EMHUOGHAẠPH ITUUGHẠ PHỌ 34
AḌUỌR 107 Eḍeenhaan Ephomhoghiạn Phọ
Idị Koḍeenhaan Ghan Ephomhoghiạn R’onmạ Ighirigiir Mem Dị Oye Aḍighi Ikarạph
“Enhaạn dị eego esi onmạ ighirigiir phọ odị rakparaghạ ghan olhoghonhaạn anạ ḍighaạgh dị nạ kakiton esi ikarạph phọ anạ.”—ROM 2:4 (NWT).
EGBON
Idị ikumor awe phọ rokparaghạ ghan olhoghonhaạn aḍighaạgh we dị oḍighi igbogh ikarạph siẹn ookpomhoghan phọ.
1. Eeghe kụ ketue emite mem dị oye aḍighi igbogh ikarạph?
SIPHẸ emhuoghaạph phọ eten bọ, yira utuughạ idị otelhedom mọ Pọl aphạm raghaạph oye dị aḍighi igbogh ikarạph siphẹ ookpomhoghan phọ arọl bọ Korịnt. Oḍighinhom ikarạph phọ o/meera okiton, esi iduọn phọ ugbatạn ni nyodị osighẹ igbo abumor phọ. Toroboiperolbọ, idiphọ esi aBaibul phọ okpasị bọ emhuoghaạph ituughạ phọ eḍeenhaan bọ, kotue ni ologhonhaạn ḍighaạgh buniin awe dị oḍighi ikarạph dị kokiton. (Rom 2:4) Ika kụ idị ikumor awe phọ kologhonhaạn buẹn phọ ḍighaạgh orue okiton?
2-3. Ewạ mọ oḍighi eeghe mem dị yira olhegheri mọ onyọ umor maḍighi igbogh ikarạph siẹn ookpomhoghan phọ, kụ eeghe kụ iḍighi?
2 Amem dị ikumor awe phọ olhegheri odọ ikarạph phọ kụ edị kotue ologhonhaạn ḍighaạgh oye phọ. Esi iduọn phọ yira koḍighi eeghe eḍighi maạr dị yira olhegheri mọ onyọ umor maḍighi igbogh ikarạph? Oḅenhị odị aghị ateẹny ikumor awe phọ pidị ologhonhaạn nyodị ḍighaạgh.—Isa. 1:18; Iiḍ. 20:28; 1 Pit. 5:2.
3 Yira koḍighi ika eḍighi maạr dị oye dị aḍighi igbogh ikarạph u/meera ukị uḅenhị ikumor awe phọ? Oghị oteẹny ikumor awe phọ oḅenhị pidị ikumor awe phọ ongọ nyodị olhoghonhaạn aḍighaạgh dị akpeanhaạn. Amem dị yira oḍighi iduọn phọ kụ edị yira roḍeenhaan mọ yira opomhoghiạn ni onyọ umor phọ. Oḍighinhom ikarạph dị u/kiton rapuẹ ghan siya phọ odị r’aZihova. Odị kaḅilhẹ kẹn ni apuẹ ḍien ookpomhoghan phọ. Esi iduọn phọ, ghalhamọ r’iduọn oḍighi iphẹn phọ i/dugh bọ ni, loor ephomhoghiạn phọ yira omhoọgh bọ oghị esi aZihova r’oye phọ aḍighi bọ ikarạph phọ, yira koteẹny ni ikumor awe phọ.—Ps. 27:14.
