EMHUOGHAẠPH ITUUGHẠ PHỌ 52
Loghonhaạn Ḍighaạgh Bunhọn Okparạm Mem Iiḅaghamhị
“Torobọ amem lọ nạ katue ni, ḍighi iiḅi angọ bulọ owạ.”—PROV. 3:27.
AḌUỌR PHỌ 103 Shepherds—Gifts in Men
OGHAẠPH OOKARAGHa
1. Ika kụ edị aZihova ragbor ghan kaphagharanhaạn iiḅereghị arebenhẹ phọ odị?
AZIHOVA katue ni asighẹ nyinhạ apagharanhaạm iiḅereghị onhọn oye. Mughumọ nạ okumor oye ookpomhoghan, odị raloghonhaạn ghan ḍighaạgh ikumor awe phọ, okọy eten obobọ okaaphọm na katue ni aloghonhaạn ḍighaạgh. Kụ iphẹn phọ etu ni inẹ mọ asiạ anạ meghị anyụ obobọ ke/ghị ḅilhẹ mughumọ nạ onyọ umor obobọ umaranhi. Mem dị oye dị aphomhoghiạn aZihova alhọm nyodị olhoghonhaạn aḍighaạgh, Enhaạn ragbor ghan kụ asighẹ ikumor awe ookpomhoghan phọ ḅilhẹ rabunhọn arebenhẹ odị dị okpẹ oḍuom olhoghi kụ aḍighinhom olhoghonhaạn aḍighaạgh budị omhoghi. (Kọl. 4:11) P’eeghe emạ eepoogh dị yira omhoọgh okumu ongọ aZihova ḅilhẹ r’abumor r’abumaranhi phọ ayira eten phọ ephẹn phọ! Kụ yira kotue ni oḍighi iduọn phọ mem dị ezẹgh emite, mem ekperenhom iiḅaghamhị, obobọ mem ikpuuroghọm.
LOGHONHAẠN BUNHỌN ḌIGHAẠGH MEM DỊ EZẸGH EMITE
2. Uḍighi ika kụ ketue bọ eḍighi ipaanhaạn olhoghonhaạn abunhọn ḍighaạgh mem dị ezẹgh emite?
2 Ketue ni eḍighi ipaanhaạn olhoghonhaạn abunhọn ḍighaạgh mem dị egbogh ezẹgh dị reetenheghian ghan emite. Esi omaạm, etue ni etọl olhoghi ayira oghị ophogh oyaghirị ayira, kuolọ etue ni eḍighi ootorosoromhinheen oghị. Kụ kẹn eeni yira otue ni owạ omhạgh aani abunhọn dị ekuom oru k’ayira olhe aani eḍien, kuolọ iphẹn phọ kẹn bịn ke/tue edugh. Yira otue ni owạ olhoghonhaạn aḍighaạgh bunhọn, kuolọ etue ni eḍighi ipaanhaạn eḍighi iyaạr dị abuọ eghunotu ayira romiinhọm. Toroboiperolbọ, yira rowạ ni olhoghonhaạn abumor phọ ayira ḍighaạgh, kụ reḅaạl ghan ni olhoghi aZihova mem dị yira oḍighi oomo idị yira kotue, olhoghonhaạn abunhọn ḍighaạgh. (Prov. 3:27; 19:17) Eeghe kụ edị yira kotue oḍighi?
3. Yira otuughạ eeghe esi eḍeenhaan ikumor awe ookpomhoghan phọ aDesi? (Jeremiah 23:4)
3 Iyaạr dị ikumor awe phọ kotue oḍighi. Eḍighi iyaạr dị nạ aḍighi okumor oye ookpomhoghan, pọ kuamhị alhegheri iyool phọ. (Bạl Jeremiah 23:4.) ADesi, onyọ umaranhi phọ oghaạph bọ oghol siphẹ emhuoghaạph phọ eten bọ, aḅẹm mọ, “Ikumor awe phọ orọl bọ ekụ arukumuan phọ amhị ugbor ghan ni urelhian imhị epẹ erugh phọ kụ oḅilhẹ uḍighan aani ghan imhị oḍighi inhọn araraạr.”b Ikuph phọ abupoghom mọ abuẹn phọ olhọgh bọ iḍighi ni idị edughanhaan bidị olhoghonhaạn aDesi ḍighaạgh mọ ezẹgh aKOVID-19 phọ ezẹ bọ buniin abuọ eghunotu phọ abidị.
