Iiḍighi Abutelhedom Mọ
26 Kụ Ạgrịpạ ạḅenhi Pọl mọ: “Mọngo nyịnha eepoogh ọghaaph aani ịyaar ọphelhaam ẹmhu ạna.” Kụ ạ Pọl aselhe ḍịghaagh ọdi amhiigh ọghaaph mọ:
2 “Uwo Ẹmha phọ Ạgrịpạ, olhoghi ạmhi ạḅaal li ịduon mị ạmheera bọ ghisigh ạna rodon ọghaaph ịlo ọphelhaam ẹmhu ạmhi ịdi egbolhomaam oomo ịpe ạbuo a Ju phọ ọgba bọ ọḅam ẹmhu ạmhi, 3 ẹkar nụun ẹkpaariom ịduon nạ alhegheri bọ ni agey oomo eḍighinhom ịyaar ạbuo a Ju phọ r’ạraraar dị bịdi rọtuan ghan kọogbaghanhaan. Esi ịduon phọ, mị rạlom ni mọ kpạram ni ạnhaghan ịpe mị kạkaaph bọ.
4 “Ịdi egbolhomaam dọl phọ mị ạrol ghan bọ k’ẹghoroghor ạmhi igbo awe* phọ ạmhi r’ẹpe Jeruselem, oomo ạbuo a Ju phọ 5 ulhegheri bọ ịmhi igbaany olegheri ni mọ mị uḍighi ghan ọnyo ạ Fạrisi, ẹku dị reeko ghan tọrobo ạpakiri olhogh ẹku ịiḅereghi phọ ayoor. Kụ eru mạar dị bịdi komeera ni pọ kọḅenhi ni nyịnha mọ ịphen phọ ịne ni. 6 Kụolo nyịidipho rọwa osophonhaan ạmhi ọoruen loor ịduon mị amheeraam bọ oguan phọ Ẹnhaan aguan bọ bụrude ạburude phọ ayoor; 7 kụ oniin phọ oguan phọ ọphon kụ ẹdi a 12 arughunhughun phọ ayoor rogon ọmhiin dị kamunughan ịduon bịdi rokumuan bọ rukumuan iigbia kọngo Ẹnhaan r’oomo ekpom ḍịroor r’adulhe. Uwo Ẹmha, ạbuo a Ju phọ ọtuan ịduon mị amheeraam bọ ịphen phọ kụ ọḅem bọ mọ mị asoor olhogh.
8 “Uḍighi ika kụ ịkparanhaan bọ inyinha omheeraam mọ Ẹnhaan katue ni aḅerion bụphe momhuughu bọ? 9 Mị r’aloor bịn umheeraam ni akuphom owol mọ ẹkpe ni dị mị kaḍighi oomo ịdi mị katue osophoghom aḍien phọ a Jizọs ọpo ạ Nạzạrẹt phọ. 10 Kụ ịpe kụ ịdi mị ạtuugh ni aḍighi ẹpe Jeruselem, mị ụlhogh ni ịbadi awe phọ Ẹnhaan ikoli, ịdi eḍighi bọ aruwo ẹmhu ạbupinyon rịkia phọ ụngo ni ịmhi ịikpo oḍighi ịphen phọ; kụ mem dị rọwa ọze awe phọ Ẹnhaan, mị umheeraam aani ghan ni mọ ọze bịdi. 11 Mị ụkpaariom ghan ni bịdi mọ ọpharanhaan omheeraam mọ ạbidi, esi ọghi ghan obughotu atum obughotu ọgbiphoghom ạbidi; kụ loor esi oboom ọghagh olhoghi phọ mị ạmhoogh bọ ạghi esi ạbidi, mị ụghi ghan ni kẹn ịnhon ạramha ạgbiphoghom bịdi.
12 “Eniin amem mị ụtuan ni ịduon phọ anyeenhe Dạmạskọs r’ịikpo phọ aruwo ẹmhu ạbupinyon rịkia phọ ụngo bọ ịmhi. 13 Mị odi ni ẹpe eten phọ ogbo ootaany, Uwo Ẹmha, kụ mị ạmhiin ḍịḅaal dị epu ḍịḅaal erumhuḍio phọ dị ẹḅua ẹpe k’ạke isoorom ịmhi r’ạbuphe rụdaph bọ ịmhi. 14 Yoor romhelheghu ude kụ mị ạnhaghan ẹḍogh dị ịḅenhi ịmhi ọnhu a Hibru mọ: ‘Sọl, Sọl, uḍighi ika kụ nạ rụgbiphoghom bọ ịmhi? Nạ kaḍighima ịyaar loor ịduon nạ reenhan bọ ịmhi.’* 15 Kụ mị apuru mọ: ‘Uwo Ẹmhoogh, nạ ạnhian?’ Kụ Uwo Ẹmhoogh phọ ạḅem mọ: ‘Mị a Jizọs, ọpo nạ rạgbiphoghom bọ. 16 Kụolo ḅetenhu ạmheera. Mị ụtuan dị nạ kaḍighi ẹbenhe ạmhi ạḅilhe ạkaaph ịlo ạraraar phọ nạ mạmhiin bọ r’ạraraar dị mị kaḍeenhaan nyịnha dị igbolhomaam ịmhi kụ amitenhaan bọ nyịnha. 17 Kụ mị kạphel li nyịnha ạsighe ḍịghaagh awe phọ ạbuen phọ r’ạḍighaagh awe areelhe phọ mị rarom bọ nyịnha ọghi 18 ọḅarion ariḍien phọ r’ọsighe esi ufiri ọlhogh esi ạḍiḅaal, r’ọphel ạbidi ọsighe esi ịikpo phọ a Setạn kụ ọḅogh ạbidi ọngo Ẹnhaan, pịdi bịdi ọmoogh ọsar ọwilhenhaan ịkaraph ọḅilhe ole erua igbo ạbuphe mọḅaalhamhi bọ loor esi omheeraam mọ ọmhoogh bọ oru esi ạmhi.’
19 “Esi ịduon phọ, Uwo Ẹmha phọ Ạgrịpạ, mị ụ́ḅaar ẹmhu mem mọ mị ạmhiin bọ uḍien phọ ạḅua bọ ẹpe k’ạke aru, 20 mị umhiighom ghụn ẹpe Dạmạskọs ạḅilhe ạghi ẹpe Jeruselem, r’oomo ạramha phọ edi bọ eelhe phọ a Judia, ạḅilhe ạghi ạteeny bụo areelhe phọ, ạḅenhi ghan we mọ bịdi okiton ọḅilhe ooghiraan osoman Ẹnhaan, kụ oḍighi ghan rạraar dị eḍeenhaan mọ bịdi mokiton. 21 Pọ kụ ịyaar phọ ạbuo a Ju phọ usiph bọ ịmhi ẹpe otu ịiḅereghi phọ kụ ọwa bọ oghiigh ạmhi. 22 Kụolo loor ịduon Ẹnhaan mụlhoghonhaan bọ ịmhi ḍịghaagh, k’arodon mị ạkiom ni ghisigh ragbeelhom ghan dom mọ Ẹnhaan kạḅenhi bụbam r’abugbogh, kụ mị rạ́kaaph ghan ẹnhon ịyaar emuton ịpe ịge Ariil phọ rạ Ịge phọ a Mozis ẹḅem bọ mọ kemite, 23 mọ ạ Krạịst phọ kạmiinhom ni ḅịlhe mọ loor ịduon ọdi kụ kaḍighi bọ ọḅel dị koḅeton esi aḍuugh, ọdi kagbeelhom ḍịḅaal ạḅenhi we phọ ạbuen phọ r’ạbuo areelhe phọ.”
24 Ạ Pọl odi ni rạkaaph ịphen phọ ọphelhaam ẹmhu ọdi, kụ ạ Fẹstọs ạḅem r’ẹḍogh dị ẹghi ạnyu mọ: “Ịyaar memhiigh rẹeḅaghamhi ẹmhu ạna Pọl! Iboom ịtuugha rẹwalhawalhamhi ẹmhu ạna!” 25 Kụolo ạ Pọl ạḅem mọ: “Ịyaar ẹmhu ạmhi ị́iḅaghamhi, Ogbogh Opoghom mọ Fẹstọs, ịphen mị rạkaaph bọ ịne ni, kị́walhawalha ạraraar. 26 Ọkar agey, uwo ẹmha phọ mị rạḅenhi bọ oomo phọ ịphen phọ alegheri ni ịlo ạraraar phọ ịphen phọ; mị ameeraam ni akuphom owol mọ r’eniin ịphen phọ dị ọdi kọ̋nhaghan ghan ílo, loor esi dị úḍighi ịphen phọ esi ịbooghian. 27 Uwo Ẹmha phọ Ạgrịpạ, nạ ameeraam ni ịge Ariil phọ ḍụghum? Mị alegheri ni mọ nạ ameeraam ni.” 28 Kụolo Ạgrịpạ ạḅenhi Pọl mọ: “Esi ekulha amem nạ kukiton ni ịmhi aḍighi ọnyo ạ Krịstẹn.” 29 Kụ ạ Pọl ạḅem mọ: “Ịyaar dị mị rạlom Ẹnhaan pọ, mụghumo esi ekulha amem ọbobo esi ẹedoony amem, nạ r’oomo ạbuen rọnaghan bọ ịphen mị rạkaaph bọ rodon phọ, oḍighi aani Krịstẹn ịduon ạmhi, kụolo mị ụ́wa mọ ịkasaghiom aani inyinha izime.”
30 Kụ uwo ẹmha phọ aḅetenhu, kụ opoghom mọ rạ Bẹnis r’awe phọ ọrol bọ r’ạbidi oḅerenhu aani. 31 Ịduon bịdi rọḍua bọ kụ oniin ạḅenhi ghan nyoniin mọ: “Oye phọ ọphon phọ óḍighi ịyaar dị ẹkpe ọtuan oghiigh ọbobo ọlhogh ikoli.” 32 Kụ Ạgrịpạ ạḅenhi Fẹstọs mọ: “Yira mutue ni oseere oye phọ ọphon phọ mọ ọdi mụ́lom bọ mọ ọsighe ḍighiton phọ ọdi ọghiom Siza.”