Tụutughian Ghan Ọoḅereghinhaan Ạbunhon

1. Yira ulhegheri ika mọ ịiḅereghi ayira ẹman ni mạar esi a Jehova?

ỊIḄEREGHI eḍighi ẹekia inmo dị a Jehova ụngo iyira. Tụutughian ịlo ịphen phọ: A Jehova ạḅogh ni iniin iiḍighi ạngo rụukpaany phọ ọdi. (Ps. 91:11) Ọdi ạngo kẹn Ọony phọ ọdi iiḍighi dị ẹmhan mạar. (Mạt. 28:18) Kọkaaph ika ịlo ọnhaghan ghan ịiḅereghi ayira? Ịphen phọ eḍighi ịyaar dị a Jehova bịn kụ raḍighi ghan. Ọdi ạkar “rạnaghan ghan ịiḅereghi ayira.”—Ps. 65:2.

2. Eeghe eḍeenhaan kụ ẹdi otelhedom mọ ạ Pọl aphighi ịlo ọoḅereghinhaan ghan ạbunhon?

² Ghạlhamo r’ịduon yira rọoḅereghi ghan bọ kọḅenhi a Jehova rạraar dị rịiḅaghamhi iyira, ẹwa kẹn ni mọ ọoḅereghinhaan ghan bụnhon. Ịpe kụ ịdi otelhedom mọ ạ Pọl aḍighi ghan. Esi ọmaam, ọdi ạge ạghiom ookpomhoghan phọ Ẹfesos kụ ạḅem mọ: “Mị úsoph mem ọsephenaan ghan anyina Ẹnaan esi ịiḅereghi.” (Ẹfẹ. 1:16) Ạ Pọl aghol ghan ni kẹn bunhiin awe ạaḅereghi. Esi ọmaam, ọdi ạḅenhi Timoti mọ: “Mị rạseph ni Ẹnaan, . . . Mị raghol ghan ni nyịna esi ịiḅereghi ḍughul rꞌootaany kạngo Ẹnaan ḍịseph oomo amem.” (2 Tim. 1:3) Ạ Pọl ạmhoogh ni ịiḅaghamhi ịlo aloor ọdi oghol ọoḅereghi. (2 Kọr. 11:23; 12:7, 8) Ghạlhamo r’ịduon phọ ni, ọdi ạaḅereghinhaan ghan ni bụnhon.

3. Eeghe kụ iḍighi kụ eeni amem yira rọ́otughian ghan bọ ọoḅereghinhaan ạbunhon?

³ Eeni amem yira robulha ghan ni ọoḅereghinhaan ghan ạbunhon. Eeghe kụ iḍighi? Ọnyo umaranhi dị oghol mọ Sabrinaa ạghaaph ni eniin ịyaar dị rẹkom ghan. Ọdi ạḅem mọ: “Tọrobo ọnyo ayira ạmoogh ni ịbadi ạraraar oḍighi. Loor ịiḅaghamhi kịrokiro phọ yira osoman bọ, ịbadi amem yira rogbon ghan ọoḅereghi ịlo ayira bịn kowulha bụnhon.” Ịphen phọ remitenhaan ghan ni nyịnha ḍụghum? Eḍighi ịdipho, pọ ẹmhuoghaaph phọ ẹphen phọ kẹlhoghonhaan ni nyịnha ḍịghaagh. Kẹkaaph (1) ịyaar phọ eḍighi bọ kụ ẹmhan bọ mạar ọoḅereghinhaan ghan ạbunhon, ḅịlhe (2) ịdi nạ katue aḍighi ịduon phọ.

ỤTU EEGHE KỤ YIRA KỌOḄEREGHINHAAN GHAN BỌ BỤNHON?

