ẸMHUOGHAAPH ỊTUUGHA PHỌ 47
ẠḌUOR PHỌ 38 He Will Make You Strong
“ Nạ Ạman Ni Mạar”!
“ Nạ ạman ni mạar.”—DAN. 9:23.
EGBON
Ọlhoghonhaan ạḍighaagh bụphe ophogh bọ loor ạbidi osooromhi olhegheri mọ bịdi ọman ni mạar esi a Jehova.
1-2. Eeghe kụ kịlhoghonhaan iyira ḍịghaagh okuphom owol mọ yira ọman ni mạar esi a Jehova?
ẠREBENHE a Jehova ọman ni mạar esi a Jehova, kụolo abuniin odi ni dị rologhoma ghan mọ bụno ụ́man mạar esi ọdi. Eeni oye kụ ạzoom bịdi eten dị bịdi olhoghoma mọ bụno ụ́man mạar. Ịphen phọ memitenhaan ghan ni nyịnha ḍụghum? Eḍighi ịdipho, ika kụ ịdi nạ katue akuphom owol mọ nạ ạman ni mạar esi a Jehova?
2 Ọoḅeghion ghan areḍeenhaan ạ Bạịbul dị eḍeenhaan ịpe a Jehova rạwa bọ mọ awe ụmhiin iyira ọbobo ụzoom iyira kịlhoghonhaan ni iyira ḍịghaagh. A Jizọs, Ọony phọ a Jehova, aghuenhi ghan ni ạḅilhe ạlhogh we eegu. Ịphen ọdi aḍighi bọ iḍeenhaan mọ ọdi r’Ọde phọ ọdi ọkar kụ ọmaghamhi mạar we dị osooromhi loor, dị olhoghoma mọ bụno ụ́moogh mạar oḍighinhom. (Jọn 5:19; Hib. 1:3) Sịen ẹmhuoghaaph phọ ẹphen phọ, yira kọoḅeghion: (1) ịpe a Jizọs ạlhoghonhaan bọ ḍịghaagh we ọlhogh elhegh mọ bịdi ọman ni mạar, ḅịlhe (2) r’ịpe yira kotue bọ okuphom owol loor ayira mọ yira ọkar ri ọman mạar ghisigh Ẹnhaan.—Hag. 2:7.
ỊPE A JIZỌS ẠLHOGHONHAAN BỌ ḌỊGHAAGH WE ỌLHOGH ELHEGH MỌ BỊDI ỌMAN NI MẠAR
3. A Jizọs ạzoom ika we ạ Gạlili phọ oru bọ ọteeny nyọdi ịlo ọlhoghonhaan ạḍighaagh?
3 Mem mọ a Jizọs odi bọ Gạlili rạkaaph iiḅi ịinhaghan phọ, awe uru ni ọteeny nyọdi, olher rụru ọnhaghan ghan ọghaaph phọ ọdi, kụ ọdi ạḅilhe aakonhom bụdi úmoon. A Jizọs ạmhiin bịdi ịdipho “iyool ịga dị ọkpan ruzu phọ kụ ọwilhe bịn dị opoghom úlo.” (Mạt. 9:36) Abuḍiemhiom ạruuku ịiḅereghi phọ ụmhiin we phọ ạbuen phọ ịdipho ighiil awe, kụ ọmhagh ghan bịdi mọ “ạwe dị mosu ọnhu.” (Jọn 7:47-49) Kụolo a Jizọs aghuenhi ni bịdi esi ọlhogh ghan amem ọtughemhi ạbidi r’ookonhom ạreezegh phọ ạbidi. (Mạt. 9:35) Ịdi epelhom sịen, orue ọlhoghonhaan ạḍighaagh ịbadi awe, ọdi ạtughemhi ni butelhedom mọ ọdi ọghaaph aani iiḅi ịinhaghan phọ, kụ ạngo bịdi ịikpo ookonhom ạreezegh r’ạbulo rọokpelheghu.—Mạt. 10:5-8.
