ESI ỊTUUGHA PHỌ 64
Ạ Dạnịẹl Odi Sịphe Ooni Idimini Ḅụagu Phọ
Oniin oye ọlo a Midia dị oghol mọ ạ Dạrạịọs amhiigh ni ọtooghi ạ Bạbịlọn. Ạ Dạrạịọs ạmhiin mọ ạ Dạnịẹl aḍighi oye dị ạgbatanhaan. Esi ịduon phọ, ọdi aḍighi nyọdi oḍiemhiom ikpolhom awe ẹmha phọ. Awe phọ ạbuen phọ ụlhogh nị ḍien Dạnịẹl kụ ọwa ghan reten oghiigh ọdi. Bịdi ulhegheri ni mọ ạ Dạnịẹl rạaḅereghi ghan a Jehova ịraar amem ḍio phọ. Kụ bịdi ọghi ọḅenhi Dạrạịọs mọ: ‘Uwo ẹmha ayoor, ọlhogh olhogh mọ tọrobo oye ạaḅereghi ghan oginha ạna. Kụ oye lọ ụ́daph olhogh phọ, kotoph osumeeny sịphe ooni idimini ḅụagu phọ.’ Ịpe bịdi ọghaaph bọ ịḅeraan ni Dạrạịọs, kụ amheeraam.
Ịduon ạ Dạnịẹl ạnaghan bọ omhoom olhogh phọ, ọdi ạghi ni aḍigh olhoghi otu ọdi kụ aghughuron rughuugh ookuugh phọ, kụ akpuḍian amhiigh ọoḅereghi a Jehova. Awe phọ ạbuen ọlhogh bọ nyọdi ḍien phọ ụmhiin ni dị ọdi rạaḅereghi, kụ oghiil ọghi ọḅenhi Dạrạịọs mọ: ‘Ạ Dạnịẹl ómheera ọdaph olhogh phọ. Ọdi rạaḅereghi ghan Ẹnhaan phọ ọdi ịraar amem ḍio phọ.’ Ạ Dạrạịọs ạphomhoghian ni Dạnịẹl, kụ iḍighi kụ ọdi ạwa ni reten ọphel ọdi. Kụolo ghạlhamo r’ọdi uwo ẹmha phọ bịn kátue anme olhogh dị ọdi mạlhogh. Esi ịduon phọ, ọdi amheeraam ni mọ oroph Dạnịẹl osumeeny ooni idimini ḅụagu phọ.
Ịpe emite bọ iḍighi ni ịdi ạ Dạrạịọs útue ụnaanhi ḍughul phọ ạḍiphe phọ. Mem dị ạḍiroor ẹḅaal, ọdi aghiil li ạghi sịphe ooni phọ, kụ ạlo mọ: ‘Dạnịẹl, Ẹnhaan phọ ạna ẹphel li nyịnha ḍụghum?’
Ạ Dạrạịọs ạnhaghan ni ẹḍogh ạ Dạnịẹl ẹpe olhoghi phọ dị ẹḅem mọ: ‘Ọokpaany a Jehova ạkasi ni rụnhu idimini ḅụagu phọ, bịn bịdi ịmhi íḍighi ịyaar.’ Ịphen phọ iḍighi ni ịdi olhoghi ạ Dạrạịọs ạḅaal, kụ ọdi ạngo ịto mọ ọsighe Dạnịẹl omiteom sịphe ooni phọ. Omiteom bọ Dạnịẹl, r’ịyaar íḍighi nyọdi. Kụ uwo emhạ phọ ạngo ịto mọ: ‘Ịsighe we phọ ọgbaaghiom bọ Dạnịẹl eroph esumeeny sịphe ooni phọ.’ Mem mọ oroph bọ we phọ osumeeny sịphe ooni phọ, idimini ḅụagu phọ ịphanyi ni bịdi.
Ạ Dạrạịọs ạngo ni ịto we phọ ọdi mọ: ‘Tọrobo oye aghiilhaan ghan Ẹnhaan phọ ạ Dạnịẹl. Ọdi mạphel Dạnịẹl ạsighe ḍịghaagh idimini ḅụagu phọ.’
Ịdipho ạ Dạnịẹl, nạ rạaḅereghi ghan ni a Jehova tọrobo aḍio ḍụghum?
“[A Jehova] ạmaar ri ọtophoron ghan aweye aruukuan omiteom esi ọdegh ophogh kịrokiro.”—2 Pita 2:9