EMHUOGHAẠPH ITUUGHẠ PHỌ 42
AḌUỌR PHỌ 103 Shepherds—Gifts in Men
Sereghiạn We Phọ AZihova R’aZizọs Osighẹ Bọ Roḍighinhom
“Mem mọ dị agheel bọ k’akẹ phọ . . . , ang̣ọ inmo we.” —EFẸ. 4:8.
EGBON
Ipẹ abuphẹ rologhonhaạn ghan bọ ḍighaạgh ikumor awe phọ, ikumor awe ookpomhoghan, r’abupoghom eghir rulhoghonhaạn ghan bọ iyira ḍighaạgh, ḅilhẹ r’ipẹ yira kotue bọ oḍeenhaan mọ yira osereghiạn ni bumor phọ abuẹn phọ okpẹ bọ oḍuomolhoghi.
1. Eeghe kụ iniin araraạr dị aZizọs maḍighinhaan we?
OYE o/lho dị malhoghonhaạn ghan ḍighaạgh bunhọn aaleeny Zizọs. Mem mọ odị arọl bọ siẹn ade phọ, odị asighẹ ni iikpọ oḍighinhom iiḍaạny phọ odị alhoghonhaạn ḍighaạgh bunhọn. (Luk 9:12-17) Inmo dị odị angọ dị epelheghiom pọ, ongọ ayira ghuḍum mọ odị. (Jọn 15:13) Egbi k’amem mọ oḅeton bọ nyodị, odị akiọm ni ghisigh rulhoghonhaạn iyira ḍighaạgh. Idiphọ odị aguanhaan bọ, aZizọs malhọm aZihova ongọ ayira uwaloor iigbia phọ odị otughemhị r’oodereghị ayira. (Jọn 14:16, 17; 16:13) Kụ dị eego esi ituughạ phọ yira rokị ghan bọ, aZizọs akiọm ni ghisigh runyaamhị ghan iyira otughemhị awe igey aBaibul phọ siẹn oomo aḅirinhi phọ.—Mat. 28:18-20.
2. Abuọ anhiạn kụ abuniin “inmo” awe phọ oghaạph bọ siphẹ Efesọs 4:7, 8?
2 Ooḅeghiọn enhọn inmo dị aZizọs ungọ iyira. Otelhedom mọ aPọl agẹ mọ mem mọ aZizọs agheel bọ k’akẹ, odị angọ “inmo we.” (Bạl Efesọs 4:7, 8.) APọl aghaạph mọ aZizọs angọ inmo we obakị ookpomhoghan phọ ibadị areten. (Efẹ. 1:22, 23; 4:11-13) Rodon, inmo phọ odị angọ bọ eḅaramaạm buphẹ rologhonhaạn ghan bọ ḍighaạgh ikumor awe phọ, ikumor awe ookpomhoghan, ḅilhẹ r’abupoghom eghir.a Ii, awe phọ abuẹn phọ u/munughan, esi iduọn phọ, bidị ropiomạn ghan ni. (Jems. 3:2) Kuolọ Uw-emhoọgh phọ ayira Zizọs asighẹ ni bidị raḍighinhom olhoghonhaạn ayira ḍighaạgh; bidị okạr kụ oḍighi inmo dị ungọ iyira.
3. Kaạph amaaniọm ipẹ oomo ayira kotue bọ obakị buẹn ungọ bọ iyira idiphọ “inmo.”
3 AZizọs angọ oḍighi okparamhị ookpomhoghan phọ we phọ abuẹn phọ oḍighi bọ “inmo.” (Efẹ. 4:12) Kuolọ oomo phọ ayira kotue ni ologhonhaạn ḍighaạgh bidị oḍighi oḍighi phọ ophọn phọ. Kotue ni omaaniọm iphẹn phọ oḍighi olhọgh aKindọm Họl. Abuniin rolọgh otu phọ, abunhọn rosạ ghan riiḍien, abuniin odi osaanyọgh araraạr, ḅilhẹ r’inhọn iiḍighi. Iniin phọ kẹn ni, oomo phọ ayira kotue ni obakị esi ikpo onhụ r’iiḍighi buphẹ rologhonhaạn ghan bọ ḍighaạgh ikumor awe phọ, ikumor awe ookpomhoghan phọ, ḅilhẹ r’abupoghom eghir phọ. Uguạ ooḅeghiọn ipẹ yira romooghọm ghan bọ suọ iiḍighi phọ abidị ḅilhẹ r’ipẹ yira koḍeenhaan bọ mọ yira osereghiạn ni bidị r’aZizọs phọ ungọ bọ iyira bidị idiphọ “inmo.”
