Tụughaany Osooromhi Aloor Phọ A Jehova

1. Eeghe kụ iḍighi kụ osooromhi aloor phọ a Jehova aḍighan bọ elhegh?

MEM dị nạ aphogh bụphe rọtooghi bọ rodon, nạ katue ni ạḅem mọ bịdi osooromhi ni loor ḍụghum? Eeni nạ kạḅem mọ eeye. Kụolo a Jehova phọ aḍighi bọ Ẹnhaan Oomo Ịikpo asooromhi ni loor. (Ps. 113:5-8) Tọrobo ẹeghara a Jehova ẹḅaram ni osooromhi aloor. R’eeteḅa ẹeghara ophoophe aloor ílo loor ọdi. Sịen ẹmhuoghaaph phọ ẹphen phọ, yira kọoḅeghion iniin inya ạraaghara a Jehova r’ịpe osooromhi aloor aḍighom bọ sịphe inya ạraaghara phọ ịpe phọ. Yira kọoḅeghion kẹn ịpe a Jizọs ạtuughaany bọ osooromhi aloor Ọde phọ ọdi. Ọoḅeghion ạraaghara phọ ịphen phọ kịlhoghonhaan iyira ḍịghaagh oḍuraan otuman a Jehova, r’ọkuamhi ọtuughaany osooromhi aloor phọ ọdi.

A JEHOVA ADUGH ỌḄAANHAAN

2. Ạ Psalm 62:8 ẹkaaph eeghe ịlo a Jehova? (Mịin kẹn afoto opoḍi phọ.)

² Rédugh ghan ọḅaanhaan awe dị ophoophe loor. Ophoophe aloor phọ ạbidi raḍighi ghan ịdi bịdi rọzo ghan eten dị reḍighi ghan ịdi ạbunhon rọokpukian ghan ọghi ọteeny ạbidi ọbobo otuman ạbidi. P’eeghe ịdi a Jehova ạgbatanhaan! Loor ịduon a Jehova asooromhi bọ loor, ọdi ụḅenhi ni iyira ọḅaanhaan ghan ọdi r’ọḅenhi ghan ọdi rạraar dị rịiḅaghamhi iyira. (Bạl Psalm 62:8.) Ịdipho ạburude dị rọmaar ghan kophogh nmụny ạbidi roler ghan bọ rụru mem dị ạnmuny phọ ạbidi rọkaaph ịiḅaghamhi ạbidi, kụ ịdi a Jehova raler ghan rụru kạngo ịiḅereghi ạbuphe rooseeny bọ nyọdi. Ọdi ạge ni ịbadi ịiḅereghi phọ ịphen phọ sịphe ạ Bạịbul phọ. Ịphen phọ eḍeenhaan mọ ọdi adugh ni ọḅaanhaan. (Josh. 10:12-14; 1 Sam. 1:10-18) Kụolo kọkaaph ika eḍighi mạar dị ịyaar eḍighi ịdi yira olhoghoma mọ yira ụ́kpeanhaan ọḅaanhaan a Jehova?