IDỊ IKUMOR AWE PHỌ KOTUE OLOGHONHAẠN ḌIGHAẠGH OYE DỊ AḌIGHI IGBOGH IKARẠPH
4. Eeghe kụ edị ikumor awe phọ kogbon mem dị ophạm raghaạph r’oye dị aḍighi igbogh ikarạph?
4 Mem dị oye siẹn ookpomhoghan phọ aḍighi igbogh ikarạph, aḍita ikumor awe phọ kụ rosaḅạr ghan iraạr ikumor awe dị kopạm raghaạph phọ. Kụ emoghi ni dị awe phọ abuẹn phọ kosooromhi loor oḅilhẹ olegheri okụ. Bidị olegheri mọ ghalhamọ r’iduọn bidị kologhonaạn bọ ni ḍighaạgh oye phọ okiton, ko/kpaariọm nyodị onmia. (Deut. 30:19) Bidị olegheri ni kẹn mọ ka/torobọ oye kụ kakiton idiphọ Uw-emhạ phọ Devid. (2 Sam. 12:13) Abuniin abuḍighinhom ikarạph ro/meera ghan kosighẹ olhoghonhaạn aḍighaạgh phọ aZihova. (Gen. 4:6-8) Toroboiperolbọ, iyaạr dị ikumor awe phọ ogbon pọ olhoghonhaạn aḍighaạgh oḍighinhom ikarạph phọ dị kakiton. Eeghe araraạr kụ keeḅakị ikumor awe phọ mem dị bidị ophạm raghaạph r’oye dị aḍighi ikarạph?
5. Eeghe iromoghiom kụ edị ikumor awe phọ kodạph mem dị bidị ophạm raghaạph r’oye dị aḍighi igbogh ikarạph? (2 Timoti 2:24-26) (Miịn kẹn afoto phọ.)
5 Ikumor awe phọ olegheri mọ oye phọ amạn ni maạr esi aZihova ghalhamọ r’iduọn maḍighi bọ igbogh ikarạph. (Luk 15:4, 6) Loor iduọn phọ, mem dị ikumor awe phọ rokaaphạn r’odị, bidị ko/ḅaanhaạn nyodị r’igbagarạ ikpo onhụ, ḅilhẹ ko/zoọm nyodị ekarạph eten. Bidị ko/miịn kẹn mọ amem mọ amuphẹ phọ eḍighi mem oopuru yogh oye phọ sipuru olhegheri ipẹ ekạr bọ emite bịn. Kparipẹ ghụn, bidị koḍeenhaan imạ araagharạ phọ edi bọ siphẹ 2 Timoti 2:24-26. (Bạl.) Ikumor awe phọ roḍeenhaan ghan ephomhoghiạn r’igbiririph loor esi dị bidị rowạ dị oye phọ kakiton.
Idiphọ abukoriom iyool igạ iḍiodi phọ, ikumor awe phọ roḍighi ghan ni oomo ipẹ bidị kotue bọ olhoghonhaạn aḍighaạgh oyool dị maphe (Miịn ekpịgh phọ 5)
6. Ika kụ edị ikumor awe phọ rokolhobian ghan ekpom abidị kụ ogbi oghaaphạn r’oye phọ aḍighi bọ ikarạph phọ? (Rom 2:4, NWT.)
6 Ikumor awe phọ ropụr ghan kooḅeghiọn iiḅakiọm mọ aZihova. Bidị rokparaghạ ghan otuughaạny eten phọ epẹ aZihova razoọm ghan bọ buḍighinhom ikarạph. Bidị kẹn olegheri ni ikpo onhụ phọ aPọl agẹ bọ mọ: “Enhaạn dị eego esi onmạ ighirigiir phọ odị rakparaghạ ghan olhoghonhaạn anạ ḍighaạgh dị nạ kakiton esi ikarạph phọ anạ.” (Bạl Rom 2:4, NWT.) Ikumor awe phọ olegheri ni mọ bidị oḍighi bupoghom dị odi eeḍiạn aKraist. (Isa. 11:3, 4; Mat. 18:18-20) Tutụ ikumor awe phọ kokị oteẹny oye phọ aḍighi bọ ikarạph phọ, bidị rolọm ghan ni aZihova olhoghonhaạn abidị ḍighaạgh pidị bidị otue ologhonhaạn oye phọ aḍighi bọ ikarạph phọ ḍighaạgh. Bidị rowaaghị ghan ni raraạr siphẹ aBaibul phọ r’arinyạ ookpomhoghan phọ. Bidị rooḅereghị ghan kẹn kolhọm olhoghonhaạn aḍighaạgh aZihova pidị bidị otue onaghanhạn oye phọ r’adọl phọ odị. Bidị rooḅeghiọn ghan kẹn iyaạr phọ eḍighi bọ kụ oye phọ aḍighi bọ ikarạph phọ.—Prov. 20:5.