OḌIGHI ABUPHẸ ROLOGHONHAẠN GHAN BỌ ḌIGHAẠGH IKUMOR AWE PHỌ
4. Eeghe kụ iniin iiḍighi dị abuphẹ omạ bọ olhoghonhaạn ghan aḍighaạgh ikumor awe phọ oḍighi ghan bọ siphẹ oḅẹl okuron asiạ phọ?
4 Siphẹ oḅẹl okuron asiạ phọ, umạ ni buniin abumor okumuan idiphọ abudị rologhonhaạn ghan ḍighaạgh ikumor awe phọ. (1 Tim. 3:8) Kụ ekịgh mudị bidị kụ uḍighi ghan bọ iiḍighi “ologhonhaạn ghan aḍighaạgh bunọn” aPọl aghaạph bọ aghol. (1 Kọr. 12:28) Abuphẹ olhoghonhaạn ghan bọ ḍighaạgh ikumor awe phọ uḍighi ni iiḍighi dị emhạn maạr pidị ikumor awe ookpomhoghan phọ otue ogbon otughemhị r’ophogh ookpomhoghan phọ. Esi omaạm, bidị ulhoghonhaạn ghan ḍighaạgh ogẹ otenheghi inhọn ariisi Igẹ Iigbia phọ obobọ oghị oghooghi araraạr phọ koḍighinhom bọ.
5. Ighẹn kụ iniin iiḍighi dị abuẹn rologhonhaạn ghan bọ ḍighaạgh ikumor awe phọ roḍighi rodon?
5 Ooḅeghiọn iniin iiḍighi dị buphẹ rologhonhaạn ghan bọ ḍighaạgh ikumor awe phọ roḍighi ghan siphẹ ookpomoghan phọ anyinha. (1 Pit. 4:10) Otue ni ongọ bidị oḍighi ophogh ikpoki ookpomhoghan phọ obobọ rokool ookpomhoghan phọ, oḍighi idị arinyạ ketu ookpomhoghan phọ, ophegh ghan asuọr r’asividio, ogbi r’ooḅakị awe, obobọ oselhemhi r’ogbuurogh aKindọm Họl phọ. Iiḍighi phọ abidị iphẹn phọ reḍighi ghan iyaạr dị araraạr rekị ghan imạ siphẹ ookpomhoghan phọ. (1 Kọr. 14:40) Inhọn iiḍighi dị buniin abidị roḍighi ghan pọ, ophạm aani ghan iniin apakirị edeọm ituughạ ogboku awiki phọ ḅilhẹ r’ongọ ghan oghaạph ogbo. Otue ni omạ oniin onyọ abidị olhoghonhaạn aḍighaạgh opoghom egu. Eeni amem, okumor oye ookpomhoghan atue ni apạm oniin onyọ abidị dị asianhaan akị akparamhiọm onyọ umor obobọ umaranhi.
