ABaibul Phọ Aguanhaan Ni Imạ Aghisigh

Ibadị osomhan ni iiḅaghamhị dị rekọm ghan okururu, ooḅaghamhiạn aloor, ḅilhẹ r’eephinha. Nạ masomhan aani ghan ni iiḅaghamhị dị ekọm raraạr phọ iphẹn phọ? Eeni nạ aloghoma ni eephinha loor esi e/moon obobọ aḍuugh oye dị nạ aphomhoghiạn. Kụ eeni nạ raatughiạn ghan ni mọ, ‘Adọl phọ amhị kenighẹ ni epu siẹn ḍughụm?’ ABaibul phọ angọ ni ophagharanhaạn aḍipuru phọ aḍiẹn phọ.

1. ABaibul phọ angọ eeghe oḍuomolhoghi?

ABaibul phọ akaạph ni iyaạr phọ eḍighi bọ kụ iiḅaghamhị emuza bọ, aḅilhẹ kẹn ni apamhanhạm iiḅi iinhaghạn mọ moọny amem Enhaạn kasiemhi ni eekunha iiḅaghamhị phọ iphẹn phọ. Aruguanhaan aBaibul phọ ketue ni engọ nyinhạ “oḍuomolhoghi ilọ aghisigh phọ.” (Ibạl Jeremiah 29:11, 12.) Oḍuomolhoghi phọ ophọn phọ katue ni ulhoghonhaạn iyira ḍighaạgh okparạm iiḅaghamhị nyiidiphọ, omhoọgh egey ephoghom araraạr r’oḅaạl olhoghi dị katọl k’agee-pọ.

2. ABaibul phọ aguanhaan eeghe ilọ aghisigh phọ?

ABaibul phọ akaạph mọ amem retu ni dị “aḍuugh, amukum ologhi, r’emoghi r’eephina ke/tọl mun.” (Ibạl Ogananami 21:4.) Iiḅaghamhị, idiphọ—ekulhom, ekeeny ooruẹn, e/moon r’aḍuugh, reḍighi ghan bọ idị awe kotoph oḍuomolhoghi abidị—ke/tọl mun. ABaibul phọ aguanhaan ni mọ awe kotọl li siẹn ade phọ dọl aParadaịs k’agee-pọ.

3. Nạ kakparamhị ika oḍuomolhoghi anạ ilọ aruguanhaan aBaibul phọ?

Ibadị awe rodon rogon ghan ni omhiịn dị imạ kemite, kuolọ u/kạr ukuphom owol mọ ipẹ bidị rogon bọ kemite ni. Aruguanhaan aBaibul phọ i/tọl idiphọ. Yira kotue ni okuphom owol ipẹ aBaibul phọ aghaạph bọ “mem dị yira omiigha loor kụ ooḅeghiọn ghan siikpịgh aḍinyạ iigbia phọ.” (Iiḍighi 17:11) Iduọn nạ ratuughạ bọ Baibul phọ, nạ katue ni alegheri mughumọ enighẹ ni omheeraam ipẹ aBaibul phọ aghaạph bọ ilọ aghisigh phọ.

OLHEGHERI OBUGHẸ

4. ABaibul phọ aguanhaan ghuḍum k’agee-pọ dị iiḅaghamhị ke/tọl mun

Pogh sikoọl aruguanhaan aBaibul phọ omạ bọ siẹn phọ. Ighẹn kụ ikạr eḍạ ḍiḅeeraạn anạ? Kụ eeghe kụ iḍighi?

Ibạl riisi aBaibul phọ iphẹn phọ ogẹ bọ otumeriom ruguanhaan phọ, kụ eeḅeghiọn sipuru phọ iphẹn:

• Nạ katue ni amooghọm suọ riisi aBaibul phọ iphẹn phọ? Ketue ni engọ suọ buọ eghunotu anạ obobọ righirị anạ?

Gbiom olhoghi anạ orọl aḅirinhi dị

5. Aruguanhaan aBaibul phọ ketue ni elọgh ḍighaạgh

AVIDIO: Mị Uwạ Ghan Osiemhi Eekuna Ekeeny Ooruẹn (4:07)

• Siphẹ avidio phọ, eeghe ekeeny ooruẹn kụ edị aRafika asoman?

• Ghalhamọ r’iduọn ekeeny ooruẹn phọ i/ḍuạ bọ ni, ika kụ idị aBaibul phọ alhoghonhaạn nyodị ḍighaạgh?

Aruguanhaan aBaibul phọ ilọ aghisigh phọ ketue ni ingọ iyira oḅaạl olhoghi eḅilhẹ ilhoghonhaạn iyira ḍighaạgh okpạr opu oḅonyonhu ozuan. Ibạl Proverbs 17:22 r’a Rom 12:12, kụ eeḅeghiọn sipuru phọ iphẹn:

• Aruguanhaan aBaibul phọ ilọ aghisigh phọ ketue ni elhoghonhaạn nyinhạ ḍighaạgh nyiidiphọ? Eeghe kụ iḍighi?

OGHAẠPH OOKARAGH

Aruguanhaan aBaibul phọ ilọ aghisigh phọ r’ingọ ghan iyira ibo keḅilhẹ ilhoghonhaạn iyira ḍighaạgh okpạr opu oḅonyonhu ozuan.

Ooḅula

• Uḍighi ika kụ ewạ bọ dị awe kolegheri ruguanhaan phọ Enhaạn?

• ABaibul phọ akaạph eeghe ilọ aghisigh phọ?

• Ika kụ idị omhoọgh oḍuomolhoghi ilọ aghisigh phọ kelhoghonhaạn nyinhạ ḍighaạgh?

WAAGHỊ AMHIỊN

Legheri abughẹ idị omhoọgh oḍuomolhoghi ketue elhoghonhaạn nyinhạ ḍighaạgh mem dị nạ asoman iiḅaghamhị.

“Oḍuomolhoghi—Nạ Kamoọgh Ika?” (Awake!, April 22, 2004)

Miịn idị oḍuomolhoghi ilọ aghisigh phọ reloghonhaạn ḍighaạgh we dị odimhom ghan ezẹgh.

“Odaluạn E/moon Dị Re/soph Ghan Mem—ABaibul Phọ Katue Ni Aloghonhaạn Ḍighaạgh?” (Edi intanẹt)

Nạ rophogh ḍuọr phọ koḍeenhaan bọ vidio phọ, kụ agbiom olhoghi dị nạ r’eghunotu anạ rokelhọm ghuḍum siphẹ Paradaịs idiphọ aBaibul phọ aguanhaan bọ.

Gbiom Olhoghi Mem Dị (3:37)

Bạl amhiịn idị adọl aghuḍum oye dị awạ ghan onme agomẹt phọ enmia mem dị atuughạ alhegheri ipẹ aBaibul phọ aguanhaan bọ.

“Mị U/miịn Mun Mọ Enighẹ Ni Dị Mị Kanme Aḅirinhi Phọ” (The Watchtower, July 1, 2013)