4. Eeghe kụ edị ikumor awe phọ oḍighi orue olhoghonhaạn aḍighaạgh Desi, kụ itughemhị iyira eeghe?
4 ADesi aghaạph mọ, “Loor iduọn ikumor awe phọ oḍighi bọ righirị amhị, idughanhaan ni imhị oḅenhị abidị ipẹ mị alhoghoma bọ ḅilhẹ r’ilọ araraạr dị riiḅaghamhị imhị.” Iphẹn phọ etughemhị ikumor awe phọ eeghe? Mọ bidị omhaạr ghan ophogh iyool phọ kụ iiḅaghamhị egbi omite. Ḍigh bidị righirị. Eḍighi iyaạr dị ezẹgh eḍighi idị i/tue idugh dị yira kokị opogh bidị, pọ kparaghạ osighẹ inhọn odọ areten oḅaanhaạn abidị. ADesi aḅẹm mọ “Ikumor awe phọ ugbor ghan ni umhạgh imhị oḅilhẹ ofirimạ ghan sidom afon uruom imhị ibadị amem eniin phọ aḍio phọ,” kụ “ariisi aBaibul phọ bidị aạl ghan bọ, ghalhamọ r’ipẹ mị alhegheri bọ ni igbaany, ikạr ghan kụ itir imhị.”
5. Ika kụ idị ikumor awe phọ kotue olegheri raraạr dị abumor r’abumaranhi phọ omhoghi kụ ologhonhaạn bidị ḍighaạgh?
5 Oopuru yogh ghan abumor phọ sipuru r’amagheel kụ eniin eten dị yira kotue olegheri raraạr dị bidị omhoghi. (Prov. 20:5) Bidị omoọgh ni eḍien olhe, rooghọ, ḅilhẹ r’inhọn araraạr dị bidị omhoghi? Bidị rokiilhaan ni mọ bidị ko/moọgh mun oḍighi obobọ esi erọl? Bidị omoghi ni olhoghonhaạn aḍighaạgh agomẹnt phọ ḍughụm? Abumor r’abumaranhi umitiom ni ongọ raraạr dị aDesi amhoghi. Kuolọ ephomhoghiạn phọ r’olhoghonhaạn aḍighaạgh phọ ikumor awe phọ ongọ bọ nyodị ilhoghonhaạn nyodị ḍighaạgh iboom okaran iiḅaghamhị phọ odị asoman bọ. Odị aḅẹm mọ: “Ikumor awe phọ uuḅereghị r’amhị. Ghalhamọ r’iduọn mị u/tue mun bọ uutughiạn ipẹ bidị oghaạph bọ, mị aatughiạn ni ipẹ mị alhoghoma bọ. Epẹ kụ eten dị aZihova uḅenhị ghan imhị mọ, ‘Nạ bịn o/lho.’ ”—Isa. 41:10, 13.
Olhoghi onyọ umor phọ aphạm bọ ituughạ Otu Okoriom mọ aḅaạl iduọn odị ranaghạn bọ dị abumor r’abumaranhi phọ ropanyanhaạn sipuru phọ, kụ aḅaạl kẹn ni olhoghi onhaghạn ophagharanhaạn onyọ umor dị u/moon dị aḍighom zoom ituughạ phọ (Miịn ekpịgh phọ 6)