6. Eeghe kụ iniin ariphigh phọ yira otuạn bọ rosereghiạn rukumuan abuphẹ rologhonhaạn ghan bọ ḍighaạgh ikumor awe phọ?
6 Ika kụ idị iiḍighi abuphẹ rologhonhaạn ghan bọ ḍighaạgh ikumor awe phọ rengọ ghan suọ ookpomhoghan phọ? Oniin umaranhi dị oghol mọ Beberly,b epẹ Bolivia, aḅẹm mọ: “Mị rasẹph ni buphẹ rologhonhaạn ghan bọ ḍighaạgh ikumor awe phọ, loor esi dị mị akạr kụ rakelhọm ghan ituughạ phọ. Loor arukumuan phọ abidị, mị katue ni amoọr suọr, apagharanhaạn ḍipuru, anaghạn raghaạph phọ rongọ bọ, aḅilhẹ atuughạ iyaạr siphẹ asividio phọ r’iḍoronheẹn phọ bidị roḍeenhaan ghan bọ. Mem dị odi ituughạ bidị ropogh ghan marugh phọ koḅilhẹ oḍighi idị kedughanhaan buphẹ roḍighinhom bọ zoom oghelhọm ituughạ phọ. Kụ mem dị omhạn ituughạ phọ, bidị roḍiemhiom ghan ogbuurogh aKindọm Họl phọ, ogbiighi ikpoki dị olhọgh siphẹ igbe phọ, ḅilhẹ r’omhiịn mọ ookpomhoghan phọ omoọgh ni rinyạ dị i/lo. Mị rasẹph ni bidị!” Onyọ umaranhi dị oghol mọ Leslie, dị odi ghan Colombia dị olom mọ aḍighi okumor oye ookpomhoghan, aḅẹm mọ: “Olom amhị abeḍenhọm buphẹ rologhonhaạn ghan bọ ḍighaạgh ikumor awe phọ. Bidị k’u/lo, odị ka/moọgh ghan eepoogh, katọl ghan bịn rukumuan, esi iduọn phọ, mị rasẹph ni bidị esi oophugh phọ r’olhoghonhaạn aḍighaạgh phọ abidị.” Dị iikia i/lo, eeni iphẹn phọ kụ edị nạ alhoghoma aani.—1 Tim. 3:13.
7. Ika kụ idị yira koḍeenhaan mọ yira osereghiạn ni buphẹ rologhonhaạn ghan bọ ḍighaạgh ikumor awe phọ? (Miịn kẹn afoto phọ.)
7 Ii olhoghi ayira aḅaạl li loor imạ arukumuan phọ buphẹ rologhonhaạn ghan bọ ḍighaạgh ikumor awe phọ rokumuan bọ, kuolọ aBaibul phọ uromha iyira mọ oḍeenhaan ghan mọ yira rosẹph ni bidị. (Kọl. 3:15) Okumor oye ookpomhoghan dị oghol mọ Chris, epẹ Finland, aḍighi ni iduọn phọ. Odị aḅẹm mọ “mị ragẹ ghan ni ḍinyạ obobọ dom afon dị eḅarạm ni esi aBaibul kaghiọm odị raloghonhaạn ghan ḍighaạgh ikumor awe phọ. Mị rakaạph ghan ni kaghol emạ iyaạr dị odị aḍighi dị ikparamhị imhị ḅilhẹ r’ephigh phọ mị rasereghiạn bọ rukumuan phọ odị.” APascal r’ aJael, olom r’anhịr epẹ New Caledonia, rogbor ghan ni koghol buphẹ rologhonhaạn ghan bọ ḍighaạgh ikumor awe phọ kooḅereghị. APascal aḅẹm mọ, “Ilọm r’iiḅereghị ayoor nyiidiphọ egbon ooḅereghinhaạn ghan abidị kụ osẹph aZihova loor abidị. Yoor rolọm ghan kẹn dị aZihova katọl r’abidị aḅilhẹ aloghonhaạn bidị ḍighaạgh.” AZihova ranaghạn ghan ni odọ iiḅereghị phọ ipẹ phọ, kụ oomo ookpomhoghan phọ romooghọm ghan ni suọ.—2 Kọr. 1:11.
