ẸMHUOGHAAPH ỊTUUGHA PHỌ 51
ẠḌUOR PHỌ 132 Now We Are One
Ịdi Nạ Kaakolhobian Kụ Aḍio Apinien Phọ Ạna Ekuenhi A Jehova
‘ḷḅoonomi ghan oomo ạraraar eḍighi ẹkuami.’—1 KỌR. 14:40.
EGBON
Ịdi ọnyo umor r’umaranhi dị rọwa ạalhan kokuenhi a Jehova ḍio apinien phọ ạbidi.
1-2. A Jehova rạwa eeghe ḍio apinien phọ ạna?
OYE r’ạna meguan ilhom ḍụghum? Eḍighi ịdipho, pọ yoor robo ni r’ạna! Eeni nạ ạkuom ni loor ookolhobian ịpe ạraraar kẹki bọ ḍio apinien phọ ạna. A Jehova ạmoogh ni ogbolhomaam apinien phọ ạna. Ọdi rạwa dị nyinha kẹkelhom ḍio apinien phọ anyinha kụ ẹḅilhe ẹmoogh ibo pạ apiniena phọ anyinha.—Prov. 5:18; Song of Sol. 3:11.
2 A Jehova ạkpeanhaan ni dị yira kokuenhi ḍio apinien phọ ayira. Eeghe kụ iḍighi? Kụ ika kụ ẹdi nạ katue aḍighi ịduon phọ? Ii ẹmhuoghaaph phọ ẹphen phọ ọkar ookolhobianhaan bụlo rọwa ạalhan ịlo ookolhobian aḍio apinien phọ ạbidi, kụolo ạsinhi iilhogh phọ kọoḅeghion bọ kẹloghonhaan ni ḍịghaagh oomo ayira oghuenhi a Jehova eḍighi mạar dị yira ọghi aani pinien phọ ọbobo upuru iyira oromha ịlo ịpe iikolhobian phọ rẹki bọ.
UḌIGHI IKA KỤ ẸWA BỌ DỊ AḌIO APINIEN PHỌ ẠNA KEKUENHI A JEHOVA?
3. Ạbuphe rookolhobian bọ ịlo aḍio apinien phọ ạbidi koseere olhoghi eeghe, kụ eeghe kụ iḍighi?
3 Ẹkpe ni dị iikolhobian aḍio apinien ọnyo ạ Krịstẹn kẹḅoph r’ạsinhi iilhogh phọ a Jehova edi bọ sịphe ạ Bạịbul phọ. Eeghe kụ iḍighi? Loor esi dị, a Jehova kụ Aphighi pinien. Ọdi kụ aakolhobian ọḅel apinien phọ, ọpo Ạdạm ra Iv. (Gen. 1:28; 2:24) Kụ iḍighi kụ, oḍighi ịpe a Jehova rạwa bọ kụ ẹrol ghan ilhoghi ạbuphe rookolhobian bọ ịlo aḍio apinien phọ ạbidi.
4. Ẹghen ẹnhon ephigh kụ ẹdi ọnyo umor r’umaranhi dị rọwa ạalhan ọmhoogh ọtuan oghuenhi a Jehova ḍio apinien phọ ạbidi?
4 Ịnhon ịkpanha ariphigh edi ni dị ẹwa bọ dị nạ kaakolhobian ḍio apinien phọ ạna eten phọ ẹpe a Jehova rạwa bọ. Ẹḅel phọ pọ: Ọdi kụ Ọde k’ạke ạna r’ogbogh Ọyaghiri ạna. (Hib. 12:9) Dị iikia ílo, nạ rạwa ni mọ asiya phọ anyinha ẹghi ni ghisigh. R’amem r’amem nạ kạ́wa mọ ịyaar emite ḍio apinien phọ ạna ọbobo ẹnhon aḍio dị kepin esi Ọyaghiri phọ ạna, Jehova. (Ps. 25:14) Nạ ragbi mọ ị̋kpeanhan dị aḍio apinien phọ ạna kekuenhi a Jehova loor oomo ạraraar phọ ọdi maḍighinhaan bọ nyịnha r’ịpe ọdi kaḍighi bọ ghisigh ḍụghum?—Ps. 116:12.