4. Nạ ạtuugha eeghe esi eten phọ ẹpe a Jizọs ạzoom ghan bọ we phọ oru ghan bọ ọnhaghan ọghaaph phọ ọdi?
4 Eten phọ a Jizọs aghuenhi ghan bọ bụphe ọnhaghan ghan bọ ọghaaph phọ ọdi, iḍeenhaan mọ ọdi r’Ọde phọ ọdi ọkar kụ ọmaghamhi mạar we phọ ạbuphe ạbunhon ophogh bọ osooromhi. Eḍighi mạar dị nạ rakumu a Jehova kụolo nạ ạmhoogh iikia mụghumo nạ ạman ni mạar esi a Jehova, pọ tụutughian ịpe a Jizọs ạzoom bọ we phọ ạbuphe awe ụ́maghamhi bọ mạar. Ịphen phọ kẹlhoghonhaan nyịnha ḍịghaagh ọmhiin mọ nạ ạman ni mạar esi a Jehova.
5. Kạaph ịlo ạdol ạnhir ọlo ạ Gạlili phọ a Jizọs azuan bọ.
5 A Jizọs ọ́tughemhi egu awe phọ bịn, kụolo ạlhoghonhaan kẹn ni bịdi ḍịghaagh. Esi ọmaam, mem mọ ọdi rạkaaph bọ iiḅi ịinhaghan phọ ẹpe Gạlili, a Jizọs azuan ni oniin ạnhir dị ịḅaal remite ghan loor phọ esi a 12 ạsia. (Mạk 5:25) Loor ịduon ọdi ụ́ḅaal bọ ọdaphan olhogh phọ, tọrobo oye dị ạḅogh nyọdi pọ kạ́ḅaal aani kẹn. Ịphen phọ iḍighi ni ịdi ạnhir phọ úuḍikuan ghan we. Ọḅaram ịsiphe, ạnhir phọ óḍighan ghan bụnhon ọoḅereghi aani a Jehova ọbobo olheeghi ạrayaal. (Lev. 15:19, 25) Dị iikia ílo, ạnhir phọ ọphon phọ ạkar kụ ạmhiinhom loor ẹzegh phọ ẹphen phọ.—Mạk 5:26.
6. Ẹghen eten kụ ẹdi ookonhom bọ ạnhir phọ ịḅaal phọ ekilhogh ghan bọ loor phọ emite?
6 Ạnhir phọ ọphon phọ rạmiinhom bọ ịduon phọ ạwa dị a Jizọs kaakonhom nyọdi. Kụolo ọdi ọ́ghi onyen ọteeny nyọdi. Eeghe kụ iḍighi? Eeni émoon phọ ọdi mẹkom roofolha ẹngo nyọdi. Eeni kẹn ọdi aghiilhaan mọ a Jizọs kạḅitonhaan nyọdi loor ịduon ọdi ụ́ḅaal bọ ọdaphan olhogh phọ. Loor ịduon phọ, ọdi ạḅogh eekunha ạsuoma ạnyu phọ a Jizọs, kụ akuphom owol mọ ghạlhamo r’ạsuoma phọ ọdi bịn keekonhom ni nyọdi. (Mạk 5:27, 28) Omheeraam mọ ọdi ọphon phọ ạphel li nyọdi—ọdi ạmhoogh ni eekonhom. Mem mọ a Jizọs apuru bọ oye phọ ạḅogh bọ ạsuoma phọ ọdi, ạnhir phọ ạ́aghi ịpe ọdi aḍighi bọ, ạghaaph ni mọ ọno. A Jizọs amhegheron ika?
