odi Slovenia rakumuan, 1994

Uḅenhị ni iyoor oghị okumuan apakirị Europe, ekpisi dị purukụ oḅilhẹ omhiigh oḍighi phọ ayira. Lhạ phọ 1992 yoor usi ni Ljubljana, Slovenia, etuman bọ epẹ ookonhom bọ odẹ r’onhiin amhị kụ bidị ogbi bọ oghị Italy. Okiọm ni ghisigh robe raaghạm rikpisi phọ oghol ghan bọ mọ Yugoslavia. Ilạ agadạ phọ erọl bọ Vienna, Austria, ḅilhẹ r’arifịs phọ edi bọ Zagreb, Croatia, r’aBelgrade, Serbia, kụ uphogh ghan rukumuan ekool phọ epẹ phọ. Nyiidiphọ torobọ eelhe komoọgh Betẹl olọ abidị.

Iphẹn phọ remạ ghan mọ yoor komiigh oḅilhẹ otuughạ omhoom onhụ r’eḍighinhom iyaạr. Awe ekpisi phọ uḅẹm ghan mọ, “Jezik je težek,” kụ remạ ghan mọ “Onhụ phọ akpạr ri oo.” Kụ akạr ri akpạr! Ipẹ abumor r’abumaranhi phọ odaphạn ghan bọ raraạr dị ookpomhoghan phọ ooḅenhion ikạr kụ iḅeraạn iyoor. Yoor umhiịn ni ipẹ aZihova asẹph bọ bidị loor iphẹn phọ. Yoor uḅilhẹ kẹn omhiịn idị aZihova raaḅenhion ghan raraạr mem mọ opọ ekpeanhaạn bọ. Adọl phọ ayoor epẹ Slovenia ikparamhị raraạr dị yoor motuughạ kụ eḅilhẹ itughemhị iyoor imhoom araraạr.

Kuolọ onhọn onmia arọl li. Lhạ phọ 2000 usighẹ ni iyoor oghimọm Côte d’Ivoire, epẹ West Africa. Kụ unwanyụ aNovember 2002, loor eghạm yoor uḅuạ ni oghị Sierra Leone. Kụ epẹ Sierra Leone phọ purukụ omhạn eghạm dị emạn 11 asiạ. Ikpạr ri oḅuạ aCôte d’Ivoire r’eephirighan. Toroboiperolbọ, araraạr phọ yoor motuughạ bọ ilhoghonhaạn ni iyoor ḍighaạgh ophamhanhạm ibo phọ ayoor.

Yoor ugbon we phọ owạ bọ onhaghạn igey phọ ḅilhẹ r’ipẹ abumor r’abumaranhi phọ ruḍeenhaan bọ iyoor ephomhoghiạn, mokparạm bọ eghạm mọ ibadị asiạ. Bidị umheel li ekulhom, kuolọ bidị udi ghan ni ilọ bidị omhoọgh ongọ aani bunhọn. Oniin umaranhi angọ ni Debbie rusuoma. Kụ aDebbie aakpukiạn ni osighẹ arusuoma phọ, kuolọ umaranhi phọ o/mheera kụ aḅẹm mọ: “Mem eghạm mọ, abumor phọ ulhoghonhaạn ni iyoor ḍighaạgh, nyiidiphọ, amem ayoor olhoghonhaạn aani ni aḍighaạgh bunhọn.” Yoor usopha otuughaạny eḍeenhaan phọ abidị.

Ekureriom mọ, yoor uḅulha ni epẹ Côte d’Ivoire, kuolọ araghaạph imhirighan itooghị phọ iḅilhẹ ni ekọm iiḅaghamhị epẹ phọ. Esi iduọn phọ, unwanyụ aNovember 2004, oghuugh anyụ usaạny ni iyoor aḅuanhạm. Iyạl phọ ayoor uphạm iyạl arukuru bịn kụ oḅuanhạm bọ. Yoor umhinhạ oopho ude ḍughul esi dị awe eghạm aFrance orọl, kụ ḍieriphọ aḍio phọ usaạny iyoor oghimọm Switzerland. Mem mọ yoor osi bọ olạ agadạ phọ rekị eteẹny ogbo aḍughul, kụ ekụ phọ ropogh bọ Olạ Agadạ phọ, r’abuphẹ rotughemhị bọ askul phọ oghol bọ mọ Ministerial Training School r’anmariịr abidị usighẹ ni iyoor r’eenyuụm, uḅol iyoor, ungọ iyoor egholhoghọl eḍien, oḅilhẹ ungọ iyoor riiḍien emhạ abidị. Iphẹn phọ ikạr kụ itir iyoor.

