Aghuḍum Ogbaanyạn R’oḅaạl Olhoghi Siẹn Arukumuan Phọ AZihova

IDỊ ARARAẠR ERỌL SIPHẸ EGHUNOTU PHỌ AYOOR

Umhạr imhị lhạ phọ 1934. Odẹ r’onhiin amhị abuọ aSwitzerland kụ oru orugh Timmins, emhạ dị edi Ontario, Canada. Lhạ phọ 1939 kụ edị onhiin amhị amhiigh aạl ghan aWatchtower kụ aḅilhẹ amhiigh oghị aani ghan ituughạ Abugbaanhaạn AZihova. Odị uphạm ghan imhị r’odiiny abumor r’abumaranhi amhị aghimọm aani ghan ituughạ phọ. I/bia iboom bịn odị aḍighi oniin onyọ Ogbaanhaạn AZihova.

Osopha phọ odị oḍighi onyọ Ogbaanhaạn o/ḅeraạn odẹ phọ ayoor. Kuolọ, onhiin phọ ayoor aphomhoghiạn igey phọ kụ aḅilhẹ asopha oḅạr aZihova. Odị aghiọm ni ghisigh aḅạr aZihova ghalhamọ r’amem mọ osophoghom bọ oḍighi Abugbaanhaạn AZihova epẹ Canada igbo alhạ phọ 1940 kụ esi 1945. Ghalhamọ r’iduọn Odẹ phọ ayoor aatuuny ghan bọ onhiin phọ ayoor, odị aghiọm ni ghisigh alhọgh ghan odẹ phọ ayoor eegu aḅilhẹ azoọm ghan nyodị emạ eten. Emạ eḍeenhaan phọ odị ilhoghonhaạn imhị r’abumor phọ amhị ḍighaạgh oru okumu aani aZihova. Olhoghi ayoor aḅaạl li mem mọ eegharạ Odẹ phọ ayoor enmia bọ, kụ odị amhiigh bọ ozoọm ayoor r’ephomhoghiạn.

OḌIGH ARUKUMUAN OOMO AMEM MỌ

Unwanyụ August 1950, mị ughị aani ni Theocracy’s Increase Assembly opọ ophạm bọ egbogh emhạ phọ aNew York. Mem dị mị amhiịn bumor r’abumaranhi dị oḍuạ kirokirọ arikpisi kụ oru, ḅilhẹ ronaghạn iikiạ araraạr dị abumor dị moghị askul aGilead rokaạph, inyu ni imhị obughẹ arukumuan phọ mị rangọ bọ aZihova! Araghaạph phọ mị anhaghạn bọ ikparamhị ghan imhị bịn oḍigh arukumuan oomo amem mọ. Esi iduọn phọ, ogheel phọ bịn mị ageeghị oḍighi okọy eten opọ oomo amem mọ. Olạ agadạ phọ aCanada uḅenhị imhị ophụr oḍiiny amuụm. Mị uḍiiny muụm unwanyụ October 1, 1950. Unwanyụ phọ atum bọ siphẹ bịn mị aḍighi okọy eten opọ oomo amem mọ kụ ungọ imhị ḍinyạ oghị okumuan idiphọ okọy eten epẹ Kapuskasing. Emhạ phọ epẹ phọ ikelhạn ni iboom r’esi phọ yoor orugh bọ.

Mem mọ aghozogh 1951 ramuneen bọ, olạ agadạ phọ umhạgh ni Bugbaanhaạn dị kotue oḅạ onhụ aFrench dị eḅeraạn oghị apakirị aQuebec dị roḅạ ghan French. Umhoghi ni bukaaphọm ekpisi phọ epẹ phọ. Mị unhaghạn ni onhụ Aḅekeeny r’aFrench. Mị usighẹ ni ḍimhạgh phọ, kụ usighẹ imhị oghị epẹ Rouyn. Mị u/legheri oye epẹ phọ. Kụ iduọn mị aghaạph bọ emhiighom mọ, ogina iyaạr dị mị amhoọgh pọ esi phọ ogẹ bọ dị mị kakị, kuolọ oomo araraạr ighị ni imạ. AMarcel r’amhị uḍighi ni igbogh arighirị, kụ mị ughelhọm ni okumuan epẹ Quebec esi inya asiạ. Esighẹ rekị, mị umhiigh ni okumuan idiphọ okọy eten opọ agbatanhaạn bọ.

