EMHUOGHAẠPH ITUUGHẠ PHỌ 33
AḌUỌR PHỌ 130 Osạr Ghan Owilhenhaạn
Idị AZihova Rawạ Mọ Ookpomhoghan Phọ Ozoọm Oye Dị Aḍighi Ikarạph
‘Eḍighi maạr dị oye aḍighi ikarạph, yira omoọgh ni oye dị amheerạ enye ogbạ ophelhọm ayira.’—1 JỌN 2:1.
EGBON
Iyaạr dị yira kotue otuughạ esi ipẹ emite bọ siphẹ ookpomhoghan phọ arọl bọ Korịnt, mem dị onyọ umor aḍighi igbogh ikarạph.
1. AZihova rawạ mọ torobọ oye aḍighi eeghe?
AZIHOVA alẹm we kụ angọ eepoogh osopha ghan iyaạr lọ bidị koḍighi. Kụ yira rosopha ghan ni osopha torobọ aḍio. Kuolọ osopha dị akạr amhạn maạr apelheghiom dị oye katue asopha, pọ osopha oḅọgh aloor ongọ aZihova kụ oḍighi aani pakirị eghunotu abuphẹ rooḅereghị bọ nyodị. Kụ aZihova rawạ ni dị torobọ oye kasopha ooḅereghị odị. Eeghe kụ iḍighi? Loor esi dị odị apomhoghiạn we kụ rawạ ghan ipẹ kenighenhaạn bọ bidị. Odị rawạ ghan dị bidị koḍighi righirị odị kụ oḅilhẹ okelhọm ghuḍum k’agee-pọ.—Deut. 30:19, 20; Gal. 6:7, 8.
2. AZihova rawạ mọ oye dị aḍighi ikarạph aḍighi eeghe? (1 Jọn 2:1)
2 Toroboiperolbọ, aZihova ra/kpaariọm ghan oye okumu odị. Odị angọ ni eepoogh mọ torobọ oye asopha iyaạr dị odị kaḍighi. Kuolọ eeghe kụ kemite eḍighi maạr dị oye dị maḍiiny muụm aḍighi igbogh ikarạph? Eḍighi maạr dị odị u/meera ukiton pọ kogbatạn ni nyodị osighẹ siẹn ookpomhoghan phọ. (1 Kọr. 5:13) Kuolọ eḍighi maạr dị ogbatạn oye phọ osighẹ, aZihova rawạ ni mọ odị akiton aḅilhẹ aḅula esi odị. Yira kotue ni oḅẹm iduọn phọ loor esi dị aZihova aghol emhụ awe dị roḍighi ghan ikarạph kụ amiteom bọ ekiạ etagharạn phọ. Dị eego esi ekiạ etagharạn phọ, aZihova kasạr ri abilhenhaạn oye dị aḍighi ikarạph kuolọ akiton. (Bạl 1 Jọn 2:1.) Kụ loor esi iduọn aZihova uphomhoghiạn bọ iyira, odị rawạ ni mọ oye dị aḍighi ikarạph akiton.—Zech. 1:3; Rom 2:4; Jems 4:8.
3. Yira kooḅeghiọn eeghe siẹn emhuoghaạph phọ ephẹn phọ?
3 AZihova muḅenhị ni iyira idị odị raloghoma ghan mem dị oye aḍighi ikarạph, r’ipẹ odị rapogh ghan bọ oye dị aḍighi ikarạph. Kụ odị rawạ dị yira kodaphạn aani eḍeenhaan phọ odị. Siẹn emhuoghaạph phọ ephẹn phọ yira kooḅeghiọn idị yira kotue otuughaạny aani nyodị. Iduọn nạ raaḅeghiọn bọ emhuoghaạph phọ ephẹn phọ, lọgh elhegh (1) idị abumor r’abumaranhi phọ orọl bọ ookpomhoghan phọ aKorịnt oḍighi mem dị onyọ umor aḍighi igbogh ikarạph, (2) r’idị otelhedom mọ Pọl aḅenhị bidị oḍighi mem mọ oye phọ akiton bọ, ḅilhẹ (3) r’idị aZihova rapogh ghan we lọ oḍighi ikarạph kuolọ okiton.