6. Eeghe kụ edị yira kotue oḍighi siphẹ ookpomhoghan phọ orue olhoghonhaạn aḍighaạgh bunhọn? (Miịn afoto phọ.)
6 Iyaạr dị abunhọn kotue oḍighi. Ii, eḍighi oḍighi ikumor awe phọ oḍiemhiom ophogh abumor r’abumaranhi phọ. Kuolọ aZihova rawạ mọ oomo ayira okparamhị ghan oḅilhẹ olhoghonhaạn ḍighaạgh bunhọn. (Gal. 6:10) Ghalhamọ eẹny iyaạr dị yira oḍighinhaan oye dị u/moon bịn ketue ni eloghonhaạn nyodị ḍighaạgh iboom. Obumoọny atue ni aḍorọ iyaạr angọ onyọ umor okparamhị odị. Onyọ iḍoọgh atue ni akị akoonhaan raraạr umaranhi. Onyọ umor obobọ umaranhi atue ni asạ eḍien akiomaạn oye dị u/moon? Mem dị ezẹgh emite, torobọ oye siphẹ ookpomhoghan phọ amoghi ni okparamhị. Esi iduọn phọ, kenighẹ ni omitiom ghan amem dị emhanhạm oghaaphạn ghan abumor r’abumaranhi phọ mem dị ituughạ emiteghu, mughumọ isiphẹ aKindọm Họl phọ obobọ azoom. Ikumor awe phọ kẹn omoghi aani ni okparamhị. Abuniin abumor r’abumaranhi rogẹ ghan ni rinyạ koghiọm ikumor awe phọ osẹph abidị loor iiḍighi phọ bidị oḍighi bọ mem dị egbogh ezẹgh emite. P’eeghe idị enhighẹ “dị oniin kakparamị ghan ologhi oniin, oniin aaneghị ghan nyoniin”!—1 Tẹs. 5:11.
LOGHONHAẠN ḌIGHAẠGH BUNHỌN MEM DỊ OSOMAN EKPERENHOM IIḄAGHAMHỊ
7. Eeghe ipaanhaạn kụ ketue ni etọl mem dị ekperenhom iiḅaghamhị emite?
7 Ekperenhom iiḅaghamhị etue ni enme ghuḍum oye esi onyam oḅatạn. Abuniin otue ni otoph raraạr emhoọgh abidị, otu, obobọ buọ ephomhoghiạn abidị loor ekperenhom iiḅaghamhị. Iphẹn phọ kẹn remitenhaan ghan ni bumor r’abumarani phọ ayira kẹn. Yira koḍighi eeghe orue olhoghonhaạn aḍighaạgh?
8. Eeghe kụ edị ikumor awe r’aruw-emhụ eghunotu koḍighi kụ ekperenhom iiḅaghamhị egbi omite?
8 Iyaạr dị ikumor awe phọ kotue oḍighi. Ikumor awe, iloghonhaạn ḍighaạgh bumor r’abumaranhi phọ ookolhobian okori kụ ekperenhom iiḅaghamhị egbi omite. Imiịn ni mọ oomo abumor r’abumaranhi siphẹ ookpomhoghan phọ olegheri ni ilọ okoronhaan mem dị ekperenhom iiḅaghamhị emite ḅilhẹ r’idị bidị kotue oteẹny ikumor awe phọ. Umaranhi phọ Margaret oghaạph bọ oghol siphẹ emhuoghaạph phọ eten bọ, aḅẹm mọ: “Ikumor awe ookpomhoghan phọ ayoor ungọ ni iyoor iinhaghạn mem dị ophạm ituughạ, ophụr ayoor rurụ mọ amem mọ aniạn rele ghan bọ raraạr kephuẹ ke/ten. Bidị uḅẹm mọ eḍighi maạr dị abuọ agomẹnt phọ ongọ itọ mọ awe phọ oḍuaghụ oghelheghu inhọn arikpisi loor idị onuzạ phọ reloghorị ghan bịn, pọ mọ yoor onhuụn oḍuạ.” Iinhaghạn phọ ipẹ phọ ikạr kụ ekpeanhaạn r’amem mọ, loor esi dị esi oogh asiwiki bịn onuzạ phọ emhiigh olhe. Aruw-emhụ eghunotu otue ni osighẹ mem iiseeny eghunotu ooḅeghenhọm idị torobọ oye siphẹ eghunotu phọ kaḍighi. Eḍighi maạr dị nạ r’anmụny anạ mookolhobian ni, pọ oḅio anyinha kapọ ni mem dị ekperenhom iiḅaghamhị emite.
