ẸMHUOGHAAPH ỊTUUGHA PHỌ 40
ẠḌUOR PHỌ 111 Our Reasons for Joy
A Jehova Kụ Rụngo Ghan Iyira ‘Iboom Ibo’
“ “Ẹnhaan kụ rụngo ghan bọ ịmhi iboom ibo.”—PS. 43:4.
EGBON
Ịlo ọlhogh elhegh rạraar dị ketue ni emi ibo phọ ayira ẹsighe ḅịlhe r’ịpe yira kotue bo ọḅilhe ọmoogh ibo phọ ayira.
1-2. (a) Ịbadi awe rologhoma ghan ika rodon? (b) Yira kọoḅeghion eeghe sịen ẹmhuoghaaph phọ ẹphen phọ?
ỊBADI awe rodon ogbon ophorogh ạraraar dị kẹngo bịdi ọḅaal olhoghi. Ghạlhamo r’ịduon phọ ni, ibo phọ ạbidi rẹ́tol ghan kebia. Okururu r’ọto kụ maḅogh ghụn ịbadi. Ịphen phọ remitenhaan ghan ni kẹn rẹbenhe a Jehova. Loor ịduon yira odi bọ siḍio “aruukuna phọ,” yira kosoman ghan ni siḍol r’ọoḅaghamhian aloor dị kịkparanhaan iyira okaran.—2 Tim. 3:1.
2 Sịen ẹmhuoghaaph phọ ẹphen phọ, yira kọoḅeghion rạraar dị ketue ni emi ibo phọ ayira ẹsighe ḅịlhe r’ịpe yira kotue bọ ọḅilhe ọmoogh ibo phọ ayira. Kụolo ẹḅel phọ, yira kọpur ọlogh elhegh zin ogey ọḅaal olhoghi r’ibo.
AZIN OGEY ỌḄAAL OLHOGHI R’IBO
3. Ọlhem mọ ụtughemhi iyira eeghe ịlo a Jehova? (Mịin kẹn sifoto phọ.)
3 A Jehova aḍighi Ẹnhaan ọḅaal olhoghi, kụ rạwa mọ yira ọmhoogh ọḅaal olhoghi r’ibo. Ibo phọ ọdi eeghironhaan ni esi ọlhem mọ ọdi, pọ kụ ịyaar phọ olhoghi ayira rạḅaal ghan bọ mem dị yira ọmhiin ịma ade phọ, rạraar dị ẹmhoogh ạgba kịrokiro, ịnham dị reḅo ịlo ạreegh, ḅịlhe yira olhe eḍien dị rẹdugh. Ẹnhaan ạkar kụ ụphomhoghian iyira kụ rạwa mọ ọghelhom ghuḍum!
Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images
Mem dị yira ọmhiin dị ịnham repegh ephegh rịitughianham ghan iyira mọ a Jehova aḍighi Ẹnhaan ọḅaal olhoghi (Mịin ẹkpigh phọ 3)
4. (a) Eeghe kụ iḍighi kụ a Jehova ạmoogh bọ ni ọḅaal olhoghi ghạlhamo r’ịduon ọdi rạmiin bọ dị awe rọmiinhom? (b) Eeghe inmo kụ ịdi a Jehova ụngo iyira? (Psalm 16:11)
4 Ghạlhamo r’ịduon a Jehova aḍighi bọ Ẹnhaan ọḅaal olhoghi, Ọdi alegheri ni ịiḅaghamhi phọ r’ịmhinhimhiin phọ edi bọ sịen aḅirinhi phọ. (1 Tim. 1:11) Kụolo ọdi ómheera ịpe phọ ẹsighe ibo phọ ọdi. Ọdi alegheri ni mọ oomo ịmhinhimhiin eḍighi ẹlo ekula amem bịn, kụ ọdi mạmaanhaan kẹn ḍio osiemhi eekunha. Ọdi ạkparam ni rakori ḍio phọ ọdi kasiemhi bọ eekunha ọto r’ịmhinhimhiin k’agee-pọ. Kụolo nyịidipho, ọdi ạnaghanhan ni oomo ạraraar phọ yira osoman bọ kụ rạwa ni ọlhoghonhaan ayira ḍịghaagh. Ika kụ ịdi ọdi raḍighi ghan bọ ịphen phọ? Ọdi ụngo iyira inmo ọmhoogh ghan ibo. (Bạl Psalm 16:11.) Ọmhiin ịdi ọdi adi ạngo aani ibo phọ ịphen phọ Ọony phọ ọdi, Jizọs.