IDỊ OOKPOMHOGHAN PHỌ OḌIGHI MEM DỊ OYE AḌIGHI IGBOGH IKARẠPH
4. Eeghe iyaạr kụ imite siphẹ ookpomhoghan phọ arọl bọ Korịnt? (1 Korịnt 5:1, 2)
4 Bạl 1 Korịnt 5:1, 2. Omhunhenhiom iraạr amem mọ aPọl aghị bọ oḍighi oghaạph iiḅi iinhaghạn, odị anhaghạn ni ekarạph iyaạr dị emite siphẹ omhoom ookpomhoghan phọ arọl bọ Korịnt. Oniin onyọ umor dị odi siphẹ ookpomhoghan phọ arolhạn ghan esi r’anhịr odẹ odị. Ghalhamọ r’awe dị Enhaạn roo/ḅereghị ghan bịn ulhegheri ni mọ ipẹ odị raḍighi bọ i/nighẹ. Kuolọ abumor phọ uutughiạn ghan mọ onyọ umor phọ aḍighi bọ ikarạph phọ katue ni akiọm ghisigh atọl ghan siphẹ ookpomhoghan phọ. Kụ eeni abuniin siphẹ ookpomhoghan phọ uutughiạn ghan mọ bunọ rotuughaạny onmạ ighirigiir phọ aZihova esi omeera mọ odị aghiọm ghisigh arọl siphẹ ookpomhoghan phọ. Kuolọ aZihova ra/wạ ghan dị awe phọ odị koḍighi yogh ghan ikarạph araraạr. Dị iikia i/lo, igbogh ikarạph phọ iphẹn onyọ umor phọ aḍighi bọ iḍighi ni idị awe omhiigh oghaaphọgh ikarạph araraạr ilọ awe phọ aZihova. Eeni kẹn abuniin abumor r’abumaranhi momhiigh ni otuughaạny ekarạph eḍighinhom iyaạr phọ odị. Esi iduọn phọ aPọl aḅenhị ni ookpomhoghan phọ oḍighi iyaạr.
5. APọl aḅenhị ookpomhoghan phọ moḍighi eeghe, kụ ipẹ phọ remạ ghan eeghe? (1 Korịnt 5:13) (Miịn kẹn afoto phọ.)
5 Bạl 1 Korịnt 5:13, [NWT]. Dị eego esi uwaloor iigbia phọ, aZihova aḍighi ni idị aPọl agẹ ḍinyạ aghiọm ookpomhoghan phọ arọl bọ Korịnt. Odị aḅenhị bidị mọ ogbatạn oye phọ aḍighi bọ ikarạph phọ osighẹ igbo abumor phọ.a Abumor phọ orọl bọ siphẹ ookpomhoghan phọ kozoọm ika oye phọ? APọl aḅenhị bidị mọ ‘ku/ḅọph oghuugh’ r’odị. Iphẹn phọ remạ ghan eeghe? APọl aḅenhị ni bidị mọ itọ phọ iphẹn phọ remạ ghan mọ bidị ‘ku/lean oye phọ eḍien.’ (1 Kọr. 5:11) Orọl ude olhe eḍien r’oye reḍighi ghan iyaạr dị iyạl phọ awe phọ komoọgh raghaạph oḅilhẹ ooḍikuan. Eegholhaany ni mọ aPọl raḅenhị ghan ookpomhoghan phọ mọ kuu/ḍikuan r’oye phọ opọ phọ. Iphẹn phọ keḍighi idị abunhọn abumor ko/tuughaạny ekarạph eḍeenhaan phọ odị. (1 Kọr. 5:5-7) Keloghonhaạn kẹn oye phọ ḍighaạgh olhoghoma mọ odị maḍighi iyaạr dị aZihova i/ḅeraạn, kụ eeni akiton.
Dị eego esi uwaloor iigbia phọ aPọl agẹ ni ḍinyạ aghiọm ookpomhoghan phọ arọl bọ Korịnt, kụ aḅenhị bidị mọ ogbatạn osighẹ oḍighinhom ikarạph phọ u/meera bọ ukiton (Miịn ekpịgh phọ 5)
6. Ookpomhoghan phọ uḍighi eeghe mem mọ aPọl agẹ bọ ḍinyạ phọ aghiọm bidị, kụ ipẹ phọ itir ika oye phọ aḍighi bọ ikarạph phọ?
