Nạ Aatughiạn ni?

Nạ mamhiigha ni loor abạl oomo arumhuoghaạph Otu Okoriom alhạ phọ arolhool? Uguạ, pogh mughumọ nạ katue ni apanyanhaạn sipuru phọ iphẹn phọ:

Eeghe kụ asuọ dị yira komoọgh eḍighi iyaạr dị yira omiteom ghan mem oḅaanhaạn, olher ghan rurụ ongọ, ḅilhẹ ogbirima ghan ilọ aZihova?

Nạ kasopha ghan ogey osopha, aḍighi ogey otughemhiạ, amoọgh omheeraam dị akpạr, ḅilhẹ ephomhoghiạn phọ anạ esi aZihova kepogh ghan bịn obụgh.—w22.01, ipoḍi phọ 30-31.

Eeghe asuọ kụ edị yira komoọgh eḍighi iyaạr dị yira okparamhị oḍuomolhoghi phọ ayira esi aZihova ḅilhẹ r’abuphẹ odị amạ bọ omheerạ enye odị?

Ophọn kụ amem dị yira kotuughạ okparamhị oḍuomolhoghi phọ ayira esi aZihova, ophọn kụ ka/mem dị ilhoghi ayira kebạl iyạl mem dị ikumor awe phọ ungọ iyira iiḅakiọm. Mem igbogh iiḅaghamhị phọ, yira kookolhobian ni odaphạn ghan iiḅakiọm dị kungọ ghan iyira ghalhamọ ighịgh mudị ekpạr ri onhaghanhạn obobọ odaphạn.—w22.02, ipoḍi phọ 4-6.

Ookpaạny phọ atụ eeghe kụ aḅenhị bọ Zechariah ilọ “iyaạr ophoghom eselom iikpe phọ edi bọ ḍighaạgh phọ [opoghom abuọ aJu phọ] Zerubbabel”? (Zech. 4:8-10)

Uḍien phọ ophọn phọ angọ ni okuphom owol we phọ Enhaạn mọ ghalhamọ riduọn omhoom otu phọ u/si bọ oḅẹl phọ, kolhọgh ni omạn, kụ kaḅeeraạny kẹn ni aZihova.—w22.03, ipoḍi phọ 16-17.

Ika kụ edị nạ katue aḍighi “oye omaaniọm . . . siphẹ oghaạph phọ anạ”? (1 Tim. 4:12)

Oḅạ ghan ikpo onhụ dị eyoghoyoghọ r’olhọgh eegu epẹ erugh phọ, omoọr ghan r’oomo ekpom ḅilhẹ r’ogbor ghan ophagharanhaạn aḍipuru ituughạ, ogbạ ghan agey ḅilhẹ rolhọgh ghan abunhọn ophophe, kụ oghel iitunyan.—w22.04, ipoḍi phọ 6-9.

Uḍighi ika kụ elhom enhạm mọ oghaạph bọ oghol siphẹ Ogananami 13:1, 2 emoọgh bọ riisi aloor inya ilhom inhạm mọ (iikpọ itooghị) oghaạph bọ oghol siphẹ Daniel emhụ phọ 7?

Elhom enhạm mọ oghaạph bọ oghol siphẹ Ogananami phọ emhụ phọ 13 i/meerạ esi eniin itooghị bịn, idiphọ aRome. Kparipẹ, emerenyạn esi oomo iikpọ itooghị phọ medạ ghan bọ we epẹ omhạn kụ eteẹny k’arodon.—w22.05, opoḍi phọ 9.

Eeghe ephigh eten kụ edị yira kotue oḍeenhaan mọ yira oḍuom ni olhoghi iiruẹn phọ aZihova?

Mem dị oye upiomạn iyira, aghaạph obobọ aḍighi iyaạr dị ephin esi ayira, owilhẹ oghạgh olhoghi r’olhọgh ghan iyaạr olhoghi. Owilhẹ aZihova kụ aalemhi raraạr. Odị kaaḍighion ni iiḅaghamhị phọ ikarạph ekọm bọ.—w22.06, ipoḍi phọ 10-11.

Eeghe kụ edị onyọ umor dị amhoọgh eepoogh ooḅereghị siphẹ ituughạ phọ kalọgh elhegh?

Ro/sighẹ ghan iiḅereghị phọ kụ oolemhiom ookpomhoghan phọ obobọ ongoọm iinhaghạn. Ḅilhẹ mọ i/moghi dị odị kaaḅereghị “iidoọny” iiḅereghị. (Mat. 6:7)—w22.07, ipoḍi phọ 24-25.

Ika kụ edị koḅerion kụ “osoph iiruẹn” ongọ buphẹ “moḍighi ghan bọ ikarạph phọ”? (Jọn 5:29)

Bidị ko/soman ooruẹn aḍuugh loor ikarạph dị bidị oḍighi kụ ogbi omhugh. Kooḅeghiọn roozọ ḅilhẹ r’iḍighinhom araraạr phọ abidị emhiigh k’amem mọ oḅerion bọ bidị kụ rekị.—w22.09, opoḍi phọ 18.

Eeghe omạ oromha kụ edị J. F. Rutherford angọ siphẹ ookpomhoghan eephugh phọ ophạm bọ September 1922?

Siphẹ ookpomhoghan eephugh phọ ophạm bọ epẹ Cedar Point, Ohio, U.S.A., odị agbeelhom mọ: “Uw-emhạ phọ mamhiigh ratooghị! Nyinha emoọgh oḍighi oḅenhị atorobọ oye ilọ iphẹn phọ. Esi iduọn phọ, igbeelhom, igbeelhom, igbeelhom, ilọ Uw-emhạ phọ ḅilhẹ r’Omhạr phọ odị!”—w22.10, ipoḍi phọ 3-5.

Isaiah emhụ phọ 30 ekpaạph ilọ ighẹn iraạr areten dị Enhaạn rulhoghonhaạn ghan iyira ḍighaạgh okparạm?

Emhuoghaạph phọ ephẹn phọ eḍeenhaan mọ odị (1) raler ghan rurụ kụ aḅilhẹ apagharanhaạn iiḅereghị ayira, (2) rungọ ghan iyira iiḅakiọm, ḅilhẹ (3) r’aḍisẹph phọ odị nyiidiphọ r’ipẹ odị umhooghonhaạn bọ iyira ghisigh.—w22.11, opoḍi phọ 9.

Uḍighi ika kụ yira kotue bọ ni okureri mọ ikpo onhụ phọ edi bọ Psalm 37:10, 11, 29 imhunughan ni iḍiodi phọ kụ mọ keḅilhẹ ni emunughan epẹ ghisigh?

Ikpo onhụ phọ aDevid ipẹ phọ iḍeenhaan ipẹ aghuḍum katọl bọ siphẹ Izrạl, idiphọ amem mọ aSolomon ratooghị bọ Izrạl. Kụ aZizọs aghaạph ni aghol ilọ aParadais phọ rukori bọ iyira ghisigh mem dị odị rakaạph ilọ ekpịgh phọ 11. (Mat. 5:5; Luk 23:43)—w22.12, ipoḍi phọ 8-10, 14.