9. Ikumor awe koḍighi eeghe mem dị ekperenhom iiḅaghamhị ke/mite ḅilhẹ r’amem dị memite?
9 Eḍighi maạr dị nạ aḍighi oniin opoghom ekool arukumuan, pọ kenighẹ ni dị nạ kabonyị sinoba abumor r’abumaranhi phọ odi bọ ekụ arukumuan phọ anạ ḅilhẹ bidị ogeeghị ongọ nyinhạ riisi amarugh phọ abidị. Kụ ka/kor ri ekperenhom iiḅaghamhị memite kụ agbi oḍighi iphẹn phọ. Kụ mem emhạn mem ḅilhẹ ghan ni aphogh ipẹ bidị ogeeghị bọ ongọ nyinhạ. Iphẹn phọ kelhoghonhaạn nyinhạ ḍighaạgh orue oḅaanhaạn abumor r’abumaranhi phọ odi bọ ekụ arukumuan phọ anạ ḅilhẹ r’olhegheri araraạr dị reeḅaghamhị bidị mem dị ekperenhom iiḅaghamhị emite. Kaạph aḅenhị ookpomhoghiom aḍita ikumor phọ ipẹ bidị oghaạph bọ oḅenhị nyinhạ, pidị odị aḅenhị opoghom eghir phọ ilọ iiḅaghamhị phọ abumor phọ osoman bọ. Mem dị abumor phọ abuẹn phọ oḅophoghạn kụ okumuan, bidị kotue ni ologhonhaạn bumor r’abumaranhi phọ ḍighaạgh agey. Mem mọ onuzạ phọ amite bọ ekpisi phọ abuọ aMargaret, opoghom eghir phọ abidị akumuan ni r’ikumor awe phọ ḍughul r’ootaany esi 36 awạ omhiịn mọ bidị ologhonhaạn ni ḍighaạgh 450 abumor r’abumaranhi dị owilhẹ ruutu abidị oḍuạ loor onuzạ phọ amite bọ. (2 Kọr. 11:27) Iphẹn phọ ilhoghonhaạn ḍighaạgh bumor r’abumaranhi phọ omhoọgh ariisi orọl.
10. Eeghe kụ iḍighi kụ ekpẹ bọ dị ikumor awe phọ kosighẹ oḍighi oghị ghan ophogh abumor r’abumaranhi idiphọ oḍighi dị amhạn maạr? (Jọn 21:15)
10 Eḍighi oḍighi ikumor awe phọ osighẹ aBaibul phọ okparamhiọm abumor r’abumaranhi phọ ḅilhẹ r’oḍighi idị olhoghi abidị kapọ mem dị ekperenhom iiḅaghamhị emite. (1 Pit. 5:2) Eḅẹl iyaạr dị ikumor awe phọ koḍighi mem dị ekperenhom iiḅaghamhị emite pọ omhiịn mọ torobọ onyọ umor r’umaranhi akpetenhaan ni iiḅaghamhị phọ, ḅilhẹ omoọgh eḍien, iinmenian, ḅilhẹ r’esi orọl. Kuolọ mem dị ibadị arunwanyụ meten bidị komoghi ni dị kosighẹ Baibul phọ okparamhiọm bidị. (Bạl Jọn 21:15.) Umor phọ Harold oniin odị rapogh aani ghan Olạ Agadạ, aghị ni aaphoghogh bumor r’abumaranhi dị ekperenhom iiḅaghamhị emitenhaan. Odị aḅẹm mọ, “resighẹ ghan ni mem kụ bidị ogbi omhooghạ aloor abidị.” Bidị otue ni oḅilhẹ omoọgh raraạr emhoọgh phọ bidị oroph bọ, kuolọ kekpạr ri kụ bidị obula ḍuugh oye ephomhoghiạn abidị, ephua abidị dị emhạn maạr, obobọ idị bidị omhiịn ḍuugh. Mem dị bidị ootughiạn ilọ iphẹn phọ etue bịn eḅilhẹ esụgh eephinha phọ emitiom. Iphẹn phọ re/mạ ghan mọ bidị u/moọgh omheeraam, kuolọ eḍighi ipẹ oye raloghoma ghan bọ mem dị ekarạph iyaạr emitenhaan oye phọ.”