AGILEAD R’ARARAẠR DỊ OYE PHỌ AGON KỤ K”OMHOỌGH

Mem mọ mị odi bọ Quebec, olhoghi amhị aḅaạl li mem mọ uruom bọ imhị ḍinyạ aḍimhạgh oghị aani Askul aGilead, opọ amhunhenhiom bọ 26 epẹ South Lansing, New York. Mị umhạn askul phọ February 12, 1956, kụ ungọ imhị ḍinyạ oghị okumuan epẹ Ghana,b West Africa. Kuolọ, mị agbi bọ oghị aGhana phọ, iwạ ni dị mị kakị Canada akoriom iyạl obobọ iraạr awiki dị arinyạ erelhe phọ amhị kemunughan.

Mị uutughiạn mọ kesighẹ iyạl obobọ iraạr awiki, kuolọ oḍual arunwanyụ kụ edị mị arọl Toronto akori omhoọgh arinyạ erelhe phọ. Siẹn amem mọ amuẹn phọ, mị urọl r’eghunotu aCripps, kụ mị aru alhegheri Sheila onyanhị phọ abidị. Yoor uru ni ophomhoghiạn siloor . Mị rawạ bọ oguan odị pinien, bịn arinyạ erelhe phọ amhị eru. Iyạl phọ ayoor uuḅereghị ni kụ osopha mọ mị ukị ekpisi phọ urom bọ imhị oghị phọ. Yoor uḅẹm mọ yoor kogeạn ghan rinyạ opogh mọ oghaạph apinien phọ ayoor kaḅọph ni. I/ḍighi osopha dị adugh, kuolọ araraạr ighị ni idị enhighẹ.

Isighẹ ni imhị oniin unwanyụ osi aGhana. Mị asi bọ Ghana bịn umạ imhị oḍighi opoghom eephugh. Oḍighi phọ opọ phọ usighẹ ni imhị aghị ibadị ariisi epẹ Ghana r’inhọn areelhe dị etuman siphẹ, idiphọ Ivory Coast r’aTogoland (nyiidiphọ rokol ghan mọ Togo). Ibadị amem, ogina amhị kụ ughiilhom ghan moto phọ olạ agadạ phọ ugọ bọ imhị, kụ mị ughelhọm ghan agey!

Eekunha awiki phọ, mị uphạm ghan iiḍighi eghir dị ophạm. Yoor u/moọgh esi ophạm arookpomhoghan eephugh r’eghir. Esi iduọn phọ, abumor phọ usighẹ ghan sigarabạ r’ighirikị iriịr kụ olhoghọm ruutu dị kekoph bumor phọ esi ogogọ. Loor iduọn iyaạr ophoomhị ghan araraạr i/tọl bọ esi phọ orọl ghan bọ olhe eḍien, ukpooghị ghan inhạm mọ, kụ mem dị meteẹny olhe eḍien kụ okiigh osạ ongọ we phọ.

Eeni amem dị yoor ookpomhoghan iduọn phọ araraạr areẹgh imite ghan ni. Esi omaạm, eniin amem dị umor phọ Herb Jennings,cdị aḍighi aani onyọ amisonarị, rangọ oghaạph, bịn anạm apatanaạn epẹ role ghan bọ eḍien phọ bịn aghiil amite siphẹ igbo eegbolhom mọ r’epẹ awe phọ orolhoghụ bọ. AHerb awooriọm ni oghaạph phọ bịn enhạm mọ i/legheri mun ekpisi oghiil oghị. Inya abumor dị omhoọgh inyaạm kụ uru osiph enhạm mọ oḅulhemhi epẹ role ghan bọ eḍien phọ, kụ awe phọ orolhoghụ bọ ude ronaghạn oghaạph phọ omhiigh okpoolha arighaạgh.

