Ikpakarạ Igbe Dị Rengọ Ghan We Eḍien Aruwaloor

Abugbaanhaạn aZihova roteẹny ghan rinyạ r’asividio dị eego esi Intanẹt eten dị ke/rọl ghan. Kuolọ, ibadị apakirị aḅirinhi phọ, abumor phọ ayira ko/tue oteẹny intanẹt loor esi dị emạn iboom ikpoki. Abunhọn odi rikpisi dị iduọn rokaạph bọ bịn Intanẹt phọ maḍuạ, o/kpạr, obobọ o/lo r’o/lo.

Toroboiperolbọ, nyiidiphọ ibadị abumor r’abumaranhi phọ ayira kotue ni odanlod rinyạ r’asividio phọ dị Intanẹt u/ḍighinhom! Ika kụ idị iphẹn phọ erue bọ edugh?

JW Box phọ pọ ikpakarạ igbe dị rongọ ghan rookpomhoghan rikpisi dị Intanẹt u/kạr ulo. Epamanạm iyaạr dị oghol mọ router dị oghị ḍighi kụ ogho, software dị abumor phọ odi bọ Ekpịgh aKomputa epẹ Betẹl omiteom, r’arinyạ r’asividio dị edi siphẹ jw.org. Torobọ igbe phọ rekị ni omhạn $75 U.S.

Siphẹ aKindọm Họl phọ, abumor phọ r’abumaranhi phọ rosighẹ ghan wifi afon abidị kokonetọm JW Box phọ bịn odanlod rinyạ rasividio. Ghalhamọ r’abudị omhoọgh igbaany asifon obobọ idị i/kạr imạn ikpoki bịn kotue ni okonẹt. Kuolọ eḍighi maạr lọ ookpomhoghan phọ odi ekpisi dị u/moọgh intanẹt, ika kụ idị imhoom araraạr keḍigh bọ JW Box phọ? Amem emhạn mem olạ agadạ phọ rolọgh ghan imhoom araraạr dị memite siphẹ jw.org USB flashdrive dị ramạn ni $4 U.S. k’osighẹ oghiọm dị bidị kozọl siphẹ aJW Box phọ.

Ika kụ idị aJW Box phọ malhoghonhaạn ḍighaạgh bumor phọ ayira? Nathan Adruandra, odẹ dị odi ghan Democratic Republic of Congo, aḅẹm mọ: “Mị ukparaghạ ni ibadị amem odanlod iidoọny asividio phọ ‘Sey Jihova, . . . Mị Abeḍenhọm Nyinạ’ ḅilhẹ r’aTuutughiạn Anhịr Phọ aLọt. Kuolọ i/ḅọph, iphẹn phọ iḅonyon ni imhị bịn ezu. Nyiidiphọ mị katue ni adanlod sividio phọ iphẹn alọgh fon amhị, kụ rilhoghonhaạn ghan iyoor ḍighaạgh idiphọ odẹ r’onhiin omhaạr otughemhị anmụny phọ ayoor.”

Onyọ umor dị raloghonhaạn ghan ḍighaạgh rookpomhoghan dị edi aNigeria ookolhobian aJW Box phọ aḅẹm mọ: “Abumor phọ omiịn JW Box phọ idiphọ inmo dị egbatanaạn dị aZihova angọ bidị. Olhoghi abidị aḅaạl agey nyiidiphọ iduọn medughanhaan bọ bidị odanlod aani arinyạ r’asividio phọ edi bọ siphẹ Igbe Araraạr Osighẹ Otughemhiọm mọ.”

Mosighẹ JW Box dị repel li 1,700 okiọm bumor ayira Africa, Oceania, ḅilhẹ r’aSouth America, kụ oḅilhẹ ni rookolhobian ilọ osighẹ inhọn oghiọm inhọn ibadị arookpomhoghan. Ika kụ idị yira romoọgh ghan bọ ikpoki oḍighinhom iphẹn phọ? Esi iisogh phọ rosogh ghan bọ ilọ oḍighi oomo isiẹn aḅirinhi phọ, ibadị rosogh ghan bọ siphẹ donate.jw.org. Meḍighi esi imạ eegharạ inmo phọ anyinha.