3. Eeghe kụ iḍighi kụ nạ akuphom bọ ni owol mọ a Jehova rạwa ni mọ gbor ghan ạḅaanhaan nyọdi esi ịiḅereghi?

³ Yira kotue ni ọḅaanhaan a Jehova esi ịiḅereghi ghạlhamọ r’amem dị yira olhoghoma mọ yira ụ́kpeanhaan ẹphomhoghian phọ ọdi. Uḍighi ika kụ yira ọḅem bọ ịduon phọ? Sịphe aḍidogh ọony phọ aphe bọ, a Jizọs ạtomaam a Jehova ọde phọ ạmhoogh bọ igbiririph ạghi esi ọony phọ ọdi ghạlhamo r’ịduon ọony phọ alhoghoma bọ mọ ọno ọ́kpeanhaan mụn dị ọde phọ ọdi kạḅilhe ạsighe nyọdi. Ọde phọ amhegheron ika mem mọ ọony phọ ọdi aḅulha bọ olhoghi otu? A Jizọs ạḅem mọ ọony phọ odi ni k’egher kụ ọde phọ ọdi “aghiil ạghi aḅol kụ amhiigha loor ạkpun nyọdi.” (Luk 15:17-20) A Jehova ịdipho ọde phọ ọphon phọ. Tọrobo amem dị ọdi ạnhaghan ịiḅereghi ạbuphe moḅonyonhu bọ ozuan loor apum ọbobo ọoḅaghamhian aloor, mem mem mọ osooromhi aloor phọ ọdi ranyu ghan ni nyọdi olher ạruru ọngo ạbidi. (Lam. 3:19, 20) Ịdipho ọde phọ ọpo phọ, igbiririph renyu ghan ni a Jehova oghiil oru ọodereghi ayira r’ọngo ayira okuphom owol mọ ọdi ụphomhoghian ni iyira. (Isa. 57:15) Ika kụ ịdi a Jehova rakiil ghan bọ karu ụteeny iyira rodon? Ọdi raḍighi ghan ịduon phọ dị eego esi ikumor awe ookpomhoghan phọ, bụo eghun otu ayira dị ọḅoph omheeraam r’ayira, ḅịlhe r’abumor r’abumaranhi phọ. (Jems 5:14, 15) A Jehova amiteom iikolhobian phọ ịphen phọ loor esi dị ọdi rạwa mọ oḍuraan otuman nyọdi.

4. Ika kụ ịdi a Jizọs aḍeenhaan mọ ọdi adugh ni ọḅaanhaan?

⁴ A Jizọs ạtuughaany Ọde phọ Ọdi. Ịdipho Ọde phọ ọdi, a Jizọs asooromhi loor. Loor ịduon phọ, mem mọ ọdi ạrol bọ sịen ade phọ awe úkiilhaan ghan ọḅaanhaan ọbobo otuman ọdi. Bịdi úkiilhaan ghan opuru ọdi sipuru. (Mạk 4:10, 11) Mem dị ọdi apuru aani bịdi ḍịitughian ạbidi ịlo ịyaar, bịdi ụghaaph ghan ni ịpe edi bọ olhoghi ạbidi. (Mạt. 16:13-16) Kụ mem dị bịdi ọpioman, bịdi úkiilhaan mọ a Jizọs kạkagham bịdi olhoghi. Loor esi dị bịdi olegheri mọ a Jizọs ạyoghoyogho, rạnma ghan ighirigiir kụ rạkparam ghan kẹn. (Mạt. 17:24-27) Loor ịduon a Jizọs ạtuughaany bọ Ọde phọ ọdi agey, ạbudapham mọ ọdi uru ni olhegheri mọ a Jehova óḍighi ọgbagara oye, óphoophe loor, ọbobo ọ́kelhan we ịdipho abuḍiemhiom ạruuku ịiḅereghi phọ ọrol bọ mem mọ ạmuphe phọ.—Jọn 14:9.