5-6. Eeghe kụ iḍighi kụ a Jizọs rạmoogh ghan bọ ibo?
5 Sịphe oomo ọlhem mọ a Jehova, a Jizọs kụ ạmhoogh ọḅaal olhoghi apu. Eeghe kụ iḍighi? Ọoḅeghion ịyal ariphigh. (1) Ọdi kụ “ạkpoghoronaan Ẹnaan ạmadan” ạḅilhe ạsighe oomo ạraaghara phọ ọdi. (Kọl. 1:15; 1 Tim 6:15.) (2) Ọdi kụ mạrol ghan r’ọde phọ ọdi aḍighi bọ zin ọḅaal olhoghi apu tọrobo oye.
6 A Jizọs rạmoogh ghan ibo oḍighi ạtorobo ịyaar dị ọde phọ ọdi ạḅenhi nyọdi oḍighi. (Prov. 8:30, 31; Jọn 8:29) Kụ loor ịphen phọ, ọdi mạmhoogh kuuḅi aghisigh a Jehova.—Mạt. 3:17.
7. Ika kụ ịdi yira kotue ọkar ọmoogh ibo?
7 Yira phọ kẹn kotue ni ọmoogh aani ibo eḍighi mạar dị yira oḍuraan otuman a Jehova aḍighi bọ zin ọḅaal olhoghi. Mem dị yira ọlhogh mem ọtuugha ịlo a Jehova kụ ọḅilhe ọtuughaany nyọdi, ọḅaal olhoghi phọ ayira kạbugh ni. Yira kọmoogh kẹn ibo mem dị yira roḍighi ịpe Ẹnhaan rạwa bọ kụ ọḅilhe olhegheri mọ yira ọmoogh ni kuuḅi aghisigh ọdi.a (Ps. 33:12) Kụolo kọkaaph ika eḍighi mạar dị eeni amem yira ụ́moogh ibo ọbobo ibo phọ ayira ẹkar bịn ẹḍua? Ịphen phọ rẹma ghan mọ yira ụ́moogh mụn kuuḅi aghisigh Ẹnhaan ḍụghum? Eeye! Yira úmunughan, kụ eeni amem yira rọmiinhom ghan ni eephina, okururu, beeph olhoghi, kụ a Jehova ạnaghanhan ni ịphen phọ. (Ps. 103:14) Ọoḅeghion rạraar dị ketue ni emi ibo phọ ayira ẹsighe r’ịdi yira kotue ọḅilhe ọmoogh ibo phọ ayira.
KÁMEERA ỊYAAR EMHI IBO PHỌ ẠNA ẸSIGHE
8. Ika kụ ịdi ịiḅaghamhi dị yira osoman ketue itir iyira?
8 Ọḅel ọḅa phọ: Ịiḅaghamhi dị yira osoman. Nạ rạmiinhom ni loor ịgbiphoghom, ekperenhom ịiḅaghamhi, ekulhom, riiphinha ọbobo ạḍikpo? Yira otue ni otoph ibo phọ ayira mem dị yira osoman ịiḅaghamhi phọ ịphen phọ, ẹkar ẹkpaariom mem dị yira útue ụpamaghan ọbobo usiemhi eekunha ịiḅaghamhi phọ. Ạ Bạịbul phọ ạkaaph ni mọ ‘mem dị olhoghi oye phọ ụ́ḅaal, oye phọ rakururu ghan ni.’ (Prov. 15:13) Okumor oye ookpomhoghan dị oghol mọ Babis, dị umor r’ọde r’onhiin ọdi omhugh esi inya ạsia ạḅem mọ: “Mị ulhoghoma mụdi ogina ạmhi kụ odi ḅịlhe mọ oye ọlhoghonhaan ạmhi ḍịghaagh ólho. Eeni amem mị uḅonyonhu ghan ni azuan loor ịbadi ạraraar phọ mị ạmhoogh bọ oḍighi phọ kụ mị útue bọ ụmoogh mem ọrolhan umor phọ ạmhi ḅịlhe r’ọde r’onhiin phọ ạmhi kụ bịdi omugh bọ.” Ịiḅaghamhi dị yira osoman ketue ni ẹkpa ịnyaam ayira ḅịlhe ẹkom okururu ịngo iyira.