OḌIGHI IKUMOR AWE PHỌ “OPHẠM BỌ IIḌIGHI” SIẸN IGBO PHỌ AYIRA
8. Eeghe kụ iḍighi kụ aPọl agẹ bọ mọ ikumor awe ookpomhoghan oḅẹl okuron asiạ phọ uphạm ni iboom iiḍighi? (1 Tesalonikạ 5:12, 13)
8 Ikumor awe ookpomhoghan oḅẹl okuron asiạ phọ ukumuan ni iboom siphẹ ookpomhoghan phọ. (Bạl 1 Tesalonikạ 5:12, 13; 1 Tim. 5:17) Bidị umhaạr ri ophogh ookpomhoghan phọ, ophạm ghan ituughạ oḅilhẹ osopha ghan osopha idiphọ aḍita ikumor awe. Bidị ‘uromhoghiom’ ghan ni bumor r’abumaranhi phọ—ongọ ghan iromhoghiom r’eten ephomhoghiạn pidị omheeraam mọ abidị akpạr. (1 Tẹs. 2:11, 12; 2 Tim. 4:2) Toroboiperolbọ, ikumor awe phọ abuẹn phọ ukumuan ghan ni kẹn omiteom ongọ rughunotu abidị ḅilhẹ r’okparamhị asiya phọ abidị r’aZihova.—1 Tim. 3:2, 4; Taị 1:6-9.
9. Ighẹn kụ iniin iiḍighi ikumor awe phọ rodon?
9 Rodon, ikumor awe ookpomhoghan omoọgh iboom araraạr oḍighi. Bidị ropinom ghan bin oghaạph iiḅi iinhaghạn phọ. (2 Tim. 4:5) R’oophugh bidị roḍiemhiom ghan ni omite epẹ erugh phọ, rooḅakị ghan ipẹ koḍighi bọ oḍighi phọ siphẹ arokool phọ, rutughemhị ghan iyira kẹn okuamhị ogbạ r’otughemhị ikpo onhụ phọ. Bidị roogbo ghan iiruẹn r’onmạ ighirigiir. Mem dị onyọ aKristẹn aḍighi igbogh ikarạph, ikumor awe phọ roḍighi ghan ni ipẹ bidị kotue bọ olhoghonhaạn odị ḍighaạgh oḅilhẹ omhoọgh asiya dị ekpạr r’aZihova. Eniin phọ amem mọ, bidị rogona ghan ni loor omhiịn mọ ookpomhoghan phọ aḅaạl. (1 Kọr. 5:12, 13; Gal. 6:1) Okpanhạ oḍighi ikumor awe phọ pọ ophogh iyool phọ. (1 Pit. 5:1-3) Bidị rookolhobian ghan ni agey kongọ imạ araghaạph. Bidị rokparaghạ ghan kẹn olhegheri atorobọ oye siphẹ ookpomhoghan phọ, komiteom mem oghị ghan okparamhị iyool phọ. Etigheri iiḍighi dị bidị omhoọgh siphẹ ookpomhoghan phọ, abuniin ikumor awe phọ oḅilhẹ kẹn rologhonhaạn ghan ḍighaạgh oḍighi olhoghoḍị r’ookoḍị asiKindọm Họl phọ, r’ookolhobian ilọ arookpomhoghan eephugh phọ kekị. Buniin rokumuan ghan r’aHospital Liaison Committee ḅilhẹ r’aPatient Visitation Group. Ikumor awe phọ rokumuan ghan ni iboom loor emhụ ayira!
10. Eeghe kụ iniin ariphigh phọ yira otuạn bọ rosereghiạn iboom iiḍighi phọ ikumor awe phọ roḍighi bọ?
10 AZihova aguanhaan mọ abupoghom kotọl li dị komaạr uphogh iyira kụ yira “ko/kiil mun ruugu.” (Jer. 23:4) Onyọ umaranhi dị oghol mọ Johanna epẹ Finland, amhiịn ni idị iphẹn phọ eru inẹ mem dị onhiin odị amheel egbogh e/moon. Odị aḅẹm mọ: “Ghalhamọ r’iduọn imhị ri/dughanhaan ghan bọ oḅenhị abunhọn ipẹ mị alhoghoma bọ, oniin okumor oye dị mị u”kạr utuman amiteom ni mem alher rurụ ungọ imhị mem mọ mị rakaạph bọ ipẹ mị alhoghoma bọ, aaḅereghị r’amhị, aḅilhẹ ukparamhị imhị mọ aZihova uphomhoghiạn ni imhị. Mị u/tue mun uutughiạn ipẹ odị akạr bọ aghaạph, kuolọ mị aatughiạn ni mọ mị ulhoghoma ni oghoph. Mị ameeraam mọ aZihova kụ akạr arom nyodị oru olhoghonhaạn amhị ḍighaạgh mem mọ amuphẹ ekpeanhaạn bọ.” Ika kụ idị ikumor awe ookpomhoghan phọ anyinha molhoghonhaạn ghan nyinhạ ḍighaạgh?