AFranco rangọ ghan oghaạph Kindọm Họl epẹ Côte d’Ivoire.

AFranco raḅaanhaạn ghan we dị oḅuạ ekpisi abidị loor iiḅaghamhị epẹ Côte d’Ivoire, lhạ phọ 2005

Usighẹ ni iyoor oghị Ghana ekulha amem, kụ yoor oḅilhẹ oḅula Côte d’Ivoire mem dị eghạm mọ mephọ. Imạ eten phọ abumor phọ uzoọm bọ iyoor ilhoghonhaạn iyoor ḍighaạgh okaran amem mọ ewạ bọ mọ yoor oghiil oḅuạ phọ ḅilhẹ r’arikpisi phọ usighẹ bọ iyoor oghimọm ekulha amem mọ. ADebbie r’amhị usopha mọ yoor ko/peghom ephegh ephomhoghiạn phọ abumor phọ uḍeenhaan bọ iyoor. Ii iiḅaghamhị phọ yoor osoman bọ mem mọ amuphẹ phọ bịn itughemhị ni iyoor iyaạr.

YOOR UGHỊ EPẸ AREELHE PHỌ ERUMUḌIO PHỌ REḄUẠ GHAN BỌ KEMITE

AFranco r’aDebbie odi esi dị bidị oghị omhiịn otu iḍiodi dị ophiemhi epẹ Middle East.

Mem mọ yoor odi bọ epẹ Middle East, lhạ phọ 2007

Emhụ agadạ phọ ugẹ ni iyoor ḍinyạ lhạ phọ 2006 kụ uḅenhị iyoor ilọ emhoom ekpisi dị yoor kokị omiigh oḍighi, reelhe dị edi epẹ erumuḍio phọ reḅuạ ghan bọ kemite. Ephẹn phọ yoor kosoman kẹn ipaanhaạn, otuughạ omhoom onhụ r’emhoom eḍighinhom iyaạr. Iwạ ni otuughạ ibadị araraạr loor imirighan itooghị phọ erọl bọ r’eten iiḅereghị phọ abidị. Arookpomhoghan phọ yoor oghị ghan bọ umhoọgh ni ibadị arunhụ, kuolọ iphẹn phọ i/kọm maḍia igbo phọ abidị loor iduọn bidị odạph ghan bọ iiḅakiọm ookpomhoghan phọ, kụ iphẹn phọ iḅeraạn ni iyoor iboom. Abumor phọ ukạr kụ uḅeraạn iyoor loor iduọn bidị okparaghạm bọ isophoghom ḍighaạgh eghunotu abidị, buphẹ r’abidị rokị ghan bọ askul, buphẹ r’abidị roḍighi ghan bọ oḍighi, r’abumatuman phọ abidị.

Lhạ phọ 2012, Yoor ughị aani ni ookpomhoghan eephugh dị agbatanhaạn dị ophạm epẹ Tel Aviv, Israel. Iphẹn kụ eḅẹl amem dị ophạm ogbogh ookpomhoghan eephugh dị awe ogbogh iduọn egbi k’amem mọ ophạm bọ Pentecost 33 C.E. Yoor ko/bulha ni bịn ookpomhoghan eephugh phọ ephẹn phọ!

Siạ phọ ipẹ phọ, urom ni iyoor oghị ophogh eniin eelhe dị osophoghom oḍighi phọ ayira. Yoor uphạm rinyạ ookpomhoghan phọ kụ odiighi we mem dị yoor omite epẹ erugh phọ, yoor oḅilhẹ ophạm ibạm arookpomhoghan eghir. Awe eghạm dị ophạm iboom areenemạ umhereghạ ni riisi kirokirọ siphẹ areten phọ, kuolọ oḅio ayoor o/kaph loor esi dị iyạl ikpo abumor r’abumaranhi phọ udạph bọ iyoor urelhe ghan r’osụ olhoghi.

YOOR UḄILHẸ OḄULA AFRICA

AFranco ragẹ ghan iyaạr olhoghi akomputa odị.