5. Ika kụ ịdi osooromhi aloor kụlhoghonhaan iyira ḍịghaagh oḍighi awe dị odugh ọḅaanhaan?

⁵ Ika kụ ịdi yira kọtuughaany a Jehova? Mem dị yira ọtuugha osooromhi aloor, kedughanhaan ni we ọḅaanhaan ghan ayira. Osooromhi aloor kaḍighi ịdi yira kọ́moogh rạaghara dị reporogh ghan we kẹkelhe ịdipho ẹḍim, ophoophe aloor, ḅịlhe r’ẹ́maar ọsar ọwilhenhaan. Kụolo yira osooromi loor, yira koḍighi ghụn we dị ọyoghoyogho, ọmhoogh ọkparam, ḅịlhe rọsar ghan kọwilhenhaan, oye dị ạmhoogh rạaghara phọ ịphen phọ radugh ghan otuman. (Kọl. 3:12-14) Ẹkar ẹkpaariom dị ikumor awe ookpomhoghan phọ koḍighi we dị odugh ọḅaanhaan. Orue oḍighi ịduon phọ, kẹwa dị bịdi kọtol ghan r’abumor r’abumaranhi phọ. Ịphen phọ rẹma ghan mọ bịdi kọlogh ghan ikuph ọghi ghan ịtuugha sịphe a Kindọm Họl phọ kpạripe r’oḍighinhom ghan a Zoom. Kụ eḍighi mạar dị ạsidol phọ ạbidi emheera ni, bịdi ọkparagha ni orelhean ghan bumor r’abumaranhi phọ ẹpe erugh phọ. Ịphen phọ keḍighi ịdi abumor r’abumaranhi phọ kọkuamhi olegheri bịdi, bịn medughanhaan bịdi ọghaaph ghan ịiḅaghamhi ạbidi ọḅenhi ikumor awe phọ.

A JEHOVA RẠNAGHANHAN GHAN SỊDOL PHỌ AYIRA

6-7. Ngọ reḍeenhaan dị ẹma emiteom mọ a Jehova rameeraam ghan ni ịlo ạrebenhe phọ ọdi ọghaaph.

⁶ Ịbadi awe dị ophoophe loor rómeeraam ghan ịlo ạbunhon ọghaaph. Kụolo loor ịduon a Jehova asooromhi bọ loor, ọdi rạnaghanhan ghan ni sịdol phọ ayira ọbobo rameeraam ghan ni ịlo yira ọghaaph ghạlhamo r’ịduon ọdi ạbugh bọ ni apu tọrobo oye. Ọoḅeghion ịpe ọdi ạzoom bọ umaranhi phọ a Mozis, Miriạm. Ọdi r’umor phọ ọdi Erọn ugumom ni Mozis, ọpo ạmheera bọ enye a Jehova. Ịphen phọ iḍeenhaan mọ ọdi ọ́lhogh eegu a Jehova, iphin ni esi a Jehova kụ ạlhiom ạ Miriạm r’ẹzegh ọku ufe. Kụolo mem mọ Erọn aghol bọ ẹmhu a Miriạm ạaḅereghian Mozis kụ a Mozis ạlhom bọ a Jehova mọ aakonhom Miriạm, a Jehova amhegheron ika? Ọdi ólhom ogheelhom ọoruen phọ ọdi masophonhaan bọ Miriạm. Loor ịduon a Jehova asooromhi bọ loor, ọdi ạnhaghan ni ịlom mọ a Mozis, kụ aakonhom Miriạm.—Num. 12:1-15.

⁷ A Jehova aḍeenhaan kẹn osooromhi aloor eten phọ ẹpe ọdi ạzoom bọ Uwo ẹmha phọ Hẹzẹkịạh. Dị eego esi oyil phọ ọdi, a Jehova ạḅenhi Hẹzẹkịạh mọ ọdi kamugh ni mọony amem. R’emoghi ạ Hẹzẹkịạh ạlhom ni a Jehova ookonhom ọdi. R’ọnma ighirigiir a Jehova ạnhaghan ni ịlom mọ ọdi kụ ạḅaram ịnhon a 15 ạsia sịphe aghuḍum mọ ọdi. (2 Ki. 20:1, 5, 6) Ii, osooromhi aloor anyu ni a Jehova oḍeenhaan igbiririph r’ọsighe ghan ịlo ạbunhon ọghaaph.