11. Ika kụ idị yira koḍeenhaan mọ yira osereghiạn ni ikumor awe phọ? (Miịn kẹn afoto phọ.)
11 AZihova rawạ mọ yira osereghiạn ikumor awe phọ loor “iiḍighi phọ bidị ophạm bọ.” (1 Tẹs. 5:12, 13) AHenrietta, olọ Finland, aḅẹm mọ: “Dị u/kpaariọm, ikumor phọ rologhonhaạn ghan ḍighaạgh bunhọn, kuolọ iduọn phọ re/mạ ghan mọ bidị omoọgh mem r’inyaạm opu bunhọn obobọ bidị u/moọgh ipaanhaạn siphẹ aghuḍum mọ abidị. Eeni amem, mị raḅenhị ghan bidị mọ: ‘Nạ alegheri ni mọ nạ okạr ogey okumor oye ookpomhoghan? Mị rawạ mọ legheri idiphọ.’” Umaranhi epẹ Türkiyec dị oghol mọ Sera aḅẹm mọ: “Ikumor awe phọ omoghi ni ibuọm oghiọm aghisigh oḍighi phọ abidị. Esi iduọn phọ, yira otue ni ogẹ ḍinyạ okiọm bidị, omạgh bidị oru aani k’ayira olhe eḍien, obobọ oḍighan bidị omite epẹ erugh phọ.” Okumor oye ookpomhoghan odi ni dị nạ asereghiạn iboom loor iiḍighi phọ odị raḍighi bọ ḍughụm? Wạ reten oḍeenhaan odị mọ nạ asereghiạn ni nyodị.—1 Kọr. 16:18.
Nạ katue ni angọ ibuọm bumor phọ abuphẹ ophạm bọ iiḍighi oghiọm aghisigh oḍighi phọ abidị (Miịn siikpịgh phọ 7, 11, 15)
ABUPOGHOM EGHIR PHỌ RULHỌGH GHAN IYIRA KOPHOPHE
12. Eeghe iikolhobian kụ edị oḅilhẹ omiteom okparamhị ookpomhoghan phọ mem oḅẹl okuron asiạ phọ? (1 Tesalonikạ 2:7, 8)
12 AZizọs aḅilhẹ ni angọ ookpomhoghan phọ we dị rologhonhaạn ḍighaạgh enhọn eten. Dị edaphạn iiḅakiọm aZizọs, ikumor awe phọ epẹ Jeruselem urom ni Pọl, Banabạs, r’abunhọn oghị ghan ophogh arookpomhoghan phọ. (Iiḍ. 11:22) Eeghe kụ iḍighi? Okparamhị ookpomhoghan phọ, idiphọ ikumor awe phọ r’abuphẹ rologhonhaạn ghan bọ ḍighaạgh ikumor awe phọ roḍighi bọ rodon. (Iiḍ. 15:40, 41) Abumor phọ abuẹn phọ mophinyọn ni iboom arikiạ oḅilhẹ olọgh ghuḍum abidị esi ooto r’osooromineen otughemhị r’okparamhị abunhọn siphẹ ookpomhoghan phọ.—Bạl 1 Tesalonikạ 2:7, 8.
13. Ighẹn kụ iniin iiḍighi abupoghom eghir?
13 Abupoghom eghir roḍighi ni oboom oḍighi oghị ghan ophogh arookpomhoghan phọ. Abuniin rotelhe ghan ibadị itobi oḍuạ ookpomhoghan ogbạ ookpomhoghan. Torobọ awiki, abupoghom eghir rongọ ghan ni ibadị araghaạph, koghị oophoghogh bumor r’abumaranhi, ḅilhẹ kẹn ropạm ghan ni ruupuruan r’abukọy eten, ikumor awe ookpomhoghan, ḅilhẹ r’aruupuruan omite epẹ erugh phọ. Rookolhobian ghan kẹn raghaạph r’ipẹ arookpomhoghan eghir r’eephugh kekị bọ. Bidị rotughemhị ghan askul abukọy eten, kophạm ruupuruan dị egbatanhaạn r’abukọy eten eghir phọ, ḅilhẹ r’inhọn iiḍighi dị eeni olạ agadạ phọ ongọ bidị oḍighi kụ ewạ mọ oogboronhom.
