Iiḍighi Abutelhedom Mọ
23 Kụ ạ Pọl akiririom aphogh we ạ Sạnhẹdrin phọ kụ ạḅem mọ: “We phọ, bumor phọ, mị raḍighi ghan ni rạraar ghisigh Ẹnhaan r’ọoruen olhoghi dị ịmhi ụ́uḅaghamhi k’arodon.” 2 Ogbogh ọpinyon rịkia phọ Ạnạnạyạs ạto ạḅenhi bụphe ọmheregha bọ otuman Pọl mọ oḅor nyọdi. 3 Kụ ạ Pọl ạḅenhi nyọdi mọ: “Ẹnhaan kaḍighi aani ni nyịnha ịphen nạ ạḅem bọ mọ uḍighi ịmhi, nạ iikpe dị ogbul ọphalhaḅaal ạgba. Nạ ạtol ude pạ phọ rạwa ọdaph ịpe Olhogh phọ ạḅem bọ osoph ọoruen ọngo ạmhi kụ ạḅilhe rạgbagharan ghan Olhogh phọ esi ọngo ịto mọ uḅor ịmhi.” 4 Kụ bụphe ọmheregha bọ pạ phọ ọḅem mọ: “Ogbogh ọpinyon rịkia phọ Ẹnhaan kụ ẹdi nạ raatuuny ghan?” 5 Kụ ạ Pọl ạphagharanhaan mọ: “Bumor phọ, mị úlegheri mọ ọdi ogbogh ọpinyon rịkia. Ịdi eḍighi bọ ọge ni mọ, ‘Kạ́kaaph ịkaraph ịlo oye dị rạtooghi kaphogh we phọ ạna.’”
6 Ạ Pọl rolhegheri mọ buniin pạ phọ oḍighi bụo ạ Sạdusi kụ buniin oḍighi bụo ạ Fạrisi, kụ ạghaaph r’ẹḍogh dị ẹghi ạnyu sịphe ạ Sạnhẹdrin phọ mọ: “We phọ, bumor phọ, mị ọnyo ạ Fạrisi r’ọony ạbuo ạ Fạrisi. Kụ ọtuan ịduon mị amheeraam bọ mọ oḅetenhu esi aḍuugh odi ni kụ rọwa bọ osophonhaan ạmhi ọoruen.” 7 Kụ ịphen ọdi ạghaaph bọ iḍighi ni ịdi ịgbaragbara esoor igbo ạbuo ạ Fạrisi phọ rạ Sạdusi phọ, kụ amadia amite sịphe bịdi ookpomhoghan bọ. 8 Ịdi eḍighi bọ ạbuo ạ Sạdusi phọ úmeeraam mọ oḅetenhu esi aḍuugh r’ạruukpaany r’aruwaloor edi ghan ni, kụolo ạbuo ạ Fạrisi phọ omeeraam ni oomo ịphen phọ. 9 Kụ oboom ọruonhu asoor, kụ buniin ạbutughemhia Olhogh phọ dị odi ẹku ạbuo ạ Fạrisi phọ ọmheregha kụ omhiigh ọgbakian, kụ ọghaaph ghan r’ịghagh ilhoghi mọ: “Yoor ụ́miin olhogh dị oye phọ ọphon phọ asoor, kụolo eḍighi mạar dị uwaloor ọbobo ọokpaany ạḅaanhaan nyọdi—.” 10 Mem mọ ịgbaragbara phọ ẹbugh bọ, oḍiemhiom ạbuo ẹgham mọ aghiilhaan mọ bịdi kọpanyi Pọl kụ ạto ạḅenhi bụo ẹgham mọ mọ ọghi oogborion ọsighe nyọdi sịphe igbo ạbidi ọpham orumhom ẹpe amarugh ạbuo ẹgham mọ.
11 Kụolo ḍughul aḍio phọ ạḍiphe phọ Uwo Ẹmhoogh phọ amitenhaan ni nyọdi kụ ạḅem mọ: “Kpọ oḅio! Loor esi dị ịduon nạ mạkuamhi bọ ạghaaph ịlo ạmhi ẹphen Jeruselem kụ ịdi nạ kạtuugh aḍighi aani ẹpe Rom.”
12 Rẹḅaal, kụ ạbuo a Ju phọ oḅian ọḅilhe oghunya mọ bụno kóle ịyaar ḅịlhe kọ́pughol ịyaar tụtu bụno oghiigh Pọl. 13 Kụ alhephiri ạnmuny dị opel li 40 kụ ughunya bọ oḍighi ịphen phọ. 14 Awe phọ ạbuen phọ ụghi ọteeny ruwo ẹmhu ạbupinyon rịkia phọ r’ikumor awe phọ ọḅenhi mọ: “Yoor moghunya mọ yoor kóle r’ịyaar tụtu yoor oghiigh Pọl. 15 Esi ịduon phọ, nyinha r’awe ạ Sạnhẹdrin phọ ịḅenhi oḍiemhiom ạbuo ẹgham mọ mọ ọdi ạsighe Pọl iruom inyinha, mọ nyinha rẹwa opuru ọdi ịnhon asipuru. Kụolo yoor kookolhobian oghiigh ọdi eten.”
16 Tọrobo ịpe ẹrol bọ, ọony umaranhi ạ Pọl ạnhaghan ni mọ bịdi oḅian ọḅonha esi okori ạ Pọl, kụ aḍigh ẹpe amarugh ạbuo ẹgham mọ ạghaaph ạḅenhi Pọl. 17 Kụ ạ Pọl ạmhagh oniin uwo ẹmhu ạbuo ẹgham mọ ạḅenhi mọ: “Sịghe ọnyo ugheel ọony phọ ọphon phọ ạghiom oḍiemhiom ạbuo ẹgham mọ, ạmoogh ịyaar ọḅenhi ọdi.” 18 Kụ ọdi ạsighe nyọdi ạghiom oḍiemhiom ạbuo ẹgham mọ kụ ạḅenhi mọ: “Ạ Pọl ọnyo ikoli phọ kụ ụmhagh ịmhi ạḅem mọ mị ụsighe ọnyo ugheel ọony phọ ọphon phọ uruom nyịnha, mọ ạmoogh ịyaar ọḅenhi ạna.” 19 Kụ oḍiemhiom ạbuo ẹgham mọ ạpham ḍịghaagh ọony phọ atenhom ọgbal kụ apuru mọ: “Eeghe kụ ẹdi nạ ạmhoogh bọ ọḅenhi ạmhi?” 20 Kụ ọdi ạḅem mọ: “ạbuo a Ju phọ moopuruan ọlhom ạna mọ sịghe Pọl ạghimhom ẹpe ạ Sạnhẹdrin phọ iḍue, mụdi bịdi rọwa ọnhaghan ọbughe ịlo aḍighiton phọ ọdi. 21 Kụolo káḍighi ịpe bịdi kọḅenhi bọ nyịnha, ịdi eḍighi bọ alhephiri ạnmuny dị opel li 40 igbo ạbidi ọḅonha ni rokori ghan Pọl, kụ moghunya mọ bụno kóle ịyaar ḅịlhe kọ́pughol ịyaar tụtu bụno oghiigh nyọdi, kụ bịdi ọnya ni rokori dị nạ kameera.” 22 Kụ oḍiemhiom ạbuo ẹgham mọ ạto ạḅenhi ọnyo ugheel ọony phọ mọ: “Kạ́ḅenhi oye mọ nạ mụḅenhi ịmhi ịphen phọ.” Kụ amheera mọ ọdi agheel.
23 Kụ ọdi ạmhagh ịyal aruwo ẹmhu ạbuo ẹgham ạḅenhi mọ: “Iikolhobian 200 ạbuo ẹgham dị kotelhe owol, ra 70 ạbudi koḍiku rụsu, rạ 200 ạbudi rotoph ghan ịsoph, dị kọki Sịsạriạ omhunhenhiom ịraar ạwa* phọ ḍughul. 24 Imiteom kẹn rụsu dị ạ Pọl kaḍigh, kụ ẹsighe nyọdi kọkol ẹghiom Filiks opoghom mọ.” 25 Kụ ọdi ạge ḍịnya ạḅem mọ:
26 “Mị ạ Klọdiọs Lisiạs kụ ụge raruom nyịnha Ogbogh Opoghom mọ Filiks: Mị rạmagh ni o! 27 Ạbuo a Ju phọ usiph oye phọ ọphon phọ rọwa oghiigh, kụ mị akem ạpham bụo ẹgham mọ ạmhi ạghi ạphel nyọdi, loor esi dị mị ụnhaghan mọ ọdi ọlo a Rom. 28 Kụ loor ịduon mị ạwa bọ olhegheri olhogh phọ bịdi ọḅem bọ mọ ọdi asoor, mị ụsighe nyọdi ạghimhom ẹpe ạ Sạnhẹdrin phọ ạbidi. 29 Kụ mị ạwaaghi bọ mị ụmhiin mọ ạraraar phọ bịdi rọkaaph bọ ịlo ọdi egbolhomaam Olhogh ạbidi, kạ́raraar dị ẹkpe ọtuan oghiigh ọdi ọbobo ọlhogh ikoli. 30 Kụolo mị maru alegheri ịlo oḅian dị bịdi ọmhoogh oghiigh oye phọ ọphon phọ, pọ kụ ịyaar phọ mị aagborion bọ ạsighe nyọdi raruom nyịnha ạḅilhe bọ ạto ạḅenhi bụphe r’ọdi rọokonhoghian bọ mọ bịdi oru ghisigh ạna ọghaaph ịyaar phọ ọdi aḍighi bọ.”
31 Kụ ạbuo ẹgham mọ ạbuen phọ ọsighe Pọl ḍughul phọ ạḍiphe phọ ọghimhom Ạntipạtris, ọdaphan ịto phọ ọngo bọ bịdi. 32 Rẹteeny ḍio phọ etum bọ pạ, kụ ạbuo ẹgham mọ oḍiku bọ rụsu phọ ọdaph nyọdi, kụ ạbueripho oḅula ẹpe amarugh ạbuo ẹgham mọ. 33 Ạbuo ẹgham mọ rokiilhom ghan bọ rụsu phọ rosi Sịsạriạ kụ ọngo opoghom mọ ḍịnya phọ ọḅilhe ọḅogh Pọl ọngo nyọdi. 34 Ọdi rạal ḍịnya phọ kụ apuru Pọl mọ: “Nạ ọlo ẹghen ekool?” Kụ ạ Pọl ạḅenhi nyọdi mọ ọdi ọlo a Silisia. 35 Kụ ọdi ạḅenhi Pọl mọ: “Mị kaler ri rụru ạngo nyịnha mem dị bụphe r’ạna rẹekonhoghian bọ osi.” Kụ ọdi ạto mọ ọpham nyọdi ọghimhom ẹpe ogiga phọ ạ Hẹrọd kụ ọmhaar okori esi phọ.