6 Mem mọ aPọl agẹ bọ ḍinyạ phọ aghiọm ookpomhoghan phọ arọl bọ Korịnt, odị amhoọgh ni ogbolhomaam mughumọ ookpomhoghan phọ koḍighi ni ipẹ odị aghaạph bọ. Kuolọ i/bia iboom bịn aTaitọs aru ni aḅenhị Pọl mọ ookpomhoghan phọ mogbatạn oye phọ osighẹ. Kụ ipẹ phọ iḍighi ni idị olhoghi aPọl aḅaạl. (2 Kọr. 7:6, 7) Oḅarạm isiphẹ, mem mọ ookpomhoghan phọ oḍighi bọ ipẹ aPọl aghaạph bọ, oye phọ akiton ni amhiigh odaphạn asiigbu phọ aZihova. (2 Kọr. 7:8-11) APọl aḅenhị ookpomhoghan phọ oḅilhẹ oḍighi eeghe?
IDỊ OOKPOMHOGHAN PHỌ KOZOỌM OYE PHỌ MAKITON BỌ
7. Olhiọm bọ oye phọ aḍighi bọ ikarạph phọ, eeghe emạ iyaạr kụ iḍuạ emite? (2 Korịnt 2:5-8)
7 Bạl 2 Korịnt 2:5-8. APọl agẹ ni ḍinyạ aghiọm ookpomhoghan phọ kụ aḅenhị bidị mọ “Idiphọ nyina meḅọph bọ ni onhụ eroph nyodị ogbeph phọ mekasiạn ni.” Iphẹn phọ remạ ghan mọ ilioghọm mọ ongọ bọ oye phọ mekasiạn ni loor esi dị oye phọ makiton. Esi iduọn phọ, bidị ku/kiọm mun ghisigh uliọm nyodị.—Hib. 12:11.
8. APọl aḅilhẹ aḅenhị ookpomhoghan phọ mọ oḍighi eeghe?
8 Idị egbolhomaam onyọ umor phọ apiomạn bọ, otelhedom mọ Pọl agẹ aḅenhị ookpomhoghan phọ mọ: “Isạr bịn ewilenhaạn ekparamhị ghan ologhi odị” eḅilhẹ eḍighi idị odị “kaḅilẹ aloghoma mọ nyina epomoghiạn ni nyinọ.” Ikpo onhụ phọ aPọl eḍeenhaan mọ odị o/wạ dị ookpomhoghan phọ koḅilhẹ osighẹ oye phọ bịn. Odị rawạ dị bidị koḍeenhaan mọ bunọ mokạr ri osạr obilhenhaạn oye phọ dị eego esi ikpo onhụ r’eḍighinhom araraạr. Iphẹn phọ keḍighi idị onyọ umor phọ kaloghoma mọ olhoghi abidị aḅaạl li iduọn odị maḅula bọ siẹn ookpomhoghan phọ.
9. Eeghe kụ iḍighi kụ ekparanhaạn bọ ni buniin awe osạr owilhenhaạn onyọ umor phọ makiton bọ?
9 Eeni iiḅaghamhị ni olhoghi abuniin awe onhaghạn mọ moḅilhẹ osighẹ oye phọ. Eeghe kụ iḍighi kụ yira oḅẹm bọ iduọn phọ? Eeni abuniin awe urọl li siphẹ ookpomhoghan phọ dị ikarạph phọ oye phọ aḍighi bọ ekọm iiḅaghamhị obobọ umugholoor engọ. Kụ eeni abunhọn awe dị okparaghạ odaphạn iilhogh phọ aZihova kologhoma ni mabi obobọ ootughiạn mọ i/nighẹ oḅilhẹ osighẹ oye phọ. (Poghom Luk 15:28-30.) Kuolọ eeghe kụ iḍighi kụ emạn bọ ni maạr dị abumor phọ koḍeenhaan onyọ umor phọ makiton bọ mọ bunọ okạr ri opomhoghiạn nyodị?
10-11. Eeghe kụ kemite eḍighi maạr dị ikumor awe phọ u/sạr ubilhenhaạn oye phọ makiton bọ?