8. Ngọ reḍeenhaan dị ẹma emiteom mọ a Jizọs rạnaghanhan ghan ni sịdol awe? (Mạk 3:1-6)

⁸ A Jizọs ạtuughaany Ọde phọ Ọdi. Mem mọ ọdi ạrol bọ sịen ade phọ, a Jizọs ọ́wilhe ghan oḍighi ghan iiḅi bụnhon mem lọ ẹwa. Esi ọmaam, ọdi aakonhom ghan ni we ḍio ophooghian phọ, ghạlhamo r’ịduon awe a Ju phọ ọmhoogh bọ ịgbagara arokpom ọkparagha ghan bọ osophoghom ọdi. (Bạl Mạk 3:1-6.) A Jizọs ạkiom ni ghisigh raḍeenhaan ghan ọnhaghanhan r’igbiririph esi eten phọ ọdi rạaḅaki bọ ookpomhoghan ạ Krịstẹn phọ. Esi ọmaam, mem dị oye sịen ookpomhoghan phọ aḍighi igbogh ịkaraph, r’ọkparam ọdi rạngo ghan ni oye phọ mem okiton.—Ogan. 2:2-5.

9. Ika kụ ịdi yira koḍeenhaan mọ yira rọnaghanhan ghan ni sịdol ạbunhon? (Mịin kẹn sifoto phọ.)

⁹ Ika kụ ịdi yira kọtuughaany a Jehova? Ẹwa dị yira kọnaghanhan ghan sịdol awe ịdipho a Jehova. (Jems 3:17) Esi ọmaam, ạburude r’aburunhiin dị rọtuughaany ghan a Jehova rógon ghan dị ạnmuny phọ ạbidi koḍighi rạraar dị bịdi kótue oḍighi. Egey eḍeenhaan ẹphen phọ pọ a Jekọb. Ọdi ạatughian ni ịlo ạnmuny phọ ọdi kụ agbi bọ osopha oḍighi ịpe edi bọ Genesis 33:12-14. Ạburude r’aburunhiin dị rọnaghanhan ghan nmụny ạbidi kọ́sighe oniin ọḅumoony ạbidi ọtomaam bụeripho. Ẹwa kẹn dị ikumor awe arookpomhoghan phọ kọnaghanhan ghan bụnhon. Eniin eten dị bịdi kotue oḍighi ịduon phọ pọ ọsighe aani ghan ạḍiitughian ạbunhon ikumor awe eḍighi mạar dị ị́gbagh sịnhi iilhogh ạ Bạịbul. (1 Tim. 3:2, 3) Oomo phọ ayira ọkparagha ghan ọsighe aani ghan ạḍiitughian ạbunhon ghạlhamo ịgbatanhaan ni r’ịlo ayira. (Rom 14:1) Ii, tọrobo oye sịen ookpomhoghan phọ ạkparagha ni oḍighi ịdi “oomo awe kọmiin eeḅi ẹzo” phọ ọdi.—Fil. 4:5.

AJEHOVA ẠMOOGH ỌKPARAM

10. Ịghen areten kụ ẹdi a Jehova maḍeenhaan ghan ọkparam?

¹⁰ Rẹ́ḅeraan ghan we dị ophoophe loor dị awe koobinyemhi bịdi. Ophoophe aloor phọ ạbidi raḍighi ghan ịdi bịdi rótue ghan kọkparam okori ịyaar. A Jehova ọ́rol ịdipho. Ọdi kụ oye dị ạmhoogh ọkparam apu tọrobo oye! Esi ọmaam, siḍio phọ a Noa, a Jehova ạḅem mọ ọno kakori ni 120 ạsia kụ agbi ophiemhi ọkaraph aḅirinhi amem mọ ạmuphe phọ. (Gen. 6:3) Ịphen phọ ịngo ni Noa mem ookonhom ạmnuny phọ ọdi ḅịlhe r’ọka oghuugh phọ r’ọlhoghonhaan ạḍighaagh eghun otu phọ ọdi. Kụ mem mọ Ebrạhạm, ọokpaany dị ạmheera enye a Jehova ạkparam ni alher rụru ạngo sipuru phọ Ebrạhạm apuru yogh bọ ịlo amuphe phọ ạ Sọdọm rạ Gomora. Oye dị aphoophe loor mụḅenhi ni Ebrạhạm mọ, ‘Ṇa ọ́mhoogh elhiom opuru ạmhi sipuru pho ịphen!’ Kụolo orue ọtuughaany a Jehova, ọokpaany phọ ạkparam ni ạphanyanhaan oomo asipuru phọ Ebrạhạm.—Gen. 18:20-33.