4-5. Eeghe ịikpo kụ ịdi ịiḅereghi dị yira ọoḅereghinhaan bụnhon ẹmhoogh? (Jems 5:16)

⁴ Ọoḅereghinhaan ghan ạbunhon “rẹmoogh ghan ni ịikpo.” (Bạl Jems 5:16.) Ọoḅereghinhaan ghan ạbunhon ketue ni enme dọl ạbidi ḍụghum? Ii, ketue ni. A Jizọs alhegheri ni mọ otelhedom mọ a Pita kạparanhaan ni nyọdi mọony amem kụ ạḅenhi nyọdi mọ: ‘Mị mạaḅereghinaan ni nyịnha mọ omeeraam mọ ạna kúpe oopho.’ (Luk 22:32) Ạ Pọl alhegheri ni kẹn mọ ịiḅereghi renme ghan ni rạraar. Pọ kụ ịyaar phọ mem mọ ọlhogh bọ nyọdi ikoli ghạlhamo r’ịduon ọdi ụ́pioman bọ, ọdi ạge ạghiom Fạịlimọn kụ ạḅenhi mọ: “Mị aḍuom ni ologhi mọ Ẹnaan kẹnaghanan ni ịiḅereghi oomo phọ anyina mị ạḅile atu ịteeny inyina.” (Fạị. 22.) Kụ ịphen phọ kụ imite ni, useere ni Pọl kụ ạḅilhe aḅulha amhiigh ọghaaph iiḅi ịinhaghan phọ.

⁵ Ii, ịphen phọ rẹ́ma ghan mọ mem dị yira ọoḅereghi, yira rọkpaariom ghan a Jehova oḍighi ịyaar phọ yira rọlom bọ. Ọdi alegheri ni mọ ạraraar phọ yira rọlom bọ ẹman ni mạar esi ayira, kụ mem dị ẹkpeanhaan ọdi rạpagharanhaan ghan ni. Olhegheri ịphen phọ kịlhoghonhaan iyira ḍịghagh ọḅenhi ghan a Jehova ịlo ạtorobo ạdol dị yira osoman r’oḍuom olhoghi mọ ọdi kaḍighi ni rạraar eten phọ ẹpe ẹkpeanhaan bọ.—Ps. 37:5; mịin 2 Kọrint 1:11.

6. Ika kụ ịdi ọoḅereghinhaan ghan ạbunhon ketir eten phọ ẹpe yira olhoghoma bọ ịlo ạbidi? (1 Pita 3:8)

⁶ Ọoḅereghinhaan ghan ạbunhon keḍighi ịdi yira kọmoogh “igbiririph” ọki esi ạbidi. (Bạl 1 Pita 3:8.) Oye dị ạmhoogh igbiririph ạbunhon rạlogh ghan elhegh ịiḅaghamhi dị ọphoripho oye phọ ạmhoogh kụ ạwa reten ọlhoghonhaan oye phọ ḍịighaagh. (Mạk 1:40, 41) Okumor oye ookpomhoghan dị oghol mọ Michael ạḅem mọ: “Mem dị mị ạaḅereghinhaan bụnhon ịlo ịiḅaghamhi ạbidi, reḍighi ghan ịdi mị rạlogh ghan elhegh ịiḅaghamhi phọ bịdi osoman bọ kụ rẹbughe ghan ẹphomhoghian phọ mị ạmhoogh bọ esi ạbidi. Ịphen phọ riḍur ghan ịmhi ketumeri bịdi ghạlhamo r’ịduon bịdi úlegheri bọ.” Ọnhon okumor oye dị oghol mọ Richard ạkaaph kẹn ọnhon ạsuo. Ọdi ạḅem mọ: “Mem dị yira ọoḅereghinhaan ghan bụnhon, rinyu ghan iyira ọlhoghonhaan ạbidi ḍịghaagh.” Ọdi ạḅaram mọ: “Mem dị yira oḍighinhaan ịyaar bụphe yira ọoḅereghinhaan bọ, ẹḅilhe ẹkigh mụdi yira rọngo ghan a Jehovah eepoogh ọsighe ayira ọphagharanhaan ịiḅereghi phọ yira ọoḅereghinhaan bọ bịdi.”