7-8. Ika kụ idị ikumor awe phọ kotuughaạny okparạm mọ aZihova mem dị bidị ophạm raghaạph r’oye dị aḍighi ikarạph?
7 Ikumor awe phọ rotuughaạny ghan okparạm mọ aZihova. Bidị olegheri ni idị aZihova makparaghạ ghan olhoghonhaạn aḍighaạgh we dị oḍighi ikarạph. Esi omaạm, r’okparạm aZihova amhiigha ni loor aḅaanhaạn Ken r’eten ephomhoghiạn. Odị aphụr kẹn ni nyodị rurụ mọ ikarạph phọ odị rawạ bọ oḍighi phọ kengọ ni nyodị iiḅaghamhị. Kụ aḅilhẹ aḅenhị nyodị idị odị kaḍighi kụ akpetenhaan. (Gen. 4:6, 7) AZihova arom ni Netan oghị oteẹny aDevid. Kụ aNetan aḍighinhom ni oghaạph omaaniọm dị alhoghonhaạn Devid ḍighaạgh okiton. (2 Sam. 12:1-7) Egbạ-gbạ amem aZihova arom ghan ni riil phọ odị oghị oteẹny eelhe phọ Izrạl oghaaphạn pidị okiton. (Jer. 7:24, 25) AZihova o/kori ghan mọ awe phọ okiton kụ agbi olhoghonhaạn abidị ḍighaạgh. Kparipẹ ghụn, odị kụ aghị ghan alhoghonhaạn bidị ḍighaạgh dị kokiton.
8 Ikumor awe phọ rotuughaạny ghan ni eḍeenhaan phọ aZihova mem dị rologhonhaạn ḍighaạgh oye dị aḍighi igbogh ikarạph. Idiphọ 2 Timoti 4:2 eḍeenhaan bọ, ikumor awe phọ romoọgh ghan ni okparạm, mem dị rokaaphạn r’oye dị ooruẹn olhoghi phọ ragurọgh. Esi iduọn phọ, orue olhoghonhaạn aḍighaạgh oye dị aḍighi ikarạph okiton, kewạ ni dị ikumor awe phọ kopoomhị loor. Eḍighi maạr dị ikumor awe phọ oghaaphọm r’oghạgh olhoghi, ketue ni eḍighi idị oye phọ aḍighi bọ ikarạph phọ ka/sighẹ oromha phọ obobọ ka/meera akiton.
9-10. Ika kụ idị ikumor awe phọ kologhonhaạn ḍighaạgh oye dị aḍighi ikarạph omhiịn araraạr phọ erorori bọ nyodị elhọgh oḍighi ikarạph phọ?
9 Ikumor awe phọ rokparaghạ ghan olhegheri araraạr phọ erorori bọ oye phọ elhọgh oḍighi ikarạph phọ. Esi omaạm, onyọ umor phọ adugh loor esi dị o/gbor ghan oghị epẹ erugh phọ obobọ o/phạm ghan ituughạ oginha odị ḍughụm? Iḍighi idị odị u/gbor ghan uu/ḅereghị ḍughụm? Odị amheera mọ ikarạph aruuphuạ esi sinhị siphẹ ekpom mọ odị ḍughụm? Amhoọgh ikarạph arighirị obobọ azaamhiọm ghan loor raraạr dị i/nighẹ ḍughụm? Ika kụ idị araraạr phọ iphẹn phọ etir ekpom odị? Odị alegheri ni idị eḍighinhom iyaạr phọ odị metir aZihova?
10 Ikumor awe phọ kotue ni opuru oye phọ sipuru dị keloghonhaạn nyodị ḍighaạgh ootughiạn araraạr phọ edughe bọ siya phọ odị r’aZihova ḅilhẹ erorori bọ nyodị elhọgh oḍighi ikarạph phọ. Bidị roḍighi ghan iduọn phọ r’eten ephomhoghiạn, kụ roo/puru ghan sipuru dị bidị u/kpẹ olhegheri. (Prov. 20:5) Kụ idiphọ aNetan, bidị otue ni oḍighinhom oghaạph omaanhiọm dị kaloghonhaạn oye phọ ḍighaạgh olhegheri idị ikarạph phọ odị eeph. Eeni amem, oye phọ kalegheri ni mọ odị maḍighi igbogh ikarạph eḅẹl amem mọ ikumor awe phọ kopạm bọ raghaạph phọ r’odị. Kụ eeni kẹn, kaḍeenhaan ni mọ odị makiton.