IKA KỤ ẸDI NẠ KAKUENHI A JEHOVA?
5. Ika kụ ịdi ạ Bạịbul phọ katue ạloghonhaan ḍịghaagh ọnyo umor r’umaranhi dị rookolhobian pinien ạbidi?
5 Ạ Bạịbul phọ ọ́go rạraar dị ọnyo ạ Krịstẹn kaḍighi ḍio apinien phọ ọdi ọbobo ịlo igoni phọ kọko bọ. Umor r’umaranhi phọ kotue ni oḍighi rạraar ọdaphan sịdol phọ ạbidi, eḍighinhom ịyaar ekpisi ạbidi, ḅịlhe r’ạraraar dị ẹḅeraan bịdi. Iḍiodi phọ, awe phọ Ẹnhaan ụdaph ni iilhogh apinien dị a Siza ạlhogh. (Mạt. 22:21) Tọrobo ịpe ẹrol bọ, apinien dị iikolhobian phọ ẹmhoogh mụḅoph r’ạsinhi iilhogh ạ Bạịbul phọ kakuenhi ni a Jehova ạḅilhe ạḅaalhamhi olhoghi ọdi. Esi ịduon phọ, ịghen ạsinhi iilhogh ạ Bạịbul kụ ẹdi ẹwa mọ lọgh elhegh?
6. Uḍighi ika kụ ẹmhan bọ mạar dị ịyal awe dị rọwa ạalhan kọdaphan iilhogh apinien ekpisi phọ bịdi odi bọ?
6 Dạphan iilhogh eelhe phọ. (Rom 13:1, 2) Iniin areelhe, iilhogh eelhe phọ ẹkaaph ni rạraar dị ịyal awe dị rọwa ạalhan koḍighi kụ bịdi ogbi ạalhan. Ịdaphan ịpe iilhogh ekpisi phọ nyinha edi bọ ẹḅem. Ọnyo umor r’umaranhi dị rọwa ạalhan ọwaaghi ni olhegheri ịdi iilhogh ekpisi phọ ẹghaaph ịlo apinien. Eḍighi mạar dị nyinha ẹmhoogh sipuru ịlo iilhogh ekpisi phọ, pọ ịteeny ikumor awe ookpomhoghan phọ ịlo ọlhoghonhaan ạḍighaagh.b
7. Aḍio apinien phọ ẹkpe ọrol ika?
7 Mịin mọ nyinha ekuenhi ni a Jehova ḍio apinien phọ. (1 Kọr. 10:31, 32) Ịmiin mọ oomo ạraraar phọ nyinha keḍighi bọ ḍio phọ ạḍiphe phọ ẹmoogh ni mụḅoph r’eemhumha uwaloor iigbia phọ kpạripe r’uwaloor aḅirinhi phọ. (Gal. 5:19-26) Ọdaphan ịpe ạ Bạịbul phọ ạḅem bọ ịlo oḍiemhiom eghun otu phọ, eḍighi dool olhephiri ọony phọ ọmhiin mọ ạraraar phọ koḍighi bọ ḍio apinien phọ ekuan ni ẹḅilhe ẹngo ọḅaal olhoghi. Koḍighi ika kụ aḍio apinien phọ ẹtol ịdipho phọ? Ọghaaph apinien dị ạḍua sịphe ạ Bạịbul phọ dị ọngo eten ẹphomhoghian r’ẹenyuum, r’eghuan, rẹloghonhaan ghan ḍịghaagh bụphe rọnaghan bọ olhegheri mọ apinien aḍighi inmo a Jehova ḅịlhe rópeghom ghan ephegh. Loor ịduon phọ, ogbogh opol ạ Krịstẹn rọpam ghan pinien ạbidi pạ a Kingdọm Họl phọ lọ edugh ni. Eḍighi mạar dị nạ rạwa mọ ọngo ọghaaph phọ ạna Kingdọm Họl, pọ nụun ni ạge ḍịnya ạghiom ikumor awe ookpomoghan phọ.