11. Ọdaphan 2 Pita 3:9, eeghe kụ iḍighi kụ a Jehova raḍeenhaan bọ ni ọkparam sịen amem mọ ayira?

¹¹ R’osooromhi aloor, a Jehova raḍeenhaan ni ọkparam sịen amem mọ ayira. Ọdi ạkparam ni rakori mem mọ ẹkpeanhaan bọ osiemhi eekunha aḅirinhi phọ ọphon phọ. Uḍighi ika kụ ọdi ạkparam bọ rakori? Loor esi dị “ọdi ọ́wa ophiemi rꞌoniin oye, ọdi rạwa ghan ghụn mọ oomo phọ awe phọ okiton esi ịkaraph phọ ạbidi.” (Bạl 2 Pita 3:9.) Ọkparam mọ a Jehova rape ni oopho ḍụghum? Eeye! Irubal awe dị ọmhoogh iiḅi arokpom moḍighi rịghiri ọdi. Kụ yira ọduom ni olhoghi mọ ạbunhon irubal koḍighi aani ni iginha phọ. Tọrobo ịpe ẹrol bọ, ọkparam mọ a Jehova ạmoogh ni esi dị ạkpo ukpe. A Jehova ạpomoghian we, kụolo ọdi ọ́ngo ẹereegh we oḍighi yogh ịlo ẹḅeraan bịdi. Ọdi kámera ẹkaraph eḍighinhom ịyaar ẹrol k’agee-pọ.—Hab. 2:3.

12. Ika kụ ịdi a Jizọs rạtuughaany bọ ọkparam mọ a Jehova?

¹² A Jizọs ạtuughaany Ọde phọ Ọdi. Esi ạsimuonir ạsia, a Jizọs mạtuughaany ni ọkparam mọ a Jehova. A Jizọs ạmhiin ni mem mọ a Setạn ạgbaaghiom bọ ọkpe a Jehova r’ạrebenhe phọ ọdi ọkpe bọ oḍuom olhoghi. (Gen. 3:4, 5; Job 1:11; Ogan. 12:10) A Jizọs ạmhiin kẹn ịmhinhimhiin kịrokiro dị awe rọmiinhom. Gbiom olhoghi ịpe ẹphu bọ Jizọs “Ophiemi iiḍighi phọ Eru”! (1 Jọn 3:8) Eeghe kụ ịlhoghonhaan bọ ḍịghaagh Jizọs ọkparam okori amem mọ a Jehova kạḅenhi bọ nyọdi ophiemhi iiḍighi Eru phọ ọmhadan? Loor esi dị a Jizọs asooromhi loor, ọdi ạlogh elhegh mọ oginha a Jehova bịn kụ katue ạma mem dị ẹkpeanhaan oḍighi ịduon phọ.—Iiḍ. 1:7.

13. Ika kụ ịdi a Jizọs aḍeenhaan ọkparam esi abutelhedom mọ ọdi, kụ eeghe kụ iḍighi?

¹³ Mem mọ a Jizọs ạrol bọ sịen ade phọ, ọdi ạmhoogh ghan ni ọkparam ạghi esi abutelhedom mọ ọdi. Esi ọmaam, mem mọ abutelhedom mọ ọdi ọogbakian ghan bọ ịlo oye dị aḍighi ogbogh sịphe igbo phọ ạbidi, a Jizọs ọ́wilhe oḍuom ạbidi olhoghi. Ọdi ạmhoogh ni ọkparam ạghi esi ạbidi. (Luk 9:46; 22:24-27) Ọdi ạmhoogh ghụn oḍuom olhoghi mọ ẹsighe rẹki bịdi konmia ni. Nạ mạpioman ghan ni eniin phọ ịyaar phọ ịbadi amem ḍụghum? Eḍighi ịdipho, pọ olhoghi ạna kạkar kụ ạḅaal ịduon nạ ạmhoogh bọ Ọtooghia dị asooromhi loor ạḅilhe ạmhoogh ọkparam.

