Bumor—Nyinha Resianhaan Ni Oḍighi Ikumor Awe?

1-2. Oḍighi ikumor awe phọ eḅaramaạm eeghe?

EḌIGHI maạr dị nạ rakumuan idiphọ odị raloghonhaạn ghan ḍighaạgh ikumor awe phọ, pọ nạ rasianhaan ni oḍighi okumor oye ookpomhoghan. Keḅeraạn ni nyinhạ oḍighi aani “ephigh oḍighi” phọ ophọn phọ ḍughụm?—1 Tim. 3:1.

² Oḍighi ikumor awe phọ eḅaramaạm eeghe? Bidị roḍiemhiom ghan oḍighi oghaạph iiḅi iinhaghạn phọ, otughemhị r’ophogh iyool phọ, ḅilhẹ r’olhọgh ophophe ookpomhoghan phọ esi ikpo-onhụ r’egey eḍeenhaan. Loor arukumuan phọ abidị iphẹn phọ, aBaibul phọ aḅẹm mọ bidị inmo dị ongọ we.—Efẹ. 4:8.

3. Ika kụ idị onyọ umor kasianhaan oḍighi okumor oye ookpomhoghan? (1 Timoti 3:1-7; Taitọs 1:5-9)

³ Ika kụ idị nạ kasianhaan oḍighi okumor oye ookpomhoghan? Osianhaan oḍighi okumor oye agbatanhaạn ni osianhaan omhoọgh oḍighi agomẹt. Epẹ aḅirinhi phọ, oye dị rawạ oḍighi kụ amhoọgh ni ḍighalhanyạ phọ, pọ kamoọgh ni oḍighi phọ. Kuolọ, oḍighi okumor oye ookpomhoghan epelhom ni omhoọgh aḍighalhanyạ itughemhị r’ogbạ ikpo-onhụ phọ. Oye dị rawạ oḍighi okumor oye amoọgh osianhaan araagharạ phọ ogọ bọ siphẹ 1 Timoti 3:1-7 r’aTaitọs 1:5-9. (Bạl) Emhuoghaạph phọ ephẹn phọ keeḅeghiọn iraạr ikpanhạ areten dị abumor dị rowạ oḍighi ikumor awe kosianhaan: omhoọgh aḍigey aḍien epẹ erugh phọ ḅilhẹ r’isiẹn ookpomhoghan phọ, oḍighi egey eḍeenhaan idiphọ oḍiemhiom eghunotu, ḅilhẹ r’ookolhobian okumu ookpomhoghan phọ r’ophooph olhoghi.

MOỌGH ḌIGEY AḌIEN

4. Remạ ghan eeghe oḍighi oye dị “eḍighinom iyaạr phọ eseleman”?

⁴ Orue osianhaan oḍighi okumor oye ookpomhoghan, pọ ewạ dị ‘eḍighinom iyaạr phọ anạ keseleman.’ Iphẹn phọ remạ ghan mọ oye phọ amhoọgh ḍigey aḍien siẹn ookpomhoghan phọ pidị awe ko/moọgh iyaạr otuạn oḍaghạ odị. Oḅarạm isiphẹ, ḍighi oye dị “amoọgh eghuan ghisigh abuphẹ u/ḍighi aani bọ buọ [ookpomhoghan phọ].” Awe dị u/ḍighi Bugbaanhaạn otue ni oḍaghạ omheeraam mọ anạ, kuolọ ka/moọgh ikarạph araagharạ dị bidị koḍaghạ. (Dan. 6:4, 5) Puruan loor mọ, ‘Mị amoọgh ni ḍigey aḍien siẹn ookpomhoghan phọ r’epẹ erugh phọ?’

5. Ika kụ idị nạ kaḍeenhaan mọ nạ ‘apomoghiạn ipẹ enighẹ bọ’?

⁵ Eḍighi maạr dị nạ “aphomoghiạn ipẹ enighẹ bọ,” pọ nạ kamiịn ghan imạ araagharạ abunhọn kụ akol ghan asẹph bidị. Olhoghi anạ kaḅaạl ghan ni oḍighinhaan igey araraạr bunhọn, ghalhamọ r’araraạr dị bidị u/seere olhoghi mọ nạ katue ni aḍighi. (1 Tẹs. 2:8; miịn “lover of goodness” siphẹ astudy note aTaitọs 1:8.) Uḍighi ika kụ emhạn bọ maạr dị okumor oye ookpomhoghan kapomhoghiạn ipẹ enhighẹ bọ? Loor esi dị bidị rolọgh ghan muboom amem abidị ophogh ookpomhoghan phọ ḅilhẹ r’ookolhobian iiḍighi dị bidị omhoọgh. (1 Pit. 5:1-3) Ghalhamọ r’iduọn phọ ni, ibo phọ bidị romoọgh ghan bọ epelheghiom ni riikiạ phọ bidị ropinyọn ghan bọ.—Iiḍ. 20:35.