AFranco raakolhobian oghaạph epẹ Congo, lhạ phọ 2014

Lhạ phọ 2013, usighẹ ni iyoor oghimọm enhọn eelhe orọl okumuan, epẹ olạ agadạ phọ aCongo, epẹ Kinshasa. Eelhe phọ aCongo egbogh eelhe dị Enhaạn esephọm imạ araraạr, kuolọ ekulhom r’araaghạm kụ edi. Eḅẹl amem mọ uḅenhị bọ iyoor oghị, yoor uḅẹm mọ, “Yoor moghị ghan ni Africa, kụ yoor onyạ ni oḅilhẹ oghị.” Kuolọ yoor oḅilhẹ ni omoọgh iboom araraạr otuughạ. Esi omaạm iniin arikpisi k”ekạr eghughuronhu ḅilhẹ igey areten i/lo. Ghalhamọ r’iduọn phọ ni, yoor umhoọgh ni inhọn igey araraạr dị yoor ogbon. Esi omaạm, yoor ugbon ni emạ eḍeenhaan okparạm mọ r’ibo phọ abumor r’abumaranhi phọ omhoọgh bọ etigheri ḍikparamhinheẹn adọl phọ bidị osoman bọ. Yoor ugbon kẹn ephomhoghiạn phọ bidị omhoọgh bọ oghị esi oḍighi iphelhegbeel phọ, ḅilhẹ r’ikuph phọ bidị rolọgh ghan bọ oghị ituughạ r’ookpomhoghan eghir. Yoor ukạr kụ omhiịn r’ariḍien ayoor dị awe dị ronaghạn igey phọ robụgh ghan bịn loor aḍisẹph phọ r’obakị phọ aZihova. Asiạ phọ yoor orọl bọ Congo rukumuan oomo amem mọ itughemhị ni iyoor iboom araraạr kụ yoor moḅilhẹ omoọgh buboom arighirị dị oḍighi idiphọ eghunotu ayoor.

AFranco odi epẹ erugh phọ, kụ odị r’abunhọn abumor r’abumaranhi otelhe rokị eniin emhạ.

Yoor odi oghaạph iiḅi iinhaghạn phọ epẹ South Africa, lhạ phọ 2023

Uḅilhẹ ni ungọ iyoor onhọn oḍighi epẹ South Africa, eekunha alhạ 2017. Olạ agadạ aSouth Africa kụ ogbogh olạ agadạ dị yoor morọl ghan okumuan, kụ oḍighi phọ ungọ bọ iyoor kẹn bịn aḍighi ni omhoom oḍighi. Siẹn phọ kẹn ni bịn yoor umhoọgh ni imhoom araraạr otuughạ, kuolọ araraạr phọ yoor motuughạ bọ epẹ omhạn ilhoghonhaạn ni iyoor ḍighaạgh orue odaphạn. Yoor ukạr kụ ophomhoghiạn ibadị abumor r’abumaranhi dị mokparaghạm ni raraạr kirokirọ esi ibadị asiạ. Ekạr kụ eḍighi iyaạr aḍiḅeraạn omhiịn dị ephomhoghiạn r’amuḅọph edi siphẹ eghunotu aBetẹl phọ, ghalhamọ r’iduọn bidị oḍuạ bọ reelhe kirokirọ kụ oru. Yoor ukạr kụ omhiịn dị aZihova asephọm eephọ we phọ odị loor iduọn bidị okpolhoghiạn bọ imhoom aroozọ phọ kụ oḅilhẹ rosighẹ koḍighinhom sinhị iilhogh aBaibul phọ.

K’amem mọ yoor omhiigh bọ k’arodon, aDebbie r’amhị momhoọgh ni rukumuan dị ingọ iyoor oḅaạl olhoghi, yoor oḅilhẹ otuughạ imhoom asidọl, imhoom eḍighinhom araraạr r’imhoom arunhụ. I/kạr ghan idugh, kuolọ mem mem mem yoor ulhoghoma ghan ni ephomhoghiạn oḅạr phọ aZihova dị eego esi ookpomhoghan phọ r’abumor r’abumaranhi phọ. (Ps. 144:2) Yoor omeeraam ni mọ araraạr phọ yoor motuughạ bọ siẹn arukumuan oomo amem mọ meḍighi idị yoor moḍighi bugey areḅenhẹ aZihova.

Mị akạr kụ rasereghiạn eten phọ odẹ r’onhiin phọ amhị uukonhom bọ imhị. Mị asereghiạn kẹn eten phọ ooḅi anhịr phọ amhị ubakị bọ imhị ḅilhẹ imạ areḍeenhaan abumor r’abumaranhi phọ. Idiphọ asiạ phọ rekị bọ, yoor okạr kụ osopha oghiọm aghisigh otuughạ araraạr kirokirọ ḍighaạgh Ogbogh Otomoghiom mọ ayira.

    Abua Publications (2001-2025)
    Log Out
    Log In
    • Abua
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share