9. Eeghe kụ kịlhoghonhaan iyira ḍịghaagh ọḅilhe ọmhoogh ibo phọ ayira? (Jeremiah 29:4-7, 10)
9 Eeghe kụ kịlhoghonhaan iyira ḍịghaagh ọḅilhe ọmhoogh ibo phọ ayira? Yira kotue ni ọḅilhe ọmoogh ibo phọ ayira eḍighi mạar dị yira ọwilhe ọoḅaghamhian ghan aloor ịlo ạraraar dị yira kótue onme kụ ọsereghian ghan ịlo yira ọmhoogh. Aḅirinhi phọ rọḅem ghan mọ tụtu oye kạmoogh ọḅaal olhoghi pọ oomo ạraraar kẹki ịpe oye phọ rạwa bọ. Ạḍiitughian phọ ạḍien phọ ítu ịne. Esi ọmaam, a Jehova aroma we a Ju phọ ọrol bọ dọl ạrebenhe ẹpe Bạbịlọn mọ, aḍimhoom ạdol phọ ạbidi ịdipho aruuruen ẹluan bịdi kụ mọ oḍighi oomo ịdi bịdi kotue ọghelhom aghuḍum ẹeḍian ạsidol phọ ịpe phọ. (Bạl Jeremiah 29:4-7, 10.) Ịphen phọ ịtughemhi iyira eeghe? Dạphan tọrobo ạdol dị nạ odi kụ ạsereghian ghan ịdi nạ ạmhoogh. Legheri mọ a Jehova kạlhoghonhaan ni nyịnha ḍịghaagh tọrobo ạdol dị nạ asoman. (Ps. 63:7; 146:5) Ọnyo umaranhi dị oghol mọ Effie, dị aḍighima ịyaar dị útue mụn utelhe, ạḅem mọ: “A Jehova, eghun otu phọ ayoor, ḅịlhe r’ookpomhoghan phọ ụkar kụ ụbaki ịmhi. Esi ịduon phọ, mị ulhoghoma mọ mị aroph ibo phọ ạmhi pọ kẹkigh mụdi mị ụ́sereghian oomo ịpe bịdi ruḍighinhaan bọ ịmhi. Mị rạwa ni oḍeenhaan mọ mị ạsereghian ni ịpe a Jehova r’ạrighiri phọ ạbuen phọ muḍighinhaan bọ ịmhi.”
10. Eeghe kụ iḍighi kụ yira kọmoogh bọ ni ibo ghạlhamo r’amem dị yira osoman ịiḅaghamhi?
10 Yira kotue ni ọmoogh ọḅaal olhoghi ghạlhamo r’amem dị ạraraar ị́ki agey ọbobo ịkaraph ạraraar imitenhaan iyira ọbobo bụo eghun otu ayira.b (Ps. 126:5) Eeghe kụ ịdighi? Loor esi dị ibo phọ ayira ị́kpasi esi ạsidol pho ayira. Ọkoy eten dị oghol mọ Maria, ạḅem mọ: “Mem dị nạ asoman ịiḅaghamhi, kụ nạ ạphamhanham ni ibo phọ ạna, pọ rẹ́ma ghan mọ nạ kákururu ọbobo kámoghi. Rẹma ghan ghụn mọ nạ ówulha ruguanhaan phọ a Jehova. A Jehova kạlhoghonhaan ni nyịnha ḍịghaagh ọphamhanham ibo phọ ạna.” Legheri mọ, etigheri ịlo ạraraar ẹkpar nyịidipho, oomo ịiḅaghamhi ayira eḍighi ẹlo ekulha amem bịn. Kụ mọony amem a Jehova kasiemhi ni eekunha rạraar phọ rẹkom ghan bọ okururu kịngo iyira.