7. A Jizọs ạzoom ika ạnhir phọ rạmiinhom bọ loor ẹzegh? (Mạk 5:34)
7 A Jizọs ạzoom ạnhir phọ ọphon phọ r’igbiririph ḅịlhe r’ọlhogh eegu. Ọdi ạmhiin mọ ạnhir phọ rakiilhaan ḅịlhe aloor phọ repiigha. (Mạk 5:33) Loor ịduon phọ, ọdi ạḅaanhaan ni ạnhir phọ eten dị kẹkparamhi nyọdi. Kụ ạmhagh nyọdi mọ “nyạnhi ạmhi.” Ẹmhagham mọ ẹphen phọ iḍeenhaan mọ a Jizọs ạmoogh igbiririph r’ẹphomhoghian ạki esi ạnhir phọ. (Bạl Mạk 5:34.) Esi phọ ịsien phọ bịn kụ esi dị a Jizọs ạmhagh ạnhir ephoph mọ “nyạnhi ạmhi.” Eeni ạtuan dọl ạnhir phọ r’oghiilhaan phọ ọdi kụ ạmhagh bọ nyọdi ịduon phọ. Gbiom olhoghi ịpe ekpom ạnhir phọ esoor bọ mem mọ a Jizọs ạḅa bọ ikpo ọnhu phọ ịphen phọ! Mọ a Jizọs mụ́ḅaanhaan bọ ạnhir phọ eten phọ ẹphen phọ, ọbo olhoghi ạnhir phọ mụuḅaghamhi ni nyọdi ghạlhamo r’ịduon mookonhom bọ ni nyọdi. A Jizọs ạlhoghonhaan nyọdi ḍịghaagh ọmhiin mọ ọdi ạman ni mạar esi a Jehova Ọde phọ ọdi.
8. Eeghe ịpaanhaan kụ ẹdi oniin ọnyo umaranhi ẹpe Brazil asoman?
8 Rodon kẹn, abuniin ạrebenhe a Jehova osoman ni ịiḅaghamhi émoon dị mẹkom ịdi bịdi moḅonyonhu ozuan ọbobo olhoghoma mọ bụno ụ́man mạar. Ọoḅeghion eḍeenhaan umaranhi dị oghol mọ Maria,a ẹpe Brazil, dị rạkoy ghan eten. Mem mọ ọmhar bọ nyọdi, ọdi ọ́mhoogh ruwol, ọ́mhoogh ḍịghaagh ekeeny. Ạ Maria ạḅem mọ: “Ụkpuuroghom ghan ni ịmhi otu askul ẹ́gbagba amem loor ạdol phọ ạmhi. Ụtaaghi ịmhi ịgbagara asiḍien. Kụ eeni amem sịphe eghun otu phọ ayoor kẹn bịn ụzoom ghan ni ịmhi eten dị ị́nighe dị mị alhoghoma mọ mị ụ́man mạar.”
9. Ika kụ ịdi ọlhoghonhaan ḍịghaagh Maria ọmhiin mọ ọdi ạman ni mạar esi a Jehova?
9 Ika kụ ịdi ạ Maria ạmhoogh bọ ọlhoghonhaan ạḍighaagh? Mem mọ ọdi aḍighi bọ ọnyo Ọgbaanhaan A Jehova, abumor r’abumaranhi phọ ụudereghi ni kụ ọḅilhe ọlhoghonhaan nyọdi ḍịghaagh ọmhiin mọ ọdi ạman ni mạar esi a Jehova. Ạ Maria ạḅem mọ: “Ạḍinya ílo dị ketue eḍigh oomo asiḍien abumor r’abumaranhi phọ ụlhoghonhaan bọ ịmhi ḍịghaagh! Mị rạseph ni a Jehova r’oomo ekpom ạmhi ọngo ạmhi ịma eghun otu abumor r’abumaranhi phọ ạbuen phọ.” Abumor r’abumaranhi phọ ụlhoghonhaan ḍịghaagh Maria orue ọlhogh elhegh mọ ọdi ạman ni mạar esi Ẹnhaan.