7. Ika kụ ịdi ọoḅereghinhaan ghan ạbunhon keḍighi ịdi yira kọmoogh ephoghom dị eeleeny ịlo ịiḅaghamhi phọ ayira? (Filipai 2:3, 4) (Mịin kẹn sifoto phọ.)

⁷ Ọoḅereghinhaan ghan ạbunhon reḍighi ghan ịdi yira kọmoogh ephoghom dị eeleeny ịlo ịiḅaghamhi ayira. (Bạl Filipai 2:3, 4.) Tọrobo ọnyo ayira asoman ni ịiḅaghamhi loor ịduon yira odi bọ aḅirinhi dị Eru phọ kụ rẹtooghi. (1 Jọn 5:19; Ogan. 12:12) Mem dị eḍighi ẹeghara ayira ọoḅereghinhaan ghan ạbunhon, kịitughianham iyira mọ ‘iniin phọ odọ ịminimiin phọ kụ edianaan ni oomo’ abumor r’abumaranhi phọ. (1 Pit. 5:9) Ọkoy eten dị oghol mọ Katherine ạḅem mọ: “Ọoḅereghinhaan ghan ạbunhon rịitughianhan ghan ịmhi mọ ạbunhon osoman aani ni ịiḅaghamhi. Kụ ịphen phọ reḍighi ghan ịdi mị rágbon ghan mụn iboom ịiḅaghamhi lọ mị asoman.”

BỊDI OMOGHI NI ỊIḄEREGHI AYIRA

8. Ngọ reḍeenhaan awe dị yira kotue ni ọḅaram sịphe ịiḅereghi phọ ayira.

⁸ Ạbuo ạnhian kụ ẹdi yira kọḅaram ghan sịphe ịiḅereghi phọ ayira? Yira otue ni ọoḅereghinhaan egu awe—esi ọmaam, we di úmoon, ịḍoogh dị osoman ịkpuurioghom r’ạrigilaam ḍịghaagh iigbo ạbidi otu askul, ḅịlhe r’awe dị rọmiinhom loor ạḍikpo. Ịbadi abumor r’abumaranhi ayira osoman ni isophoghom ḍịghaagh ạbuo eghun otu ạbidi ọbobo bụo ạgomet. (Mạt. 10:18, 36; Iiḍ. 12:5) Abuniin abumor ayira mọwilhe ruutu ạbidi osuma loor ịiḅaghamhi imirighan ịtooghi. Ạbunhon ekperenhom ịiḅaghamhi kụ imitenhaan. Ii, yira úlegheri oomo phọ abumor r’abumaranhi phọ ạbuen phọ. Kụolo mem dị yira oghol bịdi ọoḅereghi, yira rọdeenhaan ghan mọ yira rọdaph ni ịto phọ a Jizọs ẹḅem bọ mọ “tọrobo ọnyo anyina kạpomoghian nyọori phọ.”—Jọn 13:34.

9. Eeghe kụ iḍighi kụ yira kọoḅereghinhaan ghan bọ bumor r’ạnmariir abumor phọ ạbuphe rọoḅaki bọ rạraar sịen ookpomhoghan phọ?

