Ogbogh Ọnyo Ẹgham R’ọbam Ọnyanhi Ọlo Izrẹl

Oniin ọbam ọnyanhi ọlo Izrẹl ạrol li ẹnhon eelhe dị ẹkelhan de phọ Izrẹl dị oghol mọ Siria. Aweye a Siria phọ kụ usiph nyọdi mem dị ọghi ozuom we phọ Izrẹl ẹgham. Nyịidipho ọdi aḍighi ọnyanhi otu ạnhir ogbogh ọnyo ẹgham ọlo a Siria, dị oghol mọ Nemạn. Ọbam ọnyanhi phọ ạaḅereghi ghan ni a Jehova, ghạlhamo r’ịduon odi bọ r’awe dị a Jehova rọ́oḅereghi ghan.

A Nemạn ạmhoogh ni ẹgbagara ẹzegh dị ẹngo ghan nyọdi eephinha mem mem mem. Ọbam ọnyanhi ọlo Izrẹl phọ ạkar kụ ạwa ọlhoghonhaan ọdi ḍịghaagh. Esi ịduon phọ, ọdi ạḅenhi ạnhir a Nemạn mọ: ‘Mị alegheri ni oye dị katue aakonhom olom mọ ạna. Oyil a Jehova dị oghol mọ Ẹlạịsạ odi ni ẹpe Izrẹl. Ọdi katue ni aakonhom olom mọ ạna.’

Ạnhir phọ a Nemạn ạḅenhi ni olom ọdi ịpe ọnyanhi phọ ạghaaph bọ. Kụ loor ịduon a Nemạn rạwa bọ ni oye dị kaakonhom nyọdi, ọdi anyeenhe ni ọghi ọteeny Ẹlạịsạ ẹpe Izrẹl. A Nemạn agbi ghan mọ Ẹlạịsạ kụ kamite ạmiin nyọdi ịdipho ogbogh oye dị ạmhan mạar. Kụolo Ẹlạịsạ arom ghụn ẹbenhe ọdi ọghi ọmhagh a Nemạn rọḅilhe ọḅenhi mọ: ‘Kịa ẹpe Ọphiiny ạ Jọdạn aḍiiny ạsoghoronhu oḍual amem. Bịn nạ kaḍum ni.’

Ịpe Ẹlạịsạ aḍighi bọ ị́ḅeraan Nemạn. Ọdi ạḅem mọ: ‘Mị ugbi ghan mọ oyil phọ ọphon phọ katu ụḅogh ịmhi, kụ ạmagh ḍien Ẹnhaan phọ ọdi pịdi ẹzegh phọ ạmhi ẹḍua. Kụolo ọdi rụḅenhi ghan ịmhi ọghi ọphiiny Izrẹl. Ạriphiiny a Siria kụ ịnighe ipu rịphiiny Izrẹl. Uḍighi ika kụ ọdi ịmhi ụ́ḅenhi bọ mọ mị ụki ẹpe kụ aḍiiny?’ Loor esi ọghagh olhoghi, a Nemạn amite ni sịphe otu phọ Ẹlạịsạ anyeenhe ọḍua.

Ạrebenhe phọ a Nemạn ụlhoghonhaan ni nyọdi ḍịghaagh oolemhi ịitughian phọ ọdi. Bịdi upuru nyọdi mọ: ‘Ịyaar edi ni dị ọḅenhi nyịnha mọ ḍighi pịdi nạ amoon dị nạ káḍighi? Ịyaar phọ oyil phọ ạḅenhi bọ nyịnha oḍighi edugh ni. Ḍighi ịpe ọdi ạḅenhi bọ nyịnha.’ A Nemạn ạnhaghanhan ni bịdi. Kụ ọdi ạghi ẹpe Ọphiiny phọ ạ Jọdạn aḍiiny oḍual amem. Ịduon aḍiiny bọ omhunhenhiom oḍual amem mọ ạsoghoronhu bịn amhoon. Olhoghi ọdi ạḅaal li iboom kụ aḅula ọseph Ẹlạịsạ. A Nemạn ạḅenhi Ẹlạịsạ mọ: ‘Nyịidipho mị mạkar alegheri mọ a Jehova bịn kụ egey Ẹnhaan phọ.’ Nạ ragbi mọ ịrol ika esi ọbam ọnyanhi ọlo Izrẹl phọ, mem mọ a Nemạn arigheel bọ r’aloor dị memhoon?