10. Eeghe ịiḅaghamhi kụ ẹdi a Meri Mạgdạlin ạmhoogh? (Mịin kẹn sifoto phọ.)
10 Ọoḅeghion ịdi a Jizọs ạlhoghonhaan ḍịghaagh ọnhon ạnhir dị oghol mọ Meri Mạgdạlin. Oḍual ịkaraph aruwaloor kụ ịiḅaghamhi ghan nyọdi! (Luk 8:2) Eeni ọdi aḍighi yogh ghan ni rạraar dị eḍigh ḍiigu esi awe loor ịkaraph aruwaloor phọ rẹeḅaghamhi bọ nyọdi. Kụ ịphen phọ iḍighi ịdi awe útuman ghan nyọdi. Eeni ọdi ạmhoogh ni oghiilhaan, alhoghoma mọ moghel nyọdi, ḅịlhe mọ oye dị kạloghonhaan nyọdi ḍịghaagh ólho. A Jizọs aphorogh ni ịkaraph aruwaloor phọ ẹrol bọ ẹmhu ọdi, kụ ọdi aḍighi aani oniin ọnyo ạmatuan a Jizọs dị ạkuom loor. Ẹghen ẹnhon eten kụ ẹdi a Jizọs ạlhoghonhaan ḍịghaagh Meri Mạgdạlin olhegheri mọ ọdi ạman ni mạar esi a Jehova?
Ika kụ ịdi a Jizọs ạngo bọ okuphom owol Meri Mạgdalin olhegheri mọ ọdi ạman ni mạar esi a Jehova? (Mịin sịikpighi phọ 10-11)
11. Ika kụ ịdi a Jizọs aḍeenhaan mọ a Meri Mạgdạlin ạman ni mạar esi a Jehova? (Mịin kẹn sifoto phọ.)
11 A Jizọs ạmhagh ni Meri Mạgdạlin ọdaph aani ghan ọdi ọghi arikpisi phọ ọdi ạghaaph ghan bọ iiḅi ịinhaghan phọ.b A Meri Mạgdạlin ạmhooghom ni sụo mem mọ ọdi ạnhaghan ghan bọ rạraar phọ a Jizọs ạtughemhi ghan bọ bụnhon. A Jizọs amitenhaan kẹn nyọdi ḍio phọ oḅeton bọ nyọdi. Ọdi oniin ọḅel oye dị a Jizọs ạḅaanhaan ḍio phọ ạḍiphe phọ. A Jizọs ạngo kẹn ni nyọdi oḍighi ọghi ọghaaph ọḅenhi abutelhedom mọ ọdi mọ moḅeton nyọdi. P’eeghe ịdi ịphen phọ ẹma emiteom mọ a Meri Mạgdạlin ạkar kụ ạman mạar esi a Jehova!—Jọn 20:11-18.
12. Eeghe kụ iḍighi kụ a Lidia alhoghoma ghan bọ mọ ọdi ọ́mhoogh mạar oḍighinhom.
12 Ịdipho a Meri Mạgdạlin, ịbadi rodon kẹn ologhoma aani mọ awe okel bịdi ọbobo bụno ụ́man mạar. Umaranhi dị oghol mo Lidia, ẹpe Spain, ạḅem mọ mem mọ onhiin phọ ọdi odi bọ r’eghun ọno, onhiin phọ ọdi ạwa ghan ọsighenhaan eghun phọ. Ghạlhamo r’amem mọ a Lidia aḍighi bọ ọbumoony, bịn onhiin phọ ọdi ạḅitonhaan ni nyọdi ạḅilhe ạḅenhi yogh ghan nyọdi. A Lidia ạḅem mọ: “Mị usopha mọ ạmhi kaḍighi ghan ịdi awe kụlhoghoma ịmhi ọḅilhe ụphomhoghian ịmhi. Mị ughiilhaan ghan ni mọ awe ịmhi kụ́phomhoghian loor ịduon onhiin phọ ạmhi maḍighi bọ ịdi mị alhoghoma mọ mị ọkaraph oye.”
