Omiteom Asividio Ophamhạm Ookpomhoghan Eephugh 2020 “Ibo Ghan”!

Asividio phọ ophamhạm bọ ookpomhoghan eephugh phọ ayira ikạr kụ etir rokpom mọ ayira, kụ ilhoghonhaạn kẹn ni iyira ḍighaạgh onhaghanhạn igey aBaibul phọ. Usighẹ 114 asividio kụ ophamhạm bọ Ookpomhoghan Eephugh a2020 phọ “Ibo Ghan”!, iphẹn phọ eḅarạm ni 43 araghaạph phọ abumor phọ oḍighi bọ Loor Phọ Repogh Bọ r’abulọgh ḍighaạgh ph’abidị ongọ bọ. Eeni nạ raatughiạn ghan ni onhụ amalhiom r’inyaạm dị esighẹ oḍighinhom asividio phọ.

Ọ, abumor r’abumaranhi dị r’omạn ni 900 kụ ulhọgh mem r’asighalhanyạ abidị omiteom asividio phọ. Oḅophoghị, 100,000 awạ kụ edị bidị olhọgh esi eedoọny amem dị emhạn ni iyạl asiạ orue omhạn oḍighi phọ ophọn phọ. Ipẹ phọ eḅarạm ni 70,000 awạ phọ ewạ bọ m’osighẹ oḍighinhom egberi aBaibul phọ emhạn bọ 76 ikalhạ, oghol bọ mọ, Nehemiah: “Ibo Phọ AZihova Kụ Esi Oghoph Phọ Anyinha.”

Iduọn nạ alhegheri bọ ni, imhoghi ni malhiom ophoghom abuẹn omiteom bọ loor oḍighi oḍighi phọ. Kụ amalhiom arọl kẹn ni omhoọgh ikpamhaghinheẹn phọ, r’araraạr arukumuan phọ, ḅilhẹ r’esi phọ kotọl bọ okumuan.

AJared Gossman, oniin odị rakumuan aani ghan gạ ilọ Onhaghanhạm Aroḍọgh/⁠r’Asividio aḅẹm mọ: “Ekụ Itughemhị Aloor Phọ Repogh Bọ omoọgh ni ḍiḅeeraạn dị asividio phọ ayirạ kepạm aani ghan iḍighinhom araraạr arikpisi kirokirọ. Ipẹ keḍeenhaan bọ mọ oomo ayira oḍighi oniin oye siẹn oomo aḅirinhi phọ.” Kụ aḅarạm mọ: “Orue oteẹny aḍiigbu phọ aḍiẹn phọ, 24 akirokirọ odọ arugu awe kụ edị omiteom igbo 11 areelhe oḍighi oḍighi phọ. Oḍighi phọ ophọn phọ amhoghi ni malhiom, oḅoonhomhị ḅilhẹ r’ookpomhoghi araraạr emạ eten.”

Ibadị asividio phọ ayira remoghi ghan raraạr r’edeọm dị egbatanhaạn oḍighinhom. Esi omaạm, edeọm ilọ egberi ph’oghol bọ mọ Nehemiah: “Ibo Phọ AZihova Kụ Esi Oghoph Phọ Anyinha” uukolhobian siphẹ Mt. Ebo, esi phọ roḍighi ghan bọ sividio phọ etuman bọ Patterson, New York, U.S.A. Orue omhaạr oḍighinhom iisogh phọ, kụ eniin phọ amem mọ oḍighi idị edeọm araraạr phọ k’ekịgh ipẹ erọl bọ pạ Jeruselem, abumor phọ usighẹ ni ireeny dị eephoogh okaaghiọm rokpooghi. Kụ osighẹ sifom okpeom rokpooghi phọ, kụ ogbi osighẹ agbạ ogbul, dị kekịgh sighiigh iikpe aJeruselem. Iikpe phọ iphẹn phọ bidị okaaghị bọ imhạn ghan iraạr akuḅu anyụ. Usighẹ ghan iikpe phọ iphẹn phọ kụ oḍighinhom ibadị asiikpịgh avidio phọ, ipẹ phọ ighomhe ni onhụ abạl arikpisi phọ mukị bọ oḍighi vidio phọ. Ghalhamọ r’iduọn phọ ni bịn, ikpoki dị remạn ni $100, 000 (U.S) (₦38,500,000) kụ edị olheom oḍighinhom egberi phọ bịn.a

Olhegheri araraạr ilọ esi r’esi ipẹ ookolhobian bọ edeọm ookpomhoghan eephugh phọ kebughẹ ni osereghiạn phọ yira omhoọgh bọ. Yoor okuphom ni owol m’ikuph phọ olhọgh bọ omiteom edeọm mọ ephẹn phọ keḍighi ni idị oomo ayira kolọ ḍiolọ iiseeny okiọm aZihova. Yoor rosẹph ni nyinhạ ipẹ nạ asogh aani bọ angọ ilọ arukumuan oomo isiẹn aḅirinhi phọ dị eego esi donate.jw.org ḅilhẹ r’inhọn areten.