11. Ika kụ ịdi eḍeenhaan otelhedom mọ Pọl ẹkparamhi nyịnha?
11 Kọkaaph ika eḍighi mạar dị yira omhiigh ọotughian mọ eeni yira ụ́moogh mụn kuuḅi aghisigh a Jehova pọ kụ ịyaar phọ ịiḅaghamhi phọ ịteeny bọ iyira? Ọotughian ghan ịlo ạrebenhe a Jehova dị mosoman ghan siḍol dị ẹgbagara ketue ni ịlhoghonhaan iyira ḍịghaagh. Tụutughian eḍeenhaan otelhedom mọ Pọl. A Jizọs r’aloor kụ ạsaḅar nyọdi ọghi ogbeelhom iiḅi ịinhaghan phọ ọḅenhi aruuruen r’ạbuo ạrumu phọ ạbidi, r’awe phọ IzrẹI.” (Iiḍ. 9:15) P’eeghe ịma eepoogh! Kụ ghạlhamo r’ịduon phọ ni bịn, ạ Pọl asoman ni ịiḅaghamhi. (2 Kọr. 11:23-27) Kụ ịiḅaghamhi phọ ọdi ẹghigh bọ mụdi ị́moogh eekunha ịma ghan mọ ọdi ómhoogh mụn kuuḅi aghisigh a Jehova ḍụghum? Eeye! Kpạripe ghụn, ọkparam mọ ọdi aḍeenhaan mọ ọdi ạmoogh ni ḍịseph a Jehova. (Rom 5:3-5) Nyịidipho, tụutughian ịlo ạdol phọ ạna. Ghạlhamo r’ịiḅaghamhi phọ nạ asoman bọ, nạ ạpamanham ni omheeraam mọ ạna. Kụ iḍighi kụ, kuphom ni owol mọ nạ ạmoogh ni kuuḅi aghisigh a Jehova.
12. Ika kụ ịdi ạraraar dị yira ogbiighi oḍighi kụ yira úteeny remi ghan ibo phọ ayira?
12 Omhunhenhiom ịyal ọḅa phọ: Mem dị yira útue uḍighi rạraar dị yira ogbiighi oḍighi. (Prov. 13:12) Ẹphomhoghian r’ọsereghian phọ yira ọmhoogh bọ esi a Jehova rinyu ghan iyira ophighi asiigbu sịen arukumuan phọ a Jehova. Tọrobo ịpe ẹrol bọ, eḍighi mạar dị ạsidol phọ ayira ímeera mọ ọteeny siigbu phọ yira ophighi bọ, yira otue ni oḅonyonhu ozuan. (Prov. 17:22) Ọkoy eten dị oghol mọ Holly ạḅem mọ: “Mị ụwa ghan ọghi aani Askul Ạbukaaphom Iiḅi Ịinhaghan Phọ pịdi mị ạki ẹnhon eelhe akumuan ọbobo ạki aani ọdighi a Ramapo phọ. Kụolo ạsidol phọ ạmhi inmia ni, bịn mị útue mụn úteeny siigbu phọ ịpe phọ. Mị ulhoghoma ni mabi. Redughe ghan ni oye phọ mem dị oye phọ rạwa ni oḍighi ịyaar kụolo útue.” Ịbadi rologhoma aani ghan kẹn ịphen phọ.
13. Eḍighi mạar dị ạsidol phọ ayira ímeera mọ oḍighi iniin ạraraar sịen arukumuan phọ a Jehova, eeghe asiigbu dị yira kotue ni ọteeny kụ ịdi yira kopighi?