13. Eeghe kụ ịlhoghonhaan bọ Lidia ḍịghaagh ọmhiin mọ ọdi ạman ni mạar esi a Jehova?
13 Mem mọ a Lidia aru bọ ạtuugha igey phọ, ịiḅereghi r’ịtuugha ạ Bạịbul phọ, ḅịlhe ịma ikpo ọnhu r’eḍighinhom ạraraar abumor r’abumaranhi phọ ịlhoghonhaan ni nyọdi ḍịghaagh olhegheri mọ ọdi ạman ni mạar esi a Jehova. A Lidia ạḅem mọ: “Olom mọ ạmhi agbor ghan ni ụḅenhi ịmhi ịdi ọdi ụphomhoghian ịmhi. Kụ mem ẹmhan mem, ọdi ụutughianham ghan ni ịmhi ịma ạraaghara dị mị ạmhoogh. Ạbunhon abuuḅi ạrighiri ạmhi uḍighi ghan kẹn igina phọ.” Nạ alegheri ni oye dị amhoghi ọlhoghonhaan ạḍighaagh olhegheri mọ ọdi ạman ni mạar esi a Jehova ḍụghum?
ỊDI YIRA KOTUE ỌMIIN LOOR AYIRA ỊDIPHO A JEHOVA RẠMIIN GHAN BỌ
14. Ika kụ ịdi 1 Samuel 16:7 ịlhoghonhaan iyira ḍịghaagh ọmhiin eten phọ a Jehova rạmiin ghan bọ we? (Poghom igbe phọ “Uḍighi Ika Kụ A Jehova Ạmaghamhi Bọ Mạar We Phọ Ọdi?”)
14 Legheri mọ ịpe aḅirinhi phọ ọmhiin bọ nyịnha kụ kị́pe a Jehova ạmhiin bọ nyịnha. (Bạl 1 Samuel 16:7.) A Jehova rạ́tuan ghan ḍimite ayira, dọl ayira, ọbobo askul dị yira ọghi kụ ụmhaghamhi iyira mạar. (Isa. 55:8, 9) Esi ịduon phọ, kpạripe rọsighe igbiighi aḅirinhi phọ kụ ophoghom ịdi nạ ạmhan mạar, sịghe ghụn igbiighi phọ a Jehova kụ aphoghom. Nạ atue kẹn ni ạbal sịphe ạ Bạịbul phọ ịlo awe dị a Jehova ạmhaghamhi ni mạar ghạlhamo r’ịduon eeni amem bịdi olhoghoma ghan bọ mọ bụno ụ́man mạar esi a Jehova. We ịdipho Ịlạịjạ, Naomi, rạ Hạnạ. Nạ atue kẹn ni ạge rạraar dị memitenhaan ghan nyịnha dị eḍighi ịdi nạ alhoghoma mọ a Jehova ạkar ri ạmhaghamhi nyịnha mạar ạḅilhe ạphomhoghian nyịnha. Ọḅaram ịsien, nạ atue ni ạaḅeghion rụmhuoghaaph dị edi sịphe ạrinya phọ ayira dị ẹghaaph ịdi yira ọmhan mạar.c
15. Eeghe kụ iḍighi kụ a Jehova ạmhiin bọ Dạnịẹl ịdipho oye dị ạmhan mạar esi ọdi? (Daniel 9:23)
15 Legheri mọ a Jehova ạmaghamhi nyịnha mạar loor ạdol ọkpe oḍuom olhoghi phọ ạna. Amem ịrol li dị oyil phọ Dạnịẹl adugh ạḅilhe aḅonyonhu azuan, eeni mem mọ ọdi mapel bọ 90 ạsia. (Dan. 9:20, 21) A Jehova ạkparamhi nyọdi ika? A Jehova arom ọokpaany phọ ọdi Gabriel ọghi ọotughianham ạ Dạnịẹl mọ ọdi ạman ni mạar esi ọno ḅịlhe mọ ọno mạnhaghan ni ịiḅereghi phọ ạ Dạnịẹl. (Bạl Daniel 9:23.) Eeghe kụ iḍighi kụ ạ Dạnịẹl ạmhan bọ mạar esi a Jehova? Eniin ịyaar pọ, ọdi ạpomoghian elhiom eḍighinhom ịyaar ạḅilhe aḍighi oye dị ạkpe oḍuom olhoghi. (Ezek. 14:14) A Jehova ạge ịphen phọ aseere ọodereghiom ayira. (Rom 15:4) Iniin phọ kẹn ni, a Jehova rạnaghan ghan ni ịiḅereghi phọ ạna. Ọdi ạmaghamhi ni mạar ẹphomhoghian phọ nạ ạmhoogh bọ ạghi esi elhiom eḍighinhom ịyaar r’ạdol ọkpe oḍuom olhoghi phọ ạna sịen arukumuan phọ nạ rạngo bọ nyọdi.—Mic. 6:8, ịge dị edi ude; Hib. 6:10.
