Nạ Ạatughian Ni?

Nạ mamhiigha ni loor ạbal oomo ạrumhuoghaaph Otu Okoriom ạlha phọ arolhool? Ụgua, pogh mụghumo nạ katue ni ạpanyanhaan sipuru phọ ịphen phọ:

Eeghe kụ rinyu ghan iyira ọngo a Jehova eghuan?

Yira rọngo ghan a Jehova eghuan loor esi dị yira ọlogh nyọdi eegu ọḅilhe ọpomhoghian nyọdi. Yira rokuenhi ghan kẹn a Jehova loor esi dị yira rọwa mọ ạbunhon olhegheri aani nyọdi.—w25.01, opoḍi phọ 3.

Eḍighi mạar dị oye aḍighi ịyaar dị repin esi ayira, eeghe kụ kịlhoghonhaan iyira ḍịghaagh ọsar ọwilhenhaan?

Kúḅo mụdi ịyaar phọ répin esi ayira; kụolo kụ́tolhonhaan esi ọghagh olhoghi phọ ayira, loor esi dị ọghagh olhoghi rạ́kom ghan ịma kamiteom.—w25.02, ipoḍi phọ 15-16.

Eeghe kụ iḍighi kụ ạ Mạk aḍighi bọ egey eḍeenhaan ạngo ịḍoogh abumor?

Olhoghi ạ Mạk ạḅaal li ọsighe oḍighi dị ọngo nyọdi. Ghạlhamo r’ịduon ọdi aḅonyonhu bọ ni azuan loor ịyaar dị emite, ạ Mạk ọ́wilhe oḍighi phọ ọdi. Ọdi ạghiom ni ghisigh ạmhoogh ịma asiya rạ Pọl ḅịlhe r’ạbunhon abumor.—w25.04, opoḍi phọ 27.

A Jizọs ạma ghan eeghe mem mọ ọdi ạaḅereghi bọ mọ: “Mị maḍighi ịdi bịdi molegheri ḍien phọ ạna”? (Jọn 17:26)

Ạbumatuan phọ a Jizọs ulhegheri ni ḍien phọ Ẹnhaan. A Jizọs aḍighi ghụn dị bịdi kolegheri ọdo oye phọ a Jehova aru bọ, ẹḅaramaam bọ rigbiom mọ ọdi, iiḍighi phọ ọdi, r’ạraaghara phọ ọdi.—w25.05, ipoḍi phọ 20-21.

Eḍighi mạar dị yira osooromhi loor, yira kọlogh elhegh eeghe ạraraar?

Yira kọlogh elhegh mọ ạraraar edi ni dị yira úlegheri. Esi ọmaam, yira úlegheri mem mọ eekunha phọ ketu bọ r’ịpe a Jehova kaḍighi bọ mem mọ ạmuphe phọ. Yira úlegheri ịpe kemite bọ iḍue r’esi phọ a Jehova ulhegheri bọ iyira asi.—w25.06, ipoḍi phọ 15-18.

Eeghe kụ kịlhoghonhaan iyira ḍịghaagh ọmhooghom ạsuo ẹmhuoghaaph ọbobo ọghaaph ogbo?

Yira otue ni opuruan loor mọ: ‘Eeghe eḍeenhaan ọbobo ịyaar dị ọma kụ ịdi oḍighinhom sịen phọ ọtughemhi awe phọ igey ạ Bạịbul phọ? Oḍighinhom ni ọghaaph ọmaaniom dị mị kạsighe ni aḍighinhom aani mem dị mị rạtughemhi oye ḍụghum? Ẹmhuoghaaph phọ ẹphen phọ kẹkar ẹḅeraan ạnhian?’—w25.07, opoḍi phọ 19.

Yira ọtuugha eeghe ịlo ọsar ọwilhenhaan phọ Ẹnhaan esi eten phọ ọdi ạzoom bọ Devid?

Ghạlhamo r’ịduon a Devid aḍighi bọ ni igbogh ịkaraph, mem mọ ọdi akiton bọ k’ekpom, a Jehova ạsar ri ạwilhenhaan nyọdi. (1 Ki. 9:4, 5) Mem dị a Jehova ạsar ịkaraph ạwilhenhaan, ọdi rạ́atughian ghan mụn ịkaraph phọ ọbobo kákol ịkaraph phọ ịpe phọ ụlhiom iyira ghisigh.—w25.08, opoḍi phọ 17.

Eḍighi mạar dị ọpo nạ rạtughemhi bọ Bạịbul phọ kọ̋kar ọnhaghanhan ịyaar phọ nạ rạtughemhi bọ nyọdi, nạ kaḍighi ika?

Eḍighi mạar dị nạ mạkparagha ni ọtughemhi ọpo nạ rạtughemhi bọ Bạịbul phọ kụ ọdi kọ̋nhaghanhan ni ịyaar phọ, pọ ipel ẹghi risigh. Onyebel roten kụ ẹḅilhe eḅulha esi phọ.—w25.09, opoḍi phọ 24.

Ạ Bạịbul phọ ạḅem mọ ịkaraph ẹmoogh ni ịikpo “ookelheghi ayira.” (Hib. 3:13) Ika?

Ịkaraph rinyu ghan iyira oḍighi ạraraar dị ị́nighe. Riikelheghi ghan kẹn iyira ọmhoogh ghan iikia mụghumo Ẹnhaan ạkar ri ụphomhoghian iyira.—w25.10, opoḍi phọ 16.

Eeghe kụ ịraar ạraraar dị ketue ẹnighemhi ịiḅereghi phọ ayira?

(1) Ogbirima ghan ịma ạraaghara phọ a Jehova. (2) Ọotughian ghan ịlo ạraraar dị yira osoman kụ ọghaaph ghan oghol sịphe ịiḅereghi phọ ayira. Yira otue ni ọoḅereghi ịlo ọmhoogh ẹeghara ọsar ghan ọwilhenhaan. (3) Ọlhogh ghan mem ọkuamhi ghan ọoḅereghi. Ịphen phọ keḍighi ịdi yira kọkuamhi ghan ọkaaph oomo ịpe edi bọ olhoghi ayira.—w25.10, ipoḍi phọ 19-20.

Ika kụ ịdi yira kotue ọloghonhaan ḍịghaagh bụphe mọkpo bọ?

Yira otue ni ọki opogh ọbobo ọmagh ghan bụphe ạsia mẹghi bọ. Yira otue kẹn ni ọdaph bịdi ọki otu arookonhom mem lọ emhoghi ọghi ọmhiin oyil ạbidi. Yira otue kẹn ni otelhean ghan bịdi ẹpe erugh phọ ọbobo ịnhon areten ọngo ọgbaanhaan.—w25.11, ipoḍi phọ 6-7.

Ịghen ịkpanha ạraraar kụ ẹdi ọnyo ạ Krịstẹn kaḍighi ọmhiin mọ apinien phọ ọdi akuenhi ni a Jehova?

Dạphan iilhogh ekpisi phọ ịlo apinien. Kpạragha ọmhiin mọ oomo ịpe nyinha keḍighi bọ ḍio phọ ạḍiphe phọ ẹmoogh ni mụḅoph r’eemhumha uwaloor iigbia phọ. Iinmenhian phọ anyinha esereghian, kụ eghel iḍighinhom ạraraar dị ị́ḅoph rạ Bạịbul phọ. Kạaph rạraar eten dị eegholhaan mem dị nạ raakolhobian ịlo apinien phọ ạna.—w25.12, ipoḍi phọ 21-24.