6. Ighẹn kụ iniin areten ‘oghuraam ghan awe’? (Hibru 13:2, 16; miịn kẹn afoto phọ.)

⁶ Moọgh eeghara ‘oghuraam ghan awe.’ Iduọn phọ pọ, na kaḍighi ghan iiḅi bunhọn eḅaramaạm we dị r’anạ u/kạr utuman. (1 Pit. 4:9) Aḍiniin aḍinyạ ekaạph ilọ oye dị rakuraam ghan we idiphọ oye dị rakughuron ghan eghuugh otu odị kangọ ghalhamọ r’aruuruen ni.” Puruan loor anạ mọ, ‘Ulhegheriọm ni imhị idiphọ oye dị ralọgh ghan otu we ḍughụm?’ (Bạl Hibru 13:2, 16.) Oye dị rakuraam ghan we ranmo ghan inmo. Ranmo ghan inmo we dị aḍighaạgh i/boghoghọ ḅilhẹ r’abuphẹ ophạm bọ iboom iiḍighi, idiphọ abupoghom eghir r’abulọ oru ongọ oghaạph ookpomhoghan phọ.—Gen. 18:2-8; Prov. 3:27; Luk 14:13, 14; Iiḍ. 16:15; Rom. 12:13.

7. Ika kụ idị okumor oye ookpomhoghan kaḍeenhaan mọ odị o/mhoọgh “ekpooko ikpoki”?

⁷ Kạ/moọgh “ekpooko ikpoki.” Iphẹn phọ remạ ghan mọ nạ o/gbon omhoọgh aruphua. Mughumọ nạ ogbogh oye obobọ uwekulhom, okumu aZihova kụ aḍighi ekpanhạ iyaạr siphẹ aghuḍum mọ anạ. (Mat. 6:33) Iduọn phọ pọ nạ kasighẹ mem mọ anạ, inyaạm mọ anạ, ḅilhẹ r’araraạr emhoọgh anạ akumuom aZihova, aḅilhẹ asighẹ apoghom eghunotu anạ ḅilhẹ r’ookpomhoghan phọ. (Mat. 6:24; 1 Jọn 2:15-17) Puruan loor mọ: ‘Mị apomoghiạn ni iboom ipoki? Araraạr phọ mị amhoọgh bọ igbaanyạn ni imhị ḍughụm? Obobọ mị agbon omhoọgh iboom ikpoki r’aruphua ḍughụm?’—1 Tim. 6:6, 17-19.

8. Ighẹn areten kụ edị nạ kaḍeenhaan mọ nạ amoọgh ni “eeḅi ezọ” ḅilhẹ mọ nạ ‘rapamaghạn ghan ni loor’?

⁸ Nạ amhoọgh “eeḅi ezọ” kụ ‘aphamaghạn ghan loor,’ pọ eḍighinhom iyaạr anạ keeleeny ghan ni. Esi omaạm, nạ ka/leeghi ghan muboom amale r’iboom ipughọl. Iinmenhan r’eten phọ nạ aseere bọ silaạl phọ anạ kemaạr esooran, kụ nạ asabạr ghan ogey ozaamhiạn aloor. Nạ ka/tuughaạny ghan iḍighinhom araraạr aḅirinhi phọ. (Luk 21:34; Jems 4:4) Ghalhamọ uḍighi ni iyaạr dị repin esi anạ, olhoghi nạ ra/kạgh. Ka/ḍighi “ookọ amiim”; obobọ kụ/lhegheriom nyinhạ idiphọ oye iboom ipughọl. Puruan loor mọ, ‘Eten aghuḍum mọ amhị eḍeenhaan ni mọ mị amoọgh ni eeḅi ezọ ḅilhẹ mọ mị rapamaghạn ghan ni loor?’