16. Eeghe kụ kẹlhoghonhaan nyịnha ḍịghaagh omhiin a Jehova ịdipho Ọde dị ạphomhoghian nyịnha?
16 Mịin A Jehova Ịdipho Ọde Dị Ạphomhoghian Nyịnha. A Jehova rạwa ọlhoghonhaan ạna ḍịghaagh kósiph ạna olhogh riisi dị nạ ạpioman. (Ps. 130:3; Mạt. 7:11; Luk 12:6, 7) Ọotughian ghan ịphen phọ mẹlhoghonhaan ni ḍịghaagh ịbadi dị olhoghoma mọ bụno ụ́moogh mạar oḍighinhom. Esi ọmaam, ọoḅeghion eḍeenhaan ọnyo umaranhi ọlo a Spain dị oghol mọ Michelle. Ọdi alhoghoma mọ ọno ọ́mhoogh mạar oḍighinhom loor ịduon olom mọ ọdi ạgilaam ghan bọ ạḅilhe aatuuny ghan nyọdi esi ịbadi ạsia. Ọdi ạḅem mọ, “Tọrobo amem dị mị alhoghoma mọ mị ụ́moogh mạar oḍighinhom, mị ụkparagha ọotughian ịpe a Jehova ughuraam bọ ịmhi sịphe ạḍighaagh phọ ọdi r’ẹphomhoghian ḅịlhe r’oghoph phọ ọdi ụngo bọ ịmhi.” (Ps. 28:9) Umaranhi dị oghol mọ Lauren, ẹpe South Africa, ạatughianham ghan ni loor ọdi mọ, “Eḍighi mạar dị a Jehova ạsighe iḍigh ẹphomhoghian phọ ọdi uḍurom ịmhi, kụ useere ịmhi atumeriom loor ọdi oomo ạsia phọ ịphen phọ, kụ ạḅilhe ụsighe ịmhi raḍighinhom ọtughemhi aani ạbunhon igey phọ, pọ agey ni ọdi ụmhiin ni ịmhi ịdipho oye dị ạmhan mạar ạḅilhe ạmhoogh mạar oḍighinhom.”—Hos. 11:4.
17. Eeghe kụ kẹlhoghonhaan nyịnha ḍịghaagh okuphom owol mọ nạ ạmoogh ni kuuḅi aghisigh a Jehova? (Psalm 5:12) (Mịin kẹn afoto phọ.)
17 Kuphom owol mọ nạ ạmoogh ni kuuḅi aghisigh a Jehova. (Bạl Psalm 5:12.) A Devid ạtomaam kuuḅi aghisigh a Jehova ịdipho ọsuaram dị aghoph we elhiom eḍighinhom ịyaar. Olhegheri mọ nạ ạmoogh ni kuuḅi aghisigh a Jehova ḅịlhe mọ ọdi ạbaki ni nyịnha keghoph ni nyịnha ẹsighe esi ogbor ghan ọmhoogh iikia. Ika kụ ịdi nạ katue bọ alegheri mọ nạ ạmoogh ni kuuḅi aghisigh a Jehova? Ịdipho yira mọoḅeghion bọ, a Jehova ụḅenhi ni iyira sịphe ạ Bạịbul phọ ịdi ọdi raloghoma ghan ịlo ayira. Ọḅaram ịsiphe, ọdi ạḅilhe kẹn ạsighe ikumor awe arookpomhoghan phọ, rịghiri ayira, r’ạbunhon kụ rụutughianham ghan iyira mọ yira ọman ni mạar esi ọdi. Ẹwa mọ omhegheron ika mem dị bịdi rụkparamhi iyira?