8. Nyinha osopha ookpomhoghi awe ọḍe ọḍe nyinha keḍighi ika kụ ekuenhi a Jehova? (Bụo a Rom 13:13)
8 Bạl Bụo a Rom 13:13. Eḍighi mạar dị nạ ạmhoogh iikolhobian ookpomhoghi awe phọ ọḍe ọḍe ḍio apinien phọ ạna, nạ kaḍighi ika kụ kẹ́kigh ịpe aḅirinhi phọ? Ekpo ọnhu a Grik phọ ọgba bọ mọ ‘ọḍe ọḍe dị útue ụpamaghan’ rẹma ghan ọḍe ọḍe dị rọpam ghan k’ogbo aḍughul dị ẹḅaramaam iboom ịpughol, ipesi r’ạsuor. Eḍighi mạar dị na asopha ọḅaram ạmugbagara amiim sịphe igoni phọ nạ kạko bọ, pọ mịin mọ oye ọ́phughol otenhom ọku.c Eḍighi mạar dị kopegh ni sụor, pọ ẹḍogh phọ kị́ki ạnyu iboom pịdi awe phọ oru bọ pinien phọ kọ́looghi mem dị bịdi rọkaaphan ọnhon oye. Mạar aphogh ọdo ạsuor phọ r’ikpo ịge phọ kụ ạsaḅar ḍuor phọ ọbo keḍighi ghan bọ ḍighiigh okpetaan ẹngo oye.
9. Eeghe ịyaar kụ ẹdi ạbulo rọwa ạalhan kọlogh elhegh ịlo ạraraar dị ẹkpe ọghaaph r’areephegh dị kopegh mem dị rọḍe ọḍe ḍio apinien phọ ạbidi?
9 Nạ kạngo ni we eepoogh ọghaaph ịyaar, oḍeenhaan asifoto, sividio, ọbobo ịnhon areephegh mem ọḍe ọḍe phọ ḍụghum? Ạraraar phọ ịphen phọ reḍighi ghan ni ịdi aḍio phọ kẹdugh. Kụolo mịin ni mọ ẹlogh ni epophe we phọ kosoor bọ. (Fil. 4:8) Puruan loor mọ: ‘Keḍeenhaan ni ọlhogh eegu bụnhon ḍụghum? Kekuenhi ni iikolhobian apinien phọ?’ Kụ ịdi ẹman mạar epu, puruan loor mọ: ‘Kekuenhi ni a Jehova?’ Ii, ạraghaaph ạreegh reḍugh ghan ni, kụolo kị́ḅaram rạghaaph ipesi. (Ẹfẹ. 5:3) Mịin ni mọ asiya ạna ọbobo ạrighiri ạna dị kọwa ọghaaph ịyaar olegheri ni rạraar dị nạ kạ́wa mọ bịdi ọghaaph.
10. Eeghe kụ iḍighi kụ ẹnhighe bọ dị ạ Krịstẹn dị rookolhobian pinien kọtuugh bịn oliom? (1 Jọn 2:15-17)
10 Tụugh maliom kụ alhiom. (Bạl 1 Jọn 2:15-17.) Rẹḅeraan ghan a Jehova agey mem dị ạbuen rooseeny bọ nyọdi rọwa ghan reten oghuenhi ọdi kpạripe r’oghuenhi aloor ạbidi. Esi ịduon phọ, ạ Krịstẹn dị osooromhi loor roliom ghan ikpoki phọ ạbidi eten dị eḍeenhaan mọ bịdi róobaga. Eeghe ạsuo kụ ẹdi nạ kạmoogh eḍighi mạar dị nạ ạtuugh bịn alhiom ikpoki ḍio apinien phọ ạna? Eeni nạ kạmoogh aani ọdo ạsuo phọ ọnyo umor ẹpe Norway dị oghol mọ Mike ạmhoogh bọ. Ọdi ạḅem mọ: “Yoor ọmhugh oye úle, loor ịduon phọ yoor ụghiom ni ghisigh oḍighi ọkoy eten phọ ayoor. Yoor ụtuugh bịn olhiom ḍio apinien phọ ayoor kụ apinien phọ ạnhighe kẹn agey dị yoor kóbula.” A Tabitha, ọnyo umaranhi ẹpe India ạḅem mọ: “Loor ịduon yoor ọtuugh bọ bịn olhiom, yoor ụ́moogh oboom ọoḅaghamhian aloor. Apinien phọ ayoor ạtuugh bịn ạrol, iboom iikolhobian r’ịigbakian ị́tol.”