9. Omhoọgh iitughiạn dị emhiigh ḅilhẹ r’oḍighi oye dị ra/walawalạ ghan eḅaramaạm eeghe?

⁹ Eḍighi maạr dị nạ amhoọgh iitughiạn dị emhiigh, pọ nạ kamaạr aaḅeghiọn ghan raraạr idị emhoọgh muḅọph r’asinhị-iilhogh aBaibul phọ. Nạ amhiigha loor aatughiạn ghan idị aḍinhị-olhogh aBaibul phọ eghaạph kụ agbi osopha osopha, pọ kelhoghonhaạn ni nyinhạ ḍighaạgh osopha ogey osopha. Nạ ka/meeraam ghan iyaạr kụ agbi onhaghạn. Kparipẹ ghụn, pụr awaaghị amhiịn kụ agbi omheeraam. (Prov. 18:13) Ekureriom mọ, nạ kasopha ghan osopha dị kaaghironhaan ghan osụ-olhoghi phọ aZihova. Eḍighi maạr dị nạ “ra/walawalạ” ghan, pọ nạ kamaạr aḅoonomhị ghan raraạr kụ aḅon ghan akị esi. Olhegheriom nyinhạ idiphọ oye dị akpẹ obeḍenhọm ḅilhẹ radaphạn ghan iiḅakiọm. Araagharạ phọ iphẹn phọ reḍighi ghan idị nạ kamoọgh ḍimạ aḍien. Nyiidiphọ ooḅeghiọn idị onyọ umor kaḍighi egey eḍeenhaan idiphọ oḍiemhiom eghunotu.

ḌIGHI EGEY EḌEENHAAN IDIPHỌ OḌIEMHIOM EGHUNOTU

10. Ika kụ idị oye ‘kamaạr apạm otọ odị’?

¹⁰ Eḍighi maạr dị nạ aḍighi olom kụ rawạ oḍighi okumor oye ookpomhoghan, pọ kopogh ni dọl eghunotu phọ anạ kụ ogbi omạ anạ. Esi iduọn phọ, kewạ mọ “maạr aphạm otọ anạ.” Awe olhegheri nyinhạ idiphọ uw-emhụ eghunotu dị amhoọgh ephomhoghiạn aḅilhẹ rapogh ghan eghunotu odị emạ eten. Iphẹn phọ eḅaramaạm oḍiemhiom ghan atorobọ apakirị iiseeny phọ ayira. Eeghe kụ iḍighi kụ iphẹn phọ emạn bọ maạr? Otelhedom mọ aPọl aḅẹm mọ: “Oye lọ u/maạr ilọ ophạm otọ odị, kaḍighi bọ ika kụ apạm buọ [ookpomhoghan] phọ Enaạn?”—1 Tim. 3:5.

11-12. Aroozọ abuọ eghunotu oye dị rawạ oḍighi obobọ maḍighi okumor oye ookpomhoghan ketir ika nyodị? (Miịn kẹn afoto phọ.)

¹¹ Eḍighi maạr dị nạ aḍighi odẹ, pọ ibạm anmụny anạ, ‘onaghanạn ghan’ nyinhạ. Ewạ mọ tughemhị kụ aḅilhẹ aakonhom bidị r’ephomhoghiạn. Iduọn phọ re/ḅẹm ghan mọ ibạm anmụny phọ ko/pegh ghan ephegh obobọ omilọgh ghan reẹgh. Kuolọ, loor esi emạ eten phọ nạ aakonhom bọ bidị, bidị konhaghanhạn ni nyinhạ, olọgh ghan eegu bunhọn, kụ omoọgh imạ araagharạ. Loghonhaạn kẹn bidị ḍighaạgh omhoọgh igey asiya r’aZihova, odaphạn sinhị-iilogh aBaibul oḅilhẹ oḍiiny muụm.

¹² Anmụny anạ “ku/moọgh roozọ dị kokol ghan bidị mọ anmụny oḅom emụ.” Eḍighi maạr dị obumoọny anạ dị odi siẹn igey phọ aḍighi igbogh ikarạph, eeghe kụ kemite? Eḍighi maạr dị odẹ phọ u/pogh ghan obobọ u/liọm ghan moọny phọ, pọ eeni odị ka/sianhaan mun obobọ ka/kiọm mun ghisigh aḍighi okumor oye obobọ odị raloghonhaạn ḍighaạgh ikumor awe phọ.—Miịn Watchtower October 15, 1996, opoḍi phọ 21, siikpịgh phọ 6-7.