14. Eeghe kụ kịlhoghonhaan iyira ḍịghaagh ọbughe ọkparam mọ ayira?

¹⁴ Ika kụ ịdi yira kọtuughaany a Jehova? Eḍighi mạar dị yira ọḅoph ịitughian rạ Krạịst, pọ yira kotue ni ọotughian ghan ọḅilhe ọzo ịdipho a Jehova. (1 Kọr. 2:16) Ika kụ ịdi yira kolegheri ọkar ịitughian phọ ạ Krạịst? Osoph osoor ólho. Yira ọmoogh ạal ghan ạrinya ạ Bạịbul phọ ẹghaaph bọ ịlo iiḍighi phọ ọdi oghol bọ mọ Gospels. Kụ mem dị yira rọbal, ọlhogh ghan mem ogbirima ghan ịlo ịyaar phọ a Jizọs aḍighi bọ r’ephigh phọ ọdi ạtu bọ kụ aḍighi. Ọḅaram ịsiphe, ọlhom a Jehova ọlhoghonhaan ạḍighaagh ọtuughaany eten ịitughian phọ a Jizọs eḍeenhaan bọ osooromhi aloor r’ọkparam mọ ọdi. Ịduon yira rọlogh bọ ikuph ọḅoph ịitughian rạ Krạịst, yira kọtol aani ịdipho Ẹnhaan esi oḍeenhaan ghan ọkparam loor phọ ayira ḅịlhe r’abumor r’abumaranhi phọ.—Mạt. 18:26-30, 35.

A JEHOVA RAKUENHI GHAN NI BỤPHE OSOOROMHI BỌ LOOR

15. Ngọ reḍeenhaan ịdi a Jehova ạtuugh ni raḍighi ikpo ọnhu phọ edi bọ Psalm 138:6?

¹⁵ Bạl Psalm 138:6. P’eeghe ịdi olhoghi ayira ạḅaal ịduon Uwo Ẹmhoogh Ịtooghi Oomo aḅirinhi phọ rạlogh ghan bọ elhegh bụphe osoorom bọ! Ọoḅeghion reḍeenhaan awe dị a Jehova aghuenhi rukuron ạsia ẹpe ọmhan. Ịbadi ạbidi káwe dị yira rọotughian ghan, ghạlhamo r’ịduon phọ ni, ạ Bạịbul phọ ạkaaph ni ịlo ạbidi. A Jehova aphum ni Mozis ọge aani ịsiphe ạ Bạịbul phọ ḍien oobia dị oghol mọ Debora, dị ạrol aani r’awe phọ Ẹnhaan iḍiodi phọ. Ọdi akumuan ịdipho oobia sịphe eghun otu phọ Ạịzik r’eghun otu phọ a Jekọb esi 125 ạsia! Ii, yira úlegheri ạnhir phọ ọphon phọ ḅịlhe r’iboom arukumuan phọ ọdi, kụolo a Jehova ạmhiin ni mọ ọge ni sịphe ạ Bạịbul phọ ịdi ạnhir phọ ọphon phọ ạmhan mạar. (Gen. 24:59; 35:8.) Arukuron ạsia reten, a Jehova ạma ni Devid, ọḍoogh ọony dị aphogh ghan iyool ịga kụ aḍighi nyọdi Uwo ẹmha eelhe phọ Izrẹl. (2 Sam. 22:1, 36) Mem mọ ọmhar bọ Jizọs, a Jehova aghuenhi ni bupoghom iyool ịga esi orom ạruukpaany phọ ọdi ọghi ọphur ọḅenhi ạbidi mọ mọmhar a Mezạyạ phọ ẹpe Bẹtẹlẹhẹm. (Luk 2:8-11) Kụ mem mọ a Josẹf ra Meri ọsighe bọ Jizọs ọghimom sịphe otu ịiḅereghi phọ, a Jehova aghuenhi ni okumor oye phọ Simiọn r’okumor ạnhir phọ Ạnạ esi ọma Ọony phọ Ọdi oḍeenhaan ạbidi. (Luk 2:25-30, 36-38) Ii, “ghạlhamo r’ịduon a Jehova ạkel bọ ni kẹepe ạnyu, ọdi rạlogh ghan ni elhegh nyọpo asooromhi bọ loor”!