Olhegheri mọ yira ọmoogh ni kuuḅi aghisigh a Jehova kịlhoghonhaan iyira ḍịghaagh dị yira kọ́otughian ghan mọ yira ụ́moogh mạar oḍighinhom (Mịin ẹkpigh phọ 17)
18. Eeghe kụ iḍighi kụ ẹwa bọ ni mọ sẹreghian ghan mem dị awe rọseph nyịnha?
18 Mem dị awe dị olhegheri ọḅilhe ọphomhoghian nyịnha ọseph nyịnha, sẹreghian ghan ni bịdi. Legheri mọ a Jehova katue ni ạsighe bịdi aḍighinhom ọlhoghonhaan ạna ḍịghaagh olhegheri mọ nạ ạmoogh ni kuuḅi aghisigh ọdi. Umaranhi phọ Michelle, ọghaaph bọ oghol ẹpe ọmhan ạḅem mọ: “Ẹnum ẹnum, mị mạtuugha ọsighe ghan ikpo ọnhu ọsereghian phọ ạbunhon rụngo ghan bọ ịmhi. Ii ịkparanhaan ni ịmhi omheeraam, kụolo mị alegheri ni mọ ịpe kụ ịdi a Jehova rạwa mọ mị uḍighi.” Umaranhi phọ Michelle mạkar kụ ạmooghom sụo ọlhoghonhaan ạḍighaagh ikumor awe phọ. Nyịidiphọ a Michelle maḍighi ọkoy eten ḅịlhe rạtol ghan olhoghi otu kakumuan ọlhoghonhaan ạḍighaagh ọla ạgada phọ.
19. Eeghe kụ iḍighi kụ nạ kakuphom bọ ni owol mọ nạ ạman ni mạar esi a Jehova?
19 A Jizọs ụḅenhi ni iyira mọ yira ọman ni mạar esi Ọde k’ạke phọ ayira, Jehova. (Luk 12:24) Esi ịduon phọ, yira kotue ni okuphom owol mọ a Jehova ụmhiin ni iyira ịdipho ạwe dị ọmhan mạar esi ọdi. R’amem r’amem kúbulha ịphen phọ! Oḍighi oomo ịpe yira kotue bọ ọlhoghonhaan ạḍighaagh bụnhon ọmhiin mọ bịdi ọmhan bọ mạar esi a Jehova!
ẠḌUOR PHỌ 139 Miịn Loor Anạ Omhoom Aḅirinhi
a Monme iniin asiḍien.
b Dị iikia ílo, a Meri Mạgdạlin aḍighi aani ni oniin sịphe ạnmariir phọ ọdaph ghan bọ Jizọs ọghi ịnhon arikpisi. Ạnmariir phọ ạbuen phọ ụsighe ni rạraar ẹmhoogh ạbidi ọlhoghonhaan ghan ḍịghaagh Jizọs r’abutelhedom mọ ọdi.—Mạt. 27:55, 56; Luk 8:1-3.
c Esi ọmaam, kịa sịphe ạḍinya phọ Draw Close to Jehovah, ẹmhuoghaaph phọ 24 kụ ạal riisi ạ Bạịbul phọ, kụ ạḅilhe ạal ḍịnya phọ Scriptures for Christian Living sịphe ẹmhuoghaaph phọ “Doubts” ịlo areḍeenhaan awe ạ Bạịbul phọ.