Ipẹ Odeeghị Bọ Raraạr Siẹn Ookpomhoghan Akristẹn Phọ

AZihova o/ḍighi Enhaạn iwalhawalhạ. (1 Korịnt 14:33) Esi iduọn phọ, yira kogon ni omhiịn dị komaạr odẹ raraạr siẹn ookpomhoghan aKristẹn phọ. Ika kụ idị odẹ bọ raraạr siẹn ookpomhoghan aKristẹn phọ? Yira koḍighi aani eeghe pidị ookpomhoghan phọ amaạr ayọ akiọm ghisigh?

1. Anhiạn kụ oḍiemhiom ookpomhoghan phọ?

‘AKraist kụ amhoọgh ookpomhoghan phọ.’ (Efesọs 5:23) Odị odi epẹ k’akẹ kụ raḍiemhiom ghan iiḍighi awe phọ aZihova siẹn oomo aḅirinhi phọ. AZizọs amạ ‘ebenẹ phọ asụ bọ olhoghi aḅilhẹ akpẹ oḍuom olhoghi’—bidị oḍighi eẹny egu ikumor awe dị osilor, kụ olegheriom kẹn bidị idiphọ Aloor Phọ Repogh Bọ. (Ibạl Matiu 24:45-47.) Idiphọ abutelhedom mọ r’ikumor awe phọ orọl bọ oḅẹl okuron asiạ phọ epẹ Jeruselem, Aloor Phọ Repogh Bọ rongọ ghan ni iiḅakiọm rookpomhoghan phọ siẹn oomo aḅirinhi phọ. (Iiḍighi 15:2) Bidị ka/buḍiemhiom ookpomhoghan phọ. Bidị robạl ghan Baibul phọ komhiịn ipẹ aZihova rawạ bọ mọ bidị oḍighi, koḅilhẹ odaphạn ipẹ aZizọs atọ bọ.

2. Eeghe kụ oḍighi ikumor awe phọ?

Ikumor awe phọ oḍighi Kristẹn dị osilor. Bidị rotughemhị ghan we phọ aZihova ipẹ edi bọ siphẹ aBaibul phọ, kolhoghonhaạn bidị ḍighaạgh oḅilhẹ okparamhị bidị. Ro/kpẹ ghan bidị ikpoki oḍighi iphẹn phọ. Bidị roḍighinhom ghan “ophooph ologhi” dị u/tuạn omhoọgh ‘asuọ,’ kuolọ osighẹ ‘ḍiḅeraạn okumu Enaạn kụ roḍighinhom.’ (1 Pita 5:1, 2) Abumor odi ni dị rologhonhaạn ghan ḍighaạgh ikumor awe phọ, kuolọ esighẹ rekị bidị phọ kotue ni osianhaan oḍighi aani ikumor awe.

Aloor Phọ Repogh Bọ romạ ghan ni buniin ikumor awe phọ oḍighi abupoghom eghir. Bidị rokị ghan kophogh rookpomhoghan phọ okparamhị oḅilhẹ ongọ iiḅakiọm. Bidị ropogh ghan siigbu aBaibul phọ kụ komạ ikumor awe r’abuphẹ kologhonhaạn bọ bidị ḍighaạgh.—1 Timoti 3:1-10, 12; Taitọs 1:5-9.

3. Eeghe oḍighi kụ edị torobọ onyọ Ogbaanhaạn amhoọgh?

Torobọ onyọ ogbaanhaạn siphẹ ookpomhoghan phọ amoọgh oḍighi “oboom aḍien aZihova,” esi ophagharanhaạn aani ghan aḍipuru, omhoọr asuọr, ophạm aani inhọn iiḍighi mem dị ookpomhoghan, r’oḅilhẹ omite aani epẹ erugh phọ odaphạn sidọl phọ.—Ibạl Psalm 148:12, 13.

OLHEGHERI OBUGHẸ

4. AZizọs oyoghoyoghọ oḍiemhiom

AZizọs rumhạgh ghan iyira r’eenyuụm m’oghị esi odị. Ibạl Matiu 11:28-30, kụ eeḅeghiọn ḍipuru phọ aḍiẹn:

• AZizọs aḍighi eeghe odọ oḍiemhiom, kụ rawạ mọ yira omhiịn ika ipẹ odị raḍiemhiom bọ?

AVIDIO: Ikumor Awe Phọ Uḍighi Ni Iyaạr Omiteom Mem Dị Ade Ephiigha Epẹ Nepal (4:56)

ABaibul phọ akaạph ni ipẹ ikumor awe phọ kopạm bọ oḍighi phọ abidị.