11. AZizọs azoọm ghan ika buḍighinhom ikarạph?
11 Ikumor awe phọ rokparaghạ ghan odaphạn eḍeenhaan phọ aZizọs. Mem mọ aZizọs raḅaanhaạn bọ Sọl, alhoghonhaạn ni Sọl ḍighaạgh esi opuru aḍipuru phọ aḍiẹn: “Sọl, Sọl! Uḍighi ika kụ nạ rugbiphoghọm bọ imị?” Aḍipuru phọ aḍiẹn phọ ilhoghonhaạn ni Sọl ḍighaạgh omhiịn mọ ipẹ odị raḍighi bọ i/nighẹ. (Iiḍ. 9:3-6) Kụ idị egbolhomaam Jezibẹl, aZizọs aḅẹm mọ: “Mị mangọ ni nyodị eepoogh okiton esi ikarạph phọ odi.”—Ogan. 2:20, 21.
12-13. Ika kụ edị ikumor awe phọ kongọ mem oye dị aḍighi ikarạph okiton? (Miịn kẹn afoto phọ.)
12 Orue otuughaạny aZizọs, ikumor awe phọ roo/gborion ghan kootughiạn mọ oye dị aḍighi ikarạph ra/wạ okiton. Buniin eeni eḅẹl amem mọ kokaaphạn bọ r’abidị bịn koḍeenhaan ni mọ bidị mokiton, kuolọ abunhọn kosighẹ ni mem. Loor esi iduọn phọ, ikumor awe phọ kookolhobian ni oḅaanhaạn oye phọ aḍighi bọ ikarạph phọ ibadị amem. Eeni bidị roghaaphạn nyodị eḅẹl amem mọ romadạn, kụ edị odị kasi olhoghi otu kụ akạr aatughiạn iromoghiom mọ r’araraạr phọ omaaghị bọ. Kụ eeni odị atue ni aaḅereghị aZihova alọm osạr owilhenhaạn. (Ps. 32:5; 38:18) Bịn eeni mem dị oḅilhẹ ophạm raghaạph r’odị, odị kaḍeenhaan ni mọ odị rawạ okiton.
13 Esi iduọn phọ, orue olhoghonhaạn aḍighaạgh oye dị aḍighi ikarạph okiton, ikumor awe phọ roḍeenhaan ghan ogbolhomaam r’igbiririph. Bidị rolọm ghan ni dị aZihova kasẹph ikuph phọ abidị, kụ oḅilhẹ okiọm ghisigh oḍuom olhoghi mọ oye phọ aḍighi bọ ikarạph phọ kakiton ni.—2 Tim. 2:25, 26.
Ongọ oye dị maḍighi ikarạph eepoogh okiton, ikumor awe phọ ropạm ghan ni raghaạph r’odị ibadị amem (Miịn ekpịgh phọ 12)
14. Anhiạn kụ edị kongọ ḍisẹph mem dị oḍighinhom ikarạph akiton, kụ eeghe kụ iḍighi?
14 Iboom ibo retọl ghan ni mem dị oḍighinhom ikarạph akiton! (Luk 15:7, 10) Ghalhamọ r’iduọn ikumor awe phọ roḍighi ghan bọ oomo ipẹ bidị kotue bọ olhoghonhaạn oye phọ ḍighaạgh, ikpo onhụ phọ aPọl agẹ bọ mọ: “Iini siẹn Enaạn kengọ ni bidị eepoogh okiton,” eḍeenhaan mọ aZihova kụ alhoghonhaạn bọ ḍighaạgh oḍighinhom ikarạph phọ onme iitughiạn r’eḍighinhom iyaạr phọ odị. (2 Tim. 2:25) Esi iduọn phọ, yira rongọ ghan Enhaạn ḍisẹph mem dị oḍighinhom ikarạph akiton. Kuolọ eeghe asuọ kụ ramite ghan mem lọ oye akiton? APọl aḅẹm mọ, reloghonhaạn ghan ḍighaạgh oye phọ aḍighi bọ ikarạph phọ obughẹ olegheri iyaạr aBaibul phọ odị. Ḅilhẹ reḍighi ghan idị odị kaamanham siphẹ iitughiạn phọ odị, kụ eḍighi kẹn idị odị kakpetenhaan siphil phọ Eru.—2 Tim. 2:26.
