A Jehova Ạngo Sạmsịn Ịikpo

Ịbadi awe Izrẹl ụḅilhe ni omhiigh ọoḅereghi ịkaanheen ạrumhugh. Esi ịduon phọ, a Jehova amheera dị awe a Filistia kọmiinhe bịdi. Kụolo abuniin awe Izrẹl ụrol li dị ọphomhoghian a Jehova. Oniin oye dị ạphomhoghian a Jehova ughol mọ Mạnoa. Ọdi r’ạnhir ọdi ụ́moogh ọbumoony. Ḍiniin aḍio, a Jehova arom ni ọokpaany ọghi ọḅenhi ạnhir ạ Mạnoa mọ: ‘Nạ kạmoogh ni mọony olhephiri. Ọdi kụ kạpel we phọ Izrẹl ạsighe ḍịghaagh awe a Filistia phọ. Ọdi kaḍighi ọnyo ạ Nạzạrạịt.’ Ạ Nạzạrạịt phọ pọ ạbuo ạnhian? Bịdi uḍighi rẹbenhe a Jehova dị okumu ghan nyọdi eten dị ẹgbatanhaan. A Jehova ạḅenhi Nạzạrạịt phọ mọ bịdi kụ́sam ghan sịlhaal ẹmhu ạbidi.

Ịduon amem rẹki bọ, bịn ạnhir ạ Mạnoa ạmhar olhephiri ọony kụ oghol mọ Sạmsịn. Mem dị ạ Sạmsịn ạmhanham, a Jehova aḍighi ni ịdi ạ Sạmsịn ạmhoogh ịikpo. Ạ Sạmsịn ạmhoogh ni ịikpo dị katue akiigh idimini ḅụagu r’ạraghaagh ọdi. Ḍiniin aḍio oginha ạ Sạmsịn ạze ni 30 awe a Filistia, kụ awe a Filistia phọ ọlhogh nyọdi ḍien ọḅilhe ọwa ghan reten oghiigh ọdi. Ḍiniin aḍughul dị ạ Sạmsịn ạmhina Gạzạ rạnaanhi, awe a Filistia phọ ụghi ni sịphe ọnhu aḍibuo ẹmha phọ okori ghan Sạmsịn pịdi okiigh nyọdi ḍịroor. Kụolo ogbo aḍughul, ạ Sạmsịn aḅetenhu ni ạghi sịphe ọnhu aḍibuo ẹmha phọ ạkpoton eghuugh ọnhu aḍibuo ẹmha phọ kụ ạḅam rụpha ọdi kụ anyeenhiom ẹeḅaraph dị etuman Hẹbrọn.

Ẹsighe rẹki, awe a Filistia phọ ụghi ni ọteeny ọnyanhi dị ạ Sạmsịn rạwa ophin dị oghol mọ Dilạịlạ, kụ ọḅenhi mọ: ‘Yoor kọkpe nyịnha iboom ikpoki eḍighi mạar dị nạ ạwa alhegheri ịyaar phọ eḍighi bọ kụ ạ Sạmsịn ạmhoogh bọ iboom ịikpo. Loor esi dị yoor rọwa osiph ọdi ọlhogh ikoli.’ A Dilạịlạ amheera ni loor esi dị rạwa ikpoki phọ. Ẹḅel amem mọ, ạ Sạmsịn ómheera ọḅenhi nyọdi ịyaar phọ eḍighi bọ kụ ọdi ạmhoogh bọ iboom ịikpo. Kụolo a Dilạịlạ ạghiom ni ghisigh ạaḅaghamhi ghan Sạmsịn tụtu ạ Sạmsịn ạḅenhi nyọdi mọ: ‘Sịlhaal ẹmhu ạmhi kọ̋sam ghan loor esi dị mị ọnyo ạ Nạzạrạịt. Eḍighi mạar dị ọsam sịlhaal ạmhi, pọ ịikpo phọ ạmhi kẹḍua.’ Ịduon ạ Sạmsịn ạḅenhi bọ a Dilạịlạ ịyaar phọ eḍighi bọ kụ ọdi ạmhoogh bọ ịikpo phọ ketue ni ẹlogh nyọdi esi ịiḅaghamhi, kị̋dipho?

Eginha amem bịn, a Dilạịlạ ạghi ạḅenhi we a Filistia phọ mọ: ‘Mị malhegheri ịyaar phọ eḍighi bọ kụ ọdi ạmhoogh bọ ịikpo phọ!’ A Dilạịlạ aḍighi ni ịdi ạ Sạmsịn ạmhinha rụgbo ọdi ạnhaanhi, kụ ạḅenhi oye mọ aru ạsam sịlhaal ẹmhu phọ ạ Sạmsịn. Rọsam kụ a Dilạịlạ ạlo mọ: ‘Sạmsịn, awe a Filistia phọ moru!’ Kụ ạ Sạmsịn aḅetenhu, kụolo ịikpo phọ ọdi mẹḅua. Awe a Filistia phọ usiph ni nyọdi, oḅomoghi riḍien ọdi kụ ọsighe ọlhogh ikoli.

Ḍiniin aḍio, ạsimuunir awe a Filistia uukpomhoghan ni esi dị bịdi rọtol ghan kọoḅereghi ẹmhugh ạbidi dị oghol mọ Degọn, kụ ọlo mọ: ‘Ẹmhugh phọ ayira meḍighi ịdi yira mosiph Sạmsịn! Ịsighe nyọdi emiteom, ọdi aḍighi ịdi yira kọmilhogh.’ Bịdi ụsighe Sạmsịn ọmheremhi esi dị ịyal igbogh ạroko otu phọ edi kụ ọmilhogh ghan nyọdi. Ạ Sạmsịn ạaḅereghi ni ạḅenhi a Jehova mọ: ‘Seseeny Jehova, ḅịlhe ụngo ịmhi ịikpo nyịidipho bịn.’ Mem mọ ạmuphe phọ, ạsilhaal ẹmhu phọ ạ Sạmsịn mẹḅilhe esi. Kụ ọdi anyu ịyal phọ ạroko phọ ẹpham bọ otu phọ r’oomo ịnyaam ọdi. Kụ otu phọ amhelheghu ạze oomo awe phọ ọrol bọ sịphe otu phọ rạ Sạmsịn.