13 Eeghe kụ kịlhoghonhaan iyira ḍịghaagh ọḅilhe ọmhoogh ibo phọ ayira? Tụutughian ghan mọ a Jehova iyira rụ́kpagh ghan. A Jehova rạ́wa ghan dị yira koḍighi rạraar dị ipel iyira loor, ọdi rápogh ghan rukumuan dị yira rọngo nyọdi kụ agbi ọmhaghamhi ayira mạar. A Jehova rạwa ghan mọ oḍighi ịpe yira kotue bọ ḅịlhe ọrol dọl dị ẹkpe oḍuom olhoghi. (Mic. 6:8; 1 Kọr. 4:2) Ọdi ạmaghamhi mạar oye olhoghi phọ yira oru bọ apuemhi rukumuan phọ yira rọngo bọ nyọdi. Esi ịduon phọ, oḍighi ịpe ịnyaam ayira esi bọ.c Eḍighi mạar dị ạdol phọ ạna ímeera mọ ḍighi iniin ạraraar dị nạ rạwa oḍighi ọngo a Jehova, pọ gbon ghụn ịpe nạ katue bọ aḍighi. Esi ọmaam, nạ atue ni ạtughemhi aani ịḍoogh ọbobo ạloghonhaan ḍịghaagh bumor dị ạsia mẹghi. Nạ atue ni apighi ḍiigbu ọkparamhi ghan ạbunhon esi omite aani ghan k’ạbidi, ọmhagh ghan afon ọbobo ọge adom ọkparamhi ọghiom. A Jehova kạsephom ni nyịnha ibo eḍighi mạar dị nạ aḍighi ạteenyom siigbu phọ ịphen phọ! Legheri kẹn mọ yira kọmoogh ni roopoogh dị kési eekunha sịphe omhoom ạbirinhi phọ okumu a Jehova eten dị yira úseere olhoghi! A Holly, ọghaaph bọ oghol ẹpe ọmhan, ạghaaph ni akureri mọ: “Mị rạtol ghan ni ude kụ ạatughianam loor ạmhi mọ, ‘Mị kạtol k’agee-pọ.’ R’ọlhoghonhaan ạḍighaagh a Jehova, mị katue ni aḍighi ịpe mị agbiighi bọ sịphe omhoom aḅirinhi phọ.”
14. Eeghe ẹnhon ịyaar kụ ketue emi ibo phọ ayira?
14 Omhunhenhiom ịraar ọḅa phọ: Eboom ẹephua ọghelhom aloor. Sịphe ịntanet phọ, awe roḍeenhaan ghan ni ịdi bịdi rọmoogh ghan ọḅaal olhoghi mem dị bịdi rọkelom loor. Ịphen phọ meḍighi ịdi ịbadi omheeraam mọ ogbon oḍighi ạraraar dị oye phọ rạkelom ịdiphọ oghooghi ghan ạraraar, ọghi ophoghoghom ịma ạraraar, r’ọghiighi arikpisi kịrokiro kụ kẹngo bịdi ogey ọḅaal olhoghi. Ạraraar phọ ịphen phọ íbeeph. A Jehova rạwa ni mọ ọghelhom ghan ịma ạraraar phọ ọdi ạlhem bọ. Tọrobo ịpe ẹrol bọ, ịbadi mọmhiin mọ ạraraar phọ bịdi ọotughian bọ mọ kẹngo bịdi ọḅaal olhoghi kụ remi ghan ghụn ibo phọ ạbidi. Ọkoy eten dị oghol mọ Eva ạḅem mọ, “Mem dị nạ ạsighe ghuḍum mọ ạna agbon ọghelhom aloor, ịyaar nyịnha kẹ́gbaanyan ghan mụn.” Ọmhoogh eboom ẹephua ọghelhom aloor etue ni ẹkom okururu r’amabi ịngo iyira.
15. Yira ọtuugha eeghe esi eḍeenhaan Uwo ẹmha phọ Sọlọmọn?
15 Eḍeenhaan Uwo ẹmha phọ Sọlọmọn ịtughemhi iyira mọ eboom ẹephua ọghelhom aloor ketue ni ẹkom okururu. Esi ọmaam, ọdi ạkparagha ni ọmhoogh ọḅaal olhoghi esi ọgbaanyamhi ạruuphua phọ ọdi. Ọdi ạghelhom ghan egey ẹdien, sụor ḅịlhe r’ạtorobo ịyaar dị ikpoki ketue ni eko mem mọ ọdi. Kụolo ịphen phọ, ị́gbaanyan nyọdi, ọdi ạḅem mọ: “Ariḍien ayira kétue mun ẹmiin ịdi kẹgbaanyan; areḅeri ayira kétue mun ẹnaghan ịdi kẹgbaanyan.” (Eccl. 1:8; 2:1-11) Ạraraar phọ ịpe aḅirinhi phọ rọotughian ghan bọ mọ ketue ni ẹngo ogey ọḅaal olhoghi ẹkigh ịkaraph ikpoki. Ịkaraph ikpoki etue ni ẹkighi mụdi ẹnighe ni, kụolo kótue ọsighe okoom ịyaar.