Etigheri ekpisi phọ yira odi bọ, apinien ọnyo ạ Krịstẹn katue ni ạtuugh ạtol, ạnighe, ạḅilhe ạngo bịdi ọḅaal olhoghi mem dị bịdi ọotughian (Miịn sịikpigh phọ 10-11)
11. Ika kụ ịdi ạbulo rọwa ạalhan koḍeenhaan mọ bịdi osooromhi ni loor esi iinmenian phọ ạbidi? (Mịin kẹn sifoto phọ.)
11 Nạ mạatughian ni ịyaar dị nạ kạkpolhoghian ḍio apinien phọ ạna? Dị iikia ílo, nạ kạwa ni oonmenhian eten dị nạ kạdugh ọmhiin. Mem ạ Bạịbul phọ, olom r’ạnhir dị rọwa ạalhan ụmhaar ghan ni ophogh iinmenhian dị ẹnhighe kụ oonmenhian. (Isa. 61:10) Ii, iinmenhian dị nạ kaanmenian ḍio apinien phọ ạna kẹgbatanhaan ni r’ịlo ẹnhon amem, kụolo ẹtuugh bịn ẹrol. (1 Tim. 2:9) Iinmenhian phọ ạna ọbobo ịnhon ạraraar kụ kíḍighi ẹkpanha ịyaar ḍio apinien phọ ạna.—1 Pit. 3:3, 4.
12. Eeghe kụ iḍighi kụ ạ Krịstẹn dị rọwa ạalhan kokel bọ iḍighinhom ạraraar apinien dị ị́ḅoph rạ Bạịbul phọ?
12 Kel iḍighinhom ạraraar dị ị́ḅoph rạ Bạịbul phọ. (Ogan. 18:4) Sịen aḅirinhi phọ a Setạn, ịbadi arikpisi mọsighe iiḍighi aruru, ịtughemhi ạruuku ịiḅereghi ọkpe, iiḍighi ịkaraph aruwaloor bịn ọopuom eten phọ rọpam ghan bọ pinien. A Jehova ụphur ri iyira rụru mọ kụ́moogh ịyaar oḍighinhom rạraar phọ ịphen ị́ḅaal bọ. (2 Kọr. 6:14-17) Eḍighi mạar dị nạ ụ̋kar ulegheri mụghumo iniin iḍighinhom ạraraar ekpisi anyinha ẹḅeraan ni a Jehova, pọ wạaghi aphogh ịpe emhiigh bọ r’ạsinhi iilhogh ạ Bạịbul dị egbolhomaam kụ agbi osopha mụghumo nạ kạḅaram ni ḍio apinien phọ ạna.
13. Ika kụ ịdi ạ Krịstẹn dị rọwa ạalhan kọtuughaany a Jehova ịlo ọsereghian ghan ịyaar dị ọkuom bịdi?
13 Eḍighi ni eḍighinhom ịyaar ekpisi anyinha dị awe kọkuom ghan ịyaar bụlo rọbalhan ḍụghum? Awe dị ọmhoogh ikpoki r’awe dị ụ́moogh ikpoki rọ́kuom ghan eniin ịyaar phọ. Ii, ạ Bạịbul phọ uroma ni iyira onmo ghan inmo, loor esi dị reḍighi ghan ịdi olhoghi ayira rạḅaal ghan. (Prov. 11:25; Iiḍ. 20:35) Tọrobo ịpe ẹrol bọ, kúḍighi ịyaar dị awe phọ rotu bọ pinien phọ ayira kologhoma mụdi ẹkpaariom ni bịdi ọkuom ayira ịyaar, ḅịlhe kúḍighi ịdi bịdi kologhoma mọ bịdi ụngo iyira ẹeny ịyaar, kẹ́ḅaal olhoghi ayira. Yira rọtuughaany ghan a Jehova esi ọsereghian ghan ạtorobo ịyaar dị oye ạmhoogh ọkuom aani ayira, ịlo eghom eghom.—2 Kọr. 9:7.