14. Eeghe kụ iniin ariphigh phọ yira otuạn bọ rosereghiạn iboom iiḍighi phọ abupoghom eghir roḍighi bọ?
14 Ika kụ idị ookpomhoghan phọ romooghọm ghan suọ bupoghom eghir phọ oḍighi bọ inmo? Oniin onyọ umor epẹ Türkiye aghaạph ni ilọ abupoghom eghir phọ rotu ghan bọ ophogh ookpomhoghan phọ abidị. Odị aḅẹm mọ: “Torobọ amem dị bidị oru ookpomhoghan ayoor mị ramoọgh ghan ni ibuọm olhọgh amem olhoghonhaạn ghan aḍighaạgh bumor r’abumaranhi phọ. Mị mamhiịn ni ibadị abupoghom eghir; kuolọ mị ko/mhiịn ghan onyọ abidị dị u/dugh oteẹny oḅaanhaạn obobọ u/moọgh eepoogh oghaaphạn oye.” Opoghom eghir r’aJohanna phọ oghaạph bọ oghol epẹ omhạn urelhean ni eniin amem epẹ erugh phọ, kuolọ u/zuan oye olhoghi otu. AJohanna aḅẹm mọ, “ghalhamọ r’iduọn phọ ni, mị ka/bula ḍio phọ aḍiphẹ phọ. Iyạl abumaranhi amhị mogheel enhọn ekpisi, kụ inyaam abidị risiph imhị iboom. Opoghom eghir phọ ukparamhị ni imhị aḅilhẹ ulhoghonhaạn imhị ḍighaạgh omhiịn mọ nyiidiphọ eeni ke/tue edugh dị yira kotugh r’abuọ eghunotu r’arighirị ayira, kuolọ siphẹ omhoom aḅirinhi phọ yira komoọgh ni ibadị aroopoogh orọl r’abidị.” Ibadị ayira momhooghọm ni suọ oḅilhẹ osereghiạn bupoghom eghir dị oru ookpomhoghan ayira.—Iiḍ. 20:37–21:1.
15. (a) Odaphạn ipẹ edi bọ 3 Jọn 5-8, ika kụ idị yira kotue oḍeenhaan osereghiạn bupoghom eghir phọ? (Miịn kẹn afoto phọ.) (b) Eeghe kụ iḍighi kụ yira kosereghiạn bọ nmariịr abumor phọ abuphẹ ophạm bọ iiḍighi siẹn ookpomhoghan phọ, kụ ika kụ idị yira koḍighi iduọn phọ? (Miịn igbe phọ “Tuutughiạn Nmariịr Phọ Abidị.”)
15 Otelhedom mọ aJọn aromha Gayọs olhoghomạ abumor phọ oru bọ okparamhị ookpomhoghan phọ kụ olhoghonhaạn abidị ḍighaạgh ‘reten dị ekasiạn r’ipẹ Enaạn phọ yira rokumu bọ kongọ, kụ bidị oḅilẹ omiigh erelhe phọ abidị.’ (Bạl 3 Jọn 5-8.) Eniin eten dị yira kotue oḍighi iduọn phọ pọ omhạgh aani ghan opoghom eghir oru aani k’ayira olhe eḍien. Enhọn eten pọ omite aani ghan epẹ erugh phọ mem dị odị aru. Umaranhi phọ Leslie, oghaạph bọ oghol epẹ omhạn asereghiạn ghan bidị enhọn eten. Odị aḅẹm mọ, “mị raaḅereghị ghan mọ aZihova amiteom ni angọ raraạr phọ bidị omhoghi bọ. Olom amhị r’amhị ugẹ ghan kẹn ḍinyạ oghiọm bidị oḅenhị abidị idị eru phọ abidị milhoghonhaạn iyoor ḍighaạgh.” Legheri mọ abupoghom eghir awe aani ni. Eeni amem, bidị rotọl ghan ni e/moon, romoọgh ghan ni ooḅaghamhiạn aloor r’oḅonyonhu ozuan. Eeni ikpo onhụ okparamhị obobọ iịny aruunmo anạ ketue ni eḍighi ophagharanhaạn iiḅereghị opoghom eghir phọ!—Prov. 12:25.