⁹ Yira kotue kẹn ni ọoḅereghinhaan bụphe rọoḅaki bọ rạraar sịen ookpomhoghan phọ. Abunhiin ạbidi pọ, ALoor Phọ Repogh Bọ r’ạbuphe rọloghonhaan bọ bịdi ḍịghaagh, bụphe ropogh bọ ịla ạgada phọ, ikumor awe phọ ạbuphe rọoḅaki bọ rạraar ẹpe ịla ạgada phọ, bupoghom eghir, ikumor awe ookpomhoghan r’ạbuphe rọloghonhaan bọ ḍịghaagh ikumor awe phọ. Ịbadi abumor phọ ạbuen phọ osoman ni ịiḅaghamhị ịlo ạbidi kụ eniin phọ amem mọ rokumuan ni ọlhoghonhaan ayira ḍịghaagh. (2 Kọr. 12:15) Esi ọmaam, opoghom eghir dị oghol mọ Mark ạḅem mọ: “Rịiḅaghamhi ghan ni ịmhi ịduon mị ạkelhan bọ ọde r’onhiin phọ ạmhi mọkpo bọ. Ịyal phọ ạbidi rómoon ghan. Ghạlhamọ r’ịduon umaranhi ạmhi r’olom ọdi ropogh bọ ni bịdi, olhoghi ạmhi rạ́ḅaal ghan ịduon mị rạ́kar bọ kạlhoghonhaan aani bịdi ḍịghaagh.” Mụghumo yira olegheri ni oomo ịiḅaghamhi abumor phọ ạbuen phọ ọbobo úlegheri, ọotughian ghan ni ọoḅereghinhaan ạbidi. (1 Tẹs. 5:12, 13) Yira otue kẹn ni ọoḅereghinhaan nmạriir abumor phọ ạbuen phọ ịduon bịdi rọbaki bọ burulom mọ ạbidi orue oḍighi iiḍighi phọ ạbidi.

10-11. Ịiḅereghi dị oghol oomo abumor r’abumaranhi phọ ayira kụ ọoḅereghi, ebeeph ni esi a Jehova ḍụghum? Gbạ.

¹⁰ Ịduon yira mọoḅeghion bọ, yira rogbor ghan ni kọoḅereghinhaan oomo abumor r’abumaranhi phọ ayira. Esi ọmaam, dị yira úkol ḍien oye, yira otue ni ọoḅereghi mọ a Jehova ạlhoghonhaan ḍịghaagh bumor r’abumaranhi dị odi ikoli ọbobo oye ẹphomhoghian ạbidi amhugh. Okumor oye ookpomhoghan dị oghol mọ Donald ạḅem mọ, “Ịbadi abumor r’abumaranhi odi ni dị osoman ịiḅaghamhi, kụ ịbadi amem yira rokol ghan oomo abumor r’abumaranhi phọ sịphe ịiḅereghi phọ ayira pịdi ẹḅaramaam aani bụphe rọmiinhom bọ.”

¹¹ Ịdo phọ ịiḅereghi phọ ịphen phọ ẹḅeraan ni a Jehova? Ii! Loor esi dị a Jehova alegheri ni mọ yira úlegheri oomo ịiḅaghamhi phọ abumor phọ ayira osoman bọ. Esi ịduon phọ, íbeeph ọoḅereghinhaan oomo abumor r’abumaranhi phọ ayira. (Jọn 17:20; Ẹfẹ. 6:18) Ịiḅereghi phọ ịphen phọ reḍeenhaan ghan mọ yira ‘ọpomoghian bụo asiya phọ’ ayira.—1 Pit. 2:17.

MEM DỊ NẠ RẠAḄEREGHINHAAN WE DỊ NẠ ALHEGHERI

12. Ika kụ ịdi okiririom ghan ophogh ạbunhon keḍighi ịdi yira kotue olegheri we dị yira kokol ọoḅereghinhaan?

¹² Kiririom ghan aphogh. Ghạlhamo r’ịduon yira rokol ghan bọ ni egu abumor r’abumaranhi kọoḅereghi, ẹnighenhi dị yira kokol ghan siḍien awe dị yira olhegheri sịphe ịiḅereghi phọ ayira. Oye odi ni sịphe ookpomhoghan phọ anyinha dị asoman ẹgbagara émoon ḍụghum? Ọḍoogh ọnyo umor ọbobo umaranhi odi ni dị aḅonyonhu azuan loor ịkpuuroghom dị asoman otu askul? Ọde ọbobo onhiin odi ni dị ogina ọdi kụ rạkparagha ọsighe iromoghiom mọ a Jehova ookonhomom nmụny phọ ọdi ḍụghum? (Ẹfẹ. 6:4) Eḍighi mạar dị nạ akiririom aphogh dọl phọ ạbidi, pọ kẹbughe ni ịpe nạ raloghoma ghan bọ mem dị nạ ạmhiin dị ạbunhon rọmiinhom. Kụ ịphen phọ kenyu nyịnha ọoḅereghinhaan ghan ạbidi.b—Rom 12:15.