11. Eeghe olhoghonhaạn aḍighaạgh kụ edị arughunotu romoghi ghan egbạ gbạ amem?
11 Ikumor awe phọ rodaphạn ghan oromha phọ aḅẹm bọ mọ iḍighan “bulọ romoghi emoghi aani.” (Rom. 12:15) Kewạ ni dị ikumor awe phọ kokparamhị buphẹ ekperenhom iiḅaghamhị phọ emitenhaan bọ mọ aZihova ḅilhẹ abumor r’abumaranhi phọ opomoghiạn ni bidị. Ikumor awe kologhonhaạn ḍighaạgh rughunotu ophamhanhạm edeọm ituughạ, iiḅereghị, omite ghan epẹ erugh phọ, ḅilhẹ r’oghị ghan ituughạ. Ikumor awe phọ kotue kẹn ni oḍeenhaan burudẹ r’aburunhiin ilọ ologhonhaạn aḍighaạgh ibạm anmụny phọ abidị ogbon araraạr dị ekperenhom iiḅaghamhị ke/tue epiemhi. Burudẹ r’aburunhiin, igbor ghan eetughianhạm ghan ibạm anmụny phọ anyinha mọ aZihova ra/bilhẹ ghan righirị odị, ḅilhẹ mọ odị odi ghan olhoghonhaạn abidị ḍighaạgh oomo phọ amem mọ. Ḅilhẹ kẹn ka/bulha oḅenhị abidị mọ bidị oḍighom aani ni pakirị eghunotu abumor r’abumaranhi siẹn oomo aḅirinhi phọ dị okạr rowạ olhoghonhaạn abidị ḍighaạgh.—1 Pit. 2:17.
Ika kụ edị nạ katue amitiom loor olhoghonhaạn aḍighaạgh mem dị ekperenhom iiḅaghamhị emite epẹ ekool phọ anyinha? (Miịn ekpịgh phọ 12)e
12. Nạ kaḍighi ika orue obakị aani buphẹ rologhonhaạn ghan bọ ḍighaạgh mem ekperenhom iiḅaghamhị? (Miịn afoto phọ.)
12 Iyaạr dị abunhọn kotue oḍighi. Eḍighi maạr dị ekperenhom iiḅaghamhị emite ekpisi dị ituman inyinha, pọ puru ikumor awe phọ iyaạr dị nạ kaḍighi kụ aloghonhaạn aani ḍighaạgh. Nạ atue amitiom aani otu anạ dị abuẹn osumughu bọ ekpisi abidị loor iiḅaghamhị phọ kotọl, obobọ dị abuphẹ oru bọ olhoghonhaạn aḍighaạgh kotọl. Eeni otue ni oḅenhị nyinhạ osighẹ ghan eḍien oghiomaạn abumor r’abumaranhi phọ ekperenhom iiḅaghamhị phọ emitenhaan bọ. Eḍighi maạr dị ekpisi phọ ekperenhom iiḅaghamhị phọ emite bọ ekẹl iboom, nạ katue kẹn ni aloghonhaạn ḍighaạgh. Ika? Esi ooḅereghinhaạn ghan abidị. (2 Kọr. 1:8-11) Nạ katue kẹn ni asogh aani ikpoki obakị oḍighi phọ ookpomhoghan phọ aZihova roḍighi bọ omhaạr ophogh r’olhoghonhaạn aḍighaạgh buphẹ ekperenhom iiḅaghamhị phọ emitenhaan bọ. (2 Kọr. 8:2-5) Eḍighi maạr dị nạ katue ni aḍuạ akị ekpisi dị ekperenhom iiḅaghamhị emite olhoghonhaạn aḍighaạgh, pọ teẹny ikumor awe phọ olhegheri iyaạr dị nạ kaḍighi olhoghonhaạn aani aḍighaạgh. Kụ eḍighi maạr dị bidị kụ omhạgh nyinhạ oghị aani, pọ eeni kotughemhị ni nyinhạ pidị nạ akạr atue aloghonhaạn ḍighaạgh bumor r’abumaranhi phọ ḅilhẹ otue oteẹny nyinhạ mem lọ emhoghi.