10 Eeghe kụ kemite eḍighi maạr dị ikumor awe phọ u/ḅilhẹ usighẹ oye phọ obobọ abumor phọ u/ḍeenhaan nyodị ephomhoghiạn? Ipẹ phọ ketue ni eḍighi idị “ologhi phọ odị kagurọgh . . . nyodị akiigh.” Iphẹn phọ ketue kẹn ni eḍighi idị odị kaloghoma mọ onọ ka/tue mun aḍighi pakirị ookpomhoghan phọ. Odị atue kẹn ni aloghoma mọ aZihova ka/tue asạr abilhenhaạn nyodị, bịn aḅula oḍighi ikarạph phọ.
11 Eḍighi maạr dị abumor phọ u/sạr ubilhenhaạn onyọ umor phọ makiton bọ, aZihova ka/sighẹ mun bidị idiphọ arighirị odị. Eeghe kụ iḍighi? Eḍighi maạr dị bidị u/sạr ubilhenhaạn, pọ bidị ro/tuughaạny aZihova aḍighi bọ Enhaạn dị rasạr ghan kawilhenhaạn we dị mokiton. Kparipẹ ghụn bidị rotuughaạny ghan Setan ra/nmạ ghan bọ oye ighirigiir. Kụ iphẹn phọ keḍighi idị aSetan kasighẹ bidị aḍighinhom, oḍighi idị oye phọ ka/kiọm mun ghisigh akumu aZihova.—2 Kọr. 2:10, 11; Efẹ. 4:27.
12. Abumor r’abumaranhi phọ orọl bọ Korịnt koḍighi eeghe otuughaạny aZihova?
12 Abumor r’abumaranhi phọ orọl bọ ookpomhoghan phọ aKorịnt koḍighi eeghe orue otuughaạny aZihova? Bidị kosạr obilhenhaạn oye phọ makiton bọ idiphọ aZihova raḍighi ghan bọ. Lọgh elhegh raraạr dị abuniin awe dị ogẹ Baibul phọ oghaạph ilọ aZihova. ADevid aḅẹm mọ, aZihova “anighẹ, kụ asạr ghan ikarạph rabilhenhaạn.” (Ps. 86:5) AMicah agẹ mọ: “Emhụgh i/lo dị eghịgh nyinhạ, nạ rasạr ghan ikarạph kawilhenhaạn, ḅilhẹ ra/tolhọm ghan r’ophin olhoghi.” (Mic. 7:18) Kụ Aizaya agẹ mọ: “Abukarạph awe owilhẹ ekarạph eḍighinhom iyaạr phọ abidị, onmeeghi iitughiạn phọ abidị; bidị okiton osoman aZihova, odị amoọgh igbiririph kụ raagborion ghan osạr owilhenhaạn.”—Isa. 55:7.
13. Eeghe kụ iḍighi kụ ewạ bọ mọ oḅilhẹ osighẹ oye phọ aḍighi bọ ikarạph phọ? (Miịn igbe phọ “Idoọny Esi Kapụr Amem Kụ Ogbi Bọ Osighẹ Oye Phọ Aḍighi Bọ Ikarạph Phọ?”)
13 Orue otuughaạny aZihova, abumor r’abumaranhi phọ orọl bọ Korịnt kokparamhị onyọ umor phọ kụ oḅilhẹ oḍeenhaan mọ bidị opomhoghiạn ni nyodị. Esi odạph itọ phọ aPọl kụ edị ookpomhoghan phọ koḍeenhaan mọ bidị rodaphạn ni “torobọ okạl iyaạr” dị aZihova rawạ. (2 Kọr. 2:9) Ogbatạn bọ onyọ umor phọ osighẹ, iyạl ikpo arunwanyụ kụ iten bịn akiton. Esi iduọn phọ i/wạ dị ikumor awe phọ koobinyemhi oḅilhẹ osighẹ odị.
IDỊ YIRA KOTUE OTUUGHAẠNY ELHIOM OORUẸN R’ONMẠ IGHIRIGIIR PHỌ AZIHOVA
14-15. Ipẹ emite bọ ookpomhoghan phọ arọl bọ Korịnt itughemhị iyira eeghe araraạr? (2 Pita 3:9) (Miịn kẹn afoto phọ.)