Ogbo asiwiki phọ, mị ughị ghan ni ramhạ dị etuman aḍeenhaan ghan vidio phọ oghol bọ mọ The New World Society in Action. Orue oḍighi iduọn phọ, mị ukpọ ghan ophalhaḅaạl ukpe igbo iyạl ireeny, kụ avidio phọ aḍeenhaan pạ phọ. Iphẹn phọ iḅeraạn ni weye aramhạ phọ agey! Esi ibadị, epẹ phọ kụ eḅẹl amem dị momhiịn ghan vidio. Uyughurọn ghan ni agey mem dị omhiịn esi dị awe roḍiiny muụm. Avidio phọ akạr alhoghonhaạn ḍighaạgh buẹn romiịn bọ olhegheri mọ Abugbaanhaạn AZihova oḅophoghạn ni ḅilhẹ odi ni siẹn oomo aḅirinhi phọ.

Mị morọl Africa esi iyạl asiạ, bịn mị aghị ookpomhoghan eephugh dị agbatanhaạn epẹ New York lhạ phọ 1958, olhoghi amhị akạr kụ aḅaạl. Olhoghi amhị aḅaạl kẹn oḅilhẹ omhiịn aSheila. Odị aḅuạ epẹ Quebec kụ aru, ekpisi dị odị raḍighi oḍighi okọy eten dị agbatanhaạn. Yoor ugeạn ghan rinyạ bịn, kuolọ nyiidiphọ yoor momhiinhạn bọ, mị upuru ni nyodị ophin, kụ odị amheera ni. Mị ugẹ apuru umor phọ Knorrd mughumọ aSheila atue ni akị aani askul aGilead, kụ osighẹ aani nyodị otumom Africa orọl r’amhị. Odị amheera ni. Mem mọ aSheila asi bọ Ghana bịn yoor aalhạn unwanyụ October 3, 1959. Yoor ukạr kụ omhiịn ḍisẹph aZihova iduọn yoor oḍighi bọ nyodị eḅẹl siẹn aghuḍum mọ ayoor.

YOOR UḄOPHOGHẠN OKUMUAN EPẸ CAMEROON

Lhạ phọ 1961 urom iyoor oghị epẹ eelhe phọ aCameroon okumuan. Yoor osi bọ epẹ phọ uḅenhị imhị olhoghonhaạn aḍighaạgh omiteom omhoom olạ agadạ. Mị umhoọgh ghan ni ibadị araraạr oḍighi. Idiphọ oye dị rapogh olạ agadạ phọ, mị umhoọgh ni ibadị araraạr otuughạ. Kụ lhạ phọ 1965, aSheila asoph eghun. Yoor umhoọgh ni oghiilhaan mem dị yoor ootughiạn mọ yoor romoọgh obumoọny. Kuolọ iduọn yoor rookolhobian bọ oḅula aCanada ilọ iikolhobian oḍighi odẹ r’onhiin, yoor usoman ni sidọl dị iḅonyon iyoor ezu.

Obumoọny phọ ayoor amhugh ni olhoghi okuruḅakạ. Oyil phọ uḅenhị ni iyoor mọ obumoọny phọ aḍighi olhephiri oọny. 50 asiạ meten ni kụ yoor ko/rue owulha nyodị. Ghalhamọ r’iduọn iphẹn phọ ingọ bọ iyoor okururu, yoor ughiọm ni ghisigh oḍighi phọ ophọn yoor ophomhoghiạn bọ ni iboom.

Ugbiphoghọm ghan ni bumor phọ abuẹn odi bọ Cameroon loor iduọn bidị osopha bọ orọl asạm. Araraạr ikạr ghan elhoghorị mem dị rosaḅạr oye dị kaḍighi odaạm eelhe phọ. Unwanyụ aMay 13, 1970, iyaạr dị yoor u/seere olhoghi imite ni. Usophoghom ni oḍighi Abugbaanhaạn AZihova siphẹ eelhe phọ aCameroon. Agomẹt phọ ukasaghị ni oḅilhẹ osighẹ omhoom olạ agadạ phọ olhọgh bọ, kụ mọ morọl bọ esi oogh unwanyụ bịn. Esi oniin awiki bịn ophorogh oomo asimisonarị phọ siphẹ eelhe phọ, kụ uphorogh aani ni imhị r’aSheila. Loor iduọn yoor ophomhoghiạn bọ bumor r’abumaranhi phọ, kụ yoor u/legheri bọ raraạr dị bidị kosoman ghisigh, ilhoghi ayoor eeph ni owilhẹ abidị oḅuạ.