LOGHONHAẠN ḌIGHAẠGH BUMOR DỊ ROKPARAGHẠM IGBIPHOGHỌM
13. Eeghe ipaanhaạn kụ edị abumor phọ ayira osoman rikpisi dị osophoghom iiḍighi phọ ayira?
13 Rikpisi dị osophoghom iiḍighi phọ ayira, igbiphoghọm reḍighi ghan ni idị aghuḍum rukparanhaạn iyira. Abumor phọ odi bọ rikpisi phọ ipẹ phọ rosoman ghan ni ḍikparamhinheẹn ikpoki, e/moon, ḅilhẹ r’aḍuugh abuọ ephomhoghiạn abidị. Kuolọ loor esi isophoghom mọ, eeni ikumor awe phọ ko/moọgh eereẹgh orelhe yogh oghị oophoghogh obobọ oḅaanhaạn abumor r’abumaranhi phọ omhoghi bọ dị kokparamhị. Ipẹ kụ idị emitenhaan Andrei okumor oye ookpomhoghan phọ oghaạph bọ oghol siphẹ emhuoghaạph phọ eten bọ. Onyọ umaranhi dị odi aani siphẹ ekụ arukumuan phọ odị uwekulhom. Onyọ umaranhi phọ ophọn phọ aḍighima ni iyaạr loor ekperenhom iiḅaghamhị. Iwạ ni mọ aạy oḅilhẹ okolhọgh umaranhi phọ, ḅilhẹ kẹn odị o/rue mun oghị oḍighi. Etigheri isophoghom mọ erọl bọ ekpisi phọ abidị ḅilhẹ r’egbogh ezẹgh phọ, abumor phọ uḍighi ni oomo ipẹ bidị kotue bọ, ḅilhẹ aZihova alhegheri ni ipẹ remite bọ.
14. Ika kụ idị ikumor awe phọ kopighi emạ eḍeenhaan obeḍenhọm ghan aZihova?
14 Iyaạr dị ikumor awe phọ kotue oḍighi. Andrei aaḅereghị kụ aḍighi ipẹ odị katue bọ. AZihova aḍighi ika? Odị asighẹ aḍighinhom bumor r’abumaranhi dị omhoọgh eereẹgh alhoghonhaạn ḍighaạgh umaranhi phọ. Abuniin usaạny ghan onyọ umaranhi phọ moto abidị oghimọm otu arookonhom. Abunhọn ongọ ghan ikpoki. AZihova anyu bidị oḍighi oomo ipẹ bidị kotue bọ, kụ aḅilhẹ asẹph muḅọph phọ, akpọ oḅio phọ, ḅilhẹ r’ikuph phọ bidị olhọgh bọ. (Hib. 13:16) Ikumor awe iseseeny, mem dị osophoghom iiḍighi phọ ayira ilọm abunhọn ilhoghonhaạn inyinha ḍighaạgh. (Jer. 36:5, 6) Idị emhạn maạr, ibeḍenhọm aZihova. Odị katue ni ilhoghonhaạn inyinha ḍighaạgh olhegheri araraạr dị nyinha keḍighi kụ eloghonhaạn ḍighaạgh bumor r’abumaranhi phọ.
15. Ika kụ edị yira kotue opamhanhạm muḅọph phọ ayira mem igbiphoghọm?
15 Iyaạr dị abunhọn kotue oḍighi. Mem dị osophom oḍighi phọ ayira, kemoghi mọ yira ookpomhoghan ghan ibạm arugu. Esi iduọn phọ, ekạr emạn maạr omhoọgh eephọ siẹn igbo phọ ayira. Bian Setan, ka/bumor phọ. Pogh agunhọm sipiomạn abumor phọ, obobọ kparaghạ omhiịn mọ nyinha eegboronhom ni ekaaphọgh eḅophoghị. (Prov. 19:11; Efẹ. 4:26) Gboogboronhom ghan olhoghonhaạn aḍighaạgh bunhọn. (Taitọs 3:14) Olhoghonhaạn aḍighaạgh phọ ongọ bọ umaranhi phọ ingọ aani ni suọ ekụ ekool arukumuan phọ abidị. Bidị uḍuraan otuman idiphọ eghunotu.—Ps. 133:1.
16. Odaphạn Kolosị 4:3, 18, ika kụ idị yira kotue ologhonhaạn ḍighaạgh bumor r’abumaranhi phọ ayira rokpuuroghọm bọ?
16 Asimuonịr abumor r’abumaranhi rokumu ni aZihova etigheri isophoghom abuọ agomẹnt phọ. Buniin abidị odiighi ikoli loor omheeraam mọ abidị. Yira kotue ni ooḅereghinhaạn bidị, rughunotu phọ abidị, ḅilhẹ r’abuphẹ olhọgh bọ ghuḍum mọ abidị esi ooto r’osooromineen ongọ abumor r’abumaranhi phọ abuẹn phọ eḍien aruwaloor r’iphulhupul, kụ obakị bidị siphẹ otu iiruẹn phọ.c (Bạl Kolosị 4:3, 18.) Ka/pogh asooromhi iikpọ iiḅereghị phọ anạ!—2 Tẹs. 3:1, 2; 1 Tim. 2:1, 2.