14 Ugẹ oseere siphẹ aBaibul phọ ipẹ emite bọ siphẹ ookpomhoghan phọ arọl bọ Korịnt pidị osighẹ ‘utughemhiọm ghan iyira.’ (Rom 15:4) Ipẹ ogẹ bọ itughemhị iyira mọ ghalhamọ r’iduọn aZihova aḍighi bọ Enhaạn “onmạ ighirigiir,” odị o/wạ dị oḍighinhom ikarạph dị u/meera ukiton kakiọm ghisigh atọl siẹn ookpomhoghan phọ. Asiigbu phọ aZihova dị egbolhomaam igey r’ikarạph re/nmia ghan, esi iduọn phọ odị ra/sighẹ ghan oye dị raḍighi ghan ikarạph. (Jud 4) Eḍighi maạr dị aZihova ameera mọ oḍighinhom ikarạph dị u/meera ukiton arọl siẹn ookpomhoghan phọ, kekọm ni iiḅaghamhị elọgh ookpomhoghan phọ.—Prov. 13:20; 1 Kọr. 15:33.
15 Toroboiperolbọ, aBaibul phọ aḍeenhaan ni mọ aZihova o/wạ ophiemhi r’oniin oye. Odị rawạ ghan ghụn eepoogh ophẹl awe. Esi iduọn phọ odị ranmạ ghan ni ighirigiir we lọ oḍighi ikarạph kụ mokiton rowạ oḍighi arighirị odị. (Ezek. 33:11; bạl 2 Pita 3:9.) Pọ kụ iyaạr phọ dị eego esi otelhedom mọ Pọl aZihova aḅenhị bọ ookpomhoghan phọ arọl bọ Korịnt mọ osạr owilhenhaạn oye phọ makiton bọ.
Mem dị yira oḍeenhaan ephomhoghiạn kụ oḅilhẹ ozoọm eyoghoyoghọ eten oye dị oḅilhẹ osighẹ, pọ yira rotuughaạny ghan eegharạ ephomhoghiạn r’onmạ ighirigiir phọ aZihova (Miịn siikpịgh phọ 14-15)
16. Ipẹ emite bọ ookpomhoghan phọ arọl bọ Korịnt itughemhị iyira eeghe iyaạr ilọ aZihova?
16 Ipẹ emite bọ ookpomhoghan phọ arọl bọ Korịnt miḍeenhaan iyira mọ aZihova aḍighi Enhaạn ephomhoghiạn r’elhiom ooruẹn. (Ps. 33:5) Iphẹn phọ rinyu ghan ni iyira oghiọm aghisigh oboom ghan aZihova. Kụ yira rosereghiạn ghan ni eegharạ onmạ ighirigiir phọ odị loor esi dị oomo ayira ropiomạn ghan ni. Kụ olhoghi ayira aḅaạl kẹn ni iduọn aZihova amiteom bọ ekiạ etagharạn phọ pidị odị asạr ikarạph ayira abilhẹ. Eḍighi ni iyaạr iidereghị olhegheri mọ aZihova uphomhoghiạn iyira kụ aḅilhẹ rawạ ghan ipẹ kinhighenhaạn bọ iyira!
17. Yira kooḅeghiọn eeghe rumhuoghaạph phọ etum bọ siẹn?
17 Eḍighi maạr dị oye aḍighi igbogh ikarạph rodon, ika kụ edị ikumor awe phọ kotuughaạny ephomhoghiạn phọ aZihova orue olhoghonhaạn aḍighi oye phọ dị kakiton? Ookpomhoghan phọ koḍighi eeghe eḍighi maạr dị ikumor awe phọ osopha ogbatạn oye phọ obobọ oḅilhẹ osighẹ odị? Yira kooḅeghiọn sipuru phọ iphẹn phọ rumhuoghaạph phọ etum bọ siẹn.
AḌUỌR PHỌ 109 Ophomhoghiạn R’oomo Olhoghi
a Nyiidiphọ yira ko/ḅẹm mun mọ awe phọ abuẹn phọ oḍighi we dị mophorogh siẹn ookpomhoghan phọ. Yira koḅẹm ghan ghụn mọ oḍighi we dị mogbatạn osighẹ igbo abumor r’abumaranhi phọ.