Yoor urọl li odiiny unwanyụ olạ agadạ aFrance. Mị arọl bọ olạ agadạ phọ aFrance mị uḍighi ni oomo ilọ mị katue olhoghonhaạn aḍighaạgh bumor phọ odi bọ Cameroon. Unwanyụ aDecember, usighẹ iyoor oghị olạ agadạ aNigeria, loor esi dị olạ agadạ phọ aNigeria kụ kopogh ghan nyiidiphọ oḍighi ongọ eḍien aruwaloor bumor phọ odi bọ Cameroon. Ilhoghi abumor r’abumaranhi phọ orọl bọ Nigeria iḅaạl li mem mọ yoor oghị bọ osi, kụ yoor ughelhọm ni rukumuan phọ ayoor epẹ Nigeria esi ibadị asiạ.

OSOPHA DỊ AKPẠR RI IBOOM

Lhạ phọ 1973 yoor usopha ni osopha dị akpạr ri iboom. Aloor anhịr phọ amhị Sheila reeḅaghamhị ghan ni k’aḍio phọ. Mem dị yoor odi ookpomhoghan eephugh epẹ New York, aSheila amhiigh ni emoghi kụ uḅenhị imhị mọ: “Mị ka/tue mun akiọm ghisigh! Aloor amhị medugh kụ mị odi ghan iirurughiạn ibadị amem.” Mepel li 14 asiạ odị r’amhị mokumuan bọ epẹ West Africa. Ghalhamọ r’iduọn olhoghi amhị aḅaạl bọ loor esi inyaạm mọ odị malhọgh bọ siẹn oḍighi phọ, iwạ ni mọ yoor uuḅenion raraạr. Mem dị yoor orọl ude kụ ophogh dọl phọ ayoor kụ oghol ooḅereghị, yoor usopha mọ yoor koḅulha Canada pidị otue okạr okiririom opogh loor phọ odị. Owilhẹ oḍighi amisonarị phọ ayoor r’arukumuan oomo amem mọ kụ osopha dị akpạr apelheghiom dị yoor mosopha ghan.

Yoor osi bọ Canada, oniin ogbogh oyaghirị amhị dị rabool ghan simoto epẹ Toronto ungọ ni imhị oḍighi. Iịny ikpoki phọ yoor omhoọgh bọ ilhoghonhaạn ni iyoor ḍighaạgh oteẹny esi orugh, roḅilhẹ ogho araraạr dị i/mạn iboom ikpoki olhọgh otu phọ. Kụ yoor omhiigh ḍimhoom adọl phọ ayoor dị yoor iimhụgh u/le. Yoor u/wạ reten orọl aḍigbogh adọl, loor esi dị yoor umhoọgh ni eephuạ oḅula arukumuan oomo amem mọ. Yoor u/seere olhoghi mọ ke/bia kụ yoor oḅulha rukumuan oomo amem mọ.

Mị umhiigh ni oghị ghan aḍio aSatodee olhoghonhaạn ghan aḍighaạgh oḍighi olhọgh omhoom Assemblị Họl epẹ Norval, Ontario. Kụ esighẹ rekị, uḅenhị ni imhị oḍighi opoghom Assemblị Họl phọ. Aloor anhịr phọ amhị memhiigh repoorom, esi iduọn phọ yoor umhiịn mọ yoor kotue ni oḍighi oḍighi phọ. Kụ unwanyụ aJune 1974, bịn usighẹ iyoor oghị siphẹ Assemblị Họl phọ. Olhoghi ayoor aḅaạl li oḅilhẹ oḅulha arukumuan oomo amem mọ!

Olhoghi ayoor aḅaạl li iduọn aloor phọ aSheila eghiọm bọ ghisigh enhighẹ ghan bịn. Iyạl asiạ reten bịn uḅenhị iyoor oghị oḍighi oḍighi opoghom eghir. Oḍighi phọ usighẹ iyoor aghị Manitoba, emhạ aCanada dị eephoọm edi ghan agey. Ghalhamọ r’eephoọm mọ erọl bọ, eenyuụm abumor phọ iḍighi idị yoor oghelhọm ekpisi phọ. Yoor otuughạ mọ oghiọm aghisigh okumu aZihova kụ imhạn maạr, ke/kpisi phọ yira odi bọ.