MAẠR APHOGH OOKPOMHOGHAN PHỌ

13. Ika kụ idị nạ katue aḍeenhaan mọ nạ ayoghoyoghọ ni ḅilhẹ nạ o/ḍighi oye itooghị?

¹³ Abumor dị roḍeenhaan raagharạ aKristẹn oḍighi ḍisẹph kụ ongọ ookpomhoghan phọ. Oye dị ayoghoyoghọ ralọgh ghan kaphophe eephọ. Eḍighi maạr dị nạ rawạ mọ olhegheriom nyinhạ iḍiphọ oye dị ayoghoyoghọ, pọ ler ghan rurụ angọ bunhọn kụ aḅilhẹ asighẹ aani ghan ḍiitughiạn abidị. Mem dị nyinha ephạm ruupuruan, kookolhobian ni obakị aani aḍiitughiạn dị ogbogh opol siphẹ aḍita phọ momheeraam lọ i/gbạgh olhogh aBaibul obobọ ḍinhị olhogh. Ka/ḍighi oye itooghị. Iduọn phọ pọ, nạ ka/tọ ghan akananaạm mọ abunhọn osighẹ obobọ oḍighi ipẹ nạ rawạ bọ. Nạ alegheri idị emhạn maạr osighẹ aani aḍiitughiạn abunhọn. (Gen. 13:8, 9; Prov. 15:22) Ka/ḍighi oye “[oruonhụ]” obobọ “oye ekpom.” Kparipẹ r’ogbagarạ obobọ oogbakiạn ghan r’abunhọn, yoghoyoghọ. Ḍighi oye eephọ. Iduọn phọ pọ nạ kaḍiemhiom ghan oḍighi idị eephọ ketọl, ghalhamọ r’eeḍiạn asidọl dị ekpạr ri. (Jems 3:17, 18) Iyoghoyoghọ ikpo onhụ anạ ketue ni epoomhị bunhọn, ghalhamọ r’abuphẹ rusophoghom bọ iyira.—Judg. 8:1-3; Prov. 20:3; 25:15; Mat. 5:23, 24.

14. Remạ ghan eeghe mem dị oḅẹm mọ oye phọ k”‏obia siphẹ omeeraam mọ ḅilhẹ r’amem dị oḅẹm mọ aḅạr?

¹⁴ Ko/mạ onyọ umor dị “k”‏obia siphẹ omeeraam mọ” oḍighi okumor oye ookpomhoghan. Ii ro/ḅẹm ghan mọ nạ kaḍiiny muụm ibadị asiạ eten kụ nạ agbi oḍighi okumor oye ookpomhoghan, kuolọ rokaạph ghan siẹn phọ mọ emoghi ni mem oḍighi onyọ aKristẹn dị masianhaan. Kụ ogbi omạ anạ idiphọ okumor oye, ewạ mọ idiphọ aZizọs ḍeenhaan mọ nạ asooromhi loor aḅilhẹ amoọgh ogbaanyạn esi okparạm okori kụ ookolhobian ophạm atorobọ eepoogh arukumuan dị aZihova angọ nyinhạ. (Mat. 20:23; Fil. 2:5-8) Ḍighi oye dị aḅạr aZihova r’asiigbu elhiom eḍighinhom iyaạr phọ odị, esi odaphạn ghan iiḅakiọm dị ookpomhoghan phọ ongọ.—1 Tim. 4:15.

15. Onyọ umor dị u/ḍighi ophelhegbe esi ongọ ghan oghaạph katue ni aḍighi okumor oye ookpomhoghan ḍughụm? Gbạ.

¹⁵ ABaibul phọ amạ ni amiteom mọ ikumor awe ookpomhoghan omhaạr ilọ otughemhị ghan. Iphẹn phọ remạ ghan mọ nạ kaḍighi ophelhegbe ongọ ghan oghaạph ḍughụm? Eeye. Ibadị ikumor awe ookpomhoghan u”kạr umaạr ongọ oghaạph, kuolọ omaạr agey otughemhị oye Baibul epẹ erugh phọ ḅilhẹ r’oghị ghan ophogh r’okparamhị abumor r’abumaranhi phọ. (Miịn “qualified to teach” siphẹ astudy note 1 Timoti 3:2; poghom 1 Korịnt 12:28, 29 ḅilhẹ Efesọs 4:11.) Ghalhamọ r’iduọn phọ ni, ewạ ni dị nạ kakiọm ghisigh atophomhi sighalhanyạ phọ anạ idiphọ otughemhiạ. Ika kụ idị nạ katue aḍighi iduọn phọ?

