A Jehoạịdạ Aḍeenhaan Ạkpo Oḅio

A Jẹzịbẹl ạmhoogh ni ọnyanhi dị oghol mọ Ạtạlạyạ, dị ạmhoogh aani rọozo dị eeph ịdipho ọdi. Ạtạlạyạ aḍighi ạnhir oniin uwo ẹmha a Judia. Mem dị olom Ạtạlạyạ amhugh, ọony ọdi aḍighi ni uwo ẹmha. Kụolo mem mọ ọony phọ ọdi amhugh bọ, Ạtạlạyạ amhiigh ni ọtooghi a Judia, kụ ạze oomo awe dị ọmhoogh elhiom ọtooghi sịphe Judia, ghạlhamo r’ạnmuny ạnmuny ọdi. Ịphen phọ iḍighi ịdi awe phọ omhiigh oghiilhaan Ạtạlạyạ.

Uwo ẹmhu Ạbupinyon rịkia phọ a Jehoạịdạ r’ạnhir ọdi a Jehosebạ, ulhegheri ni mọ ịpe Ạtạlạyạ raḍighi bọ ị́nighe. Kụ ọlhogh ghuḍum ạbidi esi ooto r’osooromhinheen esi ạaghi kụ ọḅilhe ookonhom ọbumoony ọony Ạtạlạyạ dị oghol mọ Jehoạs sịphe otu ịiḅereghi phọ.

Mem dị a Jehoạs ạmhan oḍual ạsia, a Jehoạịdạ aakpomhoghi ni oomo abuḍiemhiom mọ r’ạbuo a Livạị phọ kụ ạḅenhi mọ: ‘Ịmeera sịphe ọnhu aḍibuo arughuugh otu ịiḅereghi phọ, kụ kémeera oye aḍigh!’ Kụ a Jehoạịdạ azu a Jehoạs eghoony aruwo ẹmha phọ. Mem mọ awe phọ a Judia ọmhiin bọ uwo ẹmha phọ, bịdi ụlo mọ: ‘Uwo ẹmha ayoor, tọl li abia!’

Mem dị Ạtạlạyạ, aḍighi bọ ukuenhi phọ ạnhaghan bọ ịpe awe phọ ọyughuron bọ, ọdi aghiil li ạghi ẹpe otu ịiḅereghi phọ. Kụ rọmhiin omhoom uwo ẹmha phọ, kụ ạlo mọ: ‘Awe phọ ạbuen phọ mụgbagharan ịmhi! Bịdi mụgbagharan ịmhi!’ Abuḍiemhiom mọ usiph ni ọkaraph ukuenhi phọ omiteom kụ oghiigh nyọdi. Kụolo kọkaaph ika ịlo ịkaraph ạraraar phọ ọdi mạtughemhi bọ eelhe phọ?

A Jehoạịdạ ạlhoghonhaan ni eelhe phọ ḍịghaagh oghiran ịyo ra Jehova, mọ bịdi kọoḅereghi oginha ọdi bịn. A Jehoạịdạ aḍighi kẹn ni ịdi bịdi olhereghi otu ịiḅereghi phọ a Bel kụ ọḅilhe oḅomoghi ịkaanheen ạrumhugh phọ. Ọdi ạma kẹn ni bụpinyon rịkia r’awe eghun phọ a Livạị dị koḍighi ghan oḍighi sịphe otu ịiḅereghi phọ pịdi awe phọ ọḅilhe ọoḅereghi ghan a Jehova sịphe phọ. Ọdi ạḅilhe kẹn ni ạma we dị kokori ghan otu ịiḅereghi phọ pịdi awe dị ụ́ḅaal koḍigh. Ịpe reten kụ a Jehoạịdạ r’abuḍiemhiom mọ ọsighe a Jehoạs ọghi sịphe otu uwo ẹmha phọ kụ ọrolhomhi nyọdi ạgada uwo ẹmha phọ. Nyịidipho Ạtạlạyạ phọ aḍighi bọ ọkaraph ukuenhi, r’ịiḅereghi a Bel ílo mụn. Kụ awe phọ kotue ni ọoḅereghi a Jehova eten dị ẹḅaal. Ịphen phọ iḍighi ni ịdi ilhoghi awe phọ a Judia ẹḅaal. Ạkpo oḅio phọ a Jehoạịdạ ạlhoghonhaan ni ḍịghaagh eelhe phọ a Judia.