13. Eeghe kụ kịlhoghonhaan iyira ḍịghaagh ọoḅereghinhaan ghan awe dị yira kọ̋mhiin ghan?

¹³ Kol ghan siḍien ạbidi. Mem dị yira rọoḅereghi, yira kotue ni okol siḍien awe dị yira kọ̋mhiin ghan. Esi ọmaam, tụutughian bumor r’abumaranhi phọ ayira odi bọ ikoli ẹpe Crimea, Eritrea, Russia, rạ Singapore. Nạ ạghi sịphe jw.org, nạ kạmiin ni siḍien ạbuphe odi bọ ikoli phọ.c Opoghom eghir dị oghol mọ Brian ạḅem mọ: “Mị mạmhiin mọ ọge ọlhogh esi siḍien abumor r’abumaranhi dị odi ikoli kụ oghol ghan asiḍien phọ ạbidi omiteom rịlhoghonhaan ghan ịmhi ḍịghaagh ọotughian ghan ạbidi kụ ogholhom ghan siḍien phọ ạbidi mem dị mị rạaḅereghi.”

14-15. Eeghe kụ kịlhoghonhaan iyira ḍịghaagh olhegheri ịyaar dị yira kokol ọḅenhi a Jehova oḍighinhaan ạbuphe yira rọoḅereghinhaan bọ?

¹⁴ Kol ịyaar phọ nạ rạwa bọ mọ a Jehova aḍighinhaan bịdi. Umor phọ Michael ọghaaph bọ oghol ẹpe ọmhan ạḅem mọ: “Mem dị mị rạbal sịphe jw.org ịlo abumor dị odi ikoli, mị rạkparagha ghan ni ọotughian ịpe kẹtol bọ eḍighi mạar dị iḍighi ịmhi. Iḍighi ịmhi mị kạaḅaghamhian ni loor ịlo ạnhir ạmhi, mị kạwa ni mọ ọmhaar ophogh nyọdi. Ọotughian ghan ịphen phọ reḍighi ghan dị mị kalegheri rạraar ọḅaram sịphe ịiḅereghi phọ ạmhi ịlo abumor phọ ạbuen phọ mophinogh bọ nmạriir kụ odi bọ ikoli phọ.”—Hib. 13:3.

¹⁵ Mem dị yira ọotughian ịpe ạdol ikoli rẹtol ghan bọ, yira kolegheri ni rạraar oghol ọoḅereghinhaan abumor phọ ayira odi bọ ikoli. Esi ọmaam, yira otue ni ọoḅereghi mọ abukoriom ikoli phọ oḍeenhaan ghan bịdi ẹphomhoghian ḅịlhe mọ ạbuo ịtooghi phọ ọngo ẹereegh bumor r’abumaranhi phọ ọoḅereghi a Jehova. (1 Tim. 2:1, 2) Yira otue kẹn ni ọoḅereghi mọ omheeraam mọ r’ẹma eḍeenhaan abumor phọ ạbuen odi bọ ikoli phọ ẹkparamhi ni bụo ookpomhoghan phọ ạbidi, kụ etir kẹn bụlo kőmhiigh ọoḅereghi a Jehova ọmhiin ịma ạraaghara phọ ạbidi bịn omhiigh ọnhaghan aani adom Ọmhar phọ. (1 Pit. 2:12) Yira otue kẹn ni ọoḅereghinhaan eniin phọ eten phọ bumor r’abumaranhi dị rokaran ịnhon ịiḅaghamhi. Yira okiririom ghan ophogh bịdi, kụ oghol ghan ịyaar phọ yira rọwa bọ mọ a Jehova aḍighinhaan bịdi, pọ keḍeenhaan mọ ẹphomhoghian phọ ayira ẹbugh ni.—1 Tẹs. 3:12.