15. Ika kụ edị ikumor awe phọ kokiọm ghisigh ologhonhaạn ghan ḍighaạgh oḍighinhom ikarạph dị makiton?
15 Mem dị oye dị aḍighi ikarạph akiton, ikumor awe phọ rokiọm ghan ni ghisigh kokparamhị omheeraam oye phọ, koḅilhẹ olhoghonhaạn nyodị ḍighaạgh okpetenhaan odẹgh ophogh r’oḍighi ipẹ eḅeraạn bọ aZihova. (Hib. 12:12, 13) Ikumor awe phọ ro/ḅenhị ghan bunhọn awe ipẹ araghaạph phọ bidị ophạm bọ r’oḍighinhom ikarạph phọ eghị bọ. Kuolọ, eeghe araraạr kụ edị ewạ mọ ookpomhoghan phọ olhegheri?
“ḄAẠM GHAN ESI OGBO”
16. Esi “ogbo” phọ aPọl aghaạph bọ aghol siphẹ 1 Timoti 5:20, remạ ghan eeghe?
16 Bạl 1 Timoti 5:20. APọl aḅenhị Timoti aḍighi bọ onhọn okumor oye siphẹ ookpomhoghan phọ oḅaạm ghan “abulọ oḍighi ikarạph” esi ogbo. Ikpo onhụ phọ iphẹn phọ remạ ghan eeghe? Ikpo onhụ phọ iphẹn phọ re/mạ ghan mọ omoọgh oḅaạm oye phọ “ogbo” ookpomhoghan phọ. Kuolọ esi ogbo phọ odị aghaạph bọ siẹn phọ remạ ghan we dị eeni olhegheri aani ikarạph phọ oye phọ aḍighi bọ. Awe phọ abuẹn phọ kotue ni oḍighi we dị omhiịn aani obobọ we dị oye phọ aḍighi bọ ikarạph phọ aḅenhị ikarạph phọ odị. Oginha awe phọ abuẹn phọ bịn kụ edị ikumor awe phọ koḅenhị mọ bunọ moḅaạm ni oye phọ aḍighi bọ ikarạph phọ.
17. Eḍighi maạr dị ibadị awe siphẹ ookpomhoghan phọ molhegheri ni obobọ kolegheri ni ikarạph dị onyọ umor aḍighi, ikumor awe phọ koḍighi eeghe, kụ eeghe kụ iḍighi?
17 Eeni amem, ibadị awe siphẹ ookpomhoghan phọ molegheri ni ikarạph phọ onyọ umor phọ aḍighi bọ obobọ kolegheri ni ghisigh. Mem dị eḍighi iduọn phọ, esi “ogbo” phọ keḍighi siphẹ ookpomhoghan phọ. Esi iduọn phọ, ikumor awe phọ kokaạph ni siphẹ ogbo ookpomhoghan phọ mọ moḅaạm onyọ umor phọ. Eeghe kụ iḍighi? APọl aḅẹm mọ: “pidị abuerị phọ omoọgh oghiilaan” oḍighi ikarạph.
18. Eḍighi maạr dị oye dị aḍiiny muụm kuolọ ko”mạn 18 asiạ aḍighi igbogh ikarạph, ikumor awe phọ koḍighi eeghe? (Miịn kẹn afoto phọ.)