Ika kụ edị nạ katue aakolhobian eghunotu anạ nyiidiphọ ilọ ikpuuroghọm? (Miịn ekpịgh phọ 17)
17. Ika kụ edị nạ katue aakolhobian nyiidiphọ ilọ igbiphoghọm?
17 Nạ reghunotu anạ kotue ni ookolobian nyiidiphọ ilọ igbiphoghọm. (Iiḍighi 14:22) Ka/kị ootughiạn yogh oomo ikarạph araraạr dị ketue emite. Kparipẹ ghụn, kparamhị siya anạ r’aZihova kụ alhoghonhaạn ibạm anmụny phọ anạ oḍighi iniin phọ. Mem dị nạ alhoghoma ooḅaghamhiạn aloor, zu ekpom anạ angọ Enhaạn. (Ps. 62:7, 8) Idiphọ eghunotu, iiḅeghiọn oomo phọ ariphigh phọ otuạn oḍuom olhoghi Enhaạn.d Idiphọ iikolhobian reloghonhaạn ghan bọ ibạm anmụny anạ ḍighaạgh mem ekperenhom iiḅaghamhị, kụ edị iikolhobian anạ r’oḍuom olhoghi phọ anạ esi aZihova ketue eloghonhaạn ḍighaạgh ibạm anmụny phọ anạ omhoọgh akpọ oḅio r’eephọ.
18. Eeghe aghisigh kụ rukori iyira?
18 Eephọ phọ Enhaạn reḍighi ghan idị yira kologhoma oghoph. (Fil. 4:6, 7) Dị eego esi eephọ phọ odị, aZihova rapoomhị ghan ekpom ayira etigheri reezẹgh, ekperenhom iiḅaghamhị, ḅilhẹ r’ikpuuroghọm. Odị rasighẹ ghan ikumor awe ookpomhoghan phọ rokumuan bọ iboom kụ aḍighinhom ophogh ayira. Kụ odị angọ ni oomo ayira eepoogh olhoghonhaạn ghan aḍighaạgh oniin atum nyoniin. Eephọ phọ yira rokelhọm bọ nyiidiphọ kinyaamhị iyira okaran igbogh iiḅaghamhị ghisigh, ghalhamọ r’igbogh iiḅaghamhị phọ. (Mat. 24:21) Mem mọ amuphẹ phọ, kewạ mọ yira ophamhanhạm eephọ olhoghi kụ olhoghonhaạn ḍighaạgh bunhọn oḍighi aani igina phọ. Kuolọ mem dị amem mọ amuphẹ phọ eten, yira ko/soman ghan mun iiḅaghamhị dị oḅio ayira kaḍuạ. Yira kokelhọm iyaạr phọ aZihova muguanhaan bọ iyira—eephọ dị ketọl k’agee-pọ.—Isa. 26:3, 4.
AḌUỌR PHỌ 109 Love Intensely From the Heart
a AZihova ragbor ghan k’asighẹ rebenhẹ odị dị okpẹ oḍuom olhoghi kụ olhoghonhaạn ḍighaạgh bulọ romoghi olhoghonhaạn aḍighaạgh. Odị katue ni asighẹ nyinhạ akparamhiọm onyọ umor obobọ umaranhi. Ooḅeghiọn idị yira kotue ologhonhaạn ḍighaạgh bunhọn mem dị omhoghi.
b Monme iniin asiḍien.
c Lọgh elhegh mọ olạ agadạ obobọ buphẹ odi bọ epẹ emhụ agadạ phọ ko/tue ologhonhaạn nyinhạ ḍighaạgh osighẹ aḍinyạ dị nạ agẹ oghiọm abumor r’abumaranhi dị odi ikoli.
d Miịn emhuoghaạph phọ “Kookolobian Nyiidiphọ Osoman Igbiphoghọm” siphẹ Otu Okoriom aJuly 2019.
e ILỌ AFOTO: Olom r’anhịr osighẹ eḍien rotuomaan eghunotu dị ekperenhom iiḅaghamhị emitenhaan.