16. Ika kụ ịdi a Jizọs ạtuughaany eten phọ Ọde phọ ọdi rạzoom ghan bọ bụnhon?

¹⁶ A Jizọs ạtuughaany Ọde phọ Ọdi. Ịdipho Ọde phọ Ọdi, a Jizọs aghuenhi ni we dị ạbunhon ophogh osooromhi. Ọdi ạtughemhi ni “iḅar awe dị ḍịnya ụ́maar” igey phọ ịlo Ọmhar phọ Ẹnhaan. (Iiḍ. 4:13; Mạt. 11:25) A Jizọs aakonhom kẹn bụphe úmoon bọ eten dị eghuenhi bịdi. (Luk 5:13) Ḍughul phọ ạḍiphe ẹḅaal kokiigh bọ nyọdi, a Jizọs aḍighi ni ịyaar dị ẹbenhe kụ raḍighi ghan. Ọdi aatol ruwol abumatuan phọ ọdi. (Jọn 13:5) Kụ ḍio phọ ọdi kaḅulha bọ ẹpe k’ạke, Ọdi aghuenhi ni oomo ạbudapham mọ ọdi osooromhi bọ loor r’ạbuen arodon, esi ọngo ạbidi oḍighi dị ạmhan mạar apu ịnhon iiḍighi—oḍighi iphelhegbeel phọ kạloghonhaan bọ ḍịghaagh bụnhon ọmhoogh aghuḍum k’agee-pọ.—Mạt. 28:19, 20.

17. Ika kụ ịdi yira kotue okuenhi bụnhon? (Mịin kẹn afoto phọ.)

¹⁷ Ika kụ ịdi yira kọtuughaany a Jehova? Yira rokuenhi ghan we mem dị yira ọghaaph iiḅi ịinhaghan phọ ọḅenhi oomo ạbulo rọwa ọnhaghan etigheri sịdol phọ ạbidi, ḍizu, ọbobo askul dị bịdi ọghi. Kụ yira rokuenhi ghan bumor r’abumaranhi phọ ayira mem dị yira ọsighe mọ bịdi kupu iyira etigheri olhegheri ịyaar r’aroopoogh arukumuan dị yira ọmhoogh sịen ookpomhoghan phọ. (Fil. 2:3) Olhoghi a Jehova rạḅaal ghan agey mem dị yira osooromhi loor kụ ọphur oghuenhi ghan oniin atum nyoniin reten phọ ịphen phọ r’ịnhon areten.—Rom 12:10; Zeph. 3:12.

18. Eeghe kụ iḍighi kụ nạ rạwa bọ osooromhi aloor ịdipho a Jehova?

¹⁸ Ịduon yira roḍighi bọ oomo ịpe yira kotue bọ ọtuughaany osooromhi aloor Ọde k’ạke phọ ayira, yira koḍighi ni we dị odugh ọḅaanhaan, we dị rọnaghanhan ghan sịdol ạbunhon, ḅịlhe ọmhoogh ọkparam. Kụ yira kokuenhi ghan kẹn bụnhon ịdipho a Jehova. Eḍighi ịdi ikuph phọ yira rọlogh bọ oḍuraan otuman Ẹnhaan osooromhi aloor phọ keḍighi ịdi yira kọkiom ghisigh ọman mạar esi Ọdi!—Isa. 43:4.