16. Ika kụ idị nạ katue aḍighi otughemhiạ dị asilor? (Miịn kẹn afoto phọ.)

¹⁶ ‘Pạm ni dom mọ . . . ekpẹ bọ ni oḍuom ologhi phọ akparamị.’ Orue oḍighi oye dị amhaạr itughemhị, pọ nạ kakpasị ghan oghaạph phọ anạ ḅilhẹ r’oromha dị nạ rangọ oye siphẹ aBaibul phọ. Moọgh eegharạ otuughạ ghan aBaibul phọ r’arinyạ phọ ayira. (Prov. 15:28; 16:23; miịn “holding firmly to the faithful word” siphẹ astudy note aTaitọs 1:9.) Mem dị nạ ratuughạ, miigha loor amhiịn ipẹ arinyạ phọ ayira egbạ bọ riisi aBaibul phọ pidị nạ atue asighẹ aḍighinhom eten phọ epẹ ekpeanhaạn bọ. Kụ mem dị nạ rangọ oghaạph obobọ ratughemhị, kparaghạ omhiịn mọ nạ ateẹny ni ekpom awe phọ ronaghạn bọ. Opuru aani ghan abunhọn ikumor awe dị mosilor ḅilhẹ r’osighẹ ghan oḍighinhom oromha abidị kelhoghonhaạn ni nyinhạ ḍighaạgh oḍighi otughemhiạ dị asilor. (1 Tim. 5:17) Ikumor awe phọ oḍighi we dị “kotue ni . . . otomoghiom” ghan bumor r’abumaranhi phọ; toroboiperolbọ, eeni amem ikumor awe phọ kotue ni oḅaạm bidị. Ikumor awe phọ osighẹ ni eyoghoyoghọ eten kụ oḍighinhom torobọ eten dị bidị rotomoghiom. Eḍighi maạr dị nạ ayoghoyoghọ aḅilhẹ amhoọgh ephomhoghiạn kụ akpasị ghan itughemhị phọ anạ siphẹ Ekpo Onhụ Enhaạn, pọ nạ kaḍighi ni oye dị amhaạr itughemhị. Loor esi dị nạ ratuughaạny ghan Ogbogh Otughemhiạ phọ, Zizọs.—Mat. 11:28-30; 2 Tim. 2:24.

KIỌM NI GHISIGH AḌIGHI IDỊ NẠ KASIANHAAN

17. (a) Eeghe kụ keloghonhaạn ḍighaạgh buphẹ rologhonhaạn bọ ḍighaạgh ikumor awe phọ oghiọm aghisigh osianhaan? (b) Eeghe kụ edị ewạ dị ikumor awe phọ kolọgh elhegh mem dị bidị rooḅeghiọn onyọ umor dị komạ oḍighi okumor oye? (Miịn igbe phọ “Ilegheri Okụ Mem Dị Nyinha Reeḅeghiọn Bunhọn.”)

¹⁷ Ibadị abuphẹ rologhonhaạn ghan bọ ḍighaạgh ikumor awe phọ otue ni ootughiạn mọ bidị ko/tue ni bịn osianhaan oḍighi ikumor awe mem dị bidị ootughiạn raraạr phọ ewạ bọ ḍighaạgh abidị. Kuolọ ilegheri mọ aZihova r’ookpomhoghan phọ ro/gon omhiịn dị nyinha kesianhaan oomo araraạr phọ ogọ bọ eten dị emhunhughan. (1 Pit. 2:21) Kụ iikpọ uwaloor iigbia phọ aZihova kụ kelhoghonhaạn nyinhạ ḍighaạgh osianhaan. (Fil. 2:13) Eniin esi araagharạ phọ ogọ bọ siẹn phọ edi ni dị ewạ mọ nighemhị ḍughụm? Pọ ḅeeḅereghị aḅenhị aZihova. Waaghị alhegheri ilọ eegharạ phọ, aḅilhẹ apuru oromha okumor oye ilọ onhighemhị eegharạ phọ.

18. Eeghe iyaạr kụ edị rewạ ḍighaạgh abuphẹ rologhonhaạn bọ ḍighaạgh ikumor awe phọ?

¹⁸ Eḍighi edị oomo phọ ayira, ghalhamọ r’abuphẹ rokumuan bọ iḍiphọ ikumor awe kokiọm ghisigh omoọgh raagharạ phọ yira ooḅeghiọn bọ siẹn emhuoghaạph phọ ephẹn phọ. (Fil. 3:16) Nạ raloghonhaạn ghan ḍighaạgh ikumor awe phọ ḍughụm? Pọ pighi ḍiigbu oḍighi aani okumor oye! Lọm aZihova atughemhị nyinhạ aḅilhẹ aḅọl nyinhạ, pidị nạ atue akumu agey nyodị r’ookpomhoghan phọ. (Isa. 64:8) AZihova asẹph ni ikuph phọ nạ ralọgh bọ osianhaan oḍighi okumor oye ookpomhoghan.