Nyinha Ạbuphe Ạsia Mẹghi Bọ Eḍighi Ephua Ookpomhoghan Phọ

Eeni kẹn nạ órue mụn oḍighi ịpe nạ aḍighi ghan bọ loor ạḍikpo. Etigheri ịduon nạ makumu bọ ni a Jehova eten dị ẹkpe oḍuom olhoghi esi ịbadi ạsia, olhoghi ạna atue ni abeeph loor ịduon nạ rátue mụn bọ kaḍighi ịpe nạ aḍighi ghan bọ. Esi ọmaam, nạ atue ni bịn amiigh ọsighe ịphen nạ raḍighi bọ nyịidipho ọtomaam ịpe nạ aḍighi ghan bọ mem dị eten. Eḍighi ịdipho, nạ kaḍighi ika kụ ạḅilhe ạmoogh ibo?

ỊYAAR DỊ A JEHOVA RẠWA ḌỊGHAAGH ẠNA

Puruan loor mọ, ‘Eeghe ịyaar kụ ẹdi a Jehova rạwa ḍịghaagh ạmhi?’ Ikpo ọnhu phọ edi bọ Deuteronomy 6:5 ketue ni ẹedereghi nyịnha. Ẹḅem mọ: “Pọmoghian a Jehova Ẹnhaan phọ ạna r’oomo ekpom ạna r’oomo aghuḍum ạna r’oomo ịnyaam ạna.”

Ọdaphan esi ạ Bạịbul phọ ẹpe phọ, a Jehova rạwa dị nạ kakumu nyọdi r’oomo ekpom ạna, r’oomo aghuḍum ạna, r’oomo ịnyaam ạna. Ephigh phọ ẹphen phọ kẹlhoghonhaan nyịnha ḍịghaagh dị nạ kạ́sighe loor ạna ạtomaam bụnhon ọbobo ạsighe ịphen nạ raḍighi bọ nyịidipho phọ ạtomaam ịpe nạ aḍighi ghan bọ mem dị eten.

Ḅeeḅeghion ịphen: Mem mọ nạ aḍighi bọ ọnyo ịḍoogh, nạ ụngo ghan eeghe a Jehova? Ogbogh opol ạrebenhe a Jehova kọḅem mọ bịdi uḍighi oomo ịpe bịdi kotue bọ okumu a Jehova. Ọdaphan ḍol phọ ạna, ịpe kụ oomo ịdi nạ arue ạngo a Jehova mem mọ ạmuphe phọ. Eeghe ạraraar kụ ịdi nạ ratue kaḍighi ạngo a Jehova nyịidipho? Eeni ịphen nạ raḍighi bọ nyịidipho ọdaphan dọl phọ ạna kụ ẹdi nạ katue aḍighi. Eḍighi mạar dị nạ ạmhiin rạraar eten phọ ẹphen phọ, pọ nạ kameeraam ni mọ nạ rạngo ni a Jehova ịpe nạ katue bọ ịdipho nạ aḍighi ghan bọ ẹpe ọmhan. Nạ ụngo ghan a Jehova oomo ịpe nạ katue bọ mem dị eten, kụ nyịidipho, nạ rạngo ni kẹn nyọdi oomo ịpe nạ katue bọ.

NẠ KATUE NI ẠLOGHONHAAN ḌỊGHAAGH IBOOM BỤNHON

Ọoḅeghion ẹnhon ịyaar dị ẹwa mọ lọgh elhegh: Kpạripe r’ọotughian ghan ạraraar phọ nạ kátue mụn bọ aḍighi, tụutughian ghụn ịbadi aroopoogh phọ nạ ạmhoogh bọ ọlhoghonhaan ạḍighaagh bụnhon. Ọkar ọghaaph, ịdipho ạ Krịstẹn dị ạsia mẹghi, ạraraar edi ni dị nạ katue aḍighi nyịidipho dị nạ mútue uḍighi mem mọ nạ aḍighi bọ ọnyo ịḍoogh. Ọoḅeghion iniin ạraraar dị nạ katue aḍighi nyịidipho:

Kạaph rạraar dị nạ mạtuugha ạḅilhe ạmhiin ạḅenhi aani bụnhon. Tụutughian riisi ạ Bạịbul phọ ịphen phọ:

Uwo ẹmha phọ Devid: “Mị uḍighi ni ọḅumoony kụ nyịidipho mị okumor oye, mị mạrol li sịen aḅirini phọ abia, kụ mị kꞌekulha kọ̋mhiin ghan dị Ọmoogh-we phọ aghel bụo aruukuan phọ ọbobo ạnmuny ạbidi ọlom eḍien kụ olhe.”—Ps. 37:25.

Josụạ: “Ipogh. Nyịidipho amem ạmi mẹteeny omugh. Oomo phọ anyina elegheri ni sịphe iloghi phọ anyina rꞌaghuḍum mọ anyina mọ rꞌeniin ịyaar dị úḍighi ílho esi oomo igey ạraraar phọ ịpe Ọmoogh-we Ẹnaan phọ anyina iguanaan bọ inyina. Oomo phọ ịdi memiteghu etu eten, ịyaar ísugha.”—Josh. 23:14.

Eeni nạ mạḅa aani ghan ni ịdo phọ ikpo ọnhu phọ ịphen phọ. A Devid ra Josụạ ụghaaph ni rạraar dị bịdi mọmhiin r’ịdi emitenhaan bịdi. Esi ịduon phọ, ikpo ọnhu phọ ạbidi ịkar kụ ẹmhoogh ịikpo agey.

Eḍighi mạar dị nạ makumu ni a Jehova esi ịbadi ạsia, pọ ạraraar phọ nạ mạmhiin bọ ketue ni ẹlhoghonhaan nyịnha ḍịghaagh ọḅenhi ạbunhon sụo phọ odi bọ okumu a Jehova. Nạ ạatughian ni mem dị nạ ạmhiin dị a Jehova ạseph we phọ ọdi eten dị ẹgbatanhaan ḍụghum? Eḍighi ịdipho, pọ kạaph ạḅenhi aani bụnhon! Keemhanhamhi ni bịdi ịdipho eemhanhamhi aani bọ nyịnha. Kẹkparamhi ni bụnhon mem dị nạ ạghaaph rạraar phọ nạ mạtuugha bọ ạḅilhe ạmhiin k’amem mọ nạ amhiigh bọ okumu a Jehova.—Rom 1:11, 12.

Ẹnhon eten dị nạ kạkparamhi aani bụnhon pọ ogbor ghan ọghi ịtuugha sịphe a Kingdọm Họl phọ, lọ edugh ni. Nạ r’abumor r’abumaranhi phọ kọmooghom ni sụo. A Connie, ọghaaph bọ oghol ẹpe ọmhan, ạḅem mọ: “Ogbor ghan ọghi ịtuugha reḍighi ghan ịdi mị ráḅonyohu ghan kazuan. Ẹphomhoghian abumor r’abumaranhi phọ rémeera ghan mọ mị uḅonyonhu uzuan. Mị rạkparagha ghan oḍeenhaan ọsereghian phọ ạmhi esi ọngo ghan ạbidi ịkpirikpiri ạraraar. Mị rạkparagha ghan kẹn ọkparamhi ạbidi ịduon bịdi rụkparamhi bọ ịmhi.”

A JEHOVA ẠMAGHAMI NI MẠAR RUKUMUAN PHỌ NẠ RẠNGO BỌ NYỌDI

Areḍeenhaan awe edi ni sịphe ạ Bạịbul phọ dị útue ghan mụn uḍighi ịpe bịdi oḍighi ghan bọ loor ạdol phọ ạbidi, kụolo a Jehova ạphomhoghian ni bịdi. Tụutughian Simiọn, okumor oye ọlo Izrẹl dị ạrol aani mem mọ ọmhar bọ Jizọs. Mem mọ a Simiọn ạghi bọ sịphe otu ịiḅereghi phọ, eeni ọdi ạmhiin ni ịḍoogh alhephiri ạnmuny dị rokumuan sịphe phọ. Kụolo kọkaaph aani ika ịlo ọdi? Ọdaphan ephoghom awe, eeni ọdi ạatughian mọ ọno maḍighi bọ okumor oye, mọ ọdi ọ́mhan mụn mạar esi a Jehova. Kụolo a Jehova ạmhiin ni rạraar kịro eten. A Jehova ạmhiin Simiọn ịdipho “oye elhiom eḍighinhom ịyaar dị ạaḅereghi ghan nyọdi r’oomo ekpom,” kụ ạseph nyọdi r’eboom eepoogh ọmhiin aani a Jizọs mem mọ ọmhar bọ. A Jehova aḍighi kẹn ịdi a Simiọn ạmhiin ịmiin mọ ọḅumoony phọ ọphon phọ kụ kaḍighi a Mesayạ phọ! (Luk 2:25-35) Dị eegholhaan ni, a Jehova ọ́mhiin Simiọn ịdipho oye dị mạkpo, ạmhiin ghụn nyọdi ịdipho oye dị ạmhoogh omheeraam dị ạkpar dị “uwaloor iigbia phọ odi loor ọdi.”

Nạ kẹn ni katue ni akuphom owol mọ a Jehova ạmaghamhi ni mạar iiḍighi omheeraam mọ ạna ghạlhamo r’ịduon nạ útue mụn bọ uḍighi ịpe nạ aḍighi ghan bọ. A Jehova rapogh ghan ịpe yira ọmhoogh bọ kụ ạsighe ẹkia phọ ayira, kị́lo yira ụ́moogh.—2 Kọr. 8:12.

R’ịphen mọghaaph bọ, gbon ịpe nạ katue bọ aḍighi. Esi ọmaam, nạ atue ni apinomaam bin ịnhon areten ọghaaph iiḅi ịinhaghan phọ, ghạlhamo ịyal ikpo ịkalha ni bịn. Nạ atue ni ạkparamhi bumor r’abumaranhi phọ esi ọmhagh ghan ạbidi fon ọbobo ọge ạḍibam ạḍinya ọghiomnhaan. Oḍighi ghan ịkpirikpiri ạraraar dị eḍeenhaan ẹphomhoghian kẹkparamhi ni bumor r’abumaranhi phọ ẹkar ẹkpaariom mem dị ẹḅua ḍịghaagh oye dị makumu a Jehova esi ịbadi ạsia ku eru.

Abunhiin ụ́moogh mụn ịnyaam mọ bịdi ọmhoogh ghan bọ loor ạḍikpo. Mịin ịdi emite eniin eelhe Africa pạ igbe phọ ẹḅem bọ mọ “Ịphel Ghuḍum Ọnyanhi Phọ.”

Legheri mọ iiḍighi ẹphomhoghian phọ r’ạdol ọḅar phọ ạna ketue ni ẹkparamhi bụnhon. Nạ eḍeenhaan oye dị ạmhoogh ọkparam, kụ nạ katue ni akuphom owol mọ ‘Ẹnaan kóye dị kabula oḍighi phọ nạ aḍighi bọ, ḅịle rꞌẹphomoghian phọ nạ ạmooghom bọ nyọdi sịphe ạḍighaagh phọ nạ ạlhoghonaan ghan bọ kụ rạloghonaan bọ ni bụo asiya phọ ạna.’—Hib. 6:10.

KỌLHOGHOL GHAN BỊN ẠGHIOM GHISIGH

Awe dị ọtuugha ịlo awe dị mọkpo ọḅem mọ alhephiri r’ạnmariir dị mọkpo dị rọloghonhaan ghan ḍịghaagh bụnhon, rọmoogh ghan ogey omhoon aloor, ịitughian dị emhoon ḅịlhe r’aghuḍum dị ạdoony.

Ii, igey iiḍighi bịn rẹ́sighe ghan ịiḅaghamhi phọ ạḍikpo rẹkom ghan bọ. Ọmhar phọ Ẹnhaan bịn kụ katue asiemhi eekunha, mem dị mẹsighe ịkaraph phọ rẹkom ghan bọ ḍịkpo r’aḍuugh, yira olhe bọ erua ḍịghaagh Ạdạm ra Iv.—Rom 5:12.

Ghạlhamo r’ạnyiidipho, arukumuan phọ nạ rạngo bọ a Jehova ẹḅaramaam bọ ọlhoghonhaan ạḍighaagh bụnhon orue olhegheri Ọdi, rẹkparamhi ghan oḍuom olhoghi phọ ạna kụ etue kẹn ni ẹngo nyịnha omhoon aloor. Nyinha ạbuphe ạsia mẹghi bọ, ilegheri mọ a Jehova ạmaghamhi ni mạar rukumuan phọ nyinha rẹngo bọ nyọdi, kụ ookpomhoghan phọ rọsereghian ni ẹma eḍeenhaan omheeraam mọ anyinha.