ỌGBALHAGHA R’ỌKPAR OPU ỊPAANHAAN
14. Eeghe ịpaanhaan kụ ịdi ịbadi dị rọwa ạalhan rosoman ghan?
14 Eeni nạ kasoman ni ịpaanhaan ịduon nạ rạkparagha bọ oḍighi apinien dị kakuenhi a Jehova. Esi ọmaam, eeni kẹkparanhaan ni nyịnha ookolhobian apinien dị ạtuugh bịn ạrol. Ọnyo umor dị oghol mọ Charlie, ẹpe Solomon Islands, ạḅem mọ: “Ịkparanhaan ni iyoor olhegheri oye dị yoor kọmagh r’oye dị yoor kọ́magh oru ọḍe ọḍe r’ayoor ḍio apinien phọ. Yoor ọmoogh iboom ạrighiri, kụ ekpisi ayoor, nạ ạmoogh ọmhagh ạtorobo oye!” A Tabitha, ọghaaph bọ oghol ẹpe ọmhan ạḅem mọ: “Ekpisi phọ mị odi ghan bọ, aḍita awe kụ rosoor ghan mem ọḍe ọḍe. Ịsighe ni mem kụ ạburude r’aburunhiin ayoor ogbi omheera dị yoor kọmagh 100 awe bịn.” A Sarah, ọlo India, ạḅem mọ: “Ophogh ghan ọnhu ikpoki dị bịdi ọmhoogh r’olheghaany kụ ịmhan mạar esi abunhiin awe ekpisi ayoor. Oomo abumor ạmhi dị úḍighi Bụgbaanhaan uḍighi ogbogh apinien. Esi ịduon phọ, awe ugon ghan dị mị kaḍighi ọdi apu ọpo ạbidi.” Eeghe kụ kịlhoghonhaan iyira ḍịghaagh ọkpar opu ịphen phọ r’ịnhon ịpaanhaan?
15. Eeghe kụ iḍighi kụ ẹmhan bọ mạar ọḅaram ịiḅereghi sịphe iikolhobian apinien phọ?
15 Kol ẹmhu iikolhobian apinien phọ ạna ạaḅereghi. Nạ katue ni ạḅenhi a Jehova sịphe ịiḅereghi phọ ạna ịlo ịpaanhaan dị nạ asoman ọbobo ịdi nạ alhoghoma ịlo iikolhobian apinien phọ ạna. (Fil. 4:6, 7) Na atue kẹn ni ạlom nyọdi ọlhoghonhaan ạna ḍịghaagh osopha ogey osopha, ọphoomhi aloor mem dị nạ rạaḅaghamhian loor, r’oḍeenhaan ạkpo oḅio esi lọ ẹwa. (1 Pit. 5:7) Oḍuom olhoghi phọ nạ ạmhoogh bọ ạghi esi a Jehova kạbugh ni mem dị nạ ạmhiin dị ọdi rạpagharanhaan ịiḅereghi phọ ạna. A Tabitha, ọghaaph bọ oghol ẹpe ọmhan ạḅem mọ: “Ọony phọ rạwa bọ ophin ạmhi r’ạmhi ụuḅaghamhian ghan ni loor mọ eeni sịen ịigbakian ketue ni emite igbo ayoor ḅịlhe r’igbo eghun otu phọ ayoor. Loor ịduon phọ, tọrobo amem dị yoor rọwa ọghaaph ịlo iikolhobian apinien phọ, yoor umhiighom ghan r’ịiḅereghi. Yoor ụkar kụ olhoghoma ọlhoghonhaan ạḍighaagh phọ a Jehova esi ẹepho phọ ẹrol bọ igbo arughun otu phọ ayoor.”
16-17. Ika kụ ịdi ọghaaph ghan ạraraar eten dị eegholhaan kẹloghonhaan ḍịghaagh mem dị rookolhobian ịlo apinien?