IYAẠR ITUUGHẠ DỊ EMHẠN MAẠR

Yoor morọl oḍighi opoghom eghir phọ esi ibadị asiạ, kụ lhạ phọ 1978 umhạgh ni iyoor oghị aBetẹl aCanada. Mị asi bọ Betẹl i/bia bịn mị atuughạ iyaạr dị emhạn maạr iboom kuolọ ikparanhaạn imhị osighẹ oḍighinhom. Mị umhoọgh ni eepoogh ongọ oghaạph oniin awạ r’egbem onhụ aFrench ookpomhoghan dị agbatanhaạn dị ophạm epẹ Montreal. Kuolọ abumor r’abumaranhi phọ u/kelhọm oghaạph phọ amhị, esi iduọn phọ oniin onyọ umor dị odi Service Department ungọ ni imhị oroma. Ogbạ agey, iwạ ni dị mị mulọgh elhegh mem mọ amuphẹ phọ mọ mị u/kạr umaạr ongọ oghaạph. Mị u/sighẹ oromha phọ odị idị eḍighi bọ mị ulhoghoma mọ kparipẹ r’osẹph amhị odị uḍaghạ yogh ghan imhị riisi dị mị asughanham. Mị ulhoghoma iduọn phọ loor eten phọ epẹ mị amhiịn bọ nyodị r’eten phọ odị ungọ bọ imhị oroma phọ.

Iyạl ikpo asiḍughulotu r’eten, oniin onyọ umor dị rapogh aani ghan olạ agadạ phọ uḅaanhaạn ni imhị ilọ oghaạph phọ ophọn phọ. Mị umheeraam ni mọ mị u/sighẹ oromha phọ, ḅilhẹ olhoghi amhị ugurọgh ni imhị. Mị ughị ni ateẹny onyọ umor phọ ungọ bọ imhị oroma phọ aaḅereghiạn. Odị asạr ri uwilhenhaạn imhị. Ipẹ emite bọ itughemhị ni imhị osooromhi aloor, kụ r’amem r’amem mị ka/bulha. (Prov. 16:18) Mị uuḅereghị ghan ni aḅenhị aZihova iphẹn emite bọ ibadị amem, kụ mị asopha mọ mị ka/kel mun oromha.

Mepel 40 asiạ mị marọl bọ Betẹl aCanada, mị rakumuan ghan idiphọ oniin odị rapogh ghan Olạ Agadạ aCanada. Kụ February 2021, mị uroph ni ooḅi anhịr phọ amhị Sheila esi aḍuugh. Kụ etigheri iduọn inyaam odị edi bọ ni, mị aḅilhẹ ni asoman aani e/moon elọ amhị. Kuolọ arukumuan phọ amhị siẹn ookpomhoghan phọ aZihova ringọ ghan imhị oḅaạl olhoghi dị mị ra/gbon ghan iiḅaghamhị phọ mị amhoọgh bọ. (Eccl. 5:20) Ghalhamọ r’iduọn mị asoman bọ ni iiḅaghamhị siẹn aghuḍum mọ amhị, araraạr dị mingọ imhị oḅaạl olhoghi kụ ipu. Mị mamhoọgh ogbaanyạn iduọn mị asighẹ bọ rukumuan phọ aZihova kụ aḍighi eḅẹl iyaạr siẹn aghuḍum mọ amhị r’omhiịn dị aZihova mulhoghonhaạn imhị ḍighaạgh oghelhọm 70 asiạ siẹn arukumuan oomo amem mọ. Mị ralọm ni aZihova dị iḍoọgh abumor phọ r’abumaranhi phọ kokiọm ghisigh oḍighi aZihova eḅẹl siphẹ aghuḍum mọ abidị, loor esi dị mị akuphom owol mọ bidị kẹn kokelhọm aani ni ghuḍum ogbaanyạn r’oḅaạl olhoghi eḍighi maạr dị bidị oghiọm ghisigh okumu aZihova.