EPHOGHOM DỊ EELEENY ỊLO ỊIḄEREGHI PHỌ AYIRA

16. Ika kụ ịdi yira koḍeenhaan mọ yira ọmoogh ni ephoghom dị eeleeny ịlo ịiḅereghi phọ ayira? (Mạtiu 6:8)

¹⁶ Ịduon yira mọtuugha bọ, ịiḅereghi etue ni enme dọl oye phọ yira rọoḅereghinhaan bọ. Kụolo ẹwa ni mọ ọmhoogh ephoghom dị eeleeny ịlo ịiḅereghi phọ ayira. Ẹwa mọ ọlhogh elhegh mọ mem dị yira rọoḅereghi, yira rọ́ḅenhi ghan a Jehova ịyaar dị ọdi úlegheri; ọbobo rótoma ghan nyọdi ịlo oḍighi. A Jehova alegheri ni rạraar dị ạrebenhe phọ ọdi omhoghi kụ yira ogbi bọ opuru. (Bạl Mạtiu 6:8.) Kụolo eeghe kụ iḍighi kụ yira kọoḅereghinhaan bọ bụnhon? Etigheri riphigh phọ ọma bọ sịen ẹmhuoghaaph phọ ẹphen phọ, reḍeenhaan ghan mọ yira ọmoogh ogbolhomaam ạbidi. Ẹphomhoghian rinyu ghan iyira ọoḅereghinhaan ạbunhon. Kụ olhoghi ạ Jehova rạḅaal ghan agey mem dị ọdi ạmhiin dị ạrebenhe phọ ọdi roḍeenhaan ẹphomhoghian ịduon ọdi.

17-18. Kạaph ạmaaniom ịyaar phọ eḍighi bọ kụ yira kọoḅereghinhaan ghan bọ bụnhon?

¹⁷ Ghạlhamo ịghigh mụdi ạdol abumor phọ yira rọoḅereghinhaan bọ ínmia, ịiḅereghi phọ ayira reḍeenhaan ghan mọ yira ọpomoghian bịdi, kụ a Jehova ạmiin ni. Ọghaaph ọmaaniom eten phọ ẹphen: Ọḅem mọ eghun otu ọmoogh ịyal ạnmuny, ọnyanhi r’olhebiri. Kụ olhebiri ọony phọ amheel émoon. Kụ ọnyanhi phọ ạghi ạaḅereghian ọde phọ kụ ạḅem mọ: “Seseeny, lọghonhaan ḍịghaagh umor phọ ạmhi, ọdi ómhoon dị úmoon!” Ọde phọ apomoghian ni ọony phọ ọdi kụ raḍighi ni ịpe ọdi katue bọ ookonhom ọdi. Tọrobo ịpe ẹrol bọ, olhoghi ọde phọ kạḅaal li ịduon ọnyanhi phọ ọdi ạphomhoghian bọ umor phọ ọdi dị tụtu aru ạlhom mọ ọdi ạlhoghonhaan nyọdi ḍịghaagh.

¹⁸ Ịpe kụ ịdi a Jehova rạwa mọ oḍighi. Ọdi rạwa mọ ọmhoogh ogbolhomaam kụ ọḅilhe ọoḅereghinhaan ghan bụnhon. Yira oḍighi ịduon phọ, keḍeenhaan mọ yira rọ́wa ghan ịlo aloor ayira bịn, kụolo ịlo ạbunhon kẹn kụ a Jehova ạmiin ni ịpe phọ. (2 Tẹs. 1:3; Hib. 6:10) Ịduon yira mọoḅeghion bọ, eeni amem ịiḅereghi phọ yira rọoḅereghinhaan ghan bọ bumor r’abumaranhi phọ etue ni enme dọl phọ ạbidi. Kụ iḍighi kụ, oḍighi oomo ịpe yira kotue bọ ọmhiin mọ yira ọotughian ni ọoḅereghinhaan ghan ạbunhon.