16. Ika kụ ịdi oḍighinhaan ghan ạraraar bụnhon keḍighi ịdi yira kotue ọḅilhe ọmoogh ibo? (Mịin kẹn sifoto phọ.)
16 Eeghe kụ kịlhoghonhaan iyira ḍịghaagh ọḅilhe ọmhoogh ibo phọ ayira? A Jizọs ụtughemhi iyira mọ “iboh k’Ẹnaan edianaan bụphe rọngo bọ epu bụphe rọboor bọ.” (Iiḍ. 20:35) Okumor oye ookpomhoghan dị oghol mọ Alekos ạḅem mọ: “Mị ragbon ghan oḍighinhaan awe rạraar ghạlhamo ighom ni. Ịduon mị rạngo bọ bụnhon, mị rágbon ghan mụn rạraar phọ ịpe mị rạwa bọ, kụ olhoghi ạmhi rạḅaal ghan ni.” Eeghe ạraraar kụ ịdi nạ katue aḍighinhaan bụnhon? Nạ ạmhiin oye dị akururu, kpạramhi nyọdi. Eeni nạ kátue aḍighi ịiḅaghamhi phọ ọdi ạngo nyọdi, kụolo nạ atue ni ạadereghi nyọdi esi olher ạruru kụ ọḅilhe oḍeenhaan igbiririph r’ọotughianham ghan ọdi mọ ọdi ạḅogh ịiḅaghamhi phọ ọdi ạngo a Jehova. (Ps. 55:22; 68:19) Nạ atue kẹn ni ạkparamhi nyọdi mọ a Jehova nyọdi ọ́ḅitonhaan. (Ps. 37:28; Isa. 59:1) Nạ atue kẹn ni ạsaanhaan nyọdi eḍien ọbobo amite aani k’ọdi. Mạgh nyọdi orelhean aani ạna ẹpe erugh phọ, ịphen phọ kẹesa ni nyọdi. Meera a Jehova ạsighe nyịnha ạkparamhi bụnhon. Ọlhoghonhaan ghan ạḍighaagh bụnhon kịngo ni iyira ogey ọḅaal olhoghi!—Prov. 11:25.
Kpạripe rogbon ạraraar dị nạ rạwa, gbon ghụn rạraar dị ạbunhon omhoghi (Mịin ẹkpigh phọ 16)d
17. Yira koḍighi eeghe orue ọmhoogh ogey ọḅaal olhoghi? (Psalm 43:4)
17 Yira kọmoogh ni ogey ọḅaal olhoghi eḍighi mạar dị yira ọghiom ghisigh oḍuraan otuman Ọde k’ạke phọ ayira. Ạ Bạịbul phọ ạkaaph ni mọ a Jehova kụ rụngo ghan bọ iyira “iboom ibo.” (Bạl Psalm 43:4.) Esi ịduon phọ, etigheri ịiḅaghamhi dị yira osoman nyịidipho, yira kotue ni ọmoogh ibo. Ọghiom ghisigh ogbon a Jehova aḍighi bọ zin ibo phọ ayira!—Ps. 144:15.
ẠḌUOR PHỌ 155 Ibo Ayoor K’agee-pọ
a Mịin igbe phọ “Gbon A Jehova Ọngo Ạna Ibo.”
b Esi ọmaam, mịin sipuru dị oopuru umor phọ Dennis r’ạnhir ọdi Irina Christensen sịphe Omhunhenhiom Oogh Iinhaghạn Dị Aloor Phọ Repogh Bọ Ongọ, 2023.
c Olhegheri ọbughe ịphen phọ, mịin ẹmhuoghaaph phọ “Cultivate Reasonable Expectations, ḅịlhe Be Joyful” sịphe Watchtower a July 15, 2008.
d ỊLO AFOTO: Ọnyo umaranhi akooghi iboom ạraraar dị ọdi rạwa, kụolo ạsifalaway dị ọdi aghoonhaan ọnyo umaranhi dị ạsia mẹghi dị amhoghi ọkparamhi kụ ịngo nyọdi ọḅaal olhoghi epu.