YIRA OMOGHI NI BUMOR OPHẠM IIḌIGHI
16. Odaphạn Proverbs 3:27, eeghe asipuru kụ edị abumor kopuruan loor?
16 Siẹn oomo aḅirinhi phọ, omoghi ni bumor dị kopạm iiḍighi. Nạ aḍighi ni olhephiri oọny dị maḍiiny muụm? Nạ katue ni aloghonhaạn ḍighaạgh? (Bạl Proverbs 3:27.) Nạ rawạ ni osi omhanhanhaạm idiphọ oniin odị raloghonhaạn ghan ḍighaạgh ikumor awe phọ? Nạ rawạ ni oḍighi aani oniin okumor oye ookpomhoghan pidị nạ akumuan angọ bumor r’abumaranhi phọ ḍughụm?d Nạ katue ni aaḅenhion raraạr orue oghị aani Askul Abukaaphọm Ilọ Omhạr Phọ? Askul phọ katughemhị nyinhạ aḅilhẹ angọ eepoogh dị aZizọs kasighẹ nyinhạ aḍighinhom eten dị ebụgh. Kụ nạ alhoghoma mọ nạ ka/tue, pọ ḅeeḅereghị aḅenhị aZihova. Alhọm nyodị uwaloor iigbia phọ odị orue oḍighi atorobọ oḍighi dị ongọ nyinhạ.—Luk 11:13; Iiḍ. 20:28.
17. “Inmo” awe phọ eḍeenhaan eeghe ilọ Uw-emhạ phọ ayira, Zizọs Kraist?
17 Abumor phọ aZizọs amạ bọ idiphọ “inmo” dị odị angọ we eḍeenhaan mọ odị ruḍiemhiom ni iyira rodon. (Mat. 28:20) Olhoghi anạ o/ḅaạl omhoọgh odọ Uw-emhạ dị amhoọgh ephomhoghiạn, eegharạ inmo, ḅilhẹ raler ghan rurụ kungọ iyira esi omiteom abumor dị osianhaan ophogh ayira ḍughụm? Esi iduọn phọ, wạ roopoogh oḍeenhaan mọ nạ asereghiạn ni oboom oḍighi phọ abumor phọ abuẹn phọ roḍighi bọ. Kụ ka/bilhẹ otuạn ghan iphẹn phọ osẹph aZihova. Odị kụ azin “oomo phọ igey inmo phọ yira omoọgh bọ.”—Jems 1:17.
AḌUỌR PHỌ 99 Myriads of Brothers
a Ikumor awe dị rokumuan idiphọ Aloor Phọ Repogh Bọ, bulọgh ḍighaạgh Aloor Phọ Repogh Bọ, Buphẹ Ropogh Bọ Ilạ Agadạ phọ, ḅilhẹ r’abunhọn dị roḍighi inhọn iiḍighi oḍighi aani kẹn “inmo” dị ongọ we.
b Monme iniin asiḍien.
c Ughol ghan mọ Turkey.
d Olhegheri obughẹ ipẹ nạ katue bọ asianhaan oḍighi oniin odị raloghonhaạn ḍighaạgh ikumor awe obobọ okumor oye, Miịn emhuoghaạph phọ “Bumor—Nyinha Resianhaan Ni Oḍighi Abudị Rologhonhaạn Ghan Ḍighaạgh Ikumor Awe Phọ?” ḅilhẹ “Bumor—Nyinha Resianhaan Ni Oḍighi Ikumor Awe?” siphẹ Otu Okoriom aNovember 2024.