Ibạl Isaiah 32:2 r’1 Pita 5:1-3, kụ eeḅeghiọn sipuru phọ iphẹn:

• Olhegheri mọ ikumor awe phọ rokparaghạ ghan olhoghonhaạn abunhọn ḍighaạgh idiphọ aZizọs etir nyinhạ ika?

• Ighẹn kụ inhọn areten dị ikumor awe phọ rotuughaạny Zizọs?

5. Ikumor awe phọ rotughemhị ghan dị eego esi eḍeenhaan

AVIDIO: Ikumor Awe Phọ Kụ Ropụr Ghan Kogbatạn Edạ! (7:39)

AZizọs aḍighi ni aḍeenhaan idị buphẹ ropogh ghan bọ we phọ Enhaạn kozọ ghan. Ibạl Matiu 23:8-12, kụ eeḅeghiọn ḍipuru phọ aḍiẹn:

• Eeghe ogbaranhaạn kụ odi igbo asiigbu phọ aZihova amaanhaạn bọ ikumor awe phọ r’idị nạ ramiịn esi abuḍiemhiom aruukụ iiḅereghị, kụ ipẹ phọ etir nyinhạ ika?

1. Ikumor awe phọ rokparamhị ghan siya abidị r’aZihova r’asiya eghunotu abidị r’aZihova

2. Ikumor awe phọ ropogh ghan oomo awe ookpomhoghan phọ

3. Ikumor awe phọ rogbor ghan koghaạph iiḅi iinhaghạn phọ

4. Ikumor awe phọ rotughemhị ghan we phọ. Bidị rologhonhaạn ghan ni ḍighaạgh ogbuurogh ariisi r’oḅilhẹ ophạm inhọn iiḍighi

6. Yira kotue ni okumuan r’ikumor awe phọ

ABaibul phọ ungọ ni iyira ephigh iyaạr otuạn okumuan r’ikumor awe phọ. Ibạl Hibru 13:17, kụ eeḅeghiọn sipuru phọ iphẹn:

• Eeghe kụ iḍighi kụ aBaibul phọ aḅẹm bọ mọ osooromhi loor ongọ buphẹ ruphogh bọ iyira? Nạ aloghoma aani ika ilọ iphẹn phọ?

Ibạl Luk 16:10, kụ eeḅeghiọn ḍipuru phọ aḍiẹn:

• Eeghe kụ iḍighi kụ emạn bọ maạr onhaghanhạn ghan ikumor awe phọ, ghalhamọ r’esi araraạr dị eghom ni?

OGHAẠPH OOKARAGH

AZizọs kụ raḍiemhiom ookpomhoghan phọ. Yira rosooromhi ghan loor kokumuan r’ikumor awe phọ loor esi dị bidị oyoghoyoghọ oḅilhẹ roḍighi ghan koḍeenhaan ipẹ bidị rutughemhị bọ iyira.

Ooḅula

• Anhiạn kụ oḍiemhiom ookpomhoghan phọ?

• Ikumor awe phọ rologhonhaạn ghan ika ḍighaạgh ookpomhoghan phọ?

• Eeghe oḍighi kụ edị torobọ oye dị raaseeny aZihova amhoọgh?

WAAGHỊ AMHIỊN

Miịn iyaạr dị eḍeenhaan mọ Aloor Phọ Repogh Bọ r’ikumor awe phọ omoọgh ni oboom ogbolhomaam okị esi aKristẹn ḍio arodon.

Okparamhị Abumor Phọ Osoman Bọ Isophoghom (4:22)

Miịn oḍighi dị abupoghom eghir roḍighi ghan.

Adọl Aghuḍum Opoghom Eghir Dị Odi Ekpisi Dị K/eghughuronhu (4:51)

Miịn oḍighi dị anmariịr siẹn ookpomhoghan phọ roḍighi.

“Abugbaanhaạn AZihova Omoọgh Ni Nmariịr Dị Oḅọgh Rukumuan Ongọ?” (The Watchtower, September 1, 2012)

Miịn idị ikumor awe phọ rolọgh ghan inyaạm okparamhị abuḅaramạ omheeraam mọ abidị.

“Ikumor Awe Ookpomhoghan Phọ—‘Rolọgh Ni Ḍighaạgh Obọ Yira Omhoọgh Ibo’” (The Watchtower, January 15, 2013)