18 Ikumor awe phọ koḍighi eeghe eḍighi maạr dị oye dị maḍiiny muụm kuolọ ko”mạn 18 asiạ aḍighi igbogh ikarạph? Ikumor awe phọ kolọgh iyạl ikumor awe oghị oteẹny obumoọny phọ r’odẹ r’onhiin odị, eḍighi maạr dị oḍighi ni Bugbaanhaạn.a Ikumor awe phọ kopuru ni odẹ r’onhiin phọ raraạr dị bidị moḍighi olhoghonhaạn aḍighaạgh obumoọny phọ pidị akiton. Eḍighi maạr dị ikumor awe phọ omhiịn mọ obumoọny phọ raḍighinhom ni oromha odẹ r’onhiin phọ odị, bidị otue ni osopha mọ odẹ phọ r’onhiin phọ kụ oghiọm ghisigh olhoghonhaạn ḍighaạgh obumoọny phọ. Ikumor awe phọ olegheri ni mọ aZihova angọ burudẹ r’aburunhiin oḍighi oolemhi ghan ibạm anmụny phọ abidị r’ephomhoghiạn. (Deut. 6:6, 7; Prov. 6:20; 22:6; Efẹ. 6:2-4) Esighẹ rekị, ikumor awe phọ kopuru ghan ni odẹ r’onhiin phọ olhegheri mughumọ bidị okiọm ni ghisigh rologhonhaạn obumoọny phọ ḍighaạgh. Toroboiperolbọ, eḍighi maạr dị obumoọny phọ maḍiiny bọ muụm mọ u/meera ukiton, pọ ikumor awe phọ komoọgh ni raghaạph r’obumoọny phọ ḅilhẹ r’odẹ r’onhiin phọ odị.
Mem dị obumoọny dị ko”mhạn 18 asiạ aḍighi igbogh ikarạph, iyạl ikumor awe romoọgh ghan ni raghaạph r’obumoọny phọ ḅilhẹ r’odẹ r’onhiin odị (Miịn ekpịgh phọ 18)
AZIHOVA AMOỌGH NI “IBOOM IGBIRIRIPH R’ONMẠ IGHIRIGIIR”
19. Ika kụ edị ikumor awe phọ kotue otuughaạny aZihova mem dị bidị omhoọgh raghaạph r’oye dị aḍighi igbogh ikarạph?
19 AZihova angọ ikumor awe phọ oḍighi oḅaalhamhị ookpomhoghan phọ. (1 Kọr. 5:7) Kuolọ bidị roḍighi ghan ni oomo ipẹ bidị kotue bọ olhoghonhaạn aḍighaạgh oye dị aḍighi igbogh ikarạph pidị akiton. Mem dị bidị rologhonhaạn oye phọ ḍighaạgh, bidị roḍuom ghan ni olhoghi mọ oye phọ kakiton ni. Eeghe kụ iḍighi? Bidị rowạ ghan otuughaạny aZihova, amhoọgh bọ “iboom igbiririph r’onmạ ighirigiir.” (Jems 5:11) Otelhedom mọ Jọn aḍighi ni emạ eḍeenhaan oye dị azoọm bumor r’abumaranhi phọ r’ephomhoghiạn. Odị agẹ mọ: “Ibạm anmụny amị, mị agẹ iphẹn phọ riruomaan inyina, obọ nyina ewilẹ oḍighi ghan ikarạph; kụ olọ aḍighi ikarạph, yira omoọgh ni oye dị ameerạ enye ogbạ ophelọm ayira ghisigh Odẹ phọ. Ophọn phọ aJizọs Kraist, oye aghuḍuul phọ.”—1 Jọn 2:1.
20. Yira kotuughạ eeghe emhuoghaạph phọ etum bọ siẹn?
20 Dị eeph ni iboom, eeni amem oye dị aḍighi ikarạph ra/meera ghan kakiton. Mem dị eḍighi iduọn phọ, rogbatạn ghan ni oye phọ kosighẹ igbo abumor phọ. Kuolọ ikumor awe phọ ropạm ghan ika raghaạph phọ? Yira kooḅeghiọn ḍipuru phọ aḍiẹn phọ emhuoghaạph phọ etum bọ siẹn.
AḌUỌR PHỌ 103 Ikumor Awe Phọ Inmo
a Ipẹ oghaạph bọ ilọ odẹ r’onhiin phọ egbolhomaam ni oye dị rapạm ghan obumoọny phọ.