16 Kạaph ghan rạraar eten dị eegholhaan r’amagheel. (Prov. 15:22) Ịdipho awe dị rọwa ạalhan, nyinha ẹmoogh ni osopha kịrokiro dị nyinha kesopha ịlo aḍio apinien phọ anyinha. Ịphen phọ ẹḅaramaam ogu aḍio apinien phọ, ọnhu ikpoki dị koliom, ọnhu awe dị kọmagh, r’ịnhon ạraraar. Tụtu nyinha kesopha oḍighi ịyaar, ịiḅeghion reten kịrokiro phọ edi bọ oḍighi ịyaar phọ r’ạsinhi iilhogh ạ Bạịbul ịlo ịyaar phọ nyinha rẹwa bọ oḍighi, r’oroma ḍịghaagh ạ Krịstẹn dị osi ọmhanhanhaam. Mem dị nạ rạkaaph ḍịitughian ạna ịlo eten dị nạ rạwa mọ oḍighi ịyaar, kạaph ẹyoghoyogho eten dị eḍeenhaan ọsu olhoghi kụ aakolhobian ọsighe aani ạḍiitughian ạbunhon. Eḍighi mạar dị ạburude r’aburunhiin anyinha ịḅenhi inyinha oḍighi ịyaar dị íbeeph ni, pọ ịnaghanhan ni bịdi. Aḍio phọ ạḍiphe phọ eḍighi aani ni ḍigbogh aḍio ạbidi. Eḍighi mạar dị nạ kátue aḍighi ịpe bịdi ọghaaph bọ, pọ r’amagheel, kạaph ni riphigh phọ ạna. (Kọl. 4:6) Kạaph ni eten dị eegholhan ạḅenhi bụo eghun otu phọ ạna mọ aḍiigbu ạna pọ oḍighi apinien dị kakuenhi a Jehova ḅịlhe ạngo nyịnha ọḅaal olhoghi.
17 Etue ni ẹkpar ọghaaph ịpe nyinha mesopha bọ oḍighi phọ ọḅenhi ạburude r’aburunhiin anyinha eḍighi mạar dị bịdi úlo aani sịen igey phọ. Kụolo nyinha ketue ni. Ọnyo umor dị oghol mọ Santhosh ẹpe India ạḅem mọ: “Arughun otu phọ ayoor ụwa mọ yoor ụḅaram eḍighinhom ịyaar ẹku ịiḅereghi a Hindu ḍio apinien phọ ayoor. Ịsighe ni mem ọnyanhi phọ r’ạmhi rọwa bọ ạalhan ọḅenhi ạbidi ịyaar phọ eḍighi bọ kụ yoor kóḍighi bọ ịdipho phọ. Kụolo yoor umheera ni oḍighi iniin ịdi ị́ka olhogh a Jehova. Esi ọmaam, yoor unme ni eḍien phọ yoor rọwa bọ ọsa phọ, ọsa ẹdi ẹḅeraan bịdi. Kụ yoor ọwilhe ọlhoghom ạsuor r’ịḅa loor esi dị bịdi róḍighi ghan rạraar phọ ịpe phọ.”
18. Awe dị rọbalan koḍighi eeghe ọmhiin mọ ạraraar ẹki ni ịma ḍio apinien phọ? (1 Bụo ạ Kọrịnt 14:40) (Mịin kẹn afoto phọ.)
18 Miigha loor kụ aakolhobian. Mem dị nạ ạmhaar ạḅoonhomhi rạraar ịlo esi r’esi, ạraraar nyịnha kẹ́kar ewiririom ḍio apinien phọ ạna. (Bạl 1 Bụo ạ Kọrịnt 14:40.) A Wayne, ẹpe Taiwan, ạḅem mọ: “Rẹteeny bọ ḍio apinien phọ ayoor, yoor ụmhoogh ni ruupuruan r’ạbuen omiteom bọ loor ọlhoghonhaan ayoor ḍịghaagh ḍio phọ ạḍiphe phọ. Yoor ụghaaph ni ịpe yoor mookolhobian bọ kụ ọḅilhe oḍighi oḍeenhaan kẹn iniin pịdi ạraraar ẹki ịma ḍio phọ ạḍiphe phọ.” Orue oḍeenhaan ọlhogh eegu ruuruen phọ kotu bọ, iḍighi ni oomo ịpe nyinha ketue bọ ọdaph amem.
Igey iikolhobian ketue ni eḍighi ịyaar dị ạraraar kẹki ịma ḍio apinien phọ (Mịin ẹkpigh phọ 18)
19. Nạ kaḍighi eeghe ọmhiin mọ nạ atue ni ạpamaghan rạraar ḍio apinien phọ ạna?
19 Nạ katue ni akpetenhaan iniin ịiḅaghamhi eḍighi mạar dị nạ ạnhuun ạtuughian rạraar dị ketue ni emite. (Prov. 22:3) Esi ọmaam, eḍighi mạar dị nạ odi ekpisi dị awe ọmhoogh ẹeghara ọghi ghan apinien dị ụ́magh bịdi, pọ mịin ni mọ nạ ạatughian ni ịdi nạ kaḍighi kụ ịphen phọ kémite. Ḅẹnhi ni bụo asiya ạna dị úlo aani sịen igey phọ ịpe nạ rạwa bọ mọ ạraraar ẹghi r’iḍighinhom ạraraar dị nạ ụ́wa mọ ọḅaram. Nạ atue ni aḍeenhaan bịdi ẹmhuoghaaph phọ ẹḅem bọ mọ “What Happens at a Wedding of Jehovah’s Witnesses?” edi bọ jw.org. Orue ọoḅaki ạraraar ḍio phọ ạḍiphe phọ, nạ atue ni ạmagh ọnyo umor dị asianhaan dị kapogh ghan ịpe ạraraar rẹki bọ. (Jọn 2:8) Eḍighi mạar dị nạ ạḅenhi ọnyo umor phọ eten dị eegholhaan ịpe nạ rạwa bọ mọ ạraraar ẹghi, ọdi kạlhoghonhaan ni nyịnha ḍịghaagh ọmhiin mọ apinien phọ ạna akuenhi ni a Jehova ạḅilhe ạki ịma.
20. Eeghe ịyaar kụ ẹdi ịyal awe dị rọwa ạalhan kọlogh elhegh ịlo aḍio apinien phọ ạbidi?
20 Eeni nạ kạaḅaghamhian ni loor mem dị nạ ạatughian oboom oḍighi phọ odi bọ ookolhobian ịlo aḍio apinien phọ ạna. Tọrobo ịpe ẹrol bọ, lọgh elhegh mọ aḍio bịn kụ ịdi nạ kạsighe aḍighihom pinien phọ ạna. Ẹpe kụ emhiighom ịma aghuḍum mọ ịyal phọ anyinha kẹsighe bọ ekumu ghan a Jehova. Iḍighi oomo ịpe nyinha ketue bọ ọmhiin mọ apinien phọ anyinha ạtuugh ni bịn ạtol ạḅilhe aḍighi eghuan. Ḍuom olhoghi a Jehova. R’ịiḅakiom a Jehova nạ katue ni aḍighi pinien dị nạ ạatughian olhoghi ạna kạḅaal dị nạ káloghoma sại.—Ps. 37:3, 4.
ẠḌUOR PHỌ 107 The Divine Pattern of Love
a IKPO ỌNHU DỊ ỌGBA: Eḍighinhom ịyaar ịbadi arikpisi, ḍio apinien phọ olom mọ r’ạnhir phọ rokunyan ghan ni risigh Ẹnhaan. Ịpe reten kụ eeni bịdi ọko we phọ igoni. Ekpisi dị eḍighinhom ịyaar phọ ẹpe phọ ílo, ẹman ni mạar dị olom r’ạnhir phọ kọdaph sịnhi iilhogh ạ Bạịbul phọ ḍio apinien phọ ạbidi.
b Olhegheri ọbughe ephoghom dị ạ Krịstẹn ọmhoogh ịlo iilhogh apinien, mịin ẹmhuoghaaph phọ “Weddings That Are Honorable in the Sight of God and Man” sịphe ạ Watchtower October 15, 2006.
c Mịin vidio phọ